ꓣꓳ ꓠꓬ ꓖꓳ ꓓꓱꓽ ꓔꓲꓹ ꓟ ꓗꓪ ꓐꓰ ꓝꓴꓲꓸ ꓔꓯ ꓟꓳꓸ ꓫꓵꓻ ꓢꓲ ꓣꓱꓽ ꓛꓰꓽ ꓔꓯ ꓟꓳꓸ ꓢꓯꓸ ꓬꓲꓼ ꓡ ꓠꓹ ꓟ ꓥ ꓡꓳ

ꓠꓬꓲꓸ ꓠꓬꓲ ꓐꓱ ꓶ ꓣꓳ ꓓꓵꓽ ꓙ ꓠꓬꓲ ꓓꓴ ꓠꓬ ꓢꓲꓺ ꓒ ꓬꓰ-ꓢꓴ ꓐꓰ ꓠꓲ-ꓗꓳ-ꓓꓲ-ꓟꓴ ꓬꓲ ꓪ ꓠꓬꓲꓽ ꓣꓳ ꓫꓸ ꓕꓱ ꓡꓯ ꓘꓳꓹ ꓟ ꓚꓺ ꓟꓲꓽ ꓥ ꓡꓳ= ꓠꓲ-ꓗꓳ-ꓓꓲ-ꓟꓴ ꓠꓬ ꓒ-ꓡꓲ-ꓢꓷ ꓕꓲ ꓣꓳ ꓥ ꓢꓲ ꓢꓲꓺ ꓒ ꓬꓰ-ꓢꓴ ꓔꓯ ꓙꓵˍ ꓡꓳ= ꓖꓳ ꓡꓱ ꓥ ꓟꓲ ꓬꓲ ꓠꓬ ꓟꓳꓼ ꓡꓳ ꓕꓯ ꓡ ꓟꓽ ꓑꓶꓸ ꓠꓬꓲ ꓢ ꓘꓪ ꓕꓯ ꓘꓳ ꓫꓱꓺ ꓫꓱꓺ ꓙꓰ ꓢꓲ ꓢꓲꓺ ꓒ ꓔꓯ ꓟꓳ ꓙꓰˍ ꓡꓳ= ꓢꓲꓺ ꓒ ꓐꓰ ꓫꓸ ꓕꓱ ꓡꓯ ꓘꓳꓹ ꓡꓳ= ꓢꓲꓺ ꓒ ꓬꓰ-ꓢꓴ ꓡꓰ ꓬꓲ ꓔꓯ ꓮꓽ ꓟ ꓥˍ ꓟꓲ ꓬꓲꓻ ꓙꓬ ꓗꓪ ꓐꓰ ꓞꓲꓽ ꓗꓷ ꓟ ꓟꓽ ꓟꓶ ꓢꓴ ꓠꓬ ꓟꓴꓽ ꓗꓪ ꓗꓪ ꓓꓯꓻ ꓙꓰ ꓟꓽ ꓓ ꓐꓰ ꓢꓲꓺ ꓒ ꓬꓰ-ꓢꓴ ꓐꓯ ꓟ ꓟꓸ ꓟꓲꓽ ꓥ ꓡꓳ= ꓐꓯ ꓘꓶꓽ ꓕꓱ ꓟ ꓔꓯ ꓑ ꓙ ꓡꓰ ꓟ ꓠꓲ-ꓗꓳ-ꓓꓲ-ꓟꓴ ꓠꓬ ꓮ ꓘꓶꓸ ꓓꓵꓽ ꓙ ꓟꓶ ꓡꓰ ꓢꓲ ꓞꓳ ꓤ ꓕꓲ ꓣꓳ ꓠꓬ ꓞꓲꓼ ꓪꓴꓽ ꓡˍ ꓕꓯ ꓚꓲ ꓛꓬ ꓟꓹ ꓟ ꓤꓽ ꓘꓶꓻ ꓗꓪ ꓝꓮꓲ ꓕꓲ ꓧꓪꓹ ꓬꓲꓼ ꓙꓰ ꓠꓸ ꓡ꓾ ꓐꓰ ꓠꓺ ꓠꓬꓲˍ ꓡꓳ= ꓢꓲꓺ ꓒ ꓬꓰ-ꓢꓴ ꓡꓰ ꓠꓴ ꓠꓬ ꓟꓸ ꓒ ꓕꓲ ꓣꓳ ꓣꓱꓽ ꓔꓬ ꓥˍ ꓟꓲ ꓕꓱ ꓟ ꓔꓯ ꓟꓽ ꓢꓷꓸ ꓡ= ꓦꓻ ꓗꓪ ꓐꓰ ꓒꓬꓱꓽ ꓟꓳˍ ꓟ ꓠꓬ ꓦꓻ ꓥ ꓡꓳ= ꓧꓪꓽ ꓗꓪ ꓐꓰ ꓒꓬꓱꓽ ꓟꓳꓻ ꓔ ꓟ ꓠꓬ ꓧꓪꓽ ꓖꓳ ꓓꓱꓽ ꓥ ꓡꓳ꓾ ꓐꓯ ꓢꓲ ꓒꓳꓹ ꓖꓶˍ ꓡꓳ=

ꓟꓸ ꓟꓲꓽ ꓕꓱ ꓟ ꓗꓪ ꓐꓰ ꓣꓳꓽ ꓓꓵꓽ ꓙ ꓠꓬꓲ ꓓꓴ ꓠꓬ ꓣꓳ ꓠꓬ ꓢꓲꓺ ꓒ ꓬꓰ-ꓢꓴ ꓔꓯ ꓙꓵꓻꓳ= ꓢꓲꓺ ꓒ ꓬꓰ-ꓢꓴ ꓟꓬꓱꓺ ꓗꓪ ꓐꓰ ꓖꓳ ꓓꓱꓽ ꓔꓲꓹ ꓟ ꓗꓪ ꓐꓰ ꓣꓳ ꓠꓬ ꓪꓴ-ꓢ ꓤ ꓮꓸ ꓟꓲꓽ ꓒꓬꓱꓼ ꓡꓺꓳ ꓐꓯ ꓟ ꓝꓮꓲ ꓕꓲ ꓧꓪꓹ ꓣꓳ ꓔꓯ ꓢꓷꓸ ꓡꓰ ꓝꓲˍ ꓟ ꓥ ꓡꓳ= ꓥ ꓡꓳ꓾ ꓣꓳ ꓟꓴꓽ ꓗꓪ ꓗꓴꓷꓼ ꓗꓪ ꓓꓯꓻ ꓙꓰˍ ꓐꓰ ꓐꓯ ꓟ ꓠꓬ ꓚꓵꓺ ꓚꓵꓺ ꓠꓲꓹ ꓟ ꓠꓯꓸꓼ ꓗꓪ ꓐꓰ ꓖꓳ ꓓꓱꓽ ꓔꓲꓹ ꓗꓷ ꓪ꓾ ꓐꓯ ꓟ ꓓꓵꓽ ꓙ ꓠꓬꓲ ꓓꓴ ꓥ ꓡꓳ= ꓙꓲꓻ ꓫꓬ ꓢꓴ ꓒꓳ-ꓡꓳ ꓡꓰ ꓕꓱ ꓡꓰ ꓐꓳ ꓔ ꓟ ꓣꓳ ꓟꓳ ꓪˍ ꓡꓳ= ꓣꓳ ꓠꓬ ꓖꓳ ꓓꓱꓽ ꓔꓲꓹ ꓟ ꓗꓪ ꓐꓰ ꓝꓴꓲꓸ ꓔꓯ ꓟꓳꓸ ꓫꓵꓻ ꓢꓲ ꓣꓱꓽ ꓛꓰꓽ ꓔꓯ ꓟꓳꓸ ꓢꓯꓸ ꓬꓲꓼ ꓡ ꓠꓹ ꓟ ꓥ ꓡꓳ꓾ ꓐꓰ ꓬꓲ ꓡꓰ ꓐꓯ ꓔ ꓟ ꓙꓳˍ ꓡꓳ= ꓣꓳ ꓠꓬ ꓖꓳ ꓓꓱꓽ ꓔꓲꓹ ꓗꓷˍ ꓥ ꓟꓲ ꓝꓴꓲꓸ ꓙ ꓖꓴ ꓚꓺ ꓔꓬ ꓕꓯ ꓠꓯ ꓞꓶˍ ꓟ ꓗꓪ ꓫꓱꓽ ꓙꓰ ꓔꓬ ꓕꓯ꓾ ꓟꓽ ꓙꓲꓻ ꓟ ꓬꓰ ꓔꓬ ꓕꓯ ꓠꓽ ꓚꓵꓺ ꓚꓵꓺ ꓖꓳ ꓓꓱꓽ ꓔꓲꓹ ꓔ ꓥˍ ꓟꓲ ꓟꓴꓽ ꓗꓪ ꓗꓴꓷꓼ ꓗꓪ ꓛꓲꓺ ꓬꓰ ꓟꓽ ꓓ=

ꓣꓳ ꓖꓳ ꓓꓱꓽ ꓔꓲꓹ ꓟ ꓠꓬ ꓢꓲꓺ ꓒ ꓬꓰ-ꓢꓴ ꓔꓯ ꓙꓵꓻˍ ꓡꓳ꓾ ꓐꓹ ꓐ ꓪꓴ-ꓢ ꓔꓯ ꓙꓵꓻˍ ꓡꓳ꓾ ꓢꓲꓽ-ꓫꓬ-ꓟ-ꓦ ꓠꓬ ꓚꓵꓺ ꓚꓵꓺ ꓔꓬ ꓟ ꓔꓯ ꓙꓵꓻˍ ꓡꓳ= ꓪꓴ-ꓢ ꓥ ꓟ ꓔꓯ ꓥꓪ ꓣꓷꓠˍ ꓡꓳ ꓐꓯ ꓟ ꓔꓯ ꓙꓵꓻˍ ꓟ ꓥ ꓡꓳ= ꓪꓴ-ꓢ ꓔꓯ ꓙꓵꓻˍ ꓕꓯ ꓠꓽ꓾ ꓣꓳ ꓠꓬ ꓪꓴ-ꓢ ꓤꓽ ꓮ ꓟꓲꓽ ꓒꓬꓱꓼ ꓡ ꓟ ꓔꓯ ꓚꓵꓺ ꓚꓵꓺ ꓙꓵꓻˍ ꓕꓯ ꓠꓽ ꓣꓳ ꓫꓸ ꓕꓱˍ ꓟ ꓕꓲ ꓘꓶꓽ ꓡꓰ ꓕꓲ ꓘꓶꓽ꓾ ꓣꓳ ꓡꓳꓸ ꓠꓬꓲˍ ꓟ ꓮ ꓙꓵꓽ꓾ ꓣꓳ ꓬꓰˍ ꓟ ꓮ ꓙꓵꓽ ꓠꓬ ꓪꓴ-ꓢ ꓟꓽ ꓠꓲꓹ ꓒꓴ ꓟ꓾ ꓪꓴ-ꓢ ꓟꓽ ꓠꓲꓹ ꓠꓵꓻ ꓟ ꓮ ꓫꓵꓽˍ ꓟꓲ ꓟꓽ ꓬꓰ ꓟ ꓥ ꓡꓳ= ꓕꓱ ꓟ ꓠꓬ ꓣꓳ ꓚꓵꓺ ꓚꓵꓺ ꓠꓲꓹ ꓟ ꓠꓯꓸꓼ ꓗꓪ ꓐꓰ ꓥˍ ꓟꓲ꓾ ꓧꓪꓽ ꓖꓳ ꓓꓱꓽ ꓗꓪ ꓐꓰ ꓥˍ ꓟꓲ ꓖꓳ ꓓꓱꓽ ꓔꓲꓹ ꓗꓷ ꓟ ꓥ ꓡꓳ= ꓝꓴꓲꓸ ꓠꓯꓸꓼ ꓗꓪ ꓣꓳ ꓫꓵꓻ ꓢꓲ ꓠꓬꓲ ꓣꓱꓽ ꓛꓰꓽ ꓔꓯ ꓟꓳꓸ ꓢꓯꓸ ꓙꓰˍ ꓟ ꓥ ꓡꓳ꓾ ꓐꓰ ꓣꓳ ꓢꓷꓸ ꓪ ꓓꓹ ꓡꓳ=

ꓠꓬꓲꓸ ꓠꓬꓲ ꓢꓲꓺ ꓒ ꓡꓰ ꓠꓲ-ꓗꓳ-ꓓꓲ-ꓟꓴ ꓔꓯ ꓦꓻ ꓗꓪ ꓐꓰ ꓦꓵꓻ ꓔ ꓢꓴ ꓠꓬ ꓦꓻ ꓗꓪ ꓐꓰ ꓥ ꓡꓳ꓾ ꓐꓯ ꓟ ꓡꓰ ꓐꓰ ꓣꓳ ꓠꓬ ꓦꓻ ꓔꓯ ꓟꓳꓸ ꓢꓯꓼ ꓕꓵꓼ ꓠꓹ ꓟ ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓐꓰ ꓣꓳ ꓔꓯ ꓬꓲꓼ ꓠꓬꓲꓸ ꓖꓶ ꓡˍ ꓟ ꓥ ꓡꓳ= ꓕꓱ ꓟ ꓡꓰꓽ ꓟꓽ ꓞꓲꓺ ꓖꓳ ꓓꓱꓽ ꓔꓲꓹ ꓟꓶ ꓗꓷ ꓟ ꓗꓪ ꓐꓰ ꓣꓳ ꓠꓬ ꓪꓴ-ꓢ ꓤ ꓠꓱ ꓒꓬꓱꓼ ꓡꓺꓳ= ꓮ ꓙꓵꓽ ꓠꓬ ꓮ ꓫꓵꓽ ꓟꓲ ꓬꓰ ꓐ ꓡ ꓢꓴ ꓐꓹ ꓐ ꓪꓴ-ꓢ ꓬꓲ ꓤ ꓫꓵꓸ ꓤ ꓠꓱ ꓒꓬꓱꓼ ꓡ ꓟ ꓡꓯꓼ ꓪ ꓕꓱ ꓟ ꓡꓰ ꓛꓲꓺ ꓪꓴꓽˍ ꓟ ꓟꓽ ꓙꓳ= ꓣꓳ ꓟꓲꓺ ꓠꓯ ꓕꓱ ꓟ ꓗꓪ ꓒꓴ ꓫꓵꓺ ꓙꓳ ꓢꓴ ꓦꓲꓻ ꓗꓪ ꓤ ꓫꓵꓸ ꓤ ꓠꓱ ꓒꓬꓱꓼ ꓠꓲꓹ ꓫꓵˍ ꓟ ꓕꓲ ꓖ ꓕꓲ ꓧꓪꓹ ꓠꓲꓹ ꓟ ꓙꓳ ꓡ ꓗꓴˍ ꓥꓳ= ꓖꓳ ꓡꓱ ꓥˍ ꓟꓲ ꓣꓳ ꓠꓬ ꓮ ꓫꓵꓽ ꓟꓲ ꓬꓰ ꓐ ꓡ ꓢꓴ ꓪꓴ-ꓢ ꓬꓲ ꓤ ꓫꓵꓸ ꓤ ꓠꓱ ꓒꓬꓱꓼ ꓡˍ ꓟ ꓣꓱꓽ ꓛꓰꓽ ꓕꓱ ꓟ ꓔꓯ ꓮ ꓡꓲ ꓐꓰ ꓟꓽ ꓗꓹ ꓛꓲ ꓐꓰ ꓔꓬ ꓐ ꓡˍ ꓡ=

ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓣꓳꓽ ꓓꓵꓽ ꓙ ꓠꓬꓲ ꓡꓯ= ꓣꓳ ꓐꓹ ꓐ ꓠꓬ ꓮ ꓫꓵꓽ ꓟꓲ ꓬꓰ ꓐ ꓡ ꓢꓴ ꓥ ꓡꓳ= ꓣꓳ ꓪꓴ-ꓢ ꓠꓬ ꓣꓳ ꓐꓰ ꓔꓬ ꓡꓳ= ꓟꓲ ꓠꓯ ꓕꓱ ꓟ ꓗꓪ ꓒꓬꓱꓽ ꓟꓳꓻ ꓡˍ ꓟ ꓠꓬ ꓬꓲ ꓡꓰ ꓣꓳ ꓔꓯ ꓠꓲꓹ ꓠꓵˍ ꓟ ꓑꓶꓸ ꓓꓴ ꓬꓲ ꓡꓰ ꓣꓳ ꓔꓯ ꓚꓬꓴꓸ ꓙ ꓠꓹ ꓟ ꓐꓱ ꓶ ꓬꓲ ꓤ ꓔꓲꓸ ꓖꓶ ꓗꓷˍ ꓗꓪ ꓛꓲꓺ ꓣꓳ ꓔꓯ ꓠꓲꓹ ꓠꓵˍ ꓡꓳ= ꓟꓲ ꓠꓯ ꓕꓱ ꓟ ꓗꓪ ꓗꓹ ꓛꓲꓽ ꓛꓲꓽ ꓡꓰꓽ ꓔꓬ ꓢꓲ ꓕꓲ ꓠꓬꓲ ꓙꓳˍ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓛꓲꓺ ꓬꓰ ꓠꓹ ꓟ ꓬꓲ ꓠꓬ ꓣꓳ ꓔꓯ ꓚꓰꓼ ꓔ ꓡꓳ ꓐꓯ ꓟ ꓔꓯ ꓮ ꓕꓯ ꓟꓲ ꓓꓵꓽ ꓙ ꓔ ꓠ ꓗˍ ꓡꓳ= ꓝꓮꓲ ꓕꓲ ꓫꓵꓽ ꓠꓬ ꓣꓳ ꓠꓬ ꓖꓳ ꓓꓱꓽ ꓔꓲꓹ ꓗꓷ ꓟꓶˍ ꓟ ꓑꓶꓸ ꓓꓴ ꓖꓳ ꓓꓱꓽ ꓔꓲꓹ ꓔ ꓢꓴ ꓕꓲ ꓣꓳ ꓡꓰ ꓐꓰ ꓛꓳꓽ ꓫꓱꓽ ꓠꓹ ꓟ ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓐꓰ ꓣꓳ ꓔꓯ ꓟꓸ ꓖꓶ ꓡˍ ꓡꓳ ꓐꓰ ꓐꓯ ꓟꓸ ꓖꓶ ꓠꓲꓹ ꓫꓵˍ ꓡꓳ=