ꓬꓰ-ꓢꓴ ꓫꓵꓻ ꓠꓹ ꓟ ꓐꓯ ꓟꓸ ꓖꓶˍ ꓟ (ꓬꓳ-ꓦ 12ꓽ24-26)

ꓬꓳ-ꓦ 12ꓽ24-26 ꓗꓪ ꓢꓲ ꓒ ꓬꓰ-ꓢꓴ ꓡꓰ ꓕꓱ ꓡꓱ ꓐꓯ ꓡꓳ= “ꓥꓪ ꓔꓱꓹ ꓔꓱꓹˍ ꓠꓴ ꓪ ꓔꓯ ꓐꓯ ꓖꓶˍ ꓠꓬꓲ ꓜꓻ ꓫꓵꓸ ꓕꓲ ꓢꓶꓽ ꓟꓽ ꓛꓵꓽ ꓡꓰ ꓕꓯ ꓠꓬ ꓬꓲ ꓜꓲ ꓣꓱꓻ ꓡ ꓟꓽ ꓓ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ= ꓬꓲ ꓫꓵꓸ ꓖꓳ ꓟ ꓛꓵꓽ ꓡꓰˍ ꓕꓯ ꓡꓰꓽ ꓬꓲ ꓜꓲꓻ ꓣꓱꓻ ꓡ ꓢꓲ ꓬꓲ ꓢꓶꓽ ꓓꓱꓼ ꓐ ꓡˍ ꓡꓳ= ꓚꓲꓸ ꓛꓬ ꓢꓯꓼ ꓟꓬ ꓔꓯ ꓠꓲꓹ ꓠꓵ ꓢꓴ ꓠꓬ ꓢꓯꓼ ꓟꓬ ꓒꓲꓼ ꓡꓰˍ ꓥꓳ= ꓚꓲꓸ ꓛꓬ ꓢꓯꓼ ꓟꓬ ꓔꓯ ꓟꓽ ꓗꓹ ꓐꓽ ꓐꓽ ꓮ ꓟꓬꓹ ꓐꓱ ꓶ ꓖꓶꓽ ꓢꓴ ꓠꓬ ꓢꓯꓼ ꓟꓬ ꓟꓶˍ ꓥꓳ ꓐꓰ ꓢꓲꓽ ꓫꓬ ꓕꓳ ꓶ ꓗꓪ ꓐꓯ ꓔ ꓡꓳ=

ꓣꓳ ꓡꓲ-ꓢꓴ ꓡꓲ ꓪ ꓐꓴ ꓟꓬꓽ ꓠꓬꓲ ꓠꓬ ꓬꓲ ꓫꓵꓸ ꓫꓵꓸ ꓢꓴ ꓔꓶ ꓜꓽ ꓔꓶ ꓓꓳ ꓢꓴ ꓥ ꓠꓬꓲ ꓕꓱ ꓟ ꓔꓯ ꓢꓷꓸˍ ꓡꓳ= ꓬꓲ ꓫꓵꓸ ꓕꓲꓽ ꓢꓶꓽ ꓬꓲ ꓜꓲꓻ ꓣꓱꓻ ꓓꓳ ꓡ ꓠꓹ ꓟ ꓐꓱ ꓶ ꓧꓶꓸ ꓕꓯ ꓛꓵꓽ ꓡꓰ ꓠ ꓗꓹ ꓡꓳ= ꓮ ꓡꓲ ꓫꓵꓽ ꓬꓲ ꓫꓵꓸ ꓥˍ ꓟꓲ ꓧꓶꓸ ꓕꓯ ꓛꓵꓽ ꓡꓰ ꓕꓯ ꓢꓲꓸ ꓡꓰꓽ ꓬꓲ ꓜꓲ ꓣꓱꓻ ꓡˍ ꓡꓳ= ꓟꓽ ꓛꓵꓽ ꓡꓰ ꓠꓬ ꓬꓲ ꓜꓲꓻ ꓟꓽ ꓣꓱꓻ ꓡ= ꓕꓱ ꓟˍ ꓡꓰ ꓐꓰ ꓣꓳ ꓤꓶꓻ ꓗꓪ ꓠꓲꓹ ꓫꓵˍ ꓟ꓾ ꓟꓽ ꓔꓱꓹ ꓟ ꓟꓽ ꓙꓲꓻ ꓟ ꓔꓯ ꓣꓳ ꓛꓵꓽ ꓡꓰ ꓝꓲ ꓠꓯꓹ ꓡꓳ= ꓛꓵꓽ ꓡꓰ ꓕꓯ ꓠꓬ ꓙꓲˍ ꓟ ꓬꓲ ꓜꓲꓻ ꓣꓱꓻ ꓡˍ ꓡꓳ=

ꓔꓯ ꓥꓳꓽ ꓐꓯ ꓠꓬ ꓢꓲꓹ ꓜꓲ ꓕꓲ ꓜꓲ ꓣꓱ  ꓻ ꓡ ꓠꓹ ꓟ ꓐꓱ ꓶ ꓢꓲꓹ ꓪꓰ ꓕꓲ ꓪꓰ ꓪꓰ ꓡ ꓠꓹ ꓟ ꓐꓱ ꓬꓲ ꓟꓲ ꓔꓯ ꓘꓪ ꓫꓴ ꓢꓲ ꓬꓲꓻ ꓙꓬ ꓧꓳꓽ ꓕꓱ ꓡꓱ ꓬꓰ ꓠ ꓔ ꓡꓳ= ꓬꓲ ꓜꓲ ꓗꓪ ꓣꓱꓽ ꓟꓽ ꓬꓯꓼ ꓟ ꓮ ꓙꓵꓽ ꓔꓯ ꓚꓵꓹ ꓦ ꓗꓷ ꓓꓶꓺ ꓦ ꓗꓷ ꓠꓯꓹ ꓡꓳ= 

ꓕꓱ ꓟˍ ꓡꓰ ꓐꓰ ꓣꓳ ꓤꓶꓻ ꓗꓪ ꓥ ꓟꓲ ꓣꓳ ꓞꓳ ꓙꓳ ꓔꓬ ꓟ ꓦꓬꓼ ꓠꓬꓲ ꓗꓪ ꓣꓳ ꓔꓯ ꓙꓳˍ ꓟ ꓟꓽ ꓙꓲꓻ ꓟ ꓮ ꓙꓵꓽ ꓛꓵꓽ ꓡꓰ ꓝꓲ ꓢꓲ ꓠꓬꓲ ꓙꓲꓻˍ ꓟ ꓬꓲ ꓜꓲ ꓣꓱꓻ ꓡ ꓠꓹ ꓟ ꓣꓳ ꓢꓯꓼ ꓕꓵꓼ ꓠ ꓗꓹ ꓡꓳ= ꓖꓳ ꓡꓱ ꓬꓰˍ ꓕꓯ ꓮ ꓡꓲ ꓥˍ ꓟꓲ ꓣꓳ ꓠꓬ ꓫꓸ ꓙꓵ ꓟꓷꓼ ꓙꓵˍ ꓥꓳ= ꓠꓻˍ ꓟꓲ ꓠꓻ ꓜꓲꓽ ꓪˍ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓡꓳꓹ ꓬꓰˍ ꓕꓯ ꓠꓬ ꓙꓲꓻˍ ꓟ ꓬꓲ ꓢꓶꓽ ꓓꓱꓼ ꓡ ꓠꓹ ꓟ ꓥ ꓡꓳ= ꓛꓵˍ ꓟ ꓬꓲ ꓢꓶꓽ ꓓꓱꓼ ꓡ ꓠꓹ ꓟ ꓥ ꓡꓳ= ꓣꓳ ꓤꓶꓻ ꓔꓯ ꓢꓴ ꓐꓱ ꓶ ꓖꓶˍ ꓕꓯ ꓔꓯꓺ ꓥꓳꓽ ꓬꓲ ꓫꓵꓸ ꓕꓲ ꓢꓶꓽ ꓠꓬ ꓛꓵꓽ ꓡꓰ ꓢꓲ ꓬꓲ ꓜꓲ ꓣꓱꓻ ꓡ ꓢꓲ ꓠꓬꓲ ꓬꓲ ꓢꓶꓽ ꓓꓱꓼ ꓡˍ ꓠꓬ ꓞꓳ ꓤ ꓜꓽ ꓓꓴ ꓐꓱ ꓶ ꓖꓶ ꓡˍ ꓟ ꓡꓰ ꓐꓰ ꓣꓳ ꓤꓶꓻ ꓥ ꓟꓲ ꓣꓳ ꓠꓲꓹ ꓫꓵˍ ꓟ ꓔꓯ ꓫꓵꓻ ꓝꓲ ꓢꓲ ꓮ ꓟꓬꓹ ꓐꓱ ꓶ ꓢꓯꓼ ꓪ ꓟꓶ ꓠꓹ ꓟ ꓐꓱ ꓶ ꓢꓯꓼ ꓕꓵꓼ ꓠ ꓗꓹ ꓡꓳ=

ꓝꓮꓲ ꓔꓯꓺ ꓥꓳꓽ ꓐꓯ ꓠꓬ ꓮ ꓐ ꓮ ꓟ ꓐꓴ ꓠꓬ ꓬꓲ ꓪ ꓤꓶꓻ ꓔꓯ ꓟꓳꓽ ꓡꓰˍ ꓗꓪ ꓛꓲ ꓬꓲ ꓧꓪꓽ ꓡꓱ ꓡꓰˍ ꓗꓪ ꓚꓲ ꓛꓬ ꓤ ꓠꓱ ꓐꓱ ꓶ ꓢꓯꓼ ꓕꓵꓼ ꓢꓲ ꓬꓲ ꓪ ꓤꓶꓻ ꓔꓯ ꓫꓵꓻ ꓡꓰ ꓝꓲˍ ꓡꓳ= ꓤ ꓠꓱ ꓣꓱꓽ ꓢꓴ ꓐꓴ ꓢꓯꓸ ꓡ ꓠꓹ ꓟ ꓐꓱ ꓶ ꓬꓲ ꓪ ꓤꓶꓻ ꓔꓯ ꓫꓵꓻ ꓖꓶˍ ꓟ ꓥ ꓡꓳ= ꓕꓱ ꓟˍ ꓡꓰ ꓐꓰ ꓕꓲ ꓐꓱ ꓠꓬ ꓚꓲꓸ ꓛꓬ ꓗꓴꓷꓼ꓾ ꓚꓲꓸ ꓛꓬ ꓞꓳ ꓫꓵꓽ ꓪꓴꓽ ꓡ ꓟꓴ ꓡ ꓠꓹ ꓟ ꓐꓱ ꓶ ꓚꓲꓸ ꓛꓬ ꓤꓶꓻ ꓔꓯ ꓟꓽ ꓗꓹ ꓐꓽ ꓐꓽ ꓖꓶ ꓗꓷ ꓢꓴˍ ꓟꓲ ꓙꓳˍ ꓡꓳ=

ꓖꓳ ꓡꓱ ꓠꓬꓲ ꓠꓴ ꓐꓰ ꓥꓪ ꓠꓬ ꓚꓲꓸ ꓛꓬ ꓤꓶꓻ ꓔꓯ ꓮ ꓡꓲ ꓣꓱꓽ ꓔꓬ ꓡ꓾ ꓮ ꓟꓬꓹ ꓐꓱ ꓶ ꓚꓲꓸ ꓛꓬ ꓤꓶꓻ ꓔꓯ ꓛꓵꓽ ꓡꓰ ꓝꓲ ꓔꓬ ꓡ꓾ ꓥ ꓠꓬ꓾ ꓚꓲꓸ ꓛꓬ ꓤꓶꓻ ꓔꓯ ꓚꓲꓸ ꓛꓬ ꓐꓱ ꓶˍ ꓡꓰꓽ ꓢꓯꓼ ꓕꓵꓼ ꓔꓬ ꓡ ꓐꓯ ꓟ ꓔꓯ ꓓꓵꓽ ꓙ ꓠꓬꓲ ꓓꓴ ꓥ ꓡꓳ= ꓖꓳ ꓡꓱ ꓠꓬꓲ ꓒꓵꓽˍ ꓟ ꓤꓶꓻ ꓐꓯ ꓟ ꓠꓬ ꓮ ꓟꓬꓹ ꓐꓱ ꓶ ꓢꓯꓼ ꓕꓵꓼˍ ꓟ ꓥ ꓡꓳ ꓐꓯ ꓟ ꓔꓯ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ=