ꓒꓲ- ꓕꓱ ꓙꓲ-ꓢꓴ ꓔꓯ ꓣꓷꓠ_ ꓟ

ꓟ-ꓕꓲ ꓕꓳꓽ ꓶ 16: 13-23

 ꓖꓳ ꓕꓯ ꓬꓰ-ꓢꓴ ꓠꓬ ꓢꓲ-ꓢ-ꓡꓰ ꓒꓲ-ꓡꓲ-ꓒꓲ ꓟꓵꓽ ꓗꓪ ꓛꓲ ꓡ ꓠꓬ꓾ ꓬꓲ ꓡꓰ ꓬꓲ ꓛꓳ ꓒꓯꓹ ꓐꓴ ꓔꓯ ꓠꓺ ꓠꓬꓲ ꓢꓲ꓾ ꓡ ꓞꓳ ꓮ ꓐꓲ ꓮꓽ ꓟ ꓥ ꓟ꓾ ꓡ ꓞꓳ ꓮ ꓡꓲ ꓐꓯ_ ꓡꓳꓺꓽ꓾ ꓐꓯ_ ꓡꓳ꓿ ꓬꓲ ꓪ ꓠꓬ꓾ ꓖꓳ ꓓꓱ ꓔꓲꓹ ꓖꓶ ꓢꓴ ꓬꓳ-ꓦ ꓥ ꓡꓳ꓾ ꓐꓯ ꓢꓴ ꓕꓲ ꓐꓱ ꓙꓳ_ ꓡꓳ꓿ ꓬꓲ-ꓡꓲ-ꓬ ꓥ ꓡꓳ꓾ ꓐꓯ ꓢꓴ_ ꓟꓲ ꓕꓲ ꓐꓱ ꓙꓳ_ ꓡꓳ꓿ ꓝꓮꓲ ꓠꓱꓸ ꓐꓯꓼ ꓢꓴ ꓠꓬ ꓬꓰ-ꓡꓲ-ꓟꓲ ꓥ ꓡꓳ꓾ ꓥ ꓠꓬ ꓟꓷ ꓠꓷꓹ ꓝ ꓢꓴ ꓗꓪ ꓟ ꓕꓲ ꓣꓳ ꓥ ꓡꓳ꓾ ꓐꓰ ꓐꓯ ꓢꓴ_ ꓟꓲ ꓙꓳ_ ꓡꓳ꓾ ꓐꓯ_ ꓡꓳ꓿ ꓬꓲ ꓠꓬ ꓬꓲ ꓪ ꓔꓯ꓾ ꓥꓪ ꓮꓽ ꓟ ꓥ ꓟ ꓠꓴ ꓪ ꓮ ꓡꓲ ꓐꓯ_ ꓡꓳꓺꓽ꓾ ꓐꓰ ꓐꓯ_ ꓡꓳ꓿ ꓢꓲ-ꓟꓴ ꓒꓲ-ꓕꓱ ꓒꓳꓹ ꓖꓶ ꓢꓲ꓾ ꓠꓴ ꓠꓽ ꓙꓲ-ꓢꓴ ꓥ ꓡꓳ꓿ ꓢꓯꓸ ꓔꓬ_ ꓟ ꓪꓴ-ꓢ ꓬꓲ ꓮ ꓐꓲ ꓥ ꓡꓳ꓾ ꓐꓯ_ ꓡꓳ꓿ ꓬꓰ-ꓢꓴ ꓡꓰ ꓒꓳꓹ ꓖꓶ ꓢꓲ ꓬꓲ ꓔꓯ ꓕꓱ ꓡꓱ ꓐꓯ_ ꓡꓳ꓾ ꓢꓲ-ꓟꓴ-ꓐ-ꓬꓳ-ꓠ ꓠꓴ ꓠꓽ ꓶꓼ ꓙꓳ ꓫꓱꓹ ꓙꓳ_ ꓡꓳ꓿ ꓮ ꓡꓲꓳ ꓐꓯ ꓠꓬ ꓧꓪꓽ_ ꓐꓰ ꓫꓵꓽ ꓡꓰ ꓠꓴ ꓔꓯ ꓟꓳꓸ ꓖꓶ_ ꓟ ꓟꓽ ꓥ꓾ ꓟꓴ ꓗꓪ ꓕꓯ ꓢꓲ ꓗꓪ ꓔꓬ_ ꓟ ꓥꓪ ꓐꓹ ꓐ ꓡꓰ ꓥ ꓡꓳ꓿ ꓥꓪ ꓝꓮꓲ ꓠꓴ ꓔꓯ ꓐꓯ ꓖꓶ_ ꓠꓬꓲ꓾ ꓠꓴ ꓠꓽ ꓒꓲ-ꓕꓱ ꓥ ꓡꓳ꓿ ꓡꓳ ꓓꓰ ꓕꓱ ꓟ ꓕꓯ ꓢꓲ ꓗꓪ ꓥꓪ ꓘꓴ ꓜꓲ ꓞꓳ ꓥꓪ ꓫꓬꓹ ꓔ ꓬꓰ_ ꓥꓳ꓿ ꓟꓸ ꓟꓲ ꓟꓵꓽ ꓪ ꓠꓬꓲ_ ꓟ ꓡꓰ ꓘꓴ ꓜꓲ ꓞꓳ ꓔꓯ ꓧꓪꓸ ꓡꓰ ꓟꓽ ꓓ꓿ ꓥꓪ ꓠꓬ ꓟꓴ ꓗꓪ ꓗꓴꓷꓼ ꓜꓳ ꓜꓴ ꓠꓴ ꓔꓯ ꓖꓶ_ ꓥꓳ꓿ ꓟꓲ ꓠꓯ ꓗꓪ ꓠꓴ ꓡꓰ ꓞꓳꓹ ꓔ_ ꓟ ꓮ ꓫꓵ ꓥ_ ꓟꓲ꓾ ꓟꓴ ꓗꓪ ꓗꓪ_ ꓟꓲ ꓞꓳꓹ ꓔ_ ꓥꓳ꓿ ꓟꓲ ꓠꓯ ꓗꓪ ꓠꓴ ꓡꓰ ꓩꓴ ꓗꓷ ꓟ ꓮ ꓫꓵ ꓥ_ ꓟꓲ꓾ ꓟꓴ ꓗꓪ ꓗꓪ_ ꓟꓲ ꓩꓴ ꓗꓷ_ ꓥꓳ꓾ ꓐꓯ ꓖꓶ_ ꓡꓳ꓿ ꓖꓳ ꓡꓱ ꓢꓲ ꓬꓲ ꓠꓬ ꓙꓲ-ꓢꓴ ꓥ ꓟ ꓮ ꓟ ꓔꓯ_ ꓟꓲ ꓟꓽ ꓐꓯ ꓖꓶ ꓠꓹ ꓟ꓾ ꓬꓲ ꓡꓰ ꓛꓳ ꓒꓯꓹ ꓐꓴ ꓔꓯ ꓙꓳꓺ ꓗꓽ ꓖꓶ_ ꓡꓳ꓿ ꓖꓳ ꓕꓲ ꓝꓲꓸ ꓕ ꓑꓳ ꓬꓰ-ꓢꓴ ꓡꓰ꓾ ꓥꓪ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓙꓰ ꓠ ꓗ ꓢꓲ꓾ ꓞꓳ ꓪꓴꓽ ꓞꓳ ꓔꓲ ꓐꓴ_ ꓐꓰ ꓔꓲ ꓒ ꓪꓴ ꓓꓵ ꓣꓱ ꓢꓴ_ ꓐꓰ꓾ ꓕꓳ ꓶ ꓐꓳ ꓒ ꓐꓴ ꓡꓯ ꓒꓯꓹ ꓗꓪ ꓫ ꓙꓵ_ ꓟ ꓮ ꓟꓬꓹ ꓜꓲꓽ ꓢꓲ ꓠꓬꓲ꓾ ꓢꓰꓼ ꓗꓷ_ ꓟ ꓜꓲꓽ ꓢꓲ꓾ ꓢꓽ ꓠꓬꓲ ꓕꓲ ꓠꓬꓲ ꓗꓪ ꓢꓯꓸ ꓡꓰꓼ ꓡ ꓠ ꓗ_ ꓡꓳ꓾ ꓐꓰ ꓬꓲ ꓛꓳ ꓒꓯꓹ ꓐꓴ ꓔꓯ ꓐꓯ ꓟꓳꓸ ꓖꓶ ꓪꓴꓸ ꓔꓴ_ ꓡꓳ꓿ ꓒꓲ-ꓕꓱ ꓠꓬ ꓬꓲ ꓔꓯ ꓣꓴ ꓔ ꓢꓲ꓾ ꓬꓲ ꓔꓯ ꓕꓼ ꓪꓴꓸ ꓔꓴ ꓡ ꓢꓲ ꓠꓬꓲ꓾ ꓢꓲ ꓒꓽꓳ꓾ ꓠꓴ ꓔꓯ ꓫꓱꓸ ꓤ꓿ ꓕꓱ ꓟ ꓮ ꓕꓯ ꓟꓲ ꓠꓴ ꓔꓯ ꓟꓽ ꓗꓷ ꓡꓰ꓾ ꓐꓯ_ ꓡꓳ꓿ ꓬꓲ ꓠꓬ ꓔꓲꓸ ꓒꓳꓹ ꓢꓲ ꓒꓲ-ꓕꓱ ꓔꓯ ꓐꓯ_ ꓡꓳ꓾ ꓢ-ꓓꓯꓳ꓾ ꓠꓴ ꓥꓪ ꓗ ꓠꓯ ꓢꓲ ꓗꓪ ꓙꓰ꓿ ꓠꓴ ꓠꓽ ꓥꓪ ꓛꓲ ꓕꓲꓽ ꓓꓴ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓪꓴ-ꓢ ꓚꓱꓹ ꓗꓪ ꓟ ꓔꓯ ꓠꓴ ꓟꓽ ꓠꓲꓹ ꓥꓳ꓾ ꓞꓳ ꓚꓱꓹ ꓗꓪ ꓟ ꓔꓯ_ ꓡꓰꓽ ꓠꓲꓹ ꓥꓳ_ ꓡꓳ꓾ ꓐꓯ_ ꓡꓳ꓿

 

Add new comment

2 + 3 =