ꓬꓰ-ꓢꓴ ꓠꓬ ꓙ ꓖꓴ꓾ ꓔꓱꓹˍ ꓟ ꓐꓰ ꓢꓯꓼ ꓟꓬ ꓥ ꓡꓳ

ꓠꓬꓲꓸ ꓠꓬꓲ ꓠꓬ ꓘꓴ-ꓜꓲ-ꓞꓳ ꓗꓪ ꓢꓲꓺ ꓒ ꓬꓰ-ꓢꓴ ꓬꓲ ꓝꓲ ꓓꓴ ꓞꓲꓺ ꓠꓬꓲꓽ ꓣꓳ ꓗꓪ ꓟ ꓙꓲꓻ ꓫꓬ ꓢꓴ ꓒꓲ-ꓡꓲ ꓐꓰ ꓬ-ꓗꓴ ꓑꓮꓲꓽ ꓥ ꓡꓳ= ꓬꓳ-ꓦ ꓕꓳꓽ ꓶ 14ꓽ6-14 ꓗꓪ ꓣꓳ ꓑ ꓙ ꓪˍ ꓟ ꓠꓬ ꓢꓲꓺ ꓒ ꓬꓰ-ꓢꓴ ꓠꓬ ꓥꓪ ꓠꓬ ꓙ ꓖꓴ ꓥ ꓡꓳ= ꓥꓪ ꓠꓬ ꓔꓱꓹ ꓚꓵˍ ꓟ ꓥ ꓡꓳ= ꓥꓪ ꓠꓬ ꓢꓯꓼ ꓟꓬ ꓥ ꓡꓳ= ꓥꓪ ꓔꓯ ꓙꓵꓻ ꓢꓴ ꓮꓽ ꓟ ꓥˍ ꓟꓲ ꓟꓴꓽ ꓗꓪ ꓗꓷꓴꓼ ꓗꓪ ꓛꓲꓺ ꓬꓰˍ ꓥꓳ= ꓥꓪ ꓗꓪ ꓐꓰ ꓗꓳꓸ ꓙꓰ ꓠꓬ ꓠꓱꓸ ꓐꓯ ꓚꓱꓹ ꓟꓽ ꓙꓳ= ꓥꓪ ꓠꓬ ꓙ ꓖꓴ ꓥ ꓡꓳ꓾ ꓐꓰ ꓐꓯ ꓡꓳ= ꓖꓳ ꓕꓯ ꓒꓲ-ꓡꓲ ꓡꓰ ꓐꓹ ꓐ ꓥꓪ ꓠꓴꓽ ꓔꓯ ꓟꓳꓸ ꓖꓶ ꓡꓯ꓾ ꓐꓰ ꓢꓲꓺ ꓒ ꓬꓰ-ꓢꓴ ꓔꓯ ꓐꓯ ꓟ ꓥ ꓡꓳ= ꓢꓲꓺ ꓒ ꓬꓰ-ꓢꓴ ꓡꓰ ꓥꓪ ꓔꓯ ꓟꓳꓻ ꓢꓴ ꓠꓬ ꓐꓹ ꓐ ꓔꓯ ꓟꓳꓻ ꓢꓴ ꓥ ꓡꓳ= ꓥꓪ ꓔꓯ ꓢꓷꓸ ꓢꓴ ꓠꓬ ꓐꓹ ꓐ ꓔꓯˍ ꓟꓲ ꓢꓷˍ ꓡꓳ= ꓥꓪ ꓔꓯ ꓙꓵꓻ ꓢꓴ ꓠꓬ ꓮ ꓟꓶ ꓥꓪ ꓬꓰˍ ꓟ ꓓꓴꓽ ꓙ ꓮ' ꓓꓴ ꓟꓬꓱꓽ꓾ ꓓꓵꓽ ꓙ ꓟꓶ ꓓꓴ ꓟꓬꓱꓽ ꓔꓯ ꓬꓰ ꓐ ꓡˍ ꓥꓳ꓾ ꓐꓰ ꓢꓲꓺ ꓒ ꓬꓰ-ꓢꓴ ꓡꓰ ꓒꓳꓹ ꓖꓶˍ ꓟ ꓔꓯ ꓣꓳ ꓑ ꓙˍ ꓡꓳ=

ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓐꓱ ꓶ ꓪꓴ-ꓢ ꓐꓯ ꓘꓶꓽ ꓗꓪ ꓐꓰ ꓣꓳꓽ ꓠ ꓠꓹ ꓓꓴ꓾ ꓓꓵꓽ ꓙ ꓠꓬꓲ ꓓꓴ ꓠꓬ ꓢꓲꓺ ꓒ ꓬꓰ-ꓢꓴ ꓠꓬ ꓙ ꓖꓴ ꓥ ꓡꓳ꓾ ꓐꓰ ꓬꓲ ꓡꓰ ꓐꓯ ꓡꓳ= ꓙ ꓖꓴ ꓠꓬ ꓮ ꓡꓰ ꓟꓬ ꓛꓲꓺ ꓬꓳꓸ ꓚꓵˍ ꓟ ꓣꓳ ꓢꓷꓸˍ ꓡꓳ= ꓕꓲ ꓖ ꓕꓲ ꓘꓴ ꓗꓪ ꓙꓰ ꓠꓲꓹ ꓫꓵˍ ꓟ ꓙ ꓖꓴ ꓟꓽ ꓢꓷꓸ ꓕꓯ ꓠꓽ ꓮ ꓡꓰ ꓘꓶꓸ ꓛꓲꓺ ꓫꓸ ꓙꓵˍ ꓟ ꓣꓳ ꓢꓷꓸˍ ꓡꓳ= ꓙ ꓖꓴ ꓪꓴꓸ ꓡꓰ꓾ ꓙ ꓖꓴ ꓥꓳꓽ ꓡꓰ ꓥ ꓠꓬ ꓙ ꓖꓴ ꓛꓬꓻ ꓗꓷ ꓕꓯ ꓠꓽ ꓣꓳ ꓠꓬ ꓣꓳ ꓙꓰ ꓚꓱꓹ꓾ ꓣꓳ ꓙꓰ ꓠꓲꓹ ꓫꓵˍ ꓟ ꓗꓪ ꓮ ꓟꓰꓸ ꓟꓽ ꓛꓲꓺ ꓬꓰ ꓬꓰ ꓚꓱꓹ ꓙꓰ ꓚꓱꓹ ꓡ ꓔꓳꓹ ꓜꓳꓽˍ ꓟ ꓙꓳ ꓗꓴˍ ꓡꓳ=

ꓖꓳ ꓡꓱ ꓠꓬꓲ ꓚ ꓚꓱꓹ ꓠꓬ ꓮ ꓘꓶꓸ ꓬꓳꓸ ꓚꓵˍ ꓟ ꓣꓳ ꓢꓷꓸˍ ꓡꓳ= ꓕꓱ ꓟˍ ꓡꓰ ꓐꓰ ꓟꓴꓽ ꓗꓪ ꓗꓴꓷꓼ ꓗꓪ ꓙꓰ ꓠꓹ ꓟ ꓚꓱꓹ ꓠꓬ ꓮ ꓟꓬꓹ ꓟꓽ ꓙꓳ= ꓕꓲ ꓚꓱꓹ ꓤ ꓡꓰꓽ ꓙꓳˍ ꓡꓳ= ꓕꓱ ꓟ ꓠꓬ ꓢꓲꓺ ꓒ ꓬꓰ-ꓢꓴ ꓥ ꓡꓳ= ꓢꓲꓺ ꓒ ꓬꓰ-ꓢꓴ ꓡꓰ ꓥꓪ ꓠꓬ ꓙ ꓖꓴ ꓥ ꓡꓳ= ꓥꓪ ꓠꓬ ꓢꓯꓼ ꓟꓬ ꓥ ꓡꓳ ꓐꓰ ꓐꓯ ꓔ ꓡꓳ= ꓔꓲꓺ ꓔꓲꓺ ꓢꓲꓽ ꓢꓲꓽ ꓡꓰ ꓬꓲ ꓐꓯ ꓔ ꓡꓳ= ꓖꓳ ꓡꓱ ꓠꓬꓲ ꓣꓳ ꓠꓬ ꓣꓳ ꓚꓲꓸ ꓛꓬ ꓠꓲꓹ ꓡꓶꓽ ꓔꓯ ꓡꓰꓽ ꓛꓳꓻ ꓔꓬ ꓠꓬ ꓣꓳ ꓠꓽ ꓣꓳ ꓙ ꓖꓴ ꓔꓯ ꓣꓳ ꓫꓬꓹ ꓔꓬ ꓟ ꓕꓲ ꓡꓰꓹ ꓥꓳ= ꓣꓳ ꓠꓬ ꓢꓲꓺ ꓒ ꓬꓰ-ꓢꓴ ꓐꓯ ꓘꓶꓽ ꓠ ꓠꓹ ꓢꓲ ꓢꓲꓺ ꓒ ꓬꓰ-ꓢꓴ ꓔꓯ ꓛꓳꓻ ꓙꓰˍ ꓕꓯ ꓠꓽ ꓣꓳ ꓠꓬ ꓬꓲ ꓟꓸ ꓖꓶ ꓔ ꓟ ꓚꓺ ꓚꓱꓹ꓾ ꓬꓲ ꓗꓸ ꓠꓯꓸ ꓢꓲꓺ ꓗꓪ ꓫꓱꓽ ꓔꓬꓹ ꓟ ꓑꓶꓸ ꓓꓴ ꓙ ꓖꓴ ꓥꓳꓽ ꓡꓰ ꓟꓽ ꓓ= ꓙ ꓖꓴ ꓛꓬ ꓡꓰ ꓟꓽ ꓓ= ꓕꓱ ꓡꓱ ꓟꓽ ꓥ ꓥ ꓣꓳ ꓠꓬ ꓣꓳ ꓠꓲꓹ ꓫꓵˍ ꓟ ꓡꓰ ꓣꓳ ꓬꓰ꓾ ꓣꓳ ꓚꓲꓸ ꓛꓬ ꓚꓱꓹ ꓣꓳ ꓧꓪ ꓔꓬ ꓟ꓾ ꓣꓳ ꓚꓱꓹ ꓣꓳ ꓛꓳꓻ ꓔꓬ ꓟ ꓕꓲ ꓡꓰꓹ ꓥꓳ= ꓕꓱ ꓡꓱ ꓙꓰˍ ꓠꓬ ꓣꓳ ꓙ ꓖꓴ ꓪꓴꓸ ꓡꓰˍ ꓥꓳ=

ꓖꓳ ꓡꓱ ꓠꓬꓲ ꓣꓳ ꓮ ꓫꓵꓽ ꓕꓲ ꓙꓰꓽ ꓬꓰˍ ꓥ ꓟꓲ ꓢꓲꓺ ꓒ ꓬꓰ-ꓢꓴ ꓔꓯ ꓧꓶꓸ ꓕꓯ ꓓꓰꓽ ꓠꓯꓹ ꓡꓳ= ꓬꓲ ꓠꓬ ꓙ ꓖꓴ ꓥ ꓟ ꓑꓶꓸ ꓓꓴ ꓬꓲ ꓔꓯ ꓚꓴꓽ ꓬꓲꓸ ꓓꓰꓽ ꓠꓯꓹ ꓡꓳ= ꓬꓲ ꓔꓯ ꓢꓷꓸ ꓠꓲꓹ ꓓꓰꓽ ꓠꓯꓹ ꓡꓳ= ꓮ ꓡꓲ ꓬꓰ ꓠꓹ ꓟ ꓢꓲꓺ ꓒꓽꓳ ꓥꓪ ꓔꓯ ꓟꓸ ꓖꓶ ꓡꓯ ꓐꓰ ꓐꓯ ꓠ ꓗˍ ꓡꓳ= ꓝꓮꓲ ꓢꓲꓺ ꓒ ꓬꓰ-ꓢꓴ ꓡꓰ ꓐꓯ ꓔ ꓟ ꓠꓬ꓾ ꓥꓪ ꓔꓯ ꓙꓵꓻ ꓢꓴ ꓠꓬ ꓥꓪ ꓬꓰˍ ꓟ ꓡꓰ ꓐꓰ ꓓꓵꓽ ꓙ ꓟꓶ ꓓꓴ ꓟꓬꓱꓽ ꓔꓯ ꓬꓰ ꓐ ꓡˍ ꓥꓳ꓾ ꓐꓰ ꓬꓲ ꓡꓰ ꓪꓵꓼ ꓘꓶꓽ ꓖꓶ ꓔ ꓡꓳ=

ꓣꓳ ꓘꓴ ꓜꓲꓼ ꓞꓳ ꓘꓴꓽ ꓗꓪ ꓡꓳꓸ ꓠꓬꓲˍ ꓥ ꓟꓲ꓾ ꓮ ꓗꓪ ꓡꓳꓸ ꓠꓬꓲˍ ꓥ ꓟꓲ ꓓꓵꓽ ꓙ ꓟꓶ ꓓꓴ ꓟꓬꓱꓽ ꓮ ꓟꓬꓹ ꓬꓰ ꓗꓷ ꓟ ꓙꓲꓻ ꓫꓬ ꓢꓴ ꓮ ꓟꓬꓹ ꓙꓳˍ ꓡꓳ= ꓢꓲꓺ ꓒ ꓬꓰ-ꓢꓴ ꓬꓲ ꓐꓯ ꓘꓶꓽ ꓠꓬ ꓮ ꓔꓳꓺ ꓟꓽ ꓥ꓾ ꓚꓵꓺ ꓚꓵꓺ ꓒꓬꓱꓼ ꓡˍ ꓡꓳ= ꓖꓳ ꓡꓱ ꓠꓬꓲ ꓣꓳ ꓙꓵꓻ ꓡꓯ= ꓬꓲ ꓐꓯ ꓘꓶꓽ ꓔꓯ ꓙꓵˍ ꓕꓯ ꓣꓳ ꓠꓬ ꓓꓵꓽ ꓙ ꓟꓶ ꓓꓴ ꓟꓬꓱꓽ ꓬꓰ ꓐ ꓡˍ ꓡꓳ= ꓬꓲ ꓐꓯ ꓘꓶꓽ ꓔꓯ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓗꓷ ꓔ ꓕꓯ ꓠꓽ ꓬꓲ ꓬꓰˍ ꓟ ꓡꓰ ꓐꓰ ꓬꓰ ꓐ ꓡˍ ꓥꓳ꓾ ꓐꓰ ꓢꓲꓺ ꓒ ꓬꓰ-ꓢꓴ ꓡꓰ ꓑꓶꓸ ꓑꓶꓸ ꓡꓰꓽ ꓪꓵꓼ ꓘꓶꓽ ꓖꓶ ꓔ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓣꓳ ꓕꓱ ꓡꓰ ꓐꓰ ꓛꓳꓽ ꓫꓱꓽ ꓙꓰˍ ꓕꓯ ꓙ ꓖꓴ ꓥ ꓟ꓾ ꓚꓺ ꓚꓱꓹ ꓥ ꓟ ꓢꓲꓺ ꓒ ꓔꓯ ꓮ ꓕꓯˍ ꓟꓲ ꓡꓳꓸ ꓔ ꓢꓲ ꓟꓽ ꓟꓶꓽ ꓬꓰ ꓝꓲ꓾ ꓟꓽ ꓒꓲꓼ ꓬꓰ ꓝꓲ ꓢꓲ ꓮ ꓕꓯˍ ꓟꓲ ꓪꓳꓺ ꓔ ꓕꓯ ꓠꓽ ꓣꓳ ꓠꓬ ꓙ ꓖꓴ ꓥꓳꓽ ꓡꓰ ꓟꓽ ꓓ= ꓣꓳ ꓕꓲ ꓖ ꓕꓲ ꓧꓪꓹ ꓑꓮꓲꓽ ꓗꓪ ꓙꓰˍ ꓕꓯ ꓙ ꓖꓴ ꓟꓽ ꓒꓲꓼ ꓬꓰ ꓠꓹ ꓟ ꓐꓹ ꓐ ꓟꓹ ꓟ ꓡꓯꓽ ꓒꓯꓹ ꓔꓯ ꓕꓶꓻ ꓕꓶꓻ ꓡꓰꓽ ꓪꓳ ꓔ ꓟ ꓡꓰ ꓐꓰ ꓣꓳ ꓠꓬ ꓮ ꓟꓶ ꓟꓲ ꓠꓯ ꓗꓪ ꓔꓬ ꓕꓯ ꓣꓳ ꓔꓯ ꓗꓶꓸ ꓢꓴ꓾ ꓣꓳ ꓔꓯ ꓟꓸ ꓒꓬꓹ ꓢꓴ ꓮ ꓟꓬꓹ ꓙꓳˍ ꓟ ꓘꓴꓽ ꓗꓪ ꓣꓳ ꓠꓬ ꓢꓲꓺ ꓒ ꓬꓰ-ꓢꓴ ꓡꓯꓽ ꓒꓯꓹ ꓔꓯ ꓕꓶꓻ ꓕꓶꓻ ꓡꓰ ꓪꓳ ꓞꓹ ꓢꓲ꓾ ꓚꓵꓹ ꓔ ꓢꓲ ꓙꓰˍ ꓕꓯ ꓠꓬ ꓙ ꓖꓴ ꓪꓴꓸ ꓡꓰ ꓟꓽ ꓓ= ꓙ ꓖꓴ ꓥꓳꓽ ꓡꓰ ꓟꓽ ꓓ= ꓙ ꓖꓴ ꓛꓬꓻ ꓡꓰ ꓟꓽ ꓓ꓾ ꓐꓯ ꓟ ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓟꓳꓸ ꓖꓶ ꓡ ꓢꓲ ꓠꓬꓲꓸ ꓠꓬꓲ ꓐꓱ ꓶ ꓛꓳ ꓫꓱꓽ ꓙꓰ ꓡꓯ=