ꓛꓳꓽ ꓒꓯꓹ ꓫꓵꓽ ꓣꓳ ꓔꓯ ꓟꓳꓸ ꓖꓶ_ ꓟ

ꓛꓳꓽ ꓒꓯꓹ ꓫꓵꓽ ꓣꓳ ꓔꓯ ꓟꓳꓸ ꓖꓶ_ ꓟ
ꓬꓳ-ꓦ ꓕꓳꓽ ꓶ 21: 1-14
ꓕꓱ ꓟꓬ ꓙꓰꓽ ꓗ ꓠꓯ ꓬꓰ-ꓢꓴ ꓠꓬ ꓕꓲ-ꓐꓲ-ꓡꓲ-ꓬ ꓬꓲꓻ ꓡꓴ ꓐꓱ ꓗꓪ ꓛꓳ ꓒꓯ ꓐꓴ ꓔꓯ ꓟꓳꓸ ꓖꓶ_ ꓢꓰꓽ ꓡꓳ꓿ ꓖꓳ ꓡꓱ ꓢꓲ ꓬꓲ ꓟꓳꓸ ꓖꓶ_ ꓟ ꓠꓬ ꓕꓱ ꓡꓱ ꓥ ꓡꓳ꓿ ꓢꓲ-ꓟꓴ ꓒꓲ-ꓕꓱ_ ꓐꓰ ꓤ ꓜꓱ꓾ ꓐꓰ ꓐꓯ_ ꓟ ꓕꓳ-ꓟ_ ꓐꓰ꓾ ꓖ-ꓡꓲ-ꓡꓲ ꓟꓵꓽ ꓗꓪ ꓟ ꓘꓹ-ꓠꓽ ꓢꓴ ꓠ-ꓕ-ꓠꓰ_ ꓐꓰ꓾ ꓜꓲ-ꓐꓱ-ꓓꓲ ꓬꓲ ꓮ ꓐꓲ ꓐꓴ_ ꓐꓰ ꓛꓳ ꓒꓯꓹ ꓝꓮꓲ ꓠꓬꓲꓽ ꓣꓳ ꓕꓲ ꓪꓺꓼ ꓔꓬ_ ꓡꓳ꓿ ꓢꓲ-ꓟꓴ ꓒꓲ-ꓕꓱ ꓡꓰ ꓬꓲ ꓪ ꓔꓯ꓾ ꓥꓪ ꓠꓽ ꓥꓪꓸ ꓓꓳꓽ ꓙꓰ_ ꓥꓳ꓾ ꓐꓯ_ ꓡꓳ꓿ ꓬꓲ ꓪ ꓡꓰ꓾ ꓥꓪ ꓠꓴꓽ_ ꓟꓲ ꓠꓴ_ ꓐꓰ ꓕꓲ ꓛꓳ_ ꓙꓰ_ ꓥꓳ꓾ ꓐꓯ_ ꓡꓳ꓿ ꓬꓲ ꓪꓽ ꓓꓳ ꓙꓰ ꓢꓲ꓾ ꓡꓲꓺ ꓗꓪ ꓓꓵ ꓡꓰ_ ꓡꓳ꓿ ꓖꓳ ꓕꓲ ꓦꓬꓼ ꓬꓲ ꓪ ꓮ ꓫꓵ_ ꓟꓲ ꓓꓳꓽ ꓟꓽ ꓟꓶ꓿ ꓟꓲꓽ ꓕꓯ ꓙꓲ ꓡ_ ꓕꓯ꓾ ꓬꓰ-ꓢꓴ ꓠꓬ ꓬꓲ ꓙꓬ ꓘꓶꓽ ꓗꓪ ꓦꓰꓼ ꓞ_ ꓡꓳ꓿ ꓬꓰ-ꓢꓴ ꓥ ꓟ ꓛꓳ ꓒꓯꓹ ꓐꓴ ꓠꓽ ꓟꓽ ꓢꓷ꓿ ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓪ ꓔꓯ꓾ ꓤ ꓠꓱ ꓐꓴꓳ꓾ ꓠꓴ ꓪ ꓜꓽ ꓓꓴ ꓟꓽ ꓙꓳ_꓾ ꓐꓯ_ ꓡꓳ꓿ ꓬꓲ ꓪ ꓡꓰ꓾ ꓟꓽ ꓙꓳ꓾ ꓐꓰ ꓬꓲ ꓔꓯ ꓒꓳꓹ ꓖꓶ_ ꓡꓳ꓿ ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓪ ꓔꓯ꓾ ꓡꓲꓺ ꓡꓯꓼ ꓙ ꓕꓲ ꓛꓱꓽ ꓗꓪ ꓥꓪꓸ ꓑꓱꓸ ꓡꓳ ꓧꓳꓽ ꓗꓷ꓿ ꓖꓳ ꓡꓱ ꓠꓬ ꓠꓴ ꓪ ꓟꓶ_ ꓥꓳ꓾ ꓐꓯ_ ꓡꓳ꓿ ꓬꓲ ꓪ ꓡꓳꓺ ꓧꓳꓽ ꓗꓷ ꓕꓯ꓾ ꓥꓪꓸ ꓮ ꓟꓬꓺ ꓟꓬ ꓓꓯꓹ ꓠꓬꓲ꓾ ꓥꓪꓸ ꓑꓱꓸ ꓔꓯ ꓬꓲ ꓪ ꓚꓵꓹ ꓓꓯ ꓡ ꓟꓽ ꓘꓴ꓿ ꓖꓳ ꓡꓱ ꓠꓬ ꓬꓰ-ꓢꓴ ꓠꓲꓹ ꓠꓵ_ ꓟ ꓛꓳ ꓒꓯꓹ ꓖꓳ ꓕꓲ ꓣꓳ ꓡꓰ ꓒꓲ-ꓕꓱ ꓔꓯ꓾ ꓢꓲꓺ ꓒ ꓥ ꓡꓳ꓾ ꓐꓯ_ ꓡꓳ꓿ ꓢꓲ-ꓟꓴ ꓒꓲ-ꓕꓱ ꓠꓬ ꓢꓲꓺ ꓒ ꓥ ꓟ ꓑ ꓙ_ ꓕꓯ꓾ ꓬꓲ ꓙꓬꓽ ꓡꓯꓽ ꓟꓴ ꓥ ꓠꓬꓲ꓾ ꓬꓲ ꓐꓵ ꓞꓶ ꓖꓪꓽ ꓧꓷꓹ ꓗꓷ ꓢꓲ꓾ ꓬꓲꓻ ꓡꓴ ꓐꓱ ꓠꓯꓸꓼ ꓗꓪ ꓔꓷꓹ ꓓꓵ ꓡꓰ_ ꓡꓳ꓿ ꓛꓳ ꓒꓯ ꓐꓴ ꓖꓳ ꓕꓲ ꓧꓳ ꓠꓽ꓾ ꓡꓲꓺ ꓤ ꓗꓪ ꓐꓰ ꓥꓪꓸ ꓒꓻ ꓐꓲ ꓐꓰ ꓓꓯꓹ ꓟ ꓥꓪꓸ ꓑꓱꓸ ꓖꓳ ꓟ ꓖꓳꓻ ꓩꓴ ꓡ_ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓙꓬ ꓘꓶꓽ ꓗꓪ ꓐꓰ ꓶꓽ ꓤ ꓟꓽ ꓗꓳꓹ꓿ ꓮꓽ ꓡ ꓠꓬꓲꓽ ꓦꓬ ꓛꓬꓹ ꓛꓲ_ ꓡꓰꓽ ꓗꓳꓹ_ ꓡꓳ꓿ ꓬꓲ ꓪ ꓠꓬ ꓬꓲ ꓙꓬ ꓘꓶꓽ ꓗꓪ ꓓꓯ ꓡ_ ꓕꓯ꓾ ꓖꓳ ꓗꓪ ꓠꓬ ꓝꓶꓸ ꓢꓷꓼ ꓮ ꓔꓳꓸ_ ꓐꓰ ꓮ ꓔꓳꓸ ꓗꓪ ꓥꓪꓸ_ ꓐꓰ ꓫꓪ ꓒꓵꓼ ꓚꓰꓹ ꓔ_ ꓟ ꓬꓲ ꓪ ꓟꓳ_ ꓡꓳ꓿ ꓬꓰ-ꓢꓴ ꓡꓰ ꓬꓲ ꓪ ꓔꓯ꓾ ꓮ ꓟꓶ ꓠꓴ ꓪ ꓣꓴ ꓟꓶ_ ꓟ ꓥꓪꓸ ꓕꓲ ꓐꓱꓻ ꓤ ꓔꓯꓹ ꓖꓶ ꓡꓯ꓾ ꓐꓯ_ ꓡꓳ꓿ ꓢꓲ-ꓟꓴ ꓒꓲ-ꓕꓱ ꓠꓽ ꓡꓲꓺ ꓠꓯꓸꓼ ꓓꓵ ꓙꓰ ꓢꓲ꓾ ꓥꓪꓸ ꓓꓽ ꓟ ꓕꓲ ꓦꓬ ꓥꓪꓽ ꓞꓲ ꓢ ꓟ ꓒ ꓐꓲꓸꓼ ꓐꓰ ꓓꓯꓹ ꓟ ꓥꓪꓸ ꓑꓱꓸ ꓔꓯ ꓬꓲ ꓙꓬ ꓘꓶꓽ ꓗꓪ ꓖꓳꓻ ꓓꓯ ꓡ_ ꓡꓳ꓿ ꓖꓳ ꓟꓬ ꓛꓲ ꓓꓯꓹ_ ꓟꓲ ꓥꓪꓸ ꓑꓱꓸ ꓠꓬ ꓟꓽ ꓧꓽ ꓡꓰ꓿ ꓬꓰ-ꓢꓴ ꓡꓰ ꓬꓲ ꓪ ꓔꓯ꓾ ꓜ ꓜꓽ ꓡꓯ꓾ ꓐꓯ_ ꓡꓳ꓿ ꓢꓲꓺ ꓒ ꓥ ꓟ ꓬꓲ ꓪ ꓢꓷ_ ꓠꓬꓲ꓾ ꓠꓴ ꓮ ꓟ ꓥ ꓡꓳꓺꓽ꓾ ꓐꓰ꓾ ꓛꓳ ꓒꓯ ꓐꓴ ꓮ ꓟ_ ꓟꓲ ꓬꓲ ꓔꓯ ꓠ ꓠꓬꓲ ꓟꓽ ꓑꓶꓸ꓿ ꓖꓳ ꓡꓱ ꓠꓬ ꓬꓰ-ꓢꓴ ꓡ ꓢꓲ꓾ ꓫꓪ ꓒꓵꓼ ꓣꓴ ꓢꓲ ꓠꓬꓲ꓾ ꓬꓲ ꓪ ꓔꓯ ꓖꓶ_ ꓡꓳ꓿ ꓥꓪꓸ_ ꓟꓲ ꓬꓲ ꓖꓳ ꓡꓱ ꓖꓶ_ ꓡꓳ꓿ ꓕꓱ ꓟ ꓠꓬ ꓬꓰ-ꓢꓴ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ ꓗꓸ ꓠꓯ꓾ ꓛꓳ ꓒꓯ ꓐꓴ ꓔꓯ ꓟꓳꓸ ꓖꓶ_ ꓟ ꓢ ꓧꓪ ꓕꓲ ꓧꓪꓹ ꓟ ꓥ ꓡꓳ꓿

Add new comment

1 + 1 =

Please wait while the page is loading