ꓝꓲ ꓓꓴ ꓐꓴ ꓡꓯꓼ ꓫꓴ

ꓟ-ꓕꓲ ꓕꓳꓽ ꓶ 19: 23-30

 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓛꓳ ꓒꓯ ꓐꓴ ꓔꓯ꓾ ꓥꓪ ꓠꓴ ꓪ ꓔꓯ ꓔꓱꓹ ꓔꓱ_ ꓐꓰ ꓐꓯ ꓖꓶ_ ꓠꓬꓲ꓾ ꓞꓳ ꓐꓳ ꓠꓬ ꓟꓴ ꓗꓪ ꓗꓴꓷꓼ ꓗꓪ ꓓꓵ ꓡꓰ ꓫꓸ_ ꓡꓳ꓿ ꓥꓪ ꓝꓮꓲ ꓠꓴ ꓪ ꓔꓯ ꓐꓯ ꓖꓶ_ ꓠꓬꓲ꓾ ꓡꓳꓽ ꓕꓳ ꓕꓲ ꓘꓹ ꓪꓳꓼ ꓠ ꓗꓺ ꓗꓪ ꓙꓻ ꓙꓰ_ ꓟ ꓠꓬ꓾ ꓞꓳ ꓐꓳ ꓕꓲ ꓣꓳ ꓪꓴ-ꓢ ꓗꓴꓷ ꓠꓯꓸꓼ ꓗꓪ ꓓꓵ ꓡꓰ_ ꓟ ꓢꓶꓸ ꓟꓽ ꓞꓲ ꓢꓻ_ ꓡꓳ꓾ ꓐꓯ_ ꓡꓳ꓿ ꓐꓯ ꓘꓶ ꓕꓱ ꓟ ꓛꓳ ꓒꓯ ꓐꓴ ꓑ ꓙ ꓗꓷ ꓠꓬ꓾ ꓬꓲ ꓪ ꓮ ꓘꓶ ꓐꓰ ꓮ ꓘꓶ ꓓꓵ ꓙ ꓟꓶ ꓢꓲ꓾ ꓖꓳ ꓡꓱ ꓥ ꓠꓬ ꓮ ꓟ ꓢꓯꓼ ꓟꓬ ꓝꓸ ꓟꓶ ꓐ ꓡ_ ꓢꓰꓽ꓾ ꓐꓯ_ ꓡꓳ꓿ ꓬꓰ-ꓢꓴ ꓠꓬ ꓬꓲ ꓪ ꓔꓯ ꓡꓳꓸ ꓔ ꓢꓲ꓾ ꓬꓲ ꓪ ꓔꓯ꓾ ꓞꓳ ꓤ ꓠꓽ ꓬꓰ ꓟꓽ ꓐ ꓡ꓿ ꓪꓴ-ꓢ ꓠꓽ ꓮ ꓫꓵ_ ꓟꓲ ꓬꓰ ꓐ ꓡ_ ꓡꓳ꓾ ꓐꓯ_ ꓡꓳ꓿ ꓖꓳ ꓡꓱ ꓠꓬ ꓒꓲ-ꓕꓱ ꓒꓳꓹ ꓖꓶ ꓢꓲ ꓬꓲ ꓔꓯ꓾ ꓠꓬꓲ ꓠꓹ꓾ ꓥꓪ ꓠꓴꓽ ꓠꓬ ꓮ ꓙꓵ ꓡꓱꓸꓼ ꓡꓳ ꓗꓷ ꓢꓲ ꓠꓴ ꓗꓸ ꓠꓯ ꓛꓳ_ ꓡꓳ꓿ ꓖꓳ ꓡꓱ ꓠꓬ ꓥꓪ ꓠꓴꓽ ꓮ ꓫꓵ ꓟꓶ_ ꓥꓳ ꓪꓺꓽ꓾ ꓐꓯ_ ꓡꓳ꓿ ꓬꓰ-ꓢꓴ ꓡꓰ ꓬꓲ ꓪ ꓔꓯ ꓕꓱ ꓡꓱ ꓐꓯ_ ꓡꓳ꓾ ꓥꓪ ꓠꓴ ꓪ ꓔꓯ ꓔꓱꓹ ꓔꓱ_ ꓐꓰ ꓐꓯ ꓖꓶ_ ꓠꓬꓲ꓾ ꓥꓪ ꓔꓯ ꓛꓳ ꓢꓴ ꓠꓴ ꓪ ꓠꓬ꓾ ꓟꓲ ꓠꓯ ꓫꓵꓼ ꓗꓪ꓾ ꓡ ꓞꓳ ꓮ ꓐꓲ ꓬꓲ ꓐꓬꓱꓼ ꓡꓱ ꓡꓱ_ ꓟ ꓙꓵꓽ ꓠꓬꓲꓸ ꓕꓲ ꓗꓪ ꓠꓬꓲꓸ ꓠꓸ_ ꓕꓯ꓾ ꓠꓴ ꓪ_ ꓟꓲ ꓙꓵꓽ ꓠꓬꓲꓸ ꓕꓲ ꓞꓲ ꓠꓬꓲꓽ ꓟ ꓗꓪ ꓠꓬꓲꓸ ꓠꓸ ꓢꓲ꓾ ꓬꓲ-ꓢꓷ-ꓡꓰ ꓞꓲ ꓠꓬꓲꓽ ꓪꓳꓼ ꓔꓯ ꓐꓯ ꓟꓴ ꓘꓶ_ ꓥꓳ꓿ ꓥꓪ ꓟꓬꓱꓺ ꓐꓱ ꓶ ꓬꓲ ꓦꓲ꓾ ꓥ ꓠꓬ ꓬꓲꓼ ꓤ ꓠꓬꓲ ꓤ ꓮꓸ ꓝꓲ ꓠꓬꓲ ꓟ꓾ ꓥ ꓠꓬ ꓮ ꓐꓽ ꓮ ꓟ_ ꓐꓰ ꓤ ꓠꓱ꓾ ꓥ ꓠꓬ ꓬꓰꓻ ꓟꓲ ꓡꓳꓺ ꓔ ꓬꓰ ꓢꓴ ꓥ ꓕ ꓑꓳ ꓠꓬ ꓕꓲ ꓦꓬꓻ ꓝꓸ ꓟꓶ ꓢꓲ꓾ ꓕꓲ ꓞꓲ ꓕꓲ ꓑ ꓟ ꓢꓯꓼ ꓟꓬ ꓟꓶ_ ꓥꓳ꓿ ꓖꓳ ꓡꓱ ꓥ_ ꓟꓲ ꓬꓲ ꓪꓴꓸ ꓮ ꓟꓬꓹ ꓣꓳ ꓠꓬ ꓬꓲ ꓡꓷ ꓗꓷ ꓡꓰ_ ꓥꓳ꓿ ꓬꓲ ꓡꓷ ꓠꓽ ꓬꓲ ꓪꓴꓸ ꓗꓷ ꓡꓰ_ ꓥꓳ꓿