ꓢꓷꓸ ꓠꓲꓹ ꓜꓳ ꓜꓴ

ꓡꓴ-ꓘ 11ꓽ47-54

47 ꓠꓴ ꓪꓽ ꓠꓽ ꓫꓸ ꓙꓵˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓒꓵꓽ ꓒ ꓐꓴ ꓡꓰ ꓢꓰꓼ ꓗꓷ ꓟ꓾ ꓟꓷꓽ ꓠꓷꓹ ꓝꓸ ꓢꓴ ꓐꓴ ꓡꓱꓼ ꓜꓴ ꓔꓯ ꓠꓴ ꓪꓽ ꓫꓬꓹ ꓜꓶꓻˍ ꓡꓳ꓿ 48 ꓖꓳ ꓡꓱ ꓠꓬꓲ꓾ ꓠꓴ ꓪꓽ ꓠꓬ ꓠꓴ ꓪꓽ ꓒꓵꓽ ꓒ ꓐꓴ ꓡꓰ ꓢꓰꓼ ꓗꓷ ꓟ ꓟꓷꓽ ꓠꓷꓹ ꓝꓸ ꓢꓴ ꓐꓴ ꓡꓱꓼ ꓜꓴ ꓔꓯ ꓫꓬꓹ ꓜꓶꓻˍ ꓟ ꓠꓬ꓾ ꓬꓲ ꓪꓽ ꓡꓰ ꓬꓰ ꓗꓷ ꓟ ꓔꓯ ꓢꓷꓸ ꓙ ꓟꓳ ꓙˍ ꓟ ꓐꓰ ꓓꓽ ꓔꓳꓹˍ ꓟ ꓥ ꓡꓳ꓿ 49 ꓖꓳ ꓡꓱ ꓠꓬꓲ ꓪꓴ-ꓢ ꓬꓲ ꓙ ꓗꓴꓸ ꓠꓲꓹ ꓡꓰ ꓫꓸ ꓕꓱ ꓗꓷ ꓢꓲ꓾ ꓥꓪ ꓠꓽ ꓬꓲ ꓪꓽ ꓔꓯ ꓟꓷꓽ ꓠꓷꓹ ꓝꓸ ꓢꓴ ꓐꓰ ꓝꓲ ꓓꓴ ꓝꓲ ꓩꓴ ꓗꓷˍ ꓥꓳ꓿ ꓬꓲ ꓪꓽ ꓡꓰ ꓕꓲ ꓐꓱ ꓔꓯ ꓢꓰꓼ ꓗꓷˍ ꓥꓳ꓾ ꓕꓲ ꓐꓱ ꓔꓯ ꓠꓽ ꓗꓸ ꓧꓪˍ ꓥꓳ꓾ ꓐꓯˍ ꓡꓳ꓿ 50 - 51 ꓖꓳ ꓟ ꓑꓶꓸ ꓓꓴ ꓟꓵꓽ ꓔꓶꓺ ꓟꓲ ꓔꓶ ꓕ ꓑꓳꓸ꓾ ꓮ-ꓐꓱ ꓬꓲ ꓫꓵꓽ ꓗꓪ ꓐꓰ ꓔꓲ ꓖꓴˍ ꓐꓰ ꓢꓲꓽ ꓫꓬ ꓦꓲ ꓠꓬꓲꓽ ꓗꓴꓸ ꓚꓸꓼ ꓗꓪ ꓫꓵꓻ ꓗꓷ ꓢꓴ ꓢ-ꓚꓬ-ꓡꓲ-ꓬ ꓬꓲ ꓫꓵꓽ ꓗꓪ ꓛꓲ꓾ ꓟꓷꓽ ꓠꓷꓹ ꓝꓸ ꓢꓴ ꓐꓴ ꓫꓵꓽ ꓔꓯ ꓧꓳꓸ ꓡꓰ ꓝꓲ ꓟ ꓝꓴꓲ ꓠꓬ ꓕꓱ ꓕꓲ ꓤꓶꓻ ꓢꓴ ꓔꓯ ꓟꓯꓻ ꓝꓲˍ ꓥꓳ꓿ ꓥ ꓡꓳ꓾ ꓠꓴ ꓪꓽ ꓔꓯ ꓥꓪ ꓐꓯ ꓖꓶꓽˍ ꓠꓬꓲ꓾ ꓕꓱ ꓕꓲ ꓤꓶꓻ ꓢꓴ ꓔꓯ ꓟꓯꓻ ꓝꓲˍ ꓥꓳ꓿ 52 ꓙꓵꓽ ꓗ ꓒ ꓐꓴꓳ꓾ ꓠꓴ ꓪꓽ ꓠꓽ ꓫꓸ ꓙꓵˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓡꓰ ꓢꓷꓸ ꓠꓲꓹ ꓜꓳ ꓜꓴꓻ ꓔꓯꓹ ꓙꓰ ꓢꓲ꓾ ꓠꓴ ꓪꓽ ꓚꓲꓸ ꓛꓬ ꓠꓽ ꓟꓽ ꓓꓵꓽ ꓙꓰ꓾ ꓓꓵꓽ ꓙꓰˍ ꓐꓰ ꓬꓰ ꓔꓬ ꓢꓴ ꓔꓯˍ ꓟꓲ ꓠꓴ ꓪꓽ ꓗꓽ ꓔ ꓡꓳ꓾ ꓐꓯˍ ꓡꓳ꓿ 53 ꓬꓰ-ꓢꓴ ꓖꓳ ꓗꓪ ꓐꓰ ꓓꓳ ꓙꓰˍ ꓕꓯ꓾ ꓙꓵꓽ ꓗ ꓟꓸ ꓒ ꓐꓴˍ ꓐꓰ ꓒ-ꓡꓲ-ꓢꓷ ꓐꓴ ꓠꓬ ꓬꓰ-ꓢꓴˍ ꓐꓰ ꓦꓶ ꓦꓶˍ ꓡꓰ ꓧꓳꓺ ꓡꓯꓽ ꓘꓳ ꓡ ꓢꓲ꓾ ꓬꓲ ꓔꓯ ꓮꓽ ꓟꓬ ꓫꓵ ꓜꓲꓻ ꓜꓲ ꓟꓵꓺ ꓟꓵ ꓠ ꓠꓬꓲ ꓢꓲ ꓠꓬꓲ꓾ 54 ꓬꓲ ꓐꓯ ꓘꓶꓽ ꓗꓪ ꓐꓰ ꓬꓲ ꓔꓯ ꓠꓸ ꓣꓴ ꓠꓹ ꓟ ꓢꓯꓼ ꓕꓵꓼˍ ꓡꓳ꓿

ꓢꓲꓽ ꓫꓬ ꓕꓳꓽ ꓶ ꓕꓱ ꓟ ꓗꓪ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟ “ꓢꓷꓸ ꓠꓲꓹ ꓜꓳ ꓜꓴ ꓔꓯꓹ ꓙꓰˍ ꓡꓳ” ꓐꓯ ꓟ ꓮ ꓫꓵꓽ ꓔꓯ ꓐꓯ ꓡ? ꓙꓵꓽ ꓗ ꓟꓸ ꓒ ꓐꓴ ꓐꓰ ꓒ-ꓡꓲ-ꓢꓷ ꓐꓴ ꓠꓬ ꓪꓴ-ꓢ ꓐꓯ ꓘꓶꓽ ꓔꓯ ꓞꓳ ꓫꓵꓽ ꓥꓳꓽ ꓗꓪ ꓐꓰ ꓒꓳꓹ ꓐ ꓡ ꓢꓴ ꓥ ꓠꓬꓲ ꓬꓲ ꓪ ꓠꓬ ꓜꓳ ꓜꓴ ꓔꓯꓹ ꓔ ꓡꓳ=

ꓪꓴ-ꓢ ꓐꓯ ꓘꓶꓽ ꓐꓴ ꓔꓯ ꓬꓲ ꓪ ꓡꓰ ꓟꓸ ꓟꓲꓽ ꓒꓶ ꓔ ꓟ ꓠꓬ ꓪꓴ-ꓢ ꓐꓯ ꓔ ꓟ ꓬꓲ ꓟꓸ ꓟꓲꓽ ꓐꓰ ꓟꓽ ꓫꓱꓸ ꓡꓯ ꓘꓳ ꓠꓬꓲ꓾ ꓖꓳ ꓟ ꓔꓯ ꓚꓵꓸ ꓔ ꓠꓬꓲ ꓑ ꓫꓬ ꓐꓴ ꓙ ꓜꓲꓼ ꓟꓽ ꓐ ꓡ= ꓬꓲ ꓪ ꓠꓬ ꓬꓲ ꓚꓲꓸ ꓛꓬ ꓬꓲ ꓪ ꓟꓴꓽ ꓗꓪ ꓗꓴꓷꓼ ꓗ ꓘꓶꓽ ꓚꓵꓸ ꓔ ꓟ ꓡꓰꓽ ꓟꓽ ꓞꓲꓺ꓾ ꓠꓱꓸ ꓐꓯ ꓢꓴ ꓐꓱ ꓶˍ ꓟꓲ ꓪꓴ-ꓢ ꓐꓯ ꓘꓶꓽ ꓔꓯ ꓙ ꓜꓲꓼˍ ꓟꓽ ꓐ ꓡ ꓠꓹ ꓟ ꓚꓵꓸ ꓔ ꓖꓶˍ ꓡꓳ= ꓬꓲ ꓪ ꓠꓬ ꓪꓽ ꓪꓴ ꓘꓳꓹ ꓟ ꓐꓰ ꓠꓲꓹ ꓦꓯꓸ ꓟ ꓗꓪ ꓐꓰ ꓬꓲ ꓪ ꓠꓬ ꓟꓷꓽ ꓠꓷꓹ ꓝ ꓢꓴ ꓐꓴ ꓔꓯ ꓟꓽ ꓘꓳ ꓣꓴ ꓟ ꓡꓰꓽ ꓟꓽ ꓞꓲꓺ ꓪꓴ-ꓢ ꓮ ꓐꓲ ꓥ ꓟ ꓢꓲ ꓒ ꓬꓰ-ꓢꓴ ꓔꓯ ꓥˍ ꓟꓲ ꓘꓳ ꓣꓴ ꓟꓽ ꓐ ꓡ=

ꓝꓮꓲ꓾ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓯ ꓔ ꓟ ꓢꓷꓸ ꓠꓲꓹ ꓜꓳ ꓜꓴ ꓐꓯ ꓟ ꓠꓬ ꓮ ꓫꓵꓽ ꓥ   ꓡ? ꓢꓷꓸ ꓠꓲꓹ ꓜꓳ ꓜꓴ ꓐꓯ ꓟ ꓠꓬ ꓙꓵꓻ ꓠꓲꓹ ꓥ ꓢꓲ꓾ ꓪꓴ-ꓢ ꓐꓯ ꓘꓶꓽ ꓔꓯ ꓠ ꓠˍ ꓟ ꓗꓪ ꓐꓰ ꓡꓰꓽ ꓙꓵꓻ ꓠꓲꓹ ꓠꓯꓸꓼ ꓗꓪ ꓙꓰ ꓐ ꓡˍ ꓡꓳ=

ꓢꓷꓸ ꓠꓲꓹ ꓜꓳ ꓜꓴ ꓠꓬ ꓪꓴ-ꓢ ꓡꓰ ꓣꓳ ꓔꓯ ꓫꓸ ꓕꓱ ꓡ ꓝꓲ ꓢꓲ꓾ ꓪꓴ-ꓢ ꓬꓲ ꓠꓯꓸˍ ꓟ ꓠꓵꓻ ꓠꓲꓹ ꓐꓰ ꓐꓲꓻ ꓓꓰ ꓡꓰˍ ꓟ ꓔꓱꓹ ꓚꓵˍ ꓟ ꓔꓯ ꓣꓳ ꓔꓯ ꓟꓸ ꓖꓶ ꓠꓹ ꓟ ꓥ ꓡꓳ= ꓔꓱꓹ ꓚꓵˍ ꓟ ꓕꓱ ꓟ ꓔꓯ ꓠꓬ ꓪꓽ ꓘꓴˍ ꓟ ꓗꓪ ꓐꓰ꓾ ꓪꓴ-ꓢ ꓐꓰ ꓙ ꓡꓯ ꓘꓳˍ ꓟ ꓗꓪ ꓐꓰ ꓡꓰꓽ ꓘꓳ ꓣꓴ ꓙꓵꓻ ꓐ ꓡˍ ꓡꓳ=

ꓢꓲ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓝ ꓢꓲ ꓐꓯ ꓖꓶ ꓡ ꓔꓬ ꓟ ꓠꓬ꓾ ꓢꓲ ꓒ ꓬꓰ-ꓢꓴ ꓠꓬ ꓜꓳ ꓜꓴ ꓥ ꓡꓳ= ꓬꓲ ꓠꓬ ꓢꓲ ꓒ ꓥ ꓡꓳ꓾ ꓬꓲ ꓠꓬ ꓚꓬꓴꓸ ꓢꓲ ꓒ ꓥ ꓡꓳ ꓐꓰ ꓙꓵꓻ ꓢꓲ ꓘꓳ ꓣꓴ ꓐꓴ ꓐꓱ ꓶ ꓬꓲ ꓠꓬ ꓟꓴꓽ ꓗꓪ ꓗꓹ ꓘꓶꓽ ꓒꓴ ꓖꓶ ꓢꓴ ꓥ ꓡꓳ=

ꓬꓲ ꓠꓬ “ꓪꓴ-ꓢ ꓬꓲ ꓙꓽ ꓗꓴꓸ ꓠꓲꓹ” ꓐꓰ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓚꓰꓺ ꓥ ꓡꓳ= ꓪꓴ-ꓢ ꓔꓬ ꓗꓪ ꓙꓽ ꓣꓳˍ ꓟ ꓠꓲꓹ ꓟ ꓡꓰꓽ ꓓꓵꓽ ꓙꓰ ꓢꓲ꓾ ꓢꓲ ꓒ ꓔꓯ ꓦ ꓡꓱ ꓢꓴ ꓡꓰꓽ ꓙꓽ ꓗꓴꓸ ꓠꓲꓹ ꓕꓱ ꓟ ꓟꓶ ꓪ ꓓꓹ ꓡꓳ= ꓪꓴ-ꓢ ꓠꓬ ꓣꓳ ꓐꓴ ꓔꓯ ꓫꓸ ꓕꓱ ꓠꓹ ꓟ ꓐꓰ ꓬꓲ ꓙꓽ ꓗꓴꓸ ꓠꓲꓹ ꓐꓰ ꓢꓷꓸ ꓠꓲꓹ ꓖꓶ ꓠꓹ ꓟ ꓣꓳ ꓔꓯ ꓮ ꓕꓯ ꓟꓲ ꓦꓴ ꓠꓬꓹ ꓔꓬ ꓡꓳ꓾ ꓐꓰ ꓢꓲꓽ ꓫꓬ ꓕꓳꓽ ꓶ ꓕꓱ ꓟ ꓗꓪ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ=