ꓢꓲꓹ ꓜꓲ꓾ ꓙꓱ ꓤ꓾ ꓢꓯꓸ ꓫꓵ ꓢꓯꓸ ꓙꓰ ꓔꓯ ꓫꓱꓸ ꓤ ꓗꓴꓸ ꓠꓹ ꓟ ꓢꓯꓼ ꓕꓵꓼ ꓡꓯ꓾

“ꓬꓲꓻ ꓙꓬ ꓠꓯꓼ ꓗꓪ ꓢꓯꓸ ꓫꓵ ꓢꓯꓸ ꓙꓰ ꓢ ꓫꓬꓹ ꓟꓽ ꓞꓲ ꓙꓳ ꓢꓲ ꓠꓬꓲ ꓬꓲ ꓟꓬꓱꓺ ꓟꓽ ꓢꓷꓸ ꓫꓵ ꓧꓪ ꓟꓽ ꓟꓶ ꓫꓵ ꓬꓲ ꓫꓵ ꓬꓲ ꓙꓰ ꓠꓬꓲꓽ ꓫꓬꓹ ꓟꓽ ꓞꓲ ꓙꓳ_ ꓢꓰ ꓡꓳ꓾” ꓐꓰ ꓢꓷꓸ ꓠꓲꓹ ꓙꓳ ꓒꓽ ꓐꓴ ꓡꓰ ꓐꓯ ꓔ ꓡꓳ= ꓖꓳ ꓡꓱ ꓠꓬꓲ ꓟꓵꓽ ꓪꓴ ꓗꓪ ꓔꓬ ꓟ ꓙꓱ ꓤ ꓙꓱ ꓟꓲ ꓡꓰ ꓟꓽ ꓞꓲ ꓬꓲꓻ ꓙꓬ ꓘꓴꓽ ꓠꓯꓼ ꓗꓪ ꓔꓬ ꓟ ꓥꓪꓸ ꓫꓵ ꓥꓪꓸ ꓙꓰ ꓢꓯꓸ ꓫꓵ ꓢꓯꓸ ꓙꓰ ꓠꓬ ꓕꓱ ꓟꓬ ꓗꓪ ꓛꓲ ꓙꓳ_ ꓟ ꓠꓬ ꓓꓵꓽ ꓙ ꓟꓶ ꓓꓴ ꓟꓽ ꓥ ꓡ꓾ ꓪꓴ-ꓢ ꓡꓰ ꓚꓰꓼ ꓔ ꓟ ꓞꓳ ꓤ ꓐꓱ ꓶ ꓐꓰ ꓝꓮꓲ ꓟꓲ ꓠꓯ ꓕꓱ ꓟ ꓗꓪ ꓐꓲ ꓓꓴ ꓟꓲ ꓠꓯ ꓕꓱ ꓟ ꓔꓯ ꓣꓱꓽ ꓙ ꓓꓴ ꓔꓳꓹ ꓙ ꓓꓴ ꓬꓲ ꓡꓰ ꓚꓰꓼ ꓔ ꓟ ꓥ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓠꓲꓹ ꓟ ꓫꓸ ꓓꓴ ꓠꓬ ꓮ ꓫꓵ ꓥ ꓐꓯ ꓠꓬ ꓣꓳ ꓟꓲ ꓠꓯ ꓞꓳ ꓤ ꓠꓬ ꓬꓲ ꓕꓯ ꓢꓲ ꓗꓪ ꓙꓳ_ ꓟ ꓟꓲ ꓠꓯ ꓗꓪ ꓔꓬ ꓟ ꓢꓯꓸ ꓫꓵ ꓢꓯꓸ ꓙꓰ ꓔꓯ ꓡꓰ ꓟꓽ ꓞꓲ ꓬꓲꓻ ꓙꓬ ꓘꓴ ꓗꓪ ꓔꓬ ꓟ ꓢꓯꓸ ꓫꓵ ꓢꓯꓸ ꓙꓰ ꓔꓯ ꓥ ꓟꓲ ꓬꓲ ꓚꓴ ꓞꓷꓹ ꓗꓷ ꓠ ꓬꓰ ꓫꓵ ꓮ ꓟꓬꓹ ꓙꓳ_ ꓡꓳ= ꓑꓳꓺ ꓐꓶ ꓢꓲ ꓠꓬꓲ ꓥꓪꓸ ꓧꓪ ꓢꓴ꓾ ꓓꓳꓼ ꓠꓸ ꓢꓲ ꓧꓪ ꓢꓴ ꓧꓪ ꓕꓱ ꓟ ꓡꓰ ꓟꓽ ꓞꓲ ꓚꓴ ꓞꓷꓹ ꓗꓷ ꓠ ꓗꓪ ꓛꓲ ꓕꓲ ꓫꓵ ꓡꓲ ꓕꓲ ꓫꓵ ꓧꓪ ꓜ ꓧꓪ ꓓꓳ_ ꓟ ꓕꓱ ꓟ ꓠꓬ ꓪꓴ-ꓢ ꓡꓰ ꓚꓰꓼ ꓔ ꓟ ꓬꓲ ꓔꓶꓻ ꓙꓱꓼ ꓐꓰ ꓙꓰ ꓔꓬ ꓫꓵ ꓟꓽ ꓥ꓾ ꓡꓳ ꓒꓱ ꓗꓪ ꓐꓲꓽ ꓡꓰ ꓠꓹ ꓟ ꓠꓯ ꓡꓰ ꓠꓹ ꓟ ꓜ ꓫꓵ ꓬꓲ ꓫꓵ ꓬꓲ ꓙꓰ ꓘꓳꓸ ꓧꓳ_ ꓟ ꓣꓳ ꓣꓱꓽ ꓫꓵ ꓣꓱ ꓙꓰ ꓛꓵ ꓡꓰ ꓟꓽ ꓓ ꓟ ꓑꓡꓮꓢꓔꓲꓚ ꓕꓱ ꓡꓱ ꓫꓵ ꓬꓲꓻ ꓙꓬ ꓘꓴꓽ ꓗꓪ ꓡꓳ ꓧꓳ_ ꓟ ꓗꓪ ꓐꓰ ꓬꓲꓻ ꓙꓬ ꓕꓱ ꓟ ꓠꓬ ꓠꓶꓺ ꓡ ꓢꓲ ꓠꓬꓲ ꓬꓲ ꓙꓬ ꓘꓴꓽ ꓗꓪ ꓔꓬ ꓟ ꓢꓯꓸ ꓫꓵ ꓢꓯꓸ ꓙꓰ ꓠꓬ ꓮ ꓞ ꓞ ꓫꓵꓻ ꓙꓰ ꓔꓬ ꓡꓳ= ꓬꓲ ꓚꓴ ꓞꓷꓹ ꓓꓴ ꓗꓷ ꓡꓰꓳ꓾ ꓠꓲꓹ ꓟ ꓫꓸ ꓓꓴ ꓟꓽ ꓥ ꓡ꓾

ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓬꓲꓻ ꓙꓬ ꓘꓴ ꓠꓯꓼ ꓗꓪ ꓔꓬ ꓟ ꓢꓯꓸ/ ꓫꓵ ꓢꓯꓸ ꓙꓰ ꓖꓳ ꓟ ꓠꓬ ꓬꓲ ꓪ ꓜ ꓓꓴ ꓟꓽ ꓫ ꓕꓯ ꓬꓲ ꓪ ꓔꓬ ꓔꓶꓸ ꓟ ꓟꓽ ꓫꓬ ꓗꓷ ꓡꓰ ꓕꓯ ꓢꓯꓸ ꓫꓵ ꓢꓯꓸ ꓙꓰ ꓖꓳ ꓟ ꓔꓯ ꓜ ꓡꓰ ꓕꓯ ꓣꓳ ꓥ ꓟꓲ ꓓꓳꓼ ꓖꓳ ꓡꓰ ꓟ ꓔꓯ ꓣꓳ ꓡꓳꓸ ꓟꓳ_ ꓡꓳ= ꓟꓲ ꓠꓯ ꓞꓳ ꓤ ꓡꓰ ꓡꓳꓺ ꓦ ꓗꓷ ꓟ ꓙꓼ ꓶ ꓤ ꓑꓡꓮꓢꓔꓲꓚ ꓝꓮꓲ ꓛꓵ ꓡꓰ ꓟꓽ ꓓ ꓟ ꓐꓬ ꓡꓰ ꓟꓽ ꓓ ꓟ ꓕꓱ ꓡꓱ ꓫꓵ ꓡꓳ ꓧꓳ ꓗꓷ ꓟ ꓗꓪ ꓐꓰ ꓬꓲꓻ ꓙꓬ ꓘꓴꓽ ꓗꓪ ꓢꓯꓸ ꓫꓵ ꓢꓯꓸ ꓙꓰ ꓮ ꓟꓬꓹ ꓕꓱ ꓡꓱ ꓐꓰ ꓫꓵꓻ ꓔꓬ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓠꓴ ꓥꓪ ꓕꓱ ꓟ ꓔꓯ ꓮ ꓡꓰ ꓐꓰ ꓙ ꓜꓲꓼ ꓐ ꓡ ꓡ꓾ ꓣꓳ ꓚꓳ ꓡꓳ ꓚꓳ ꓫꓵ ꓗꓪ ꓙꓳ_ ꓟ ꓬꓲꓻ ꓙꓬ ꓕꓯ ꓒꓵ ꓗꓹ ꓬꓰ ꓟ ꓗꓪ ꓐꓰ ꓬꓲꓻ ꓙꓬ ꓘꓴꓽ ꓗꓪ ꓙꓳ_ ꓟ ꓥꓪꓸ ꓫꓵ ꓥꓪꓸ ꓙꓰ ꓔꓯ ꓒꓵ ꓗꓹ ꓚꓰ_ ꓟ ꓗꓪ ꓐꓰ ꓕꓱ ꓡꓱ ꓫꓵ ꓬꓲꓸ ꓚꓴ ꓞꓷꓹ ꓟ ꓚꓱꓹ ꓟꓽ ꓬꓰ ꓬꓰ ꓐꓰ ꓪꓴ-ꓢ ꓡꓰ ꓚꓰꓼ ꓔ ꓟ ꓚꓱꓹ ꓔꓯ ꓔꓱꓹ ꓔꓱꓹ ꓙꓳ ꓙꓳ ꓡꓰ ꓬꓰ ꓥꓳ ꓐꓯ ꓠꓬ ꓣꓳ ꓐꓱ ꓶ ꓙꓲ ꓖꓴ ꓙꓳ ꓥꓳ꓾ ꓕꓱ ꓟ ꓠꓬ ꓣꓳ ꓐꓱ ꓶ ꓡꓰ ꓥꓳ꓾ ꓝꓮꓲ ꓣꓳ ꓥ ꓟꓲ ꓪꓴ-ꓢ ꓣꓱ ꓛꓱ ꓟꓶ_ ꓥꓳ= ꓕꓱ ꓡꓱ ꓐꓰ ꓢꓯꓸ ꓫꓵ ꓢꓯꓸ ꓙꓰ ꓬꓲꓸ ꓫꓵ ꓬꓲ ꓙꓰ ꓔꓯ ꓬꓲꓸ ꓛꓴ ꓞꓷꓹ ꓠ ꓗꓪ ꓛꓲ ꓬꓰ_ ꓟ ꓠꓬ ꓝꓴꓲ ꓙꓳ ꓟ ꓥ ꓡꓳ꓾ ꓣꓳ ꓪꓴ-ꓢ ꓡꓰ ꓔꓶꓻ ꓔ ꓟ ꓔꓶꓻ ꓙꓱꓼ ꓗꓪ ꓐꓰ ꓗꓳꓸ ꓙꓰ ꓠꓬ ꓠꓲꓹ ꓫꓵ_ ꓟ ꓣꓳ ꓠꓲꓹ ꓡꓶꓽ ꓡꓰ ꓬꓰ ꓕꓯ ꓝꓴꓲ ꓙꓳ_ ꓡꓳ ꓐꓯ ꓟ ꓔꓯ ꓢꓷꓸ ꓔ ꓢꓲ ꓠꓬꓲ ꓕꓱ ꓡꓱ ꓢꓲꓹ ꓜꓲ ꓢꓲꓹ ꓪꓰ ꓙꓱ ꓤ ꓙꓱ ꓟꓲ ꓔꓯ ꓠꓲꓹ ꓟ ꓠ ꓗꓴꓸ ꓠꓹ ꓟ ꓫꓱꓸ ꓤ ꓗꓴꓸ ꓠꓹ ꓟ ꓠꓬ ꓢꓲ ꓒ ꓬꓰ-ꓢꓴ ꓗꓸ ꓠꓯꓸ ꓖꓼ ꓢꓴ ꓐꓴ ꓶꓻ ꓟꓲ ꓥ ꓡꓳ꓾ ꓐꓯ ꓟ ꓮ ꓙꓵ ꓢꓴ ꓙꓽ ꓜꓲꓼ ꓡꓯ=