ꓢꓲ ꓒ ꓖꓶꓽ ꓡ ꓟ ꓬꓲꓻ ꓙꓬ ꓔꓯ ꓢꓲꓼ ꓠꓯˍ ꓟ (Sunday reflection)

ꓢꓲ ꓒ ꓖꓶꓽ ꓡ ꓟ ꓬꓲꓻ ꓙꓬ ꓔꓯ ꓢꓲꓼ ꓠꓯˍ ꓟ

ꓬꓳ‐ꓦ ꓶ ꓓꓳꓽ ꓫꓱ, ꓓꓳꓽ ꓗꓪ ꓢꓲ ꓒ ꓬꓰ‐ꓢꓴ ꓬꓲ. ꓪꓴ. ꓫ ꓕꓱˍ ꓟ ꓐꓯ ꓘꓶꓽ ꓠꓬ “ꓠꓴ ꓮ ꓫꓵꓽ ꓧꓪ. ꓡ?” ꓐꓯ ꓟ ꓐꓯ ꓘꓶꓽ ꓥ ꓡꓳ꓿ ꓬꓳ‐ꓦ ꓕꓳ ꓶ 1ꓽ 38 ꓗꓪ ꓣꓳꓽ ꓵ ꓪ ꓓ ꓡꓳ꓿ ꓖꓳ ꓔꓱ ꓔꓲꓺ ꓒ ꓬꓳ‐ꓦ ꓡꓰ ꓬꓲ. ꓝꓲ ꓓꓴ ꓐꓴ ꓔꓯ ꓥꓪ ꓐꓯ ꓔꓬ, ꓟ ꓠꓬ ꓕꓱ ꓕꓲꓽ ꓣꓳ ꓥꓳ ꓐꓰ ꓢꓲ ꓒ ꓬꓰ‐ꓢꓴ ꓔꓯ ꓖꓴꓺ ꓟꓳ. ꓖꓶꓽˍ ꓕꓯ ꓬꓲ. ꓛꓳ ꓒꓯ 2 ꓣꓳ ꓟ ꓠꓬ ꓢꓲ ꓒ ꓬꓰ‐ꓢꓴ ꓔꓬ, ꓖꓴ ꓗꓪ ꓙꓰˍ ꓡꓳ꓿ ꓢꓲ ꓒ ꓬꓰ‐ꓢꓴ ꓬꓲ. ꓪ ꓔꓯ ꓟꓳˍ ꓕꓯ ꓬꓲ. ꓠꓬ꓾ ꓠꓴ ꓪ ꓮ ꓫꓵꓽ ꓧꓪ. ꓡ? ꓐꓰ ꓠꓻ ꓠꓬꓲ ꓗꓷ ꓟ ꓥ ꓡꓳ꓿

ꓕꓱ ꓟ ꓠꓬ ꓢꓲ ꓒ ꓬꓰ‐ꓢꓴ ꓬꓳ‐ꓦ ꓶ ꓓꓳꓽ ꓫꓱ, ꓓꓳꓽ ꓗꓪ ꓬꓲ. ꓪꓴ. ꓫ ꓕꓱ ꓗꓷ ꓟ ꓫ ꓕꓱ ꓘꓶꓽ ꓥꓳ꓿

                ꓕꓱ ꓟ ꓡꓰ ꓐꓰ ꓠꓬꓲ. ꓠꓬꓲ ꓵ ꓠ,  ꓟ ꓶ ꓓꓳꓽ ꓫꓱ, ꓓꓳꓽ ꓗꓪ ꓢ‐ꓟ‐ꓡꓲ ꓤ ꓟꓶ ꓤ ꓕꓲꓽ ꓣꓳ ꓐꓰ ꓢꓲ ꓒ ꓬꓰ‐ꓢꓴ ꓫ ꓕꓱ ꓡꓯ ꓘꓳˍ ꓟ ꓔꓯ ꓣꓳ ꓬꓳ‐ꓦ  ꓕꓳ ꓶ 4ꓽ5‐42 ꓗꓪ ꓟꓳ ꓡꓳ꓿ ꓢꓲ ꓒ ꓬꓰ‐ꓢꓴ ꓢ‐ꓟ‐ꓡꓲ ꓤ ꓟꓶ ꓤ ꓔꓯ ꓬꓲ. ꓕꓲꓽ ꓘꓶꓽ ꓫ ꓕꓱˍ ꓟ ꓠꓬ꓾ ꓥꓪ ꓔꓯ ꓬꓲꓻ ꓙꓬ ꓖꓶꓽ   ꓡꓯ ꓐꓰ ꓬꓲꓻ ꓙꓬ ꓓꓰꓽ ꓓꓳˍ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓬꓲ. ꓠꓬ ꓕꓲꓽ ꓞꓲꓼ ꓕꓲ ꓑ ꓢꓯꓼ ꓔꓬ, ꓟ ꓬꓲꓻ ꓙꓬ ꓥꓳ ꓐꓯ ꓟ ꓟꓳ. ꓖꓶꓽ ꓠ, ꓟ ꓢ‐ꓟ‐ꓡꓲ ꓤ ꓟꓶ ꓤ ꓔꓯ ꓧꓶ. ꓕꓯ ꓬꓲꓻ ꓙꓬ ꓓꓰꓽ ꓓꓳˍ ꓡꓳ꓿

                ꓔꓱ, ꓔꓱ ꓡꓰ ꓐꓯ ꓥꓳ ꓐꓰ ꓠꓬ ꓢ‐ꓟ‐ꓡꓲ ꓡ ꓞꓳ ꓐꓰ ꓬꓴ‐ꓓ ꓡ ꓞꓳ ꓠꓬ ꓮ ꓕꓯˍ ꓟꓲ ꓟꓽ ꓙ ꓡꓯ ꓘꓳ꓿ ꓖꓳ ꓡꓱ ꓐꓯ ꓥˍ ꓟꓲ ꓢꓲ ꓒ ꓬꓰ‐ꓢꓴ ꓠꓬ ꓮ ꓙꓵꓽ ꓟ ꓪꓴ‐ꓢꓴ ꓥꓳ ꓐꓯ ꓟꓳ. ꓖꓶꓽ ꓠ, ꓟ꓾ ꓬꓲ. ꓠꓬ ꓮ ꓙꓵꓽ ꓐꓱ ꓥꓳ ꓐꓯ ꓟ ꓟꓳ. ꓖꓶꓽ ꓠ, ꓟ ꓢ‐ꓟ‐ꓡꓲ ꓤ ꓟꓶ ꓤ ꓖꓳ ꓕꓲ ꓣꓳ ꓟ ꓗꓪ ꓐꓰ ꓣꓳꓽ ꓔꓯ ꓟꓳ. ꓖꓶ ꓡ ꓡꓳ꓿

                ꓢꓲ ꓒ ꓬꓰ‐ꓢꓴ ꓠꓬ ꓬꓴ‐ꓓ ꓡ ꓞꓳ ꓐꓱ, ꓡꓰ ꓟꓽ ꓥ꓾ ꓣꓳ‐ꓟ ꓡ ꓞꓳ ꓐꓱ ꓶ ꓡꓰꓽ ꓟꓽ ꓥ꓾ ꓮ ꓙꓵꓽ ꓟ ꓐꓱ ꓶ ꓥꓳ꓿ ꓡꓲ‐ꓢꓴ ꓐꓱ ꓶˍ ꓟꓲ ꓥꓳ꓾ ꓮ ꓒꓴ. ꓐꓱ ꓶˍ ꓟꓲ ꓥꓳ꓿ ꓞꓳ ꓫꓵꓽ ꓞꓳ ꓙꓰ ꓮ ꓙꓵꓽ ꓟ ꓐꓱ ꓶ ꓥꓳ꓿

                ꓣꓳꓽ ꓟꓲ ꓠꓯ ꓞꓳ ꓤ ꓐꓴ ꓠꓬ ꓕꓲꓽ ꓙꓰꓽ ꓟꓽ ꓥ ꓕꓲꓽ ꓙꓰ ꓢꓲꓼ ꓔꓬ, ꓡꓳ꓾ ꓟꓷꓼ ꓔꓬ, ꓡꓳ꓿ ꓖꓳ ꓟ ꓑꓶ. ꓓꓴ ꓠꓱ. ꓫꓱ. ꓟ ꓗꓪ ꓡꓰ ꓣꓳ ꓧꓪ. ꓡꓳ꓿ ꓠꓬꓲ ꓠꓬꓲ ꓢꓲ ꓒ ꓠꓬ ꓣꓳ ꓔꓯ ꓥˍ ꓟꓲ ꓠꓻ ꓠꓬꓲ ꓔꓬ, ꓡꓳ꓾ ꓠꓴ ꓮ ꓫꓵꓽ ꓧꓪ ꓡ? ꓐꓰ ꓠ ꓠꓬꓲ ꓔꓬ, ꓟ ꓥꓳ꓿ ꓣꓳ ꓠꓬ ꓢꓲ ꓒ ꓖꓶꓽ ꓡ ꓟ ꓬꓲꓻ ꓙꓬ ꓔꓯ ꓢꓲꓼ ꓠ ꓗˍ ꓡꓳ꓾ ꓢꓲ ꓒ ꓔꓯ ꓢꓲꓼ ꓠ ꓗ ꓡꓳ꓿

                ꓣꓳ ꓠꓬ ꓬꓲ. ꓕꓯ ꓢꓲ ꓗꓪ ꓟ ꓟꓲ ꓠꓯ ꓖꓴꓽ ꓙꓴ ꓮ ꓙꓵꓽ ꓠꓬ ꓣꓳ ꓔꓯ ꓠꓲ, ꓟ  ꓐꓲꓼ ꓜꓲꓼ ꓟ ꓐ ꓡ ꓟ ꓔꓯ ꓢꓷ. ꓠ ꓗˍ ꓡꓳ꓿ ꓢꓲ ꓒ ꓖꓶꓽ ꓡ ꓟ ꓬꓲꓻ ꓙꓬ ꓔꓯˍ ꓡꓰ ꓣꓳ ꓧꓪ ꓡꓯ꓿ ꓬꓲ. ꓖꓶꓽ ꓡ ꓟ ꓬꓲ ꓙꓬ ꓠꓬ ꓕꓲꓽ ꓞꓲꓼ ꓟꓽ ꓢꓲꓼ ꓡ ꓟ ꓥꓳ꓿