ꓕꓲ ꓠꓬꓲ ꓡꓰ ꓕꓲ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ (ꓡꓴ-ꓘ = 13ꓽ 1-9)

ꓡꓴ-ꓘ 13ꓽ1-9

ꓖꓳ ꓕꓲ ꓝꓲꓸ ꓗꓪ ꓖ-ꓡꓲ-ꓡꓲ ꓢꓴ ꓠꓬ ꓢꓰꓼ ꓔꓲ ꓓꓴ ꓬꓰ ꓔꓬ ꓕꓯ ꓒꓲ-ꓡ ꓡꓰ ꓬꓲ ꓪ ꓔꓯ ꓢꓰꓼ ꓗꓷ ꓢꓲ꓾ ꓬꓲ ꓪ ꓫꓵꓽ ꓠꓬ ꓢꓰꓼ ꓔꓲ ꓓꓴˍ ꓐꓰ ꓦꓱꓹ ꓡꓰ ꓝꓲˍ ꓟ ꓓꓳꓽ ꓬꓰ-ꓢꓴ ꓔꓯ ꓐꓯ ꓖꓶ ꓡ ꓢꓴ ꓙꓳˍ ꓡꓳ=

ꓬꓰ-ꓢꓴ ꓡꓰ ꓬꓲ ꓪ ꓔꓯꓒꓳꓹ ꓖꓶ ꓢꓲ꓾ ꓖ-ꓡꓲ-ꓡꓲ ꓢꓴ ꓖꓳ ꓕꓲ ꓧꓳꓽ ꓔꓯ ꓕꓱ ꓡꓱ ꓢꓰꓼ ꓗꓷ  ꓠꓬꓲ꓾ꓬꓲ ꓪ ꓠꓬ ꓖ-ꓡꓲ-ꓡꓲ ꓢꓴ ꓮ ꓙꓵꓽꓕꓯ ꓢꓲ ꓝꓴꓲ ꓙꓳ ꓢꓴ ꓥꓳ꓾ꓐꓰ ꓠꓴ ꓪ ꓓꓵꓽꓙˍꓡ?ꓠꓴ ꓪ ꓔꓯ ꓥꓪ ꓐꓯ ꓖꓶˍ  ꓠꓬꓲ꓾ ꓟꓽ ꓥ=ꓠꓴ ꓪˍꓟꓲ ꓟꓽ ꓓꓵꓽꓙ ꓒꓳꓹ ꓬꓲꓼ ꓡ ꓠꓬ ꓮ ꓙꓵꓽ ꓢꓴ ꓖꓳ ꓟˍꓡꓰ ꓐꓰ ꓟꓶꓽ ꓬꓰˍ ꓥꓳ=

ꓥ ꓠꓬ ꓢꓲ-ꓡꓳ ꓗꓪ ꓟ ꓟꓵꓽ ꓔꓳꓹ ꓜꓲ ꓐꓱꓽ ꓡ ꓔꓯ ꓔꓲꓸ ꓫꓵꓸꓹ ꓢꓴꓞꓲ ꓦꓰꓼ ꓣꓳ ꓟ ꓠꓬ꓾ ꓙꓱ-ꓣꓴ-ꓢ-ꓡꓱ ꓗꓪ ꓔꓬ ꓢꓴ ꓮ ꓙꓵꓽ ꓕꓯꓽ ꓢꓲ ꓝꓴꓲ ꓙꓳ ꓢꓴ ꓥꓳ꓾ ꓓꓵꓽ ꓙˍ ꓡ?ꓠꓴ ꓪ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ꓟꓽ ꓥ= ꓠꓴ ꓪˍ ꓟꓲ ꓟꓽ ꓓꓵꓽ ꓙ ꓒꓳꓹ ꓬꓲꓼ  ꓡ ꓠꓬ ꓮ ꓙꓵꓽ ꓢꓴ ꓖꓳ ꓟˍ ꓡꓰ ꓐꓰ ꓟꓶꓽ ꓡꓰˍ ꓥꓳ꓾ ꓐꓯˍ ꓡꓳ=

ꓬꓰ- ꓢꓴ ꓠꓬ ꓔꓯ ꓥꓳꓽ ꓗꓪ ꓐꓰ ꓟꓸ ꓔꓴ ꓢꓲ꓾ ꓡ ꓞꓳ ꓕꓲ ꓣꓳ ꓠꓬ ꓬꓲ ꓛꓱꓼ ꓡꓱꓼ ꓐꓱ ꓗꓪ ꓘꓶꓽ ꓢꓶꓽ ꓕꓲ ꓜꓲ ꓔꓶ ꓔ ꓡꓳ= ꓬꓲ ꓠꓬ ꓢꓶꓹ ꓢꓶꓽˍ ꓟꓲ ꓧꓪ ꓟꓽ ꓟꓶ= ꓖꓳ ꓡꓱ  ꓠꓬ ꓬꓲ  ꓡꓰ ꓐꓱ ꓡꓳꓸ ꓢꓴ ꓔꓯ꓾ ꓠꓬꓲ ꓠꓹ꓾ ꓥꓪ ꓠꓬ ꓢꓶꓹ ꓢꓶꓽ ꓧꓪ ꓟꓶ ꓠꓹ ꓟ꓾ ꓕꓱ ꓢ ꓘꓳꓼ  ꓟ ꓠꓯꓸꓼ ꓗꓪ ꓘꓶꓽ ꓢꓶꓽ ꓕꓱ ꓕꓲ ꓜꓲ ꓛꓲ ꓔꓲ ꓗꓪ ꓡˍ ꓟꓲ ꓬꓲ ꓢꓶꓽ  ꓧꓪ ꓟꓽ ꓟꓶ= ꓮꓫꓵꓽ ꓪꓴꓸ ꓠꓬꓲ ꓟꓵꓽ ꓒꓬꓹ ꓕꓱ ꓡꓱ ꓣꓱꓸꓹ ꓔꓬ ꓝꓲ ꓠꓯꓹ ꓡ? ꓘꓷꓹ ꓩꓴ ꓗꓷ꓾ ꓐꓯˍ ꓡꓳ= ꓬꓲ ꓡꓰ ꓒꓳꓹ  ꓖꓶꓢꓲ꓾ ꓢꓲ ꓒꓽꓳ꓾ ꓞꓲ ꓠꓲꓹ ꓕꓲ ꓘꓳꓼ ꓝꓰ ꓔ ꓢꓰꓽ= ꓥꓪ ꓡꓰ ꓚꓳ ꓡꓳ ꓡꓳ ꓘꓪꓸꓸ ꓢꓲ ꓛꓲꓸ ꓧꓳꓼ ꓖꓶˍ ꓥꓳ= ꓠꓯꓸꓼ ꓦꓯꓼ ꓬꓲ ꓢꓶꓽ ꓓꓱꓼ ꓡ ꓠꓬ ꓙꓲˍ ꓥꓳ= ꓟꓽ ꓓꓱꓼ ꓡ ꓠꓬ ꓖꓳ ꓕꓯꓽ ꓢꓲ ꓘꓷꓹ ꓩꓴ ꓗꓷ꓾ ꓐꓯ ꓖꓶˍ ꓡꓳ꓾ ꓐꓯˍ ꓡꓳ=

ꓞꓳ ꓜꓴ ꓗꓪ ꓟ ꓕꓲ ꓣꓳ ꓡꓰ ꓬꓰ-ꓢꓴ ꓔꓯ꓾ ꓟꓹ ꓒꓽꓳ꓾ ꓥꓪ ꓔꓯ ꓡꓯꓼ ꓪ ꓐꓱ ꓖꓶ ꓡ ꓠꓹ ꓟ ꓥꓪ ꓮ ꓬꓲꓼ ꓔꓯ ꓐꓯ ꓙ ꓡꓯ꓾ ꓐꓯˍ ꓡꓳ=ꓬꓰ-ꓢꓴ ꓠꓬ ꓬꓲ ꓔꓯ ꓾ ꓞꓳ ꓤꓽꓳ꓾ ꓮꓽ ꓟ ꓡꓰ ꓥꓪ ꓔꓯ ꓠꓴ ꓪ ꓐꓯ ꓟꓴ ꓞꓷꓹ ꓢꓴ ꓢꓲꓽ ꓒˍ ꓐꓰ ꓡꓯꓼ ꓪ ꓐꓱ ꓖꓶ ꓢꓴ ꓣꓱꓽ ꓝꓲˍ ꓡ? ꓐꓯ ꓖꓶˍ ꓡꓳ=ꓬꓰ-ꓢꓴ ꓠꓬ ꓬꓲ ꓪ ꓔꓯ꓾ ꓠꓲꓹ ꓦꓯꓸˍ ꓟ ꓮꓽ ꓙꓵꓽ ꓔꓯ ꓧꓪꓸ ꓛꓲꓽ ꓐꓰ ꓤ ꓟꓳ= ꓮ ꓡꓲꓳ ꓐꓯ ꓠꓬ ꓞꓳ ꓤ ꓠꓽ ꓬꓲ ꓖꓴꓽ ꓙꓴꓽ ꓮ ꓟꓬꓹ ꓙꓳˍ ꓟ ꓗꓪ ꓐꓰ ꓢꓯꓸ ꓔꓬꓹ ꓟꓶˍ ꓟ ꓟꓽ ꓥ꓾ ꓐꓯˍ ꓡꓳ=

ꓬꓲ ꓠꓬ ꓔꓯ ꓥꓳꓽ ꓕꓲꓽ ꓟ ꓗꓪ ꓐꓰ ꓬꓲ ꓪ ꓔꓯ꓾ ꓞꓳ ꓐꓳ ꓕꓲ ꓣꓳ ꓠꓬ ꓬꓲ ꓦ ꓟꓲ ꓗꓪ ꓐꓰ ꓜ ꓪꓳꓽ ꓡꓳ ꓪꓳꓽ ꓮꓽ ꓟꓬꓹ ꓫ ꓟꓶˍ ꓡꓳ= ꓖꓳ ꓡꓱ ꓠꓬ ꓬꓲ ꓠꓽ ꓾ ꓥꓪ ꓜꓽ ꓫꓵꓽ ꓜꓽ ꓙꓰꓽ ꓗꓶ ꓖꓴ ꓟꓽ ꓡꓳꓼ ꓠꓬꓲ ꓮ ꓡꓲ ꓬꓰ ꓢꓰ꓾ ꓐꓰ ꓓꓵꓽ ꓙˍ ꓡꓳ=

ꓝꓮꓲ ꓬꓲ ꓡꓰˍ ꓥꓪ ꓠꓽ ꓕꓱ ꓡꓱ ꓬꓰˍ ꓥꓳ꓾ ꓥꓪ ꓜ ꓗꓹ ꓕꓱ ꓟꓬ ꓟ ꓒꓬꓹ ꓗꓷ ꓢꓲ ꓪ ꓜꓲ ꓪꓴꓽˍ ꓟ ꓜ ꓗꓹ ꓫꓬꓹ ꓢꓲ ꓠꓬꓲ꓾ꓖꓳ ꓗꓪ ꓥꓪ ꓜꓽ ꓫꓵꓽ ꓜꓽ ꓙꓰˍ ꓐꓰ ꓖꓴꓽ ꓙꓴꓽ ꓫ ꓗꓶ ꓔ ꓥꓳ= ꓖꓳ ꓗ ꓠꓯꓸ ꓥꓪ ꓠꓬ ꓥꓪ ꓶ ꓟꓬ ꓔꓯ꓾ ꓶ ꓟꓬꓳ ꓾ ꓠꓴ ꓐꓱ ꓶ ꓮꓽ ꓟꓬꓹ ꓘꓳꓼ ꓣꓱꓽ ꓓꓴ ꓫ ꓗꓶ ꓔ ꓡꓳ=ꓖꓳ ꓡꓱ ꓠꓬꓲ  ꓠꓴ ꓠꓬ ꓜꓽ ꓠꓬꓲ ꓓꓳꓻ ꓠꓬꓲ ꓠꓲꓹ ꓒꓴ ꓒꓴ ꓐꓰ ꓙꓳ ꓢ ꓔꓬ꓾ ꓐꓯ ꓖꓶˍ ꓥꓳ꓾ ꓐꓯˍ ꓡꓳ=

ꓖꓳ ꓡꓱ ꓥˍ ꓟꓲ ꓪꓴ-ꓢ ꓠꓽ ꓬꓲ ꓔꓯ ꓾ ꓞꓳ ꓙꓲꓽꓳ꓾ ꓠꓬꓲꓸ ꓟꓶꓽ ꓘꓶꓼ ꓠꓴ ꓶ ꓟꓬ ꓔꓯ ꓥꓪ ꓧꓪ ꓡˍ ꓥꓳ= ꓖꓳ ꓡꓱ ꓠꓬ ꓠꓴ ꓡꓰ ꓙꓽ ꓖꓶ ꓔ ꓟ꓾ ꓮꓽ ꓟ ꓔꓯꓸ ꓟ ꓗꓷ ꓡꓰˍ ꓥꓳ ꓪ? ꓐꓰ ꓐꓯ ꓖꓶˍ ꓡꓳ= ꓚꓲ ꓛꓬ ꓐꓱ ꓶˍ ꓡꓰꓽ ꓒꓵꓽ ꓡꓽ ꓫ ꓗꓶ ꓔ ꓢꓲ ꓪꓴ-ꓢ ꓔꓯ ꓟꓳꓸ ꓟꓽ ꓐꓳ ꓟ ꓡ ꓞꓳ ꓠꓬ ꓬꓲ ꓕꓰ ꓡꓰ ꓗꓹ ꓡꓳ꓾ ꓐꓯˍ ꓡꓳ=