ꓗ ꓘꓶꓽ ꓦꓴ ꓠꓬꓹ ꓢꓴ ꓔꓯ ꓥꓳꓽ

 ꓦꓲ ꓢꓲꓺ ꓒ ꓠꓬ ꓘꓴꓽ ꓒ ꓮ ꓡꓲ ꓕꓲ ꓙꓵꓹ ꓗꓪ ꓡ_ ꓟ ꓢꓷ_ ꓕꓯ ꓠꓽ꓾ ꓬꓲ ꓠꓬ ꓧꓪꓸ ꓛꓲ ꓐꓰ ꓔꓬ ꓢꓲ ꓬꓲ ꓦꓲ ꓔꓯ ꓟꓽ ꓕꓴꓻ ꓦꓱꓹ ꓡꓰ ꓝꓲ ꓡꓳ ꓫꓵꓽ ꓥ ꓡꓳ꓿ ꓕꓱ ꓟ ꓠꓽ ꓠꓴ ꓪ ꓢꓷ ꓔꓸ꓿ ꓠꓴ ꓪ_ ꓟꓲ ꓙꓽ ꓖꓶ ꓔ꓾ ꓮ ꓡꓲꓳ ꓐꓯ ꓠꓬ ꓠꓴ ꓪ ꓓꓵ ꓙ ꓟꓽ ꓛꓲ ꓟ ꓕꓲ ꓙꓵꓹ ꓗꓪ ꓡ ꓞꓳ ꓮ ꓐꓲ ꓡ_ ꓥꓳ꓾ ꓐꓯ_ ꓡꓳ꓿ ꓒꓲ-ꓕꓱ ꓡꓰ꓾ ꓢꓲꓺ ꓒꓽꓳ꓾ ꓔꓯꓺ ꓥꓳꓽ ꓕꓱ ꓟ ꓠꓬ ꓥꓪ ꓠꓴꓽ ꓔꓯ_ ꓡꓰꓽ ꓐꓯ_ ꓟ ꓥ ꓡꓺꓽ꓾ ꓥ ꓠꓬ ꓮ ꓙꓵ ꓢꓴ ꓔꓯ_ ꓟꓲ ꓐꓯ_ ꓡꓺꓽ꓾ ꓐꓯ_ ꓡꓳ꓿ ꓢꓲꓺ ꓒ ꓡꓰ ꓕꓱ ꓡꓱ ꓐꓯ_ ꓡꓳ꓾ ꓦꓲ ꓢꓲꓺ ꓒ ꓠꓬ ꓬꓲ ꓚꓲ ꓛꓬ ꓦꓲ ꓗꓪ ꓟ ꓡ ꓞꓳ ꓔꓯ ꓙꓵꓽ ꓝꓲ ꓢꓲ꓾ ꓬꓲ ꓝꓲꓸ ꓛꓲ ꓡ ꓠꓬ ꓬꓲ ꓪ ꓔꓯ ꓜꓻ ꓐꓱ ꓖꓶ ꓜꓽ ꓢꓴ꓾ ꓦ ꓡꓱ ꓐꓳ_ ꓟ_ ꓐꓰ ꓢꓷ ꓠꓲꓹ ꓙꓳ_ ꓟ ꓦꓲ ꓙꓵꓽ ꓢꓴ ꓠꓬ ꓮꓽ ꓟ ꓥ ꓡꓳꓺꓽ꓿ ꓢꓲꓺ ꓒ ꓛꓲ ꓡ_ ꓕꓯ꓾ ꓬꓲ ꓚꓳ ꓑ ꓕꓱ ꓡꓱ ꓬꓰ ꓔꓬ_ ꓟ ꓔꓯ ꓡꓳꓸ ꓟꓳ_ ꓠꓬ꓾ ꓚꓳ ꓑ ꓖꓳ ꓟ ꓠꓽ ꓶꓼ ꓙꓳ ꓫꓱꓹ ꓙꓳ_ ꓡꓳ꓿ ꓥꓪ ꓠꓴ ꓪ ꓔꓯ ꓔꓱꓹ ꓔꓱ_ ꓐꓰ ꓐꓯ ꓖꓶ_ ꓠꓬꓲ꓾ ꓬꓲ ꓔꓯ ꓠꓬ ꓬꓲ ꓢꓲꓺ ꓒ ꓔꓯ ꓙꓳ_ ꓟ ꓥ ꓕ ꓑꓳ ꓔꓯ ꓙꓵꓽ ꓝꓲ_ ꓥꓳ꓿ ꓖꓳ ꓡꓱ ꓥ_ ꓟꓲ ꓚꓳ ꓑ ꓖꓳ ꓟ ꓬꓲ ꓠꓲꓹ ꓟ ꓗꓪ꓾ ꓥꓪ ꓢꓲꓺ ꓒ ꓠꓲꓹ ꓞ ꓟꓽ ꓡ ꓠꓳꓹ꓾ ꓐꓰ ꓐꓯ ꓢꓲ꓾ ꓚꓳ ꓑꓸ ꓚꓳ ꓟ ꓐꓴ ꓔꓯ ꓓꓶꓽ ꓢꓲ ꓠꓬꓲ꓾ ꓜꓽ ꓠꓬꓲ ꓓꓳ ꓠꓬꓲ ꓙꓲꓻ ꓒꓶꓽ ꓬꓲꓼ ꓠꓬꓲ ꓬꓰ ꓪꓴꓸ ꓔꓴ ꓡ_ ꓕꓯ ꓠꓽ꓾ ꓬꓲ ꓟꓽ ꓡꓳꓸ ꓔꓬ_ ꓟ ꓦꓬꓼ ꓠꓬꓲ_ ꓐꓰ꓾ ꓬꓲ ꓟꓽ ꓢꓷ ꓟ ꓕꓲ ꓙꓵꓹ ꓗꓪ ꓠꓬ ꓬꓲ ꓢꓲꓺ ꓒ ꓡ ꓢꓲ꓾ ꓬꓲ ꓔꓯ ꓛꓬꓻ ꓒꓵ ꓡꓲꓽ ꓡꓲꓽ_ ꓡꓰ ꓖꓶ ꓢꓲ ꓠꓬꓲ꓾ ꓦ ꓡꓱ ꓟꓽ ꓐꓳ ꓢꓴ_ ꓐꓰ ꓕꓲ ꓪꓺꓼ ꓬꓲ ꓔꓯ ꓐꓱꓺ ꓗꓷ_ ꓥꓳ꓿ ꓬꓲ ꓢꓲꓺ ꓒ ꓠꓲꓹ ꓡꓶ ꓔꓯ ꓢꓷ_ ꓥ_ ꓟꓲ꓾ ꓬꓲ ꓙꓽ_ ꓟꓲ ꓟꓽ ꓙꓽ ꓖꓶ꓾ ꓬꓲ ꓢꓲꓺ ꓒ ꓠꓲꓹ ꓡꓶ ꓔꓯ_ ꓟꓲ ꓟꓽ ꓛꓳ ꓟ ꓚꓳ ꓑ ꓖꓳ ꓕꓲ ꓣꓳ ꓔꓯ ꓮ ꓘꓶ ꓓꓶꓽ_ ꓥꓳ꓿ ꓖꓳ ꓡꓱ ꓥ_ ꓟꓲ ꓟꓽ ꓢꓷ ꓟ ꓖꓳ ꓕꓲ ꓣꓳ ꓓꓶꓽ ꓙꓲꓽ ꓙꓳ_ ꓟ ꓬꓰ_ ꓕꓯ ꓠꓽ꓾ ꓬꓲ ꓔꓯ ꓠꓲꓸ ꓠꓬꓲ ꓤ ꓓꓶꓽ_ ꓥꓳ꓿ ꓮꓽ ꓟ ꓔꓯ ꓟꓬꓽ ꓠꓬꓲ ꓖꓶ ꓔ_ ꓠꓬ꓾ ꓮ ꓟ ꓔꓯ ꓟꓬꓽ ꓠꓬꓲ ꓧꓪ_ ꓥꓳ꓿ ꓮꓽ ꓟ ꓔꓯ ꓟꓬꓽ ꓠꓬꓲ ꓡꓯꓼ ꓙꓱ ꓔ_ ꓠꓬ꓾ ꓮ ꓟ ꓔꓯ ꓟꓬꓽ ꓠꓬꓲ ꓧꓪ_ ꓥꓳ꓿  

ꓡꓴ-ꓘ ꓕꓳꓽ ꓶ 12: 39-48