ꓘꓹ-ꓒꓱ-ꓠꓴ ꓜꓲꓼ ꓦꓲ ꓗꓪ ꓠꓽ ꓖꓼ ꓓꓳ ꓗꓷˍ ꓟ

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓙꓵꓽ ꓢꓴ ꓧꓪꓸ  ꓧꓪꓸꓼ꓾

ꓣꓳ ꓞꓲꓼ ꓣꓳˍ ꓕꓯ ꓢꓷꓸ ꓔ ꓟ ꓠꓬ ꓟꓽ ꓫꓬ ꓫꓵꓽ ꓠꓲꓽ꓾ ꓠꓲꓽ ꓢ-ꓓꓯ ꓐꓯ ꓟ ꓠꓬ ꓡꓳ ꓘꓴꓽ ꓡꓳ ꓟꓲ꓾ ꓪ ꓚꓲ ꓪ ꓐ꓾ ꓢꓲꓹ ꓜꓲ ꓢꓲꓹ ꓐ ꓐꓰ ꓭ ꓘꓴ꓾ ꓥ ꓠꓬ꓾ ꓠꓲꓽ ꓔꓬꓹ ꓠꓸ ꓟ꓾ ꓟꓽ ꓫꓬ ꓫꓵꓽ ꓔꓬ ꓠꓸ ꓟ ꓔꓬꓹ ꓖꓴ ꓙꓳˍ ꓗꓪ ꓡꓰꓽ ꓠꓲꓽ ꓔꓬ ꓡꓳ꓾ ꓐꓰ ꓣꓳ ꓢꓷ ꓔ ꓡꓳ=  ꓖꓳ ꓡꓱ ꓥ ꓟꓲ ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳ ꓶ ꓥ ꓟ ꓡꓴ-ꓘ 4ꓽ31-37 ꓗꓪ ꓡ ꓞꓳ ꓕꓲ ꓣꓳ ꓠꓬ ꓪꓽ ꓘꓴ ꓦꓲ ꓠꓲꓽ ꓜꓶꓽ ꓞꓹ ꓢꓲ ꓢꓲꓺ ꓒ ꓬꓰ-ꓢꓴ ꓓꓵꓽ ꓡ ꓕꓯ ꓢꓲ ꓒ ꓬꓰ-ꓢꓴ ꓔꓯ ꓖꓼ ꓓꓳ ꓠꓲꓹ ꓫꓵˍ ꓟ ꓟꓸ ꓟꓲꓽ ꓥ ꓡꓳ= 

ꓢꓲꓺ ꓒ ꓬꓰ-ꓢꓴ ꓡꓰ ꓢꓲꓺ ꓒ ꓦꓬꓼ ꓠꓬꓲ ꓛꓲꓺ ꓡ ꓕꓯ ꓪ ꓘꓴ ꓦꓲ ꓗꓪ ꓓꓵꓽ ꓙꓰ ꓢꓲ ꓪꓴ-ꓢ ꓟꓸ ꓟꓲꓽ ꓚ ꓖꓶˍ ꓡꓳ= ꓖꓳ ꓡꓱ ꓥ ꓟꓲ ꓖꓳ ꓗꓪ ꓠꓲꓽ ꓜꓶꓽ ꓞꓹ ꓢꓴ ꓕꓲ ꓣꓳ ꓠꓬ ꓢꓲꓺ ꓒ ꓬꓰ-ꓢꓴ ꓔꓯ ꓡ ꓢꓲ꓾ ꓠꓴ ꓠꓬ ꓥꓪ ꓠꓴꓽ ꓐꓰ ꓮ ꓫꓵꓽ ꓗꓴꓸ ꓙꓲꓽ ꓙꓳˍ ꓡ= ꓬꓲ ꓙꓵꓹ ꓟꓽ ꓛꓲꓺ ꓡ ꓕꓯ ꓡꓰ ꓥꓪ ꓠꓴꓽ ꓔꓯ ꓖꓼ ꓓꓳ ꓗꓷ ꓠꓹ ꓟ꓾ ꓒꓬꓹ ꓗꓷ ꓠꓹ ꓟ ꓬꓰˍ ꓡ ꓐꓰ ꓐꓯ ꓡꓳ= ꓢꓲꓺ ꓒ ꓬꓰ-ꓢꓴ ꓡꓰ ꓬꓲ ꓔꓯ ꓓꓳ ꓙꓰ ꓨ꓾ ꓐꓯ ꓢꓲ ꓪꓽ ꓘꓴ ꓦꓲ ꓘꓴꓽ ꓗꓪ ꓐꓰ ꓬꓲ ꓔꓯ ꓖꓼ ꓓꓳ ꓗꓷˍ ꓟ ꓟꓸ ꓟꓲꓽ ꓥ ꓡꓳ=

ꓖꓳ ꓡꓱ ꓠꓬꓲ ꓪꓽ ꓘꓴ ꓦꓲ ꓗꓪ꓾ ꓢꓲꓽ ꓫꓬ ꓦꓲ ꓗꓪ ꓮ ꓡꓰ ꓗꓹ ꓠꓬꓲ ꓠꓲꓽ ꓜꓶꓽ ꓞꓹ ꓢꓴ ꓔꓬ ꓡ= ꓮ ꓫꓵꓽ ꓪꓴꓸ ꓠꓬꓲ ꓠꓲꓽ ꓠꓬ ꓪꓽ ꓘꓴ ꓦꓲ ꓗꓪ ꓔꓬ ꓡ ꓐꓯ ꓟ ꓔꓯ ꓣꓳ ꓓꓵꓽ ꓙ ꓠꓬꓲ ꓓꓴ ꓥ ꓡꓳ= ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓐꓯ ꓟꓳꓸ ꓖꓶ ꓡ ꓔꓬ ꓟ ꓠꓬ꓾ ꓕꓲꓽ ꓠꓬ꓾ ꓣꓳ ꓕꓲ ꓠꓬꓲ ꓕꓲ ꓠꓬꓲ ꓪꓽ ꓘꓴ ꓔꓬ ꓥ ꓟꓲ꓾ ꓕꓲ ꓠꓬꓲ ꓕꓲ ꓠꓬꓲ ꓙꓲˍ ꓟ ꓬꓰ ꓔꓬ ꓥ ꓟꓲ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓥ ꓟꓲ ꓠꓲꓽ ꓢ-ꓓꓯ ꓔꓯ ꓫꓱꓸˍ ꓟ꓾ ꓠꓲꓽ ꓢ-ꓓꓯ ꓟꓬꓱꓽ ꓥ ꓟ꓾ ꓦꓯꓸ ꓠꓲꓹ ꓙꓵꓽˍ ꓟ꓾ ꓟꓽ ꓢꓲꓽ ꓟꓽ ꓫꓬ ꓬꓰˍ ꓟ꓾ ꓟꓬ ꓔꓳꓹ ꓟ꓾ ꓐꓴˍ ꓟ ꓮ ꓙꓵꓽ ꓠꓬ ꓠꓲꓽ ꓢ-ꓓꓯ ꓔꓯ ꓫꓱꓸˍ ꓟ ꓥ ꓡꓳ= ꓣꓳ ꓠꓲꓹ ꓟ ꓥˍ ꓟꓲ ꓢꓲꓽ ꓫꓬ ꓦꓲ ꓥ ꓡꓳ= ꓢꓲꓽ ꓫꓬ ꓕꓳ ꓶ ꓗꓪ ꓓꓹ ꓟ ꓡꓰ ꓐꓰ ꓣꓳ ꓠꓲꓹ ꓟ ꓠꓬ ꓪꓴ-ꓢ ꓔꓬ ꓖꓴ ꓥ ꓡꓳ= ꓖꓳ ꓡꓱ ꓥ ꓟꓲ ꓣꓳ ꓠꓬ ꓪꓴ-ꓢ ꓔꓬ ꓖꓴ ꓐꓯ ꓔ ꓥˍ ꓟꓲ ꓣꓳ ꓠꓲꓹ ꓟ ꓠꓬ ꓟꓽ ꓢꓲꓽ ꓟꓽ ꓫꓬ ꓟ ꓔꓯ ꓠꓲꓹ ꓥꓳ ꓔ ꓢꓲ꓾ ꓟꓽ ꓙꓲꓻ ꓟ ꓔꓯ ꓡꓰꓽ ꓠꓲꓹ ꓥꓳ ꓔꓬ ꓠꓬ꓾ ꓣꓳ ꓠꓲꓹ ꓟ ꓥˍ ꓟꓲ ꓠꓲꓽ ꓜꓶꓽ ꓞꓹ ꓔꓬ ꓟ ꓕꓲ ꓡꓰꓹ ꓥꓳ=

ꓕꓱ ꓟ ꓡꓰꓽ ꓟꓽ ꓞꓲꓺ ꓠꓲꓽ ꓢ-ꓓꓯ ꓠꓬ ꓢꓲꓽ ꓫꓬ ꓦꓲ꓾ ꓥ ꓠꓬ꓾ ꓪꓴ-ꓢ ꓠꓬꓲ ꓖꓴ ꓗꓪ ꓬꓲ ꓔꓬ ꓠꓲꓹ ꓫꓵˍ ꓡꓳ= ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓬꓲ ꓠꓬ ꓢꓲꓽ ꓫꓬ ꓦꓲ ꓗꓪ ꓔꓬ ꓢꓲ ꓠꓬꓲ ꓢꓲꓺ ꓒ ꓬꓰ-ꓢꓴ ꓓꓵꓽ ꓡ ꓟ ꓔꓯ ꓟꓽ ꓠꓲꓹ ꓒꓴ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓣꓳ ꓠꓲꓹ ꓟ ꓥˍ ꓟꓲ ꓢꓲꓽ ꓫꓬ ꓦꓲ ꓥ ꓟ ꓑꓶꓸ ꓓꓴ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓢꓲꓺ ꓒ ꓬꓰ-ꓢꓴ ꓙꓵꓽ ꓔꓬ ꓡ꓾ ꓥ ꓠꓬ꓾ ꓠꓲꓽ ꓢ-ꓓꓯ ꓙꓵꓽ ꓔꓬ ꓡ ꓐꓯ ꓟ ꓔꓯ ꓓꓵꓽ ꓙ ꓠꓬꓲ ꓓꓴ ꓥ ꓡꓳ= 

ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓣꓳ ꓠꓲꓹ ꓟ ꓔꓯ ꓣꓳ ꓡꓳꓸ ꓠꓬꓲ ꓢꓲ ꓢꓲꓺ ꓒ ꓬꓰ-ꓢꓴ ꓔꓯ ꓣꓳ ꓘꓳꓹ ꓣꓴ ꓐ ꓡ ꓠꓹ ꓟ꓾ ꓢꓲꓺ ꓒ ꓬꓰ-ꓢꓴ ꓔꓯ ꓠꓲꓹ ꓟ ꓠꓯꓸꓼ ꓗꓪ ꓘꓳꓹ ꓣꓴ ꓢꓲ ꓠꓬꓲ ꓟꓽ ꓙꓲꓻ ꓫꓬ ꓟ ꓔꓯ ꓖꓼ ꓓꓳ ꓗꓷ ꓢꓲ꓾ ꓠꓲꓹ ꓟ ꓠꓯꓸꓼ ꓗꓪ ꓢꓲ ꓡꓲ ꓡꓲˍ ꓐꓰ ꓢꓲꓺ ꓒ ꓔꓯ ꓙꓵꓽ ꓝꓲ ꓠꓹ ꓟ ꓣꓳ ꓐ ꓡꓹ ꓡ꓾ ꓐꓯ ꓟ ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓢꓯꓼ ꓖꓶ ꓪ ꓖꓶ ꓡ ꓟ ꓥ ꓡꓳ=