ꓟꓴꓽ ꓗꓪ ꓗꓪ ꓟ ꓐꓹ ꓐ ꓪꓴ-ꓢ ꓡꓰ ꓪꓵꓼ ꓘꓶꓽ ꓖꓶꓽ ꓔ ꓟ ꓠꓬ ꓐꓲ ꓜꓲꓼ ꓡꓰ ꓓꓴ ꓥ ꓡꓳ=

ꓠꓬꓲꓸ ꓠꓬꓲ ꓗꓪ ꓣꓳꓽ ꓓꓵꓽ ꓙ ꓠꓬꓲ ꓓꓴ ꓢꓲꓺ ꓒ ꓬꓰ-ꓢꓴ ꓔꓯ ꓬꓴ-ꓓ ꓡꓰ ꓪꓴꓽ ꓜꓽ ꓠꓹ ꓟ ꓬꓰˍ ꓟ ꓔꓯ ꓣꓳꓽ ꓑ ꓙ ꓪˍ ꓡꓳ= ꓖꓳ ꓟ ꓡꓰꓽ ꓟꓽ ꓞꓲꓺ ꓒꓲ-ꓕꓱ ꓡꓰ ꓢꓲꓺ ꓒ ꓬꓰ-ꓢꓴ ꓔꓯ ꓢꓯꓼ ꓟꓬ ꓖꓶˍ ꓥꓳ꓾ ꓐꓰ ꓐꓯ ꓕꓯ ꓢꓲꓺ ꓒ ꓬꓰ-ꓢꓴ ꓡꓰ ꓒꓲ-ꓕꓱ ꓔꓯ ꓠꓴ ꓠꓬ ꓮꓸ ꓭ ꓒꓽ ꓟꓽ ꓐꓵꓻ ꓢꓰꓽ ꓕꓯ ꓠꓴ ꓠꓬ ꓥꓪ ꓔꓯ ꓟꓽ ꓢꓷꓸ ꓐꓰ ꓢꓽ ꓧꓪꓹ ꓣꓷꓠˍ ꓥꓳ꓾ ꓐꓰ ꓐꓯ ꓟ ꓟꓸ ꓟꓲꓽ ꓥ ꓡꓳ= ꓟꓸ ꓟꓲꓽ ꓕꓱ ꓟ ꓔꓯ ꓣꓳꓽ ꓓꓵꓽ ꓙ ꓠꓬꓲˍ ꓕꓯ ꓢꓲꓺ ꓒ ꓬꓰ-ꓢꓴ ꓠꓬ ꓬꓲ ꓔꓯ ꓪꓴꓽ ꓜꓽ ꓢꓴ ꓡꓰ ꓟꓽ ꓪꓴꓽ ꓜꓽ ꓢꓰꓽ ꓕꓯ ꓡꓰ ꓬꓲ ꓢꓷˍ ꓡꓳ= ꓘꓹ-ꓡꓲꓳ ꓬꓴ-ꓓ ꓠꓬ ꓬꓲ ꓔꓯ ꓪꓴꓽ ꓜꓽˍ ꓥꓳ ꓐꓰ ꓬꓲ ꓢꓷˍ ꓡꓳ= ꓢꓷꓸ ꓔ ꓥˍ ꓟꓲ ꓜ ꓜꓽ ꓖꓴ ꓗꓪ ꓗꓳꓺ ꓢꓲ ꓕꓲ ꓪꓽ ꓜ ꓜꓽˍ ꓡꓳ= ꓕꓲ ꓪꓽ ꓫꓸ ꓕꓱˍ ꓡꓳ= ꓬꓲ ꓔꓯ ꓠꓴ ꓬꓰ ꓙꓲꓽ ꓙꓳˍ ꓟ ꓮꓸ ꓟꓰꓸ ꓬꓰ ꓐꓰ ꓐꓯ ꓖꓶˍ ꓡꓳ=

ꓕꓱ ꓟˍ ꓡꓰ ꓐꓰ ꓬꓲ ꓮ ꓘꓶꓸ ꓠꓲꓹ ꓠꓵˍ ꓟ ꓬꓲ ꓝꓲ ꓓꓴ ꓞꓲꓺ ꓠꓬꓲꓽ ꓣꓳ ꓘꓴꓽ ꓗꓪ ꓟ ꓬꓲ ꓪꓴꓸ ꓓꓵꓺ ꓝꓰꓹ ꓔ ꓖꓶˍ ꓟ ꓒꓲ-ꓕꓱ ꓥˍ ꓟꓲ ꓬꓲ ꓔꓯ ꓟꓽ ꓢꓷꓸ ꓐꓰ ꓐꓯ ꓟ ꓧꓶꓸ ꓕꓯ ꓡꓰ ꓬꓲ ꓢꓷˍ ꓡꓳ= ꓖꓳ ꓡꓱ ꓢꓷˍ ꓥ ꓟꓲ ꓢꓲꓺ ꓒ ꓠꓬ ꓒꓲ-ꓕꓱ ꓔꓯ ꓟꓽ ꓑꓱꓹ꓾ ꓬꓲ ꓔꓯ ꓟꓽ ꓐꓯ ꓗꓸ꓾ ꓬꓲ ꓔꓯ ꓟꓽ ꓡꓳꓺ ꓒꓰ= ꓢꓲꓺ ꓒ ꓬꓰ-ꓢꓴ ꓠꓬ ꓝꓴꓲꓸ ꓔꓯ ꓟꓽ ꓠꓵꓻ ꓥˍ ꓟꓲ ꓝꓴꓲꓸ ꓙꓳ ꓢꓴ ꓔꓯ ꓠꓬ ꓠꓲꓹ ꓠꓵˍ ꓡꓳ ꓐꓯ ꓟ ꓣꓳꓽ ꓑ ꓙ ꓠꓬꓲˍ ꓡꓳ= ꓬꓲ ꓠꓬ ꓝꓴꓲꓸ ꓙꓳ ꓢꓴ ꓔꓯ ꓠꓲꓹ ꓠꓵˍ ꓡꓳ= ꓖꓳ ꓡꓱ ꓠꓬꓲ ꓬꓲ ꓠꓬ ꓬꓲ ꓬꓰ ꓙꓲꓽ ꓙꓳˍ ꓟ ꓮ ꓙꓵꓽ ꓮ ꓤ ꓤ ꓐꓰ ꓬꓰ ꓗꓳꓸ ꓙꓰˍ ꓡꓳ=

ꓒꓴ ꓔꓯ ꓠꓲꓹ ꓠꓵ ꓒꓽ ꓘꓹ-ꓡꓲꓳ ꓬꓴ-ꓓ ꓠꓬ ꓢꓲꓺ ꓒ ꓬꓰ-ꓢꓴ ꓔꓯ ꓪꓴꓽ ꓜꓽˍ ꓡꓳ= ꓣꓳꓽ ꓟꓲ ꓠꓯ ꓗꓪ ꓥˍ ꓟꓲ ꓒꓴ ꓔꓯ ꓮ ꓘꓶꓸ ꓟꓬ ꓠꓯꓸˍ ꓕꓯ꓾ ꓠꓱꓸ ꓐꓯ ꓕꓯꓽ ꓢꓲ ꓒꓵꓽ ꓗ ꓚꓰˍ ꓕꓯ꓾ ꓒꓴ ꓔꓯ ꓡꓰꓽ ꓠꓲꓹ ꓥꓳˍ ꓕꓯ ꓢꓲꓺ ꓒ ꓬꓰ-ꓢꓴ ꓔꓯ ꓗꓸ ꓠꓯ ꓢꓲꓺ ꓗꓪ ꓞꓰꓻ ꓡꓰ ꓝꓲˍ ꓟˍ ꓡꓰ ꓐꓰ ꓗꓹ ꓡꓳ= ꓢꓲꓺ ꓒ ꓬꓰ-ꓢꓴ ꓔꓯ ꓗꓸ ꓠꓯꓸ ꓢꓲꓺ ꓗꓪ ꓞꓰꓻ ꓓꓰˍ ꓝꓲ ꓢꓲ ꓒꓴ ꓔꓯ ꓡꓰꓽ ꓟꓬ ꓠꓯꓸ ꓕꓯ ꓠꓬ ꓢꓲꓺ ꓒ ꓬꓰ-ꓢꓴ ꓔꓯ ꓪꓴꓽ ꓜꓽˍ ꓟˍ ꓡꓰ ꓐꓰ ꓗꓷ ꓡꓰˍ ꓥꓳ=

ꓛꓳꓼ ꓠꓬꓲ ꓟꓬꓱꓽ ꓬꓰ ꓠꓹ ꓟ ꓬꓲ ꓙꓵꓹ ꓙꓳˍ ꓥ ꓟꓲ ꓫꓵꓽ ꓠꓬꓲ ꓕꓲ ꓠꓬꓲ ꓟ ꓪꓴ-ꓢ ꓔꓯ ꓬꓲ ꓙꓵꓹ ꓖꓶ ꓟꓽ ꓐ ꓡ ꓡ ꓐꓰ ꓒꓴ ꓧꓪ ꓔꓬ ꓕꓯ ꓠꓽ ꓣꓳ ꓠꓬ ꓒꓴ ꓔꓯ ꓦ ꓡꓱ ꓔꓬ ꓟ ꓕꓲ ꓡꓰꓹ ꓥꓳ= ꓬꓴ-ꓓ ꓘꓹ-ꓡꓲꓳ ꓡꓰ ꓐꓰ ꓢꓲꓺ ꓒ ꓬꓰ-ꓢꓴ ꓔꓯ ꓪꓴꓽ ꓜꓽ ꓢꓴ ꓡꓰ ꓐꓰ ꓗꓷ ꓡꓰˍ ꓥꓳ= ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓣꓳꓽ ꓓꓵꓽ ꓙ ꓠꓬꓲ ꓡꓯ= ꓢꓲꓺ ꓒ ꓔꓯ ꓧꓶꓸ ꓕꓯꓽ ꓧꓪ ꓔꓬ ꓡ? ꓒꓴ ꓔꓯ ꓧꓶꓸ ꓕꓯ ꓧꓪ ꓔꓬ ꓡ? ꓐꓯ ꓟ ꓣꓳꓽ ꓓꓵꓽ ꓙ ꓠꓬꓲ ꓡꓯ=

ꓢꓲꓺ ꓒ ꓡꓰ ꓣꓳꓽ ꓔꓯ ꓪꓵꓼ ꓘꓶꓽ ꓖꓶ ꓔ ꓡꓳ= ꓟꓴꓽ ꓗꓪ ꓗꓪ ꓟ ꓖꓴꓽ ꓙꓴꓽ ꓧꓶꓸ ꓕꓯ ꓧꓪ= ꓤꓰꓻ ꓞꓹ ꓟ ꓠꓴ ꓪ ꓔꓯ ꓖꓶꓽ ꓡˍ ꓥꓳ꓾ ꓐꓰ ꓐꓯ ꓔ ꓟ ꓡꓰ ꓐꓰ ꓣꓳ ꓠꓬ ꓟꓴꓽ ꓗꓪ ꓗꓪ ꓟ ꓖꓴꓽ ꓙꓴꓽ꓾ ꓟꓴꓽ ꓗꓪ ꓗꓪ ꓟ ꓶꓻ ꓤ ꓔꓯ ꓧꓶꓸ ꓔꓯ ꓧꓪ ꓠ ꓔ ꓡꓳ= ꓟꓴꓽ ꓗꓪ ꓗꓪ ꓟ ꓡꓯꓼ ꓫꓴ ꓔꓯ ꓧꓶꓸ ꓕꓯ ꓧꓪꓸ ꓕꓯ ꓠꓬ ꓟꓲ ꓠꓯ ꓗꓪ ꓟ ꓬꓲ ꓐꓶꓹ ꓓꓳ ꓡˍ ꓥꓳ꓾ ꓐꓰ ꓪꓴ-ꓢ ꓡꓰ ꓪꓵꓼ ꓘꓶꓽ ꓖꓶꓽ ꓔ ꓡꓳ= ꓮ ꓫꓵꓽ ꓟꓲ ꓬꓰ ꓐ ꓡ ꓢꓴ ꓪꓴ-ꓢ ꓡꓰ ꓪꓵꓼ ꓘꓶꓽ ꓖꓶꓽ ꓔ ꓟ ꓑꓶꓸ ꓓꓴ ꓮꓽ ꓔꓳꓺ ꓟꓽ ꓗꓷ ꓡꓰ= ꓬꓲ ꓐꓯ ꓘꓶꓽ ꓕꓲ ꓘꓶꓽ ꓡꓰ ꓕꓲ ꓘꓶꓽ ꓐꓲ ꓜꓲꓼˍ ꓡꓳ= ꓕꓲ ꓘꓶꓽ ꓡꓰ ꓕꓲ ꓘꓶꓽ ꓟꓽ ꓐꓲ ꓟꓽ ꓗꓷ ꓡꓰ= ꓢꓲꓺ ꓒ ꓡꓰ ꓐꓯ ꓔ ꓟ ꓒꓬꓱꓼ ꓡˍ ꓥꓳ ꓐꓯ ꓢꓴ ꓥˍ ꓟꓲ ꓶꓼ ꓙꓳ ꓫꓱꓹ ꓙꓳˍ ꓡꓳ= ꓖꓳ ꓡꓱ ꓠꓬꓲ ꓣꓳꓽ ꓙꓵꓻ ꓡꓯ=

ꓒꓴ ꓫꓵꓺ ꓔꓯ ꓢꓶꓸ ꓟꓽ ꓞꓲꓺ ꓪꓴ-ꓢ ꓟꓬꓱꓽ ꓬꓰ ꓡꓯ= ꓪꓴ-ꓢ ꓐꓯ ꓘꓶꓽ ꓠ ꓠꓹ ꓡꓯ= ꓪꓴ-ꓢ ꓔꓯ ꓡꓰꓽ ꓣꓳ ꓛꓳ ꓢꓲ ꓪꓴ-ꓢ ꓟꓬꓱꓺ ꓗꓪ ꓐꓰ ꓛꓳ ꓫꓱꓽˍ ꓠꓬ ꓤꓰꓻ ꓓꓹ ꓟ ꓣꓳꓽ ꓔꓯ ꓖꓶꓽ ꓡˍ ꓥꓳ= ꓕꓱ ꓟ ꓡꓰꓽ ꓟꓽ ꓞꓲꓺ ꓟꓲ ꓠꓯ ꓕꓱ ꓟ ꓗꓪ ꓛꓳ ꓫꓱꓽ ꓔꓬ ꓕꓯ ꓣꓳ ꓔꓯ ꓢꓴ ꓡꓰ ꓐꓯ ꓗꓸ ꓡˍ ꓕꓯ꓾ ꓥ ꓠꓬ꓾ ꓣꓳ ꓟꓽ ꓔꓬ ꓕꓲ ꓑꓹ ꓤ ꓗꓪ ꓣꓳꓽ ꓟꓽ ꓙꓲꓻ ꓟ ꓐꓯ ꓢꓲ ꓣꓳꓽ ꓟꓲ ꓙꓬ ꓗꓪ ꓛꓲꓺ ꓡ ꓕꓯ ꓣꓳ ꓔꓯ ꓫꓱꓸ ꓖꓶ ꓢꓴ ꓔꓯ ꓟꓳꓻ ꓪꓴˍ ꓟ ꓦꓬꓼ ꓠꓬꓲ ꓙꓳ ꓡ ꓗꓴꓸˍ ꓡꓳ= ꓖꓳ ꓕꓯ ꓠꓬꓲꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓔꓯ ꓔꓯꓺ ꓢꓳ ꓢꓲ꓾ ꓠꓲꓹ ꓟ ꓔꓯ ꓢꓲꓺ ꓡꓲꓺ ꓐꓰ ꓗꓷ ꓔ ꓢꓲ ꓠꓬꓲ ꓬꓲ ꓪ ꓔꓯ ꓛꓳ ꓤ ꓕꓲ ꓣꓳˍ ꓡꓰ ꓐꓰ ꓡꓳꓸ ꓟꓳꓻ ꓢꓲ ꓟꓽ ꓐꓯ ꓗꓸ ꓗꓸ ꓬꓲ ꓪ ꓔꓯ ꓠꓵꓻ ꓠꓲꓹ ꓟꓳꓸ ꓖꓶ ꓠꓹ ꓟ ꓢꓯꓼ ꓕꓵꓼ ꓙꓰ ꓡꓯ=

ꓟꓲ ꓠꓯ ꓞꓳ ꓤ ꓠꓬ ꓟꓷꓽ ꓠꓷꓹ ꓘꓶꓽ ꓗꓪ ꓬꓲ ꓫꓵꓽ ꓬꓲ ꓙꓰꓽ ꓐꓯ ꓗꓴˍ ꓡꓳ= ꓟꓲ ꓙꓬ ꓗꓪ ꓕꓲ ꓙꓰꓽ꓾ ꓣꓳ ꓟꓽ ꓟꓳꓻ ꓟ ꓗꓪ ꓕꓲ ꓙꓰꓽ ꓐꓯ ꓗꓴꓸ ꓢꓴ ꓔꓯ ꓣꓳꓽ ꓔꓳꓹ ꓜꓳꓽ ꓡ ꓗꓴˍ ꓡꓳ= ꓖꓳ ꓡꓱ ꓠꓬꓲ ꓦꓬꓼ ꓠꓬꓲ ꓕꓱ ꓟ ꓗꓪ ꓞꓳ ꓙꓳ ꓙꓰˍ ꓕꓯ ꓢꓲꓺ ꓒ ꓬꓰ-ꓢꓴ ꓔꓯ ꓡꓳꓸ ꓢꓲ꓾ ꓢꓲꓺ ꓒ ꓬꓰ-ꓢꓴ ꓬꓲ ꓮ ꓡꓲ ꓛꓳ ꓫꓱꓽ ꓗꓳꓸ ꓙꓰˍ ꓟ꓾ ꓮ ꓡꓲ ꓛꓳ ꓫꓱꓽˍ ꓕꓯ ꓣꓳ ꓠꓬ ꓟꓲ ꓠꓯ ꓕꓱ ꓟ ꓗꓹ ꓛꓲꓽˍ ꓟ ꓟꓶˍ ꓡ? ꓐꓯ ꓟ ꓔꓯ ꓠꓬꓲꓸ ꓠꓬꓲ ꓣꓳꓽ ꓓꓵꓽ ꓙ ꓠꓬꓲ ꓠꓹ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓒꓴ ꓫꓵꓺ ꓔꓯ ꓢꓶꓸ ꓟꓽ ꓞꓲꓺ ꓪꓴ-ꓢ ꓟꓬꓱꓽ ꓔꓯ ꓬꓰ ꓢꓲ꓾ ꓥ ꓠꓬ ꓙꓲˍ ꓟ ꓬꓰ ꓢꓲ꓾ ꓪꓴ-ꓢ ꓠꓲꓹ ꓠꓵˍ ꓟ ꓔꓯ ꓬꓰ ꓢꓲ ꓢꓯꓼ ꓕꓵꓼ ꓙꓰˍ ꓕꓯ ꓠꓽ ꓣꓳꓽ ꓠꓬ ꓗꓹ ꓛꓲꓽˍ ꓥꓳ꓾ ꓐꓯ ꓟ ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓐꓰ ꓣꓳꓽ ꓔꓯ ꓢꓷꓸ ꓡꓰ ꓝꓲˍ ꓟ ꓥ ꓡꓳ=