ꓟꓲ ꓠꓯ ꓡꓽ ꓞꓳ ꓞꓳ ꓙꓳ ꓠꓼ ꓟ ꓐꓰ ꓠꓸꓹ ꓫꓵꓽ

ꓚꓳꓦꓲꓓ 19 ꓐꓰ ꓡꓽ ꓞꓳ ꓞꓳ ꓙꓳ ꓚꓱꓼ

ꓣꓳꓽ ꓐꓴ ꓠꓬ ꓪꓴ-ꓢ ꓬꓲꓸ ꓒꓴꓸꓹ ꓶꓽ ꓫꓸꓹ ꓢꓴ ꓥꓸˍꓟ ꓪꓴꓸ ꓠꓬꓲ ꓬꓲꓸ ꓔꓯ ꓒꓵꓸꓹ ꓛꓳ ꓠ ꓗˍ ꓡꓳ=

ꓡꓳꓸꓹ ꓬꓰ ꓟ ꓠꓸꓹ ꓢ ꓠꓬꓲ ꓜꓲꓼ ꓛꓲ ꓡ ꓢꓴ ꓔꓯ ꓟꓸ ꓖꓶꓽ ꓔꓸ ꓟ “ꓟꓲ ꓠꓯ ꓕꓱ ꓟ ꓔꓯ ꓝꓮꓲ ꓫꓯꓼ ꓔꓱꓼ ꓡꓯ-ꓸ” ꓐꓯˍ ꓟ ꓬꓲꓸ ꓝꓲꓹ ꓔꓯ ꓝꓮꓲ ꓟꓸ ꓖꓶꓽˍ ꓡꓳ=

ꓕꓱ ꓟ ꓠꓬ ꓢꓲ-ꓒ ꓬꓰ-ꓢꓴ ꓗꓪ ꓐꓰ ꓡꓹˍ ꓟ ꓥꓳꓸꓹ ꓡꓳ ꓓꓴ ꓡꓯꓼ ꓫꓴ ꓔꓯ ꓘꓴ ꓣꓳ ꓠꓼˍꓟ-ꓸ ꓟꓬꓽ ꓠꓬꓲ ꓠꓸꓹ ꓫꓵꓽ ꓓꓽ ꓕꓱ ꓟ ꓦꓬꓼ ꓠꓬꓲ  ꓝꓲꓸ ꓗꓪ ꓥꓳ ꓡꓳꓸ ꓓꓴ ꓔꓯ ꓘꓴ ꓣꓴ ꓐ ꓡꓰ ꓝꓲ-ꓸ ꓞꓳ-ꓤ ꓟꓬꓽ ꓠꓬꓲ ꓠꓬ ꓫꓸ ꓙꓵꓽ ꓓꓴ ꓔꓳꓼ ꓜꓳꓽ ꓔꓬ ꓕꓯꓽ ꓥꓳ ꓡꓳꓸ ꓓꓴ ꓕꓱꓽ ꓟ ꓠꓬ ꓟꓶꓽ ꓡꓰꓳ=

ꓣꓳꓽ ꓐꓴ ꓬꓲꓸ ꓟꓶꓽ ꓦꓬꓼ ꓠꓬꓲ ꓗꓪ ꓛꓲ ꓡꓳꓸ ꓙ ꓔꓳꓼ ꓙ ꓢꓴ ꓠꓬ ꓢꓲ-ꓒ ꓬꓰ-ꓢꓴ ꓥ ꓡꓳ=

ꓠꓸꓹ ꓫꓵꓽ ꓐꓰ ꓞꓳꓸꓹ ꓙꓳ ꓚꓱꓼ-ꓸ

ꓟꓲ ꓠꓯ ꓡꓽ ꓞꓳ ꓞꓳꓸꓹ ꓙꓳ ꓚꓱꓼ ꓗꓪ ꓠꓬ ꓕꓲ ꓠꓲꓹ ꓕꓲꓽ ꓪꓼ ꓟꓽ ꓗꓶ ꓡꓰˍꓟ ꓔꓯ ꓢꓷꓸ ꓡꓰ ꓝꓲ ꓢꓲ-ꓸ ꓖꓳ ꓟ ꓠꓬ ꓠꓸꓹ ꓫꓵꓽ ꓓꓽ ꓕꓱꓽ ꓟ ꓔꓯ ꓪ ꓜꓲ ꓔꓳꓼˍ ꓜꓳꓽ ꓝꓲ ꓔꓬ ꓡꓳ-ꓸ ꓤ ꓠꓱꓽ ꓤ ꓐꓴ ꓕꓲꓽ ꓐꓱ ꓠꓬ ꓢꓷꓸ ꓠꓲꓹ ꓢꓳ ꓙꓵꓸꓹ ꓗꓪ ꓢꓷꓸ ꓠꓲꓹ ꓢꓳ ꓟ ꓐ ꓡ-ꓸ ꓕꓲꓽ ꓐꓱ ꓠꓬ ꓢꓷꓸ ꓠꓲꓹ ꓔꓯ ꓠꓲꓹ ꓟ ꓢ ꓢꓼ ꓐꓰ ꓢꓳ ꓣꓴ ꓟꓶ ꓔꓬ ꓡꓳ-ꓸ ꓖꓳ ꓟ ꓡꓰꓽ ꓐꓰ ꓬꓰ ꓜꓽ ꓬꓰ ꓓꓳ ꓚꓱꓼ ꓗꓪ ꓥˍ ꓟꓲ ꓕꓲꓽ ꓐꓱ ꓠꓬ ꓟꓬꓱꓽ ꓬꓰ ꓟꓽ ꓪ ꓗꓷ ꓡꓰˍꓟꓲ -ꓸ ꓕꓲꓽ ꓐꓱ ꓠꓬ ꓚꓲꓸ ꓛꓬꓽ ꓦꓲ ꓗꓪ ꓐꓰ ꓬꓰ ꓠꓼ ꓟ ꓟꓬꓱꓽ ꓔꓯ ꓬꓰ ꓢꓲꓼ ꓧꓪ ꓜꓽ ꓧꓪ ꓓꓳ ꓔꓬ ꓡꓳ-ꓸ

ꓗꓴꓷꓼ ꓕꓲꓽ ꓐꓱ ꓠꓬ ꓠꓸꓹ ꓫꓵꓽ ꓓꓽ ꓔꓯꓼ ꓓ ꓔꓳꓹ ꓠꓼˍꓟ ꓒꓴꓸꓹꓫꓵ ꓬꓰ ꓙ ꓟꓽ ꓐ ꓔꓬ ꓥˍ ꓟꓲ-ꓸ ꓗꓴꓷꓼ ꓕꓲꓽ ꓐꓱ ꓠꓬ ꓔꓳꓼ ꓙ ꓢꓲ ꓬꓰ ꓔꓬ ꓡꓳ= ꓕꓱ ꓡꓰ ꓐꓰ ꓟꓽ ꓫꓱꓼ ꓡꓰˍꓟ ꓠꓬ ꓞꓳ ꓙꓳ ꓚꓱꓼ ꓗꓪ  ꓫꓸ ꓙꓵ ꓟꓶꓽ ꓙꓵ ꓓꓴ ꓮꓽ ꓟꓬ ꓔꓳꓼ ꓜꓳ ꓝꓲˍ ꓡꓳ= ꓠꓸꓹ ꓫꓵꓽ ꓖꓳ ꓟ ꓠꓬ ꓟꓽ ꓫꓱꓼ ꓔꓸ ꓟ ꓞꓳ ꓙꓳ ꓓꓴ ꓗꓪ ꓐꓰ ꓪ ꓜꓲ ꓟꓬꓽ ꓡ ꓔꓬ ꓡꓳ= ꓞꓳ ꓙꓳ ꓚꓱꓼꓟꓽ ꓪꓽ ꓡꓰˍ ꓠꓬ ꓡꓽ ꓞꓳ ꓕꓲꓽ ꓣꓳ ꓐꓰ ꓕꓲꓽ ꓣꓳ-ꓸꓕꓲꓼ ꓜꓴ ꓐꓰ ꓕꓲꓽ ꓜꓴ ꓟꓽ ꓒꓵꓽ ꓟꓽ ꓛꓳ ꓗꓶꓽ ꓡꓰˍ ꓥꓳ=

ꓠꓬꓲꓹ ꓠꓬꓲ ꓞꓳ-ꓐꓳ ꓐꓴ ꓠꓬ ꓟꓲ ꓠꓯ ꓗꓪ ꓔꓬˍꓟ ꓞꓳ ꓤ ꓮꓽ ꓙꓵꓽ ꓢꓴ ꓪ ꓒꓵˍꓟ ꓒꓴ ꓫꓵꓸꓹ ꓔꓯ ꓬꓲꓸ ꓪꓽ ꓣꓱꓽ ꓔꓬ ꓡꓳ=

ꓚꓰꓼ ꓔꓸ ꓟ ꓟꓬꓱꓽ ꓔꓯ ꓡꓳꓸ ꓠꓬꓲ-ꓸ

ꓣꓱꓽ ꓬꓯꓼˍꓟ ꓚꓱ ꓟꓽ ꓙꓳ ꓥˍ ꓟꓲ-ꓸ ꓠꓯꓸ ꓦꓯꓹ ꓙꓵꓽ ꓟ ꓠꓲꓹ ꓟ ꓗꓪ ꓐꓰ ꓠꓴ ꓶꓽ ꓒꓬꓱꓼ ꓡ ꓗꓪ ꓛꓲ ꓢꓯꓼ ꓕꓵꓼ ꓢꓲ-ꓸ ꓠꓴ ꓬꓲꓼ ꓠꓴ ꓠꓬꓲ-ꓸ ꓚꓰꓼ ꓔꓸ ꓟ ꓖꓴꓽ ꓙꓴ ꓐꓰ ꓪꓴ-ꓢ  ꓔꓯꓸ ꓥˍ ꓟꓲ ꓠꓴ ꓠꓯꓼˍ ꓗꓪ ꓣꓱꓽ ꓞꓳꓼ ꓪ ꓗꓪ ꓛꓲ ꓢꓯꓼ ꓔꓵꓼ ꓔꓬ ꓐꓭ ꓠꓬ ꓖꓳ ꓟ ꓠꓬ ꓚꓰꓼ ꓢꓴ ꓢꓲ-ꓒ ꓠꓲꓹ ꓡꓶꓽ ꓔꓯ ꓓꓽ ꓔꓳꓹ ꓗꓷˍ ꓟ ꓥˍ ꓠꓬꓲ ꓪꓴ ꓢ ꓟꓽ ꓠꓲꓹ ꓫꓵꓽ-ꓸ ꓚꓰꓼ ꓢꓴ ꓢꓲ-ꓒ ꓠꓬ ꓟꓲ ꓠꓯ ꓡꓽ ꓞꓳ ꓮꓽ ꓙꓵꓽ ꓢꓴ ꓐꓱ ꓶꓽ ꓡꓯꓼ ꓙꓱ ꓖꓶꓽ ꓔꓸ ꓟ ꓡꓯꓼ ꓫꓴ ꓥ ꓡꓳ-ꓸ ꓖꓳ ꓟ ꓪꓴꓸ ꓠꓬꓲ ꓡꓽ ꓞꓳ ꓮꓽ ꓙꓵꓽ ꓕꓱ ꓟ ꓔꓯ ꓣ ꓟꓳ ꓢꓲ ꓫꓯꓹ ꓑꓱ ꓠ ꓗꓸꓹ ꓡꓳ-ꓸ ꓫꓯꓸꓹ ꓑꓳˍ ꓟ ꓚꓱꓼ ꓗꓪ ꓥˍ ꓟꓲ-ꓸ ꓟꓲ ꓠꓯ ꓞꓳ ꓤ ꓠꓲꓹ ꓡꓶꓽ ꓟꓽ ꓥꓼ ꓚꓰꓼ ꓢꓴ ꓢꓲ-ꓒ ꓠꓲꓹ ꓡꓶꓽ ꓔꓯˍ ꓟꓲ ꓛꓳꓽ ꓠ ꓗ ꓡꓳ= ꓕꓲꓽ ꓣꓳ ꓕꓲꓽ ꓜꓴ ꓐꓱ ꓶˍ ꓡꓰ ꓟꓽ ꓥ-ꓸ ꓡꓽ ꓞꓳ ꓮꓽ ꓙꓵꓽ ꓢꓴ ꓐꓱ ꓒꓬꓱꓽ ꓠ ꓗꓼˍ ꓡꓳ=

Add new comment

17 + 2 =