ꓖꓳ ꓓꓱꓽ ꓔꓲꓹ ꓒ ꓬꓳ-ꓦ ꓪꓴꓸ ꓓꓵ ꓓꓶ ꓗꓷˍ ꓟ

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓠꓬ ꓖꓳ ꓓꓱꓽ ꓔꓲꓹ ꓒ ꓬꓳ-ꓦ ꓪꓴꓸ ꓓꓵ ꓓꓶꓺ ꓗꓷ ꓟꓶˍ ꓟ ꓑꓮꓲꓽ ꓦꓬꓼ ꓠꓬꓲ ꓥ ꓡꓳ= ꓟ-ꓘꓳ 6ꓽ17-29 ꓗꓪ ꓟꓳꓻ ꓪˍ ꓡꓳ= ꓖꓳ ꓓꓱꓽ ꓔꓲꓹ ꓒ ꓬꓳ-ꓦ ꓠꓬ ꓩꓴ-ꓡꓲ ꓪ ꓔꓲ ꓐꓰ ꓩꓴ-ꓡꓳ-ꓓꓲ ꓡꓯꓼ ꓛꓲ ꓗꓪ ꓪꓴꓸ ꓓꓵ ꓞꓷꓹ ꓗꓷˍ ꓡꓳ= ꓬꓲ ꓠꓬ ꓔꓱꓹ ꓚꓵˍ ꓟ ꓐꓱ ꓶ ꓢꓯꓼ ꓟꓬ ꓖꓶ ꓗꓷꓳ= ꓟꓽ ꓙꓲꓻ ꓟꓽ ꓔꓱꓹ ꓢꓴ ꓡꓰ ꓙꓵꓽ ꓔꓬ ꓟ ꓗꓴꓷꓼ ꓗꓪ ꓬꓲ ꓠꓬ ꓔꓱꓹ ꓜꓳꓽˍ ꓟ ꓑꓶꓸ ꓓꓴ ꓬꓲ ꓪꓴꓸ ꓓꓵ ꓞꓷꓹ ꓗꓷꓳ= ꓬꓲ ꓫꓵꓽ ꓧꓳꓸ ꓗꓷꓳ= ꓪ ꓔꓲ ꓐꓰ ꓪ ꓔꓲ ꓟ ꓠꓬ ꓚꓲꓸ ꓛꓬ ꓫꓵꓽ ꓠꓲꓹ ꓡꓶꓽ ꓔꓯ ꓛꓳ ꓢꓲ ꓗꓹ ꓛꓲꓽ ꓓꓴ ꓧꓪ ꓔꓬꓹ ꓟ ꓙꓵꓹ ꓗꓪ ꓖꓳ ꓓꓱꓽ ꓔꓲꓹ ꓒ ꓬꓳ-ꓦ ꓡꓰ ꓐꓯ ꓖꓶ ꓡˍ ꓟ ꓠꓬ ꓬꓲ ꓪ ꓠꓲꓹ ꓟ ꓗꓪ ꓗꓸ ꓬꓯꓼ ꓡꓰꓳ= ꓖꓳ ꓓꓱꓽ ꓔꓲꓹ ꓒ ꓬꓳ-ꓦ ꓐꓯ ꓘꓶꓽ ꓠꓬ ꓬꓲ ꓪ ꓬꓰ ꓔꓬ ꓟ ꓔꓯ ꓘꓶꓻ ꓡꓶꓽ ꓡꓰ ꓝꓲˍ ꓠꓬꓲ ꓬꓲ ꓪ ꓠꓬ ꓖꓳ ꓓꓱꓽ ꓔꓲꓹ ꓒ ꓬꓳ-ꓦ ꓔꓯ ꓢꓰꓼ ꓗꓷ ꓟ ꓥ ꓡꓳ=

ꓚ ꓟꓲꓽ ꓕꓱ ꓟ ꓔꓯ ꓣꓳ ꓡꓳꓸ ꓠꓬꓲˍ ꓕꓯ ꓩꓴ-ꓡꓲ ꓠꓬ ꓬꓲ ꓠꓬꓲ ꓤ ꓤ ꓟꓶ ꓩꓴ-ꓡꓳ-ꓓꓲ ꓔꓯ ꓣꓴ ꓔ ꓡꓳ= ꓖꓳ ꓟ ꓑꓶꓸ ꓓꓴ ꓬꓳ-ꓦ ꓠꓬ ꓟꓽ ꓙꓳꓺ ꓟꓽ ꓛꓱꓽ ꓐꓰ “ꓠꓴ ꓠꓬ ꓠꓴ ꓠꓬꓲ ꓤ ꓤ ꓟꓶ ꓔꓯ ꓣꓴ ꓟꓽ ꓓꓻ” ꓐꓰ ꓐꓯ ꓖꓶˍ ꓕꓯ ꓩꓴ-ꓡꓳ-ꓓꓲ ꓠꓬ ꓬꓲ ꓠꓲꓹ ꓟ ꓠꓯꓸꓼ ꓗꓪ ꓐꓰ ꓬꓳ-ꓦ ꓔꓯ ꓛꓴꓽ ꓙꓳ ꓢꓴ ꓕꓲ ꓣꓳˍ ꓡꓰ ꓐꓰ ꓢꓪꓸ ꓔ ꓡꓳ= ꓖꓳ ꓡꓱ ꓢꓲ ꓖꓳ ꓓꓱꓽ ꓔꓲꓹ ꓒ ꓬꓳ-ꓦ ꓔꓯ ꓢꓰꓼ ꓠꓹ ꓟ ꓐꓱ ꓶ ꓬꓲ ꓚꓱꓹ ꓧꓪˍ ꓥ ꓟꓲ ꓧꓪ ꓟꓽ ꓟꓶ= ꓕꓲ ꓠꓬꓲ ꓙꓳˍ ꓠꓬ ꓩꓴ-ꓡꓲ ꓪ ꓔꓲ ꓦꓵꓻ ꓦꓬꓼ ꓠꓬꓲ ꓗꓪ ꓬꓲ ꓚꓱꓹ ꓧꓪ ꓟꓶ ꓡꓰ ꓢꓲ ꓬꓲ ꓠꓬ ꓖꓳ ꓓꓱꓽ ꓔꓲꓹ ꓒ ꓬꓳ-ꓦ ꓪꓴꓸ ꓓꓵ ꓔꓯ ꓓꓶꓺ ꓝꓲ ꓗꓷꓳ=

ꓚ ꓟꓲꓽ ꓕꓱ ꓟ ꓗꓪ ꓐꓰ ꓣꓳ ꓔꓯ ꓟꓸ ꓖꓶ ꓡ ꓔꓬ ꓟ ꓠꓬ ꓬꓲ ꓪꓴꓸ ꓕꓲꓽ ꓟ ꓠꓬ꓾ ꓩꓴ-ꓡꓲ ꓠꓬ ꓬꓲ ꓚꓲꓸ ꓛꓬ ꓬꓲ ꓙꓵꓽ ꓟꓽ ꓐ ꓡ ꓟ ꓔꓯ ꓡꓳꓸ ꓟꓳꓻ ꓪ ꓓꓹ ꓡꓳ= ꓚꓵ ꓚꓵ ꓬꓲ ꓠꓽ ꓖꓳ ꓓꓱꓽ ꓔꓲꓹ ꓒ ꓬꓳ-ꓦ ꓔꓯ ꓠꓲꓹ ꓠꓵˍ ꓡꓳ= ꓙꓳꓺ ꓒꓵꓽˍ ꓡꓳ= ꓬꓳ-ꓦ ꓠꓬ ꓔꓱꓹ ꓜꓳꓽˍ ꓡꓳ ꓐꓰ ꓬꓲ ꓘꓳꓹ ꓣꓴˍ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓬꓲ ꓠꓬ ꓬꓲ ꓤ ꓟꓶ ꓩꓴ-ꓡꓳ-ꓓꓲ ꓔꓯ ꓟꓽ ꓠ ꓡꓳꓸ ꓐꓰ ꓬꓰ ꓟꓽ ꓑꓶꓸ= ꓬꓲ ꓮ ꓡꓲ ꓬꓰ ꓠꓯꓹ ꓟ ꓩꓴ-ꓡꓳ-ꓓꓲ ꓠꓬ ꓕꓵꓼ ꓪ ꓖꓶˍ ꓡꓳ= ꓕꓲ ꓠꓬꓲ ꓡꓰ ꓕꓲ ꓠꓬꓲ ꓬꓳ-ꓦ ꓟꓽ ꓙꓲꓻ ꓟ ꓔꓯ ꓡꓰꓽ ꓐꓯ ꓖꓶˍ ꓕꓯ ꓬꓲ ꓠꓬ ꓖꓳ ꓟ ꓔꓯ ꓗꓳꓸ ꓘꓳ ꓙꓰ ꓟꓽ ꓐ ꓡ ꓠꓬꓲ ꓖꓳ ꓓꓱꓽ ꓔꓲꓹ ꓒ ꓬꓳ-ꓦ ꓔꓯ ꓐꓱ ꓓꓴꓽ ꓗꓪ ꓐꓱ ꓔ ꓡꓳ= ꓬꓲ ꓠꓬ ꓪ ꓔꓲ ꓕꓲ ꓣꓳ ꓥ ꓐꓯ ꓥ ꓟꓲ ꓬꓲ ꓚꓲꓸ ꓛꓬ ꓬꓲ ꓙꓵꓽ ꓟꓽ ꓐ ꓡ=

ꓝꓮꓲ ꓕꓲ ꓫꓵꓽ ꓠꓬ ꓬꓲ ꓦꓲ ꓢꓲ ꓟ ꓩꓴ-ꓡꓳ-ꓓꓲ ꓥ ꓡꓳ= ꓬꓳ-ꓦ ꓐꓯ ꓘꓶꓽ ꓠꓬ ꓬꓲ ꓠꓲꓹ ꓟ ꓠꓯꓸꓼ ꓗꓪ ꓗꓸ ꓬꓯꓼˍ ꓟ ꓑꓶꓸ ꓓꓴ ꓖꓳ ꓓꓱꓽ ꓔꓲꓹ ꓒ ꓬꓳ-ꓦ ꓔꓯ ꓢꓰꓼ ꓠꓲꓹ ꓫꓵˍ ꓡꓳ= ꓬꓲ ꓫꓵꓽ ꓧꓪꓽ ꓠꓲꓹ ꓫꓵˍ ꓟ ꓡꓰꓽ ꓬꓰ ꓐ ꓡ ꓠꓹ ꓟ ꓬꓲ ꓝꓴꓲꓸ ꓬꓰˍ ꓟ ꓚꓱꓹ ꓗꓪ ꓙꓲꓻ ꓫꓬ ꓢꓴ ꓐꓯ ꓘꓶꓽ ꓠꓬ ꓕꓼ ꓓꓹ ꓡꓳ= ꓖꓳ ꓡꓱ ꓠꓬꓲ ꓬꓲ ꓠꓬ ꓬꓲ ꓚꓱꓹ ꓔꓯ ꓗꓽ ꓕꓼ ꓓꓹ ꓟ ꓔꓯ ꓣꓴ ꓦ ꓠꓲꓹ ꓫꓵˍ ꓟ ꓑꓶꓸ ꓓꓴ ꓬꓳ-ꓦ ꓔꓯ ꓢꓰꓼ ꓠꓲꓹ ꓫꓵˍ ꓟ ꓥ ꓡꓳ=

ꓝꓮꓲ ꓕꓲ ꓚꓱꓹ ꓗꓪ ꓐꓰ ꓡꓳꓸ ꓠꓬꓲˍ ꓕꓯ ꓬꓳ-ꓦ ꓠꓬ ꓔꓱꓹ ꓚꓵˍ ꓟ ꓐꓱ ꓶ ꓬꓲ ꓢꓯꓼ ꓟꓬ ꓔꓯ ꓖꓶ ꓑꓶꓸˍ ꓡꓳ= ꓬꓲ ꓠꓬ ꓢꓲ ꓒ ꓬꓰ-ꓢꓴ ꓐꓱ ꓶ ꓙꓻ ꓖꓴ ꓘꓳꓽ ꓖꓶˍ ꓟˍ ꓡꓰ ꓐꓰ ꓬꓲ ꓚꓲꓸ ꓛꓬ ꓬꓲ ꓙꓵꓽ ꓐ ꓡ ꓢꓲ ꓠꓬꓲ ꓔꓱꓹ ꓜꓳꓽˍ ꓟ ꓔꓯ ꓬꓲ ꓐꓯ ꓑꓶꓸˍ ꓡꓳ= ꓕꓱ ꓢ ꓚꓱꓹ ꓗꓪ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ=

ꓠꓬꓲꓸ ꓠꓬꓲ ꓟ ꓣꓳ ꓠꓬ ꓚꓲꓸ ꓛꓬ ꓔꓯ ꓚꓲꓸ ꓛꓬ ꓙꓵꓽ ꓐ ꓡˍ ꓡ? ꓐꓯ ꓟ ꓔꓯ ꓓꓵꓽ ꓙꓽ ꓠꓬꓲ ꓡꓯ= ꓪ ꓔꓲ ꓩꓴ-ꓡꓲˍ ꓡꓰ ꓐꓰ ꓠꓱꓸ ꓐꓯ ꓢꓴ ꓡꓰ ꓣꓳ ꓔꓯ ꓟꓽ ꓔꓱꓹ ꓟ ꓙꓻ ꓖꓴ ꓗꓪ ꓟꓸ ꓖꓶ ꓔꓬ ꓟ ꓗꓪ ꓐꓰ ꓙ ꓙꓰ ꓟꓽ ꓐ ꓡ ꓡ? ꓣꓳ ꓠꓬ ꓣꓳ ꓛꓲ ꓒꓯꓹ ꓕꓯꓽ ꓢꓲ ꓗꓪ ꓦꓰꓼ ꓟꓽ ꓐ ꓡ ꓡ? ꓣꓳ ꓠꓬ ꓢꓴ ꓡꓰ ꓟꓽ ꓐꓯ ꓟꓸ ꓖꓶ ꓡ ꓕꓯ ꓮ ꓫꓵꓽˍ ꓟꓲ ꓬꓰ ꓟꓽ ꓗꓴꓸ ꓡ? ꓣꓳ ꓠꓬ ꓢꓴ ꓠꓻ ꓘꓴ ꓗꓪ ꓐꓰ ꓡꓰꓽ ꓢꓯꓼ ꓦ ꓔꓬ ꓡ? ꓐꓯ ꓟ ꓔꓯ ꓓꓵꓽ ꓙ ꓠꓬꓲ ꓡꓯ= ꓖꓳ ꓡꓱ ꓥ ꓕꓯ ꓠꓽ ꓣꓳ ꓠꓬ ꓪ ꓔꓲ ꓩꓴ-ꓡꓲ ꓡꓰ ꓐꓰ ꓢꓯꓼ ꓐꓽ ꓢꓴ ꓒꓬꓱꓼ ꓡˍ ꓥꓳ= ꓮ ꓫꓵꓽ ꓔꓯ ꓥ ꓟꓲ ꓚꓲꓸ ꓛꓬ ꓖꓳ ꓓꓱꓽ ꓡꓰ ꓬꓰ ꓟꓽ ꓗꓴꓸ= ꓠꓱꓸ ꓐꓯ ꓢꓴ ꓔꓯ ꓡꓰꓽ ꓦꓻ ꓡꓱ ꓐꓳˍ ꓟ꓾ ꓕꓲ ꓫꓵꓽ ꓫꓵꓽ ꓓꓳ ꓡˍ ꓥ ꓟꓲ ꓚꓲꓸ ꓛꓬ ꓢꓷꓸ ꓠꓲꓹ ꓟꓽ ꓙꓳ꓾ ꓕꓱ ꓡꓱ ꓗꓷ ꓡꓰ ꓕꓯ ꓣꓳ ꓥˍ ꓟꓲ ꓩꓴ-ꓡꓲˍ ꓐꓰ ꓣꓳ ꓥˍ ꓟꓲ ꓕꓲ ꓣꓳ ꓣꓳ ꓡꓯꓼ ꓛꓲ ꓗꓪ ꓐꓬ ꓡꓰˍ ꓥꓳ=

ꓝꓮꓲ ꓠꓬ ꓩꓴ-ꓡꓳ-ꓓꓲˍ ꓡꓰ ꓐꓰ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓓꓵˍ ꓡ ꓐꓯ ꓟ ꓓꓵꓽ ꓙꓽ ꓠꓬꓲ ꓡꓯ= ꓕꓲ ꓠꓬꓲ ꓡꓰ ꓕꓲ ꓠꓬꓲ ꓟꓽ ꓙꓲꓻ ꓟꓽ ꓔꓱꓹ ꓟ ꓚꓱꓹ ꓗꓪ ꓐꓰ ꓣꓳ ꓫꓵꓽ ꓧꓪꓽ ꓗꓹ ꓛꓲꓽ ꓓꓴ ꓧꓪ ꓔꓬ ꓠꓬ꓾ ꓝꓴꓲꓸ ꓬꓰ ꓔꓬ ꓠꓬ ꓣꓳ ꓙꓻ ꓖꓴ ꓔꓯ ꓟꓳꓸ ꓖꓶ ꓢꓴ꓾ ꓣꓳ ꓔꓯ ꓐꓯ ꓟꓸ ꓖꓶ ꓡ ꓢꓴ ꓔꓯ ꓣꓳ ꓠꓬ ꓢꓰꓼ ꓠꓲꓹ ꓫꓵ ꓔꓬ ꓡ?= ꓖꓳ ꓕꓲ ꓣꓳ ꓔꓯ ꓟꓽ ꓙꓲꓻ ꓐꓯ ꓠꓲꓹ ꓫꓵ ꓔꓬ ꓡ ꓐꓯ ꓟ ꓔꓯ ꓓꓵꓽ ꓙꓽ ꓠꓬꓲ ꓡꓯ= ꓩꓴ-ꓡꓳ-ꓓꓲ ꓠꓬ ꓝꓴꓲꓸ ꓠꓯꓸꓼ ꓗꓪ ꓫꓱꓽ ꓔꓬ ꓟ ꓔꓯ ꓬꓳ-ꓦ ꓡꓰ ꓟꓳꓸ ꓖꓶˍ ꓕꓯ ꓬꓲ ꓠꓬ ꓠꓲꓹ ꓟ ꓦꓶˍ ꓟ꓾ ꓠꓲꓹ ꓢꓲꓼˍ ꓟ ꓡꓰ ꓐꓰ ꓣꓳ ꓥ ꓟꓲ ꓣꓳ ꓟꓽ ꓙꓲꓻ ꓟ ꓚꓱꓹ ꓟꓽ ꓔꓱꓹ ꓟ ꓚꓱꓹ ꓗꓪ ꓫꓱꓽ ꓔꓬ ꓕꓯ꓾ ꓝꓴꓲꓸ ꓙꓻ ꓖꓴ ꓗꓪ ꓫꓱꓽ ꓔꓬ ꓕꓯ ꓣꓳ ꓔꓯ ꓟꓳꓸ ꓖꓶ ꓡ ꓢꓴ ꓖꓳ ꓕꓲ ꓣꓳ ꓔꓯ ꓣꓳ ꓠꓬ ꓟꓽ ꓙꓲꓻ ꓐꓰ ꓐꓯ ꓔꓬ ꓡ? ꓐꓯˍ ꓟ ꓔꓯ ꓓꓵꓽ ꓙꓽ ꓠꓬꓲ ꓡꓯ=

ꓝꓮꓲ ꓣꓳ ꓠꓬ ꓬꓳ-ꓦ ꓡꓰ ꓐꓰ ꓔꓱꓹ ꓜꓳꓽˍ ꓟ ꓔꓯ ꓐꓯ ꓑꓶꓸ ꓠꓹ ꓟ ꓢꓯꓼ ꓕꓵꓼ ꓙꓰ ꓡꓯ= ꓬꓳ-ꓦ ꓪꓴꓸ ꓓꓵ ꓓꓶꓺ ꓗꓷ ꓟꓶˍ ꓟ ꓑꓮꓲꓽ ꓗꓪ ꓕꓱ ꓢ ꓚꓱꓹ ꓔꓯ ꓓꓵꓽ ꓙꓽ ꓠꓬꓲ ꓢꓲ ꓚꓲꓸ ꓛꓬ ꓚꓳꓽ ꓚꓲꓸ ꓛꓬ ꓦꓰꓼ ꓐ ꓡ ꓢꓲ ꓔꓱꓹ ꓜꓳꓽˍ ꓟ ꓔꓯ ꓪꓳꓻ ꓫꓳꓸ ꓐ ꓡ ꓠꓹ ꓟ ꓐꓱ ꓶ ꓢꓯꓼ ꓕꓵꓼ ꓙꓰ ꓡꓯ=