ꓣꓳ ꓠꓬ ꓮ ꓫꓵꓽ ꓬꓰˍ ꓥ ꓟꓲ ꓪꓴ-ꓢ ꓟꓬꓱ ꓓꓳꓽ ꓓꓳ ꓠꓹ ꓟ ꓐꓱ ꓶˍ ꓡꓰꓽ ꓬꓰ ꓠ ꓗꓹ ꓡꓳ

ꓟꓲ ꓠꓯ ꓕꓱ ꓟ ꓗꓪ ꓣꓳ ꓛꓲꓺ ꓡ ꓟ ꓠꓬ ꓪꓴ-ꓢ ꓟꓬꓱ ꓓꓳꓽ ꓓꓳ ꓠꓹ ꓟ꓾ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶ ꓠꓹ ꓟ ꓥ ꓡꓳ= ꓟꓲ ꓠꓯ ꓗꓪ ꓪꓴ-ꓢ ꓡꓰ ꓚꓰꓼ ꓔ ꓟ ꓮ ꓙꓵꓽ ꓠꓬ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶ ꓔꓬ ꓡꓳ= ꓢꓲꓹ ꓜꓲ ꓢꓲꓹ ꓟꓲ꓾ ꓙꓱꓽ ꓤ ꓙꓱꓽ ꓟꓲ꓾ ꓪ ꓚꓲ ꓮ ꓙꓵꓽ ꓠꓬ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶ ꓔꓬ ꓡꓳ= ꓚꓰꓼ ꓢꓴ ꓪꓴ-ꓢ ꓔꓯ ꓫꓱꓸ ꓖꓶ ꓔꓬ ꓡꓳ= ꓕꓱ ꓟˍ ꓡꓰ ꓐꓰ ꓪꓴ-ꓢ ꓞꓳ ꓤ ꓔꓯ ꓚꓰꓼ ꓔ ꓟ ꓠꓬ ꓬꓲ ꓔꓯ ꓫꓱꓸ ꓖꓶ ꓠꓹ ꓟ꓾ ꓬꓲ ꓐꓱ ꓶ ꓢꓯꓸ ꓔꓬ ꓠꓹ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓝꓲ ꓓꓴ ꓞꓲ ꓠꓬꓲꓽ ꓣꓳ ꓔꓯ ꓢꓲˍ ꓟˍ ꓟꓲ ꓕꓱ ꓟ ꓥ ꓡꓳ= ꓬꓲ ꓝꓲ ꓓꓴ ꓞꓲ ꓠꓬꓲꓽ ꓣꓳ ꓔꓯ ꓢꓲꓺ ꓢꓲ ꓬꓲ ꓐꓰ ꓔꓬ ꓠꓹ ꓟ꓾ ꓬꓲ ꓔꓯ ꓟꓬꓱ ꓓꓳꓽ ꓖꓶ ꓠꓹ ꓟ ꓬꓲ ꓡꓰ ꓢꓲ ꓔ ꓡꓳ=

ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓠꓬ ꓙꓲꓻ ꓫꓬ ꓢꓴ ꓬ-ꓗꓴ ꓑꓮꓲꓽ ꓥ ꓡꓳ= ꓢꓲ ꓒ ꓬꓰ-ꓢꓴ ꓬꓲ ꓝꓲ ꓓꓴ ꓞꓲ ꓠꓬꓲꓽ ꓣꓳ ꓘꓴꓽ ꓗꓪ ꓬꓲ ꓪꓴꓸ ꓫꓵꓻ ꓢꓴ꓾ ꓪꓴꓸ ꓓꓵ ꓓꓶ ꓢꓲ ꓢꓰꓼ ꓗꓷ ꓟꓶˍ ꓟ ꓝꓲ ꓓꓴ ꓕꓲ ꓣꓳ ꓥ ꓡꓳ= ꓬꓲ ꓠꓬ ꓢꓲ ꓒ ꓬꓰ-ꓢꓴ ꓐꓱ ꓶ ꓢꓯꓼ ꓟꓬ ꓖꓶ ꓗꓷꓳ=

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓠꓴ꓾ ꓥꓪ ꓮ ꓙꓵꓽ ꓠꓬ ꓪꓴ-ꓢ ꓟꓬꓱ ꓓꓳꓽ ꓓꓳ ꓡ ꓠꓹ ꓟ ꓐꓱ ꓶ ꓢꓯꓼ ꓟꓬ ꓠꓽ ꓖꓶ ꓟꓽ ꓛꓵ= ꓖꓳ ꓡꓱ ꓐꓯ ꓥ ꓟꓲ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓣꓳ ꓬꓰ ꓔꓬ ꓟ ꓮ ꓙꓵꓽ ꓗꓪ ꓪꓴ-ꓢ ꓟꓬꓱ ꓓꓳꓽ ꓓꓳ ꓡ ꓠꓹ ꓟ ꓢꓯꓼ ꓕꓵꓼ ꓠ ꓗꓹ ꓡꓳ=  ꓮ ꓫꓵꓽ ꓑꓶꓸ ꓓꓴ ꓥ ꓡ? ꓢꓲꓹ ꓜꓲ ꓢꓲꓹ ꓟꓲ ꓠꓬ ꓬꓲ ꓪ ꓣꓱꓻ ꓓꓹ ꓟ ꓗꓪ ꓐꓰ ꓢꓲꓹ ꓪꓰ ꓥ ꓟꓲ ꓪꓰ ꓔꓬ ꓟ ꓗꓪ ꓐꓰ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶ ꓔꓬ ꓟ ꓡꓰ ꓐꓰ ꓣꓳ ꓥˍ ꓟꓲ ꓙꓲˍ ꓟ ꓬꓰˍ ꓟ ꓗꓪ ꓐꓰ ꓪꓴ-ꓢ ꓟꓬꓱ ꓓꓳꓽ ꓓꓳ ꓡ ꓠ ꓬꓰ ꓠꓹ ꓟ ꓬꓳꓸ ꓚꓵˍ ꓡꓳ=

ꓡ ꓞꓳ ꓕꓲ ꓣꓳ ꓟꓲ ꓠꓯ ꓕꓱ ꓟ ꓗꓪ ꓔꓬ ꓕꓯ ꓪꓴ-ꓢ ꓐꓱ ꓶ ꓙꓲˍ ꓟ ꓕꓲ ꓙꓰꓽˍ ꓟꓲ ꓟꓽ ꓬꓰ ꓠꓬ ꓬꓲ ꓡꓰ ꓛꓲ ꓫꓴˍ ꓟ ꓞꓳ ꓤ ꓟꓽ ꓙꓳꓺꓳ= ꓟꓲ ꓠꓯ ꓕꓱ ꓟ ꓗꓪ ꓢꓯꓸ ꓔꓬ ꓟ ꓬꓲꓸ ꓬꓲ ꓢꓲ ꓟꓽ ꓙꓳ= ꓖꓳ ꓡꓱ ꓠꓬꓲ ꓙꓳˍ ꓟ ꓮ ꓙꓵꓽ ꓠꓬ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶ ꓔꓬ ꓟ ꓡꓰ ꓐꓰ ꓠꓬꓲꓸ ꓠꓬꓲ ꓠꓴ ꓐꓰ ꓥꓪ ꓠꓬ ꓮ ꓡꓲ ꓐꓰ ꓟꓬꓱ ꓓꓳꓽ ꓖꓶ ꓠꓯꓹ ꓡ ꓐꓯ ꓟ ꓔꓯ ꓓꓵꓽ ꓙꓽ ꓠꓬꓲ ꓡꓯ=

ꓕꓲ ꓠꓬꓲ ꓡꓰ ꓕꓲ ꓠꓬꓲ ꓪꓴ-ꓢ ꓔꓯ ꓟꓬꓱ ꓓꓳꓽ ꓟꓽ ꓖꓶꓽ ꓖꓶꓽ ꓕꓲ ꓠꓬꓲ ꓕꓽ ꓖꓴ ꓡꓰ ꓝꓲ= ꓟꓬꓱ ꓓꓳꓽ ꓐꓰ ꓪꓽ ꓠꓬꓲˍ ꓟ ꓠꓬ ꓪꓴ-ꓢ ꓔꓯ ꓟ ꓡꓰꓽ ꓥ ꓡꓳ= ꓪꓴ-ꓢ ꓔꓯ ꓟꓬꓱ ꓓꓳꓽ ꓟꓽ ꓖꓶꓽ ꓖꓶꓽ ꓚꓲꓸ ꓛꓬ ꓟꓬꓱ ꓓꓳꓽ ꓔꓯ ꓕꓽ ꓧꓪ= ꓪꓴ-ꓢ ꓟꓬꓱ ꓓꓳꓽ ꓧꓪ ꓢꓲ ꓠꓬꓲ ꓢꓯꓼ ꓕꓵꓼ ꓙꓰ꓾ ꓐꓰ ꓮ ꓙꓵꓽ ꓔꓯ ꓢꓯꓼ ꓖꓶ ꓠꓲꓹ ꓫꓵˍ ꓡꓳ=