ꓢꓲꓺ ꓒ ꓬꓰ‐ꓢꓴ ꓡꓰ ꓢꓲ‐ꓫꓬ‐ꓟ‐ꓦ ꓖꓶ ꓙ ꓟꓳˍ ꓟ (Sunday reflection)

ꓢꓲꓺ ꓒ ꓬꓰ‐ꓢꓴ ꓡꓰ ꓢꓲ‐ꓫꓬ‐ꓟ‐ꓦ ꓖꓶ ꓙ ꓟꓳˍ ꓟ

ꓠꓬꓲ. ꓠꓬꓲ ꓠꓬ ꓢꓯ. ꓬꓲꓼ ꓡ ꓟ ꓙꓵ, 6 ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓬꓳ‐ꓦ ꓕꓳ ꓶ 14ꓽ15‐21 ꓝꓲ ꓗꓪ ꓥ ꓢꓲ ꓠꓬꓲ ꓢꓲꓺ ꓒ ꓬꓰ‐ꓢꓴ ꓡꓰ ꓬꓲ. ꓝꓲ ꓓꓴ ꓐꓴ ꓔꓯ ꓢꓲ‐ꓫꓬ‐ꓟ‐ꓦ ꓟꓲ ꓠꓯ ꓗꓪ ꓬꓯꓼ ꓡ ꓟ ꓚꓱ, ꓔꓯ ꓣꓳ ꓡꓳ. ꓟꓳ ꓪ ꓡꓳ꓿

ꓔꓱ, ꓚꓵ, ꓟ ꓙꓵꓻ ꓠꓲ, ꓠꓬ ꓪꓴ‐ꓢ ꓙꓵꓽ ꓗ ꓔꓯ ꓚꓳ ꓠꓲ, ꓫꓵˍ ꓠꓲ, ꓟ ꓙꓳˍ ꓠ, ꓟ ꓐꓰ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓔꓯ ꓡꓰ ꓖꓶ ꓡ ꓟ ꓣꓱ ꓛꓰ ꓡꓯ ꓫꓴꓻ ꓔꓯ ꓘꓳ, ꓣꓴ ꓠ, ꓟ ꓥ ꓡꓳ꓿ ꓝꓮꓲ ꓣꓳ ꓙ    ꓵꓻ ꓠꓲ, ꓔꓯ ꓪꓴꓽ ꓟꓴ ꓡ ꓠ, ꓟ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓔꓯ ꓣꓳ ꓠꓲ, ꓟ ꓘꓴ ꓙꓵꓽ ꓡ ꓠ, ꓟ ꓘꓴˍ ꓠ, ꓟ ꓣꓳꓺ ꓚꓵ, ꓡꓳ꓿

ꓢꓲꓺ ꓒ ꓬꓰ‐ꓢꓴ ꓠꓬ ꓣꓳ ꓟꓲ ꓠꓯ ꓡ ꓞꓳ ꓔꓯ ꓮ ꓘꓶ. ꓛꓲ ꓠꓲ, ꓠꓵ ꓟ ꓡꓰ ꓐꓰ ꓬꓲ. ꓔꓯ ꓠꓲ, ꓠꓵ ꓠꓬ ꓬꓲ. ꓐꓯ ꓘꓶꓽ ꓔꓯ ꓛꓳ ꓢꓲ ꓠꓬꓲ ꓪꓴ‐ꓢ ꓙꓵꓽ ꓗ ꓔꓯ ꓛꓳ  ꓠ, ꓟ ꓣꓳꓺ ꓛꓲ ꓟ ꓚꓱ, ꓔꓯ ꓟ. ꓖꓶ ꓡ ꓡꓳ꓿ ꓔꓱ, ꓚꓵ, ꓙꓵꓻ ꓠꓲ, ꓠꓬ ꓟꓬꓱꓽ ꓬꓰ ꓠ, ꓟ ꓐꓰ ꓢꓲꓺ ꓒ ꓬꓰ‐ꓢꓴ ꓠꓲ, ꓡꓶꓽ ꓔꓯ ꓒꓵꓽ ꓛꓳ ꓠ, ꓢꓲ ꓠꓬꓲ ꓢꓯ. ꓔꓬ ꓠ, ꓟ ꓥ ꓡꓳ ꓐꓰ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓟ. ꓖꓶ ꓡ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓔꓯ ꓠꓲ, ꓠꓵ ꓠꓬ ꓣꓳ ꓠꓲ, ꓟ ꓗꓪ ꓠꓵꓻ ꓠꓲ, ꓙꓳ ꓢꓴ ꓝꓮꓲ ꓢꓳ ꓔꓯ ꓬꓰ ꓙ ꓗꓴ. ꓢꓴ ꓐꓰ ꓣꓳ ꓙꓵꓻ ꓠꓲ, ꓔꓯ ꓪꓴꓽ ꓟꓴ ꓡ ꓠ, ꓟ ꓢꓯꓼ ꓕꓵꓼ ꓢꓴ ꓐꓴ ꓥ ꓡꓳ ꓐꓰ ꓐꓯ ꓔ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓵꓻ ꓠꓲ, ꓠꓬ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓣꓳ ꓬꓰ ꓟ ꓟꓬꓱꓽ ꓐꓰ ꓣꓳ ꓮ ꓫꓵꓽ ꓚꓱ, ꓗꓪ ꓞꓳ ꓫꓱ ꓔꓬ ꓟ ꓔꓯ ꓧꓳꓽ ꓟꓳ ꓖꓶ ꓐ ꓡ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓙꓲ‐ꓢꓴ ꓢꓲꓺ ꓤ ꓐꓴ ꓐꓱ ꓶ ꓠꓵꓻ ꓠꓲ, ꓠꓬ ꓮ ꓘꓶ. ꓛꓲ ꓣꓳꓺ ꓚꓵ, ꓥ ꓡꓳ꓿

ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓡꓰ ꓖꓶ ꓡ ꓟ ꓡꓯ ꓫꓴꓻ ꓠꓬ ꓢꓲꓺ ꓒ ꓬꓰ‐ꓢꓴ ꓠꓬ ꓬꓲ. ꓝꓲ ꓓꓴ ꓐꓴ ꓔꓯ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓠꓬ ꓮ ꓕꓯ ꓥ ꓟꓲ ꓣꓳ ꓐꓰ ꓕꓲ ꓪ ꓔꓬ ꓓꓴ ꓥꓳ ꓐꓰ ꓐꓯ ꓔ ꓡꓳ꓿ ꓢꓲ‐ꓫꓬ‐ꓟ ꓪꓴ‐ꓢ ꓔꓯ ꓘꓳ, ꓣꓴ ꓟꓶ ꓡꓰ ꓠꓬ ꓣꓳ ꓙꓵꓻ ꓠꓲ, ꓚꓱ, ꓢꓯ. ꓔꓬ ꓚꓱ, ꓗꓪ ꓙꓽ ꓖꓴ ꓧꓳꓽ ꓟꓳ ꓖꓶ ꓟ ꓐꓰ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓣꓳ ꓤꓶ ꓗꓪ ꓣꓳꓺ ꓚꓵ. ꓟ ꓔꓯ ꓢꓲꓽ ꓫꓬ ꓕꓳ ꓶ ꓗꓪ ꓡꓳ. ꓟꓳ ꓪ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓥꓪ ꓡꓰ ꓠꓴ ꓪ ꓔꓯ ꓤ ꓛꓵꓽ ꓟꓽ ꓓꓳ ꓔꓲ, ꓬꓰ ꓝꓲ꓿ ꓥꓪ ꓠꓬ ꓠꓴ ꓪ ꓔꓯ ꓡˍ ꓢꓰꓽ ꓥꓳ꓿ ꓥꓪ ꓕꓵꓼ ꓪ ꓔꓯ ꓘꓳ ꓣꓴ ꓢꓲ ꓒꓵꓽ ꓛꓳ ꓢꓴ ꓠꓬ ꓥꓪ ꓔꓯ ꓠꓵ, ꓠꓵ ꓢꓴ ꓥ ꓡꓳ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓔ ꓡꓳ꓿

ꓠꓬꓲ. ꓠꓬꓲ ꓣꓳ ꓓꓵꓽ ꓠ, ꓟ ꓠꓬ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓔꓯ ꓣꓳ ꓧꓪ, ꓔꓬ ꓡ? ꓝꓮꓲ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓠꓬ ꓣꓳ ꓢꓯ. ꓔꓬ ꓟ ꓞꓶ ꓗꓪ ꓣꓳ. ꓚꓵ, ꓐꓰ ꓣꓳ ꓧꓪ, ꓔꓬ ꓡ? ꓝꓮꓲ ꓢꓲ‐ꓫ‐ꓟ‐ꓦ ꓪꓴ‐ꓢ ꓔꓯ ꓣꓳ ꓫ. ꓓꓴ ꓔꓳ, ꓜꓳ ꓟ ꓙꓵ, ꓕꓯ ꓶꓽ ꓓꓰꓽ ꓢꓲ ꓠꓬꓲ ꓬꓲ. ꓡꓰ ꓣꓳ ꓔꓯ ꓙꓽ ꓖꓴ ꓧꓳꓽ ꓟꓳ ꓖꓶ ꓡ ꓟ ꓗꓪ ꓣꓳ ꓛꓳ ꓫꓱ, ꓗꓷ ꓡ? ꓢꓲ‐ꓫ‐ꓟ‐ꓦ ꓪꓴ‐ꓢ ꓔꓯ ꓣꓳ ꓬꓲ. ꓙꓵ, ꓖꓶ ꓢꓲ ꓠꓬꓲ ꓪꓽ ꓘꓴ ꓡ ꓐꓰ ꓣꓳ ꓔꓯ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓓꓵꓽ ꓙ ꓠ, ꓟ ꓟ. ꓖꓶ ꓡ ꓡꓳ꓿ ꓫ. ꓟꓳ ꓪ꓿