ꓖꓳ ꓓꓱ ꓔꓲꓹ ꓖꓶ ꓢꓴ ꓬꓳ-ꓦ ꓦꓵꓸꓹ ꓡ ꓟ

ꓠꓬꓲꓸ ꓠꓬꓲ ꓟ ꓢꓲ-ꓫꓬ ꓕꓳ ꓝꓲꓼ

ꓶ ꓓꓳ ꓫꓱꓸ ꓓꓳ ꓡꓴ-ꓘ ꓕꓳꓽ ꓶ 1ꓽ57-66ꓹ80

ꓬꓲ-ꓡꓲ-ꓫ-ꓫ ꓑꓷ ꓤ ꓠꓱ ꓦꓵꓸꓹ ꓝꓲꓸ ꓛꓲ ꓡ ꓠꓬ ꓤ ꓕꓲ ꓣꓳ ꓦꓵꓸꓹ ꓡ_ ꓡꓳ= ꓢꓲ ꓒ ꓠꓬ ꓬꓲ ꓔꓯ ꓮ ꓘꓶ ꓛꓲ ꓫꓱꓸ ꓤ_ ꓟ ꓔꓯ ꓠꓶꓽ ꓛꓳꓽ ꓕꓲ ꓛꓚꓳ_ ꓐꓰ ꓬꓲ ꓫꓵꓽ ꓬꓲ ꓧꓪ ꓐꓴ ꓑ ꓙꓽ ꓗꓷ ꓠꓬ-ꓸ ꓬꓲ ꓪ_ ꓟꓲ ꓬꓲ_ ꓐꓰ ꓕꓲ ꓪ_ ꓗꓹ ꓛꓲ_ ꓡꓳ= ꓦꓰꓼ ꓠꓬꓲ ꓕꓲ ꓠꓬꓲ ꓗꓪ-ꓸ ꓬꓲ ꓪ ꓠꓬ ꓤ ꓠꓱ ꓤ ꓔꓯ ꓶ_ ꓟ ꓗ ꓫꓵ ꓬꓰ ꓖꓶ_ ꓐꓰ ꓡ ꓢꓲ-ꓸ ꓬꓲ ꓐꓹ ꓐꓼ ꓔꓯ_ ꓡꓰ ꓐꓰ ꓬꓲ ꓔꓯ_ ꓟꓲ-ꓸ ꓢ-ꓚꓬ-ꓡꓲ-ꓬ-ꓸ ꓟꓬꓱ ꓖꓶ ꓠꓲꓹ ꓫꓵ_ ꓡꓳ= ꓖꓳ ꓡꓱ ꓥ_ ꓟꓲ ꓬꓲ ꓟꓹ ꓟ ꓡꓰ-ꓸ ꓟꓽ ꓥ-ꓸ ꓬꓲ ꓔꓯ-ꓸ ꓬꓳ-ꓦ-ꓸ ꓟꓬꓱ ꓖꓶ ꓠ ꓗꓹ ꓡꓳ-ꓸ ꓐꓯ ꓖꓶ_ ꓡꓳ= ꓬꓲ ꓪ ꓡꓰ ꓬꓲ ꓔꓯ-ꓸ ꓠꓴ ꓫꓵꓽ ꓠꓴ ꓧꓪ ꓗꓳ ꓡꓳ ꓗꓪ ꓖꓳ ꓡꓱ ꓟꓬꓱ ꓔ ꓢꓴ ꓕꓲ ꓣꓳ_ ꓟꓲ ꓟꓽ ꓙꓳ-ꓸ ꓐꓯ_ ꓡꓳ= ꓬꓲ ꓪ ꓡꓰ ꓬꓲ ꓐꓹ ꓐꓽ ꓔꓯ ꓟꓶꓸꓹ ꓥꓳꓽ ꓡꓵꓹ ꓢꓲ-ꓸ ꓬꓲ ꓔꓯ ꓮ ꓡꓲ ꓟꓬꓱ ꓖꓶ ꓠꓲꓹ ꓫꓵ_ ꓡ? ꓐꓰ ꓠ ꓠꓬꓲ_ ꓕꓯ-ꓸ ꓬꓲ ꓠꓬ ꓕꓳ ꓶ ꓐꓳ ꓒꓬꓽ ꓧꓪ ꓢꓲ-ꓸ ꓬꓲ ꓟꓬꓱ ꓠꓬ ꓬꓳ-ꓦ ꓥ ꓡꓳ-ꓸ ꓐꓰ ꓐꓳ ꓓꓳ ꓡ ꓠꓬꓲ-ꓸ ꓬꓲ ꓪ ꓮ ꓙꓵꓽ ꓢꓴ ꓓꓵꓽ ꓙ ꓟꓶꓸꓹ ꓡꓰꓳ= ꓖꓳ ꓕꓯ ꓞꓼ ꓐꓰ ꓢ-ꓚꓬ-ꓡꓲ-ꓬ ꓬꓲ ꓟꓷꓽ ꓠꓷꓹ ꓒꓴ ꓡ ꓢꓲ-ꓸ ꓡ ꓛꓱ_ ꓟꓲ ꓐꓶꓸꓹ ꓡ ꓢꓲ ꓠꓬꓲ-ꓸ ꓪꓴ-ꓢ ꓔꓯ ꓫꓱꓸ ꓖꓶ ꓘꓶꓽ ꓫꓸ ꓕꓱ ꓓꓳꓡ_ ꓡꓳ= ꓖꓳ ꓕꓯ ꓚꓳ ꓡꓳ ꓡꓳ ꓗꓪ ꓔꓬ ꓢꓴ ꓮ ꓙꓵꓽ ꓓꓵꓽ ꓙ ꓟꓶ ꓡꓰ ꓢꓲ-ꓸ ꓓꓳꓽ ꓕꓱ ꓟ ꓠꓬ ꓬꓴ-ꓔ ꓪꓽ ꓚꓲ ꓟꓵꓽ ꓮ ꓙꓵꓽ ꓗꓪ ꓚ ꓒꓬꓱ ꓙꓰ_ ꓡꓳ= ꓓꓳꓽ ꓕꓱ ꓟ ꓔꓯ ꓑ ꓙꓽ ꓢꓴ ꓮ ꓙꓵꓽ ꓠꓬ-ꓸ ꓢꓲ ꓒꓽ ꓪꓴ-ꓢ ꓬꓲ ꓪꓽ ꓠꓬꓲ_ ꓟ ꓠꓬ ꓤ ꓠꓱ ꓤ ꓕꓱ ꓕꓲ ꓣꓳ_ ꓐꓰ ꓛꓳ ꓞꓹ ꓠꓬꓲ-ꓸ ꓤ ꓠꓱ ꓕꓱ ꓟ ꓠꓬ ꓮ ꓡꓲ ꓡꓴ ꓫꓵꓽ ꓕꓲ ꓣꓳ ꓒꓬꓱꓼ ꓡ_ ꓟꓽ ꓢꓷꓸ-ꓸ ꓐꓰ ꓐꓯ ꓡꓯ ꓘꓳ_ ꓡꓳ= ꓤ ꓠꓱ ꓤ ꓠꓬ ꓡꓯꓼ ꓫꓵ ꓪꓴꓽ ꓡ ꓢꓲ ꓦ ꓢꓯꓼ ꓙꓳ ꓡ_ ꓡꓳ= ꓬꓲ-ꓢꓷ-ꓡꓰ ꓡ ꓞꓳ ꓔꓯ ꓟꓳꓸ ꓖꓶ_ ꓟ ꓦꓬꓼ ꓠꓬꓲ ꓟꓽ ꓛꓲ ꓡ ꓕ ꓑꓳꓸ ꓬꓲ ꓠꓬ ꓡꓲ ꓛꓲ ꓗꓪ ꓔꓬ ꓡꓳ=

ꓬꓲ-ꓢ-ꓬ ꓕꓳꓽ ꓶ 49: 1-6

ꓬꓲꓻ ꓗꓳ ꓡꓳ ꓟꓵꓽ ꓮ ꓙꓵꓳ꓾ ꓥꓪ ꓔꓯ ꓠ ꓠꓹ꓿ ꓶꓽ ꓤ ꓗꓪ ꓟ ꓑ ꓫꓬ ꓐꓴꓳ꓾ ꓠ ꓡꓳ꓿ ꓤꓽ ꓘꓶꓻ ꓗꓪ ꓔꓬ_ ꓕꓯ ꓡꓰ ꓬꓰ-ꓧꓳ-ꓧꓪ ꓡꓰ ꓥꓪ ꓔꓯ ꓘꓴ_ ꓡꓳ꓿ ꓥꓪ ꓟꓹ ꓟ ꓖꓳ ꓓꓱ ꓗꓪ ꓔꓬ_ ꓕꓯ ꓡꓰ꓾ ꓬꓲ ꓡꓰ ꓥꓪ ꓟꓬꓱꓺ ꓞꓶ_ ꓡꓳ꓿ꓬꓲ ꓠꓬ ꓥꓪ ꓟꓷ ꓠꓷ ꓔꓯ ꓕꓯꓹ_ ꓟ ꓮ ꓕ ꓪꓴ ꓒꓲꓹ_ ꓡꓰ ꓐꓰ ꓗꓷ ꓡꓰ ꓝꓲ_ ꓡꓳ꓿ ꓬꓲ ꓡꓯ ꓒꓯ ꓶꓻ ꓥꓳꓽ ꓠꓯ ꓘꓪ ꓗꓪ ꓥꓪ ꓔꓯ ꓚꓵ ꓔ_ ꓡꓳ꓿ ꓬꓲ ꓡꓰ ꓥꓪ ꓔꓯ ꓐꓬꓱꓼ ꓡꓱꓼ ꓡꓱꓼ ꓢꓶꓸ ꓔ_ ꓟ ꓚꓬ ꓚꓱꓹ ꓒꓬꓱꓼ ꓡ ꓝꓲꓳ꓿ ꓬꓲ ꓡꓰ ꓥꓪ ꓔꓯ ꓠꓬ ꓬꓲ ꓛꓬꓹ ꓑꓴꓸ ꓠꓯꓸꓼ ꓗꓪ ꓫꓱꓹ ꓚꓵ ꓔ_ ꓡꓳ꓿

ꓖꓳ ꓡꓱ ꓢꓲ ꓬꓲ ꓥꓪ ꓔꓯ꓾ ꓠꓴ ꓠꓬ ꓥꓪ ꓚꓳ ꓑ ꓬꓲ-ꓢꓷ-ꓡꓰ ꓥ ꓡꓳ꓿ ꓥꓪ ꓠꓬ ꓠꓴ ꓠꓯꓸꓼ ꓗꓪ ꓟꓬꓱ ꓓꓳꓽ ꓟꓶ ꓡꓰ_ ꓥꓳ꓾ ꓐꓰ ꓐꓯ_ ꓡꓳ꓿ꓖꓳ ꓡꓱ ꓥ_ ꓟꓲ ꓥꓪ ꓡꓰ꓾ ꓥꓪ ꓢꓯꓼ ꓕꓵ ꓪꓴ ꓧꓶ ꓗꓷ_ ꓟ ꓠꓬ ꓮꓽ ꓔꓳ_ ꓡꓰꓽ ꓥ ꓡꓳ꓿ ꓥꓪ ꓢꓯꓼ ꓣꓱ ꓗꓷ_ ꓟ ꓠꓬ ꓬꓲ ꓖꓳꓽ ꓥ ꓡꓳ꓿ ꓖꓳ ꓡꓱ ꓥ_ ꓟꓲ ꓥꓪ ꓟꓶ ꓙꓲꓽ ꓙꓳ_ ꓟ ꓠꓬ ꓬꓰ-ꓧꓳ-ꓧꓪ ꓠꓯꓸꓼ ꓗꓪ ꓥ ꓡꓳ꓿ ꓥꓪ ꓡꓯ ꓫꓴ_ ꓟꓲ ꓥꓪ ꓪꓴ-ꓢ ꓠꓯꓸꓼ ꓗꓪ ꓥ ꓡꓳ꓾ ꓐꓯ_ ꓡꓳ꓿

ꓬ-ꓗꓴ ꓕꓲ ꓫꓵ ꓟ ꓔꓯ ꓬꓲ ꓔꓬ ꓗꓪ ꓧꓳꓽ ꓬꓲꓼ ꓡ ꓝꓲ ꓠꓹ ꓟ_ ꓐꓰ ꓬꓲ-ꓢꓷ-ꓡꓰ ꓐꓴ ꓔꓯ ꓬꓲ ꓖꓽ ꓙꓬ ꓗꓪ ꓜꓲꓼ ꓡ ꓝꓲ ꓠꓹ ꓟ꓾ ꓤꓽ ꓘꓶ ꓗꓪ ꓔꓬ_ ꓕꓯ ꓡꓰ ꓬꓲ ꓚꓳ ꓑ ꓬꓰ ꓠꓹ ꓟ ꓥꓪ ꓔꓯ ꓚꓰꓼ ꓢꓴ ꓬꓰ-ꓧꓳ-ꓧꓪ ꓡꓰ ꓕꓱ ꓡꓱ ꓐꓯ_ ꓡꓳ꓾ (ꓮ ꓡꓲꓳ ꓐꓯ ꓠꓬ ꓬꓰ-ꓧꓳ-ꓧꓪ ꓒꓬꓱ ꓕꓯ ꓗꓪ ꓥꓪ ꓠꓬ ꓒꓵꓽ_ ꓟ ꓥ ꓢꓲ꓾ ꓥꓪ ꓪꓴ-ꓢ ꓠꓬ ꓥꓪ ꓪꓽ ꓠꓬꓲ_ ꓟ ꓢꓯꓼ ꓒꓬꓱꓼ ꓡꓻꓳ)꓿ꓥ ꓡꓳ꓾ ꓬꓲ ꓡꓰ ꓕꓱ ꓡꓱ ꓐꓯ_ ꓡꓳ꓾ ꓠꓴ ꓠꓬ ꓥꓪ ꓚꓳ ꓑ ꓬꓰ ꓢꓲ ꓬ-ꓗꓴ ꓞꓳ ꓪꓳꓼ ꓐꓴ ꓔꓯ ꓔꓴ ꓡ ꓝꓲ ꓢꓲ꓾ ꓬꓲ-ꓢꓷ-ꓡꓰ ꓐꓴ ꓗꓪ ꓫꓺ ꓗꓶ ꓔ_ ꓟ ꓕꓲ ꓧꓳꓽ ꓔꓯ ꓬꓲꓼ ꓡ ꓝꓲ ꓠꓹ ꓟ ꓠꓬ꓾ ꓣꓳ_ ꓟ ꓕꓲ ꓫꓵ ꓥ ꓢꓰꓽ ꓡꓳ꓿ ꓥꓪ ꓢꓯꓼ ꓟꓬ ꓝ_ ꓟ ꓣꓱ ꓛꓰ ꓠꓬ ꓟꓲ ꓠꓯ ꓑꓶꓸ ꓗꓪ ꓛꓲ ꓬꓰ ꓝꓲ ꓠꓹ ꓟ_ ꓟꓲ꓾ ꓥꓪ ꓠꓬ ꓠꓴ ꓔꓯ ꓐꓶ ꓞꓳ ꓠꓬꓲ ꓟꓳ ꓓꓴ ꓬꓰ ꓝꓲ_ ꓥꓳ꓾ ꓐꓯ_ ꓡꓳ꓿

ꓝꓲ ꓓꓴ ꓕꓳꓽ ꓶ 13: 22 -26

ꓬꓲ ꓡꓰ ꓬꓲ ꓔꓯ ꓣꓴ ꓦ ꓗꓷ ꓠꓬ꓾ ꓬꓲ ꓪꓽ ꓪ ꓔꓲ ꓣꓱꓽ ꓠꓹ ꓟ ꓓ-ꓪꓵ ꓔꓯ ꓔꓴ ꓡ ꓝꓲ_ ꓡꓳ꓿ ꓬꓲ ꓐꓱ ꓶ_ ꓟꓲ ꓢꓷ ꓙ ꓟꓳ ꓙ ꓢꓲ ꓕꓱ ꓡꓱ ꓐꓯ_ ꓡꓳ꓾ ꓥꓪ ꓠꓲꓹ ꓟ ꓔꓯ ꓛꓳ ꓢꓲ꓾ ꓥꓪ ꓠꓲꓹ ꓡꓶꓽ ꓮ ꓙꓵ ꓬꓰ ꓠꓹ ꓟ ꓡ ꓞꓳ꓾ ꓬꓰ-ꓫꓲ ꓬꓲ ꓤꓽ ꓓ-ꓪꓵ ꓕꓲ ꓣꓳ ꓔꓯ ꓥꓪ ꓧꓪ ꓟꓶ_ ꓡꓳ꓾ ꓐꓯ_ ꓡꓳ꓿ꓬꓲ ꓙ ꓟꓳ ꓘꓶꓽ ꓔꓯ ꓛꓳ ꓢꓲ꓾ ꓡ ꓞꓳ ꓕꓱ ꓕꓲ ꓣꓳ ꓬꓲ ꓞꓲ ꓤ ꓡꓯꓹ ꓤ ꓗꓪ ꓐꓰ꓾ ꓪꓴ-ꓢ ꓡꓰ ꓬꓲ-ꓢꓷ-ꓡꓰ ꓡ ꓞꓳ ꓔꓯ ꓚꓬꓴ ꓢꓲꓺ ꓒ ꓬꓰ-ꓢꓴ ꓕꓲ ꓣꓳ ꓖꓶ ꓡ_ ꓡꓳ꓿ꓬꓲ ꓟꓽ ꓓꓳ ꓡ ꓕꓯ ꓡꓰ꓾ ꓬꓳ-ꓦ ꓠꓬ ꓬꓲ-ꓢꓷ-ꓡꓰ ꓑ ꓫꓬ ꓐꓴ ꓔꓯ꓾ ꓓꓵ ꓙ ꓒꓳꓹ ꓬꓲꓼ ꓡ ꓢꓲ ꓖꓳ ꓓꓱ ꓔꓲꓹ_ ꓟ ꓟꓸ ꓟꓲ ꓚ ꓟꓸ ꓖꓶ_ ꓡꓳ꓿ꓬꓳ-ꓦ ꓬꓲ ꓦꓬꓼ ꓠꓬꓲ ꓖꓴ ꓡꓰ_ ꓐꓰ ꓬꓰ_ ꓕꓯ꓾ ꓬꓲ ꓡꓰ꓾ ꓥꓪ ꓮꓽ ꓟ ꓥ ꓟ ꓠꓴ ꓪ ꓮ ꓡꓲ ꓓꓵ ꓙ_ ꓡꓳꓺꓽ꓿ ꓥꓪ ꓠꓽ ꓙꓲ-ꓢꓴ ꓟꓽ ꓥ꓿ ꓖꓳ ꓡꓱ ꓥ_ ꓟꓲ ꓥꓪ ꓗ ꓠꓯ ꓢꓲ ꓗꓪ ꓕꓲ ꓣꓳ ꓡ_ ꓡꓳ꓿ ꓬꓲ ꓛꓲ ꓒꓯꓹ ꓗꓪ ꓟ ꓛꓲ ꓠꓲ ꓒꓶꓻ ꓖꓶ ꓠꓹ ꓟ_ ꓟꓲ ꓥꓪ ꓟꓽ ꓒꓵꓽ꓾ ꓐꓯ_ ꓡꓳ꓿ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ-ꓐ-ꓡ-ꓦ ꓕꓲ ꓚꓰꓺ ꓟ ꓞꓲ ꓤ ꓡꓯꓹ ꓤ ꓐꓴ_ ꓐꓰ꓾ ꓠꓴ ꓪ ꓗꓳ ꓡꓳ ꓗꓪ ꓟ ꓪꓴ-ꓢ ꓔꓯ ꓙꓳꓺ ꓒꓵꓽ ꓢꓴ ꓐꓴꓳ꓾ ꓢꓯꓼ ꓟꓬ ꓝ ꓟ ꓐꓯ ꓘꓶ ꓕꓱ ꓟ ꓠꓬ ꓣꓳ ꓔꓯ ꓦꓻ ꓖꓶ ꓩꓴ ꓡ_ ꓡꓳ꓿