ꓙ ꓖꓴ ꓗꓪ ꓛꓳꓽ ꓒꓯꓹ ꓠꓬꓲꓽ ꓣꓳ ꓔꓯ ꓟꓳꓸ ꓖꓶˍ ꓟ

ꓬꓰ-ꓢꓴ ꓡꓰ ꓑ ꓑ ꓣꓴ ꓢꓲ ꓶꓼ ꓥꓳꓽ ꓙꓱꓽ ꓢꓲ ꓠꓬꓲ꓾ ꓦꓶꓹ ꓢꓲ ꓬꓲ ꓪ ꓔꓯ ꓖꓶˍ ꓡꓳ=

ꓖꓳ ꓕꓲ ꓠꓬꓲ ꓗꓪ ꓬꓲ ꓪ ꓗꓪ ꓟ ꓠꓬꓲꓽ ꓣꓳ ꓠꓬ꓾ ꓙꓱ-ꓣꓴ-ꓢ-ꓡꓱ ꓗꓪ ꓐꓰ ꓡꓳ ꓔ ꓫꓵꓽ ꓕꓷꓹ ꓛꓲ ꓗꓳꓹ ꓞꓹ ꓟ꓾ ꓬꓲ-ꓟ-ꓪꓴ-ꓢꓶ ꓟꓬꓱ ꓔ ꓟ ꓘꓹ ꓕꓲ ꓘꓹ ꓗꓪ ꓙꓰ ꓔꓬ ꓢꓲ꓾ ꓬꓲ ꓪ ꓠꓬ ꓒꓬꓱꓼ ꓡ ꓗꓷ ꓟ ꓕꓱ ꓟꓬ ꓫꓵꓽ ꓔꓯ ꓟꓳꓸ ꓫ ꓕꓱ ꓡꓯ ꓘꓳˍ ꓡꓳ=ꓬꓲ ꓪ ꓖꓳ ꓡꓱ ꓫ. ꓕꓱ ꓡꓯ ꓘꓳ ꓔꓬ ꓕꓯ꓾ ꓬꓰ-ꓢꓴ ꓠꓬ ꓬꓲ ꓪ ꓔꓯ ꓠꓶꓽ ꓡ ꓢꓲ ꓬꓲ ꓪˍ ꓐꓰ ꓕꓲ ꓛꓳˍ ꓫꓱꓽ ꓡˍ ꓡꓳ= ꓖꓳ ꓡꓱ ꓥˍ ꓟꓲ ꓬꓰ-ꓢꓴ ꓡꓰ ꓬꓲ ꓮꓽ ꓟ ꓥ ꓟ ꓬꓲ ꓪ ꓔꓯ ꓟꓽ ꓡꓳꓸ ꓓꓳ ꓡ ꓝꓲ=

ꓬꓰ-ꓢꓴ ꓠꓬ ꓬꓲ ꓪ ꓔꓯ꓾ ꓠꓴ ꓪ ꓠꓬ ꓡꓯꓼ ꓫꓵ ꓫꓱꓽ ꓡꓯꓼ ꓫꓵ ꓮ ꓫꓵꓽ ꓔꓯꓸ ꓟꓳꓸ ꓫ ꓕꓱ ꓡꓯ ꓘꓳ ꓔꓬ ꓡ? ꓐꓰ ꓠ ꓠꓬꓲˍ ꓡꓳ=ꓬꓲ ꓪ ꓠꓽ ꓠꓲꓹ ꓟ ꓫꓸ ꓫꓸꓼ ꓐꓰ ꓦꓰꓼ ꓡꓰ ꓢꓲ꓾ ꓬꓲ ꓪ ꓠꓬꓲꓽ ꓣꓳ ꓗꓪ ꓟ ꓘ-ꓡꓳ-ꓒ ꓟꓬꓱ ꓔ ꓢꓴ ꓡꓰ ꓬꓲ ꓔꓯ꓾ ꓠꓴ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓪꓰ ꓤ ꓟꓴ ꓔꓬ ꓟꓲ꓾ ꓗꓳꓸ ꓡ ꓟ ꓠꓬꓲꓽ ꓢ ꓠꓬꓲ ꓠꓯꓸꓼ ꓗꓪ ꓖꓳ ꓗꓪ ꓮ ꓡꓲ ꓗꓷ ꓡꓰ ꓟ ꓟꓽ ꓢꓷꓸ ꓡ? ꓐꓯ ꓖꓶˍ ꓡꓳ=

ꓬꓰ-ꓢꓴ ꓡꓰ꓾ ꓮ ꓫꓵꓽ ꓗꓷ ꓡꓰ ꓡ? ꓐꓰ ꓐꓯˍ ꓕꓯ꓾ ꓬꓲ ꓪ ꓡꓰ ꓬꓲ ꓔꓯ ꓾ ꓠ-ꓢ-ꓡꓱ ꓢꓴ ꓬꓰ-ꓢꓴ ꓔꓯ ꓐꓯˍ ꓟ ꓥꓳ= ꓬꓲ ꓠꓽ ꓟꓷꓽ ꓠꓷꓹ ꓝꓸ ꓢꓴ ꓥ ꓢꓲ꓾ ꓪꓴ-ꓢˍ ꓐꓰ ꓑ ꓫꓬꓼ ꓐꓴ ꓟꓲ ꓙꓬꓽ ꓗꓪ꓾ ꓬꓰˍ ꓟˍ ꓐꓰ ꓐꓯˍ ꓟ ꓗꓪ ꓪꓽ ꓠꓬꓲˍ ꓟ ꓕꓲ ꓣꓳ ꓥꓳ= ꓖꓳ ꓡꓱ ꓥˍ ꓟꓲ ꓔꓲ ꓒ ꓪꓴꓸ ꓓꓵ ꓣꓱꓽ ꓢꓴ ꓐꓴˍ ꓐꓰ ꓥꓪ ꓠꓴꓽ ꓢꓲꓽ ꓒ ꓐꓴ ꓡꓰ꓾ ꓫꓵꓻ ꓝꓴꓲ ꓐꓯ ꓞꓷꓹ ꓢꓲ ꓬꓲ ꓔꓯ ꓕꓯꓼ ꓔꓶꓸ ꓗꓷꓳ= ꓬꓲ ꓠꓽ ꓬꓲ-ꓢꓷ-ꓡꓰ ꓔꓯ ꓫꓴꓹ ꓣꓴ ꓢꓴ ꓥꓳ꓾ ꓐꓰ ꓥꓪ ꓠꓴꓽ ꓥꓳ ꓡꓳꓸ ꓔ ꓟ ꓥꓳ= ꓕꓱ ꓟꓬ ꓫꓵꓽ ꓗꓷ ꓡꓰ ꓗ ꓠꓯꓸ ꓮ ꓟꓶ ꓠꓬ ꓢ ꓠꓬꓲ ꓙꓳ ꓡꓰꓳ= ꓝꓮꓲ ꓠꓬ ꓥꓪ ꓠꓴꓽ ꓕꓲ ꓧꓳꓽ ꓗꓪ ꓟ ꓤ ꓟꓶ ꓤ ꓕꓲ ꓐꓱ ꓡꓰ ꓥꓪ ꓠꓴꓽ ꓔꓯ ꓔꓯ ꓓꓵꓽ ꓙ ꓟꓶ ꓡꓰ ꓝꓲˍ ꓡꓳ= ꓬꓲ ꓪ ꓠꓬꓲꓸ ꓠꓬꓲ ꓠꓯꓼ ꓡꓱꓼ ꓜꓴ ꓗꓪ ꓙꓰ ꓠꓬ꓾ ꓬꓲ ꓫꓵꓻ ꓟꓳ ꓟꓽ ꓟꓳ ꓠꓬꓲ ꓬꓲꓼ ꓡ ꓢꓲ꓾ ꓟꓴ ꓗꓪ ꓝꓲ ꓓꓴ ꓐꓴ ꓡꓰ ꓬꓲ ꓢꓯꓸ ꓔꓬ ꓡꓳ꓾ ꓐꓯˍ ꓟ ꓦ ꓐꓬꓱꓽ ꓟꓳ ꓗꓷꓳ꓾ ꓐꓰ ꓥꓪ ꓠꓴꓽ ꓔꓯ ꓐꓯ ꓖꓶ ꓡꓻꓳ=ꓖꓳ ꓡꓱ ꓢꓲ ꓥꓪ ꓠꓴꓽ ꓛꓳ ꓒꓯꓹ ꓕꓲꓽ ꓐꓱ ꓠꓬ ꓡꓱꓼ ꓜꓴ ꓗꓪ ꓙꓰ ꓢꓲ ꓔꓱꓹ ꓠꓬꓲ ꓬꓰ ꓕꓯ ꓤ ꓟꓶ ꓤ ꓐꓴ ꓐꓯˍ ꓟ ꓡꓰ ꓐꓰ ꓡꓳꓸ ꓟꓳˍ ꓡꓳ= ꓖꓳ ꓡꓱ ꓥˍ ꓟꓲ ꓬꓰ-ꓢꓴ ꓔꓯ ꓠꓽ ꓟꓽ ꓟꓳ꓾ ꓐꓯˍ ꓡꓳ=

ꓖꓳ ꓕꓯ ꓬꓰ-ꓢꓴ ꓡꓰ ꓔꓲ ꓪ ꓔꓯ꓾ ꓟꓷꓽ ꓠꓷꓹ ꓝꓸ ꓢꓴ ꓐꓴ ꓡꓰ ꓐꓯ ꓗꓷ ꓟ ꓮ ꓙꓵꓽ ꓔꓯ ꓙꓵꓻ ꓡꓯꓽ ꓢꓴ ꓞꓳ ꓙꓲꓽ ꓐꓴꓳ꓾ ꓙꓲ-ꓢꓴ ꓠꓬ ꓫꓸ ꓙꓵˍ ꓟ ꓕꓱ ꓟꓬ ꓫꓵꓽ ꓜꓲꓽ ꓢꓲ꓾ ꓬꓲ ꓐꓬꓱꓼ ꓡꓱꓼ ꓡꓱꓼ ꓟ ꓟꓬꓱ ꓓꓳꓽ ꓗꓪ ꓓꓵꓽ ꓡꓰ ꓠ ꓗꓹ ꓡꓳ ꓟꓽ ꓥ ꓡ? ꓐꓯˍ ꓡꓳ= ꓖꓳ ꓡꓱ ꓠꓬ ꓟꓳ-ꓫꓲ ꓗꓪ ꓐꓰ ꓪꓴꓸ ꓔꓴ ꓢꓲ꓾ ꓟꓷꓽ ꓠꓷꓹ ꓝꓸ ꓢꓴ ꓮ ꓙꓵꓽˍ ꓐꓰ ꓢꓲ ꓫꓬ ꓕꓳ ꓶ ꓗꓪ ꓬꓲ ꓚꓲ ꓛꓬ ꓔꓯ ꓐꓯ ꓬꓯꓼˍ ꓟ ꓮ ꓙꓵꓽ ꓬꓲ ꓪ ꓔꓯ ꓒꓶ ꓟꓸ ꓖꓶˍ ꓡꓳ=

ꓬꓲ ꓪ ꓙꓰˍ ꓟ ꓘꓹ ꓗꓪ ꓛꓲ ꓬꓰ ꓠꓬ꓾ ꓬꓰ-ꓢꓴ ꓠꓽ ꓡꓯꓽ ꓫꓵ ꓟꓲ ꓙꓬꓽ ꓙꓰˍ ꓐꓰ ꓬꓰˍ ꓡꓳ= ꓖꓳ ꓡꓱ ꓥˍ ꓟꓲ ꓬꓲ ꓪ ꓡꓰ ꓬꓲ ꓔꓯ ꓜꓲꓽ ꓜꓲ ꓓꓰꓽ ꓢꓲ꓾ ꓮ ꓟꓶ ꓠꓬ ꓟꓶꓽ ꓘꓶꓼ ꓝꓲꓸ ꓛꓲ ꓡ ꓢꓲ ꓟꓰꓻ ꓬꓰꓳ= ꓥꓪ ꓠꓴꓽˍ ꓐꓰ ꓔꓲꓹ ꓬꓰ ꓡꓯ꓾ ꓐꓯˍ ꓠꓬꓲ꓾ ꓬꓰ-ꓢꓴ ꓠꓬ ꓬꓲ ꓪˍ ꓐꓰ ꓔꓲꓹ ꓬꓰ ꓠꓹ ꓟ ꓓꓵꓽ ꓡꓰˍ ꓡꓳ= ꓬꓲ ꓠꓬ ꓬꓲ ꓪˍ ꓐꓰ ꓕꓲꓽ ꓪˍ ꓜ ꓜˍ ꓐꓰ ꓗꓳ ꓔꓬ ꓕꓯ꓾ ꓬꓰ-ꓢꓴ ꓡꓰ ꓑ ꓑ ꓣꓴ ꓢꓲ ꓶꓼ ꓥꓳꓽ ꓙꓱꓽ ꓢꓲ ꓠꓬꓲ꓾ ꓦꓶꓹ ꓢꓲ ꓬꓲ ꓪ ꓔꓯ ꓖꓶˍ ꓡꓳ= ꓖꓳ ꓕꓯ ꓬꓲ ꓪ ꓬꓲ ꓔꓯ ꓡꓳꓸ ꓢꓷꓸ ꓡꓰ ꓠꓬ ꓞꓼ ꓐꓰ ꓬꓲ ꓔꓯ ꓟꓽ ꓟꓳ ꓗꓷ ꓡꓰꓳ= ꓬꓲ ꓪ ꓠꓬ ꓕꓲ ꓣꓳ ꓛꓳ ꓕꓲ ꓣꓳ꓾ ꓙ ꓖꓴ ꓗꓪ ꓬꓲ ꓣꓳˍ ꓐꓰ ꓫꓸ ꓕꓱ ꓢꓲ꓾ ꓣꓳ ꓔꓯ ꓢꓲ ꓫꓬ ꓕꓳ ꓶ ꓒꓶ ꓟꓸꓖꓶ ꓡ ꓕꓯ꓾ ꓣꓳ ꓠꓲꓹ ꓟ ꓗꓪ ꓗꓹ ꓛꓲˍ ꓟ ꓐꓲ ꓡꓰꓳ ꓟꓽ ꓥ ꓡ? ꓐꓰ ꓐꓯ ꓡꓯ ꓘꓳˍ ꓡꓳ= ꓬꓲ ꓖꓳ ꓕꓲ ꓙꓵꓹ ꓗꓪ ꓬꓲ ꓪ ꓠꓬ꓾ ꓙꓱ-ꓣꓴ-ꓢ-ꓡꓱ ꓗꓪ ꓬꓲꓼ ꓙꓰ ꓢꓲ꓾ ꓞꓲ ꓕꓲ ꓣꓳ ꓟˍ ꓐꓰ꓾ ꓬꓲ ꓪˍ ꓐꓰ ꓕꓲꓽ ꓪˍ ꓜꓲꓼ ꓞꓹ ꓢꓴ ꓐꓴ ꓔꓯ ꓧꓪ ꓟꓶˍ ꓡꓳ= ꓬꓲ ꓪ ꓠꓬ ꓢꓲ ꓒꓽ ꓚꓵ ꓚꓵ ꓢꓯꓸ ꓬꓲꓼ ꓡ ꓢꓲ꓾ ꓢꓲ-ꓟꓴ ꓔꓯ ꓟꓳꓸ ꓖꓶ ꓡꓻꓳ꓾ ꓐꓰ ꓐꓯ ꓔꓬ ꓡꓳ= ꓖꓳ ꓡꓱ ꓢꓲ ꓬꓲ ꓪ ꓠꓬꓲꓽ ꓣꓳ ꓠꓬ꓾ ꓙ ꓖꓴ ꓗꓪ ꓔꓳꓹ ꓜꓳˍ ꓟ ꓐꓰ꓾ ꓑ ꓑ ꓦꓶꓹ ꓟ ꓗꓪ ꓬꓲ ꓪ ꓡꓰ ꓬꓰ-ꓢꓴ ꓔꓯ ꓮ ꓡꓲ ꓡꓳꓸ ꓢꓷꓸ ꓡꓰ ꓟ ꓮ ꓙꓵꓽ ꓚ ꓟꓸ ꓖꓶˍ ꓡꓳ=

Add new comment

4 + 3 =