ꓘꓷ-ꓠꓤ ꓟꓶ ꓤ ꓬꓲ ꓙꓵꓸꓹ ꓠꓲꓹ

ꓟ-ꓕꓲ ꓕꓳꓽ ꓶ 15: 21-28

 ꓬꓰ-ꓢꓴ ꓠꓬ ꓖꓳ ꓗꓪ ꓐꓰ ꓓꓳ ꓙꓰ ꓢꓲ꓾ ꓕꓲ-ꓬ_ ꓐꓰ ꓢꓲ-ꓓꓳ ꓟꓵ ꓗꓪ ꓙꓵꓺ ꓙꓰ ꓠꓬ꓾ ꓠꓬꓲ ꓠꓹ꓾ ꓟꓵꓽ ꓖꓳ ꓟ ꓗꓪ ꓔꓬ ꓢꓴ ꓘꓷ-ꓠ ꓤ ꓟꓶ ꓤ ꓕꓲ ꓣꓳ ꓓꓳ ꓡ ꓢꓲ ꓕꓱ ꓡꓱ ꓘꓴꓻ_ ꓡꓳ꓾ ꓢꓲ ꓒꓽꓳ꓾ ꓓ-ꓪꓵ ꓞꓲ ꓤ ꓡꓯ ꓤꓽꓳ꓾ ꓥꓪ ꓔꓯ ꓫꓱꓸ ꓤ ꓙ ꓡꓯ꓿ ꓥꓪ ꓮꓸ ꓟꓲꓽ ꓤ ꓔꓯ ꓠꓬ ꓠꓲꓽ ꓜꓶꓽ ꓞ_ ꓠꓬꓲ ꓮ ꓘꓶ ꓫꓸ ꓙꓵ_ ꓡꓳ꓾ ꓐꓯ_ ꓡꓳ꓿ ꓖꓳ ꓡꓱ ꓥ_ ꓟꓲ ꓬꓰ-ꓢꓴ ꓠꓬ ꓬꓲ ꓔꓯ ꓕꓲ ꓘꓶꓽ_ ꓟꓲ ꓟꓽ ꓒꓳꓹ ꓖꓶ꓿ ꓬꓲ ꓛꓳ ꓒꓯꓹ ꓐꓴ ꓠꓬ ꓬꓲ ꓔꓯ ꓡ ꓢꓲ ꓕꓱ ꓡꓱ ꓐꓯ_ ꓡꓳ꓾ ꓬꓲ ꓣꓳꓽ ꓗ ꓠꓯ ꓢꓲ ꓗꓪ ꓘꓴꓻ ꓔꓬ_ ꓠꓬꓲ꓾ ꓬꓲ ꓔꓯ ꓙꓰ ꓝꓲ꓾ ꓐꓰ ꓓꓰꓽ_ ꓡꓳ꓿ ꓬꓲ ꓡꓰ ꓒꓳꓹ ꓖꓶ ꓢꓲ꓾ ꓬꓲ-ꓢꓷ-ꓡꓰ ꓦꓲ ꓗꓪ ꓒꓲꓼ ꓬꓰ_ ꓟ ꓮ ꓣꓳ ꓔꓯ_ ꓡꓰꓽ ꓟꓽ ꓥ ꓠꓬ꓾ ꓥꓪ ꓔꓯ ꓟꓽ ꓝꓲ ꓩꓴ ꓔ꓾ ꓐꓯ_ ꓡꓳ꓿ ꓬꓲ ꓠꓽ ꓬꓲ ꓔꓯ ꓪꓴ ꓓꓵ ꓕꓱꓼ ꓡ ꓢꓲ꓾ ꓢꓲ ꓒꓽꓳ꓾ ꓥꓪ ꓔꓯ ꓬꓰ ꓙ ꓡꓯ꓾ ꓐꓯ_ ꓡꓳ꓿ ꓖꓳ ꓡꓱ ꓠꓬ ꓬꓲ ꓡꓰ ꓒꓳꓹ ꓖꓶ ꓢꓲ꓾ ꓤ ꓠꓱ ꓐꓴ ꓫꓪ ꓒꓵꓼ ꓣꓴ ꓢꓲ ꓮ ꓠꓽ ꓔꓯ ꓡꓳꓺ ꓖꓶ ꓜꓽ ꓙꓲꓽ ꓟꓽ ꓙꓳ꓾ ꓐꓯ_ ꓡꓳ꓿ ꓬꓲ ꓠꓽ꓾ ꓥ ꓡꓳ꓾ ꓢꓲ ꓒꓽꓳ꓾ ꓬꓲ ꓢꓲ ꓒ ꓢꓽ ꓡ ꓗꓪ ꓐꓰ ꓞꓰꓻ ꓡꓰ ꓟ ꓜꓻ ꓟꓰꓽ ꓠꓬ꓾ ꓮꓸ ꓠꓽ_ ꓟꓲ ꓜꓽ_ ꓡꓳ꓾ ꓐꓯ_ ꓡꓳ꓿ ꓖꓳ ꓕꓯ ꓬꓰ-ꓢꓴ ꓡꓰ ꓒꓳꓹ ꓖꓶ ꓢꓲ ꓬꓲ ꓔꓯ꓾ ꓤ ꓟꓶ ꓤꓽꓳ꓾ ꓠꓴ ꓙꓵꓻ ꓠꓲꓹ ꓠꓽ ꓪꓴꓽ_ ꓡꓳ꓿ ꓠꓴ ꓠꓵ_ ꓟ_ ꓡꓰ ꓐꓰ ꓠꓴ ꓔꓯ ꓒꓬꓱꓼ ꓡ ꓝꓲ꓾ ꓐꓯ_ ꓡꓳ꓿ ꓖꓳ ꓕꓲ ꓑꓹ ꓗꓪ ꓬꓲ ꓮꓸ ꓟꓲꓽ ꓤ ꓓꓻ ꓡꓰꓳ꓿