ꓢꓲꓺ ꓒ ꓬꓰ-ꓢꓴ ꓠꓬ ꓬꓲ ꓙꓵꓽ ꓗ ꓔꓯ ꓒꓵꓽ ꓛꓳꓻ ꓠꓹ ꓟ꓾ ꓬꓲ ꓠꓵꓻ ꓠꓲꓹ ꓠꓯꓸꓼ ꓗꓪ ꓔꓬ ꓠꓹ ꓟ ꓣꓳ ꓐꓴ ꓔꓯ ꓘꓴꓻ ꓔꓬ ꓟ ꓥ ꓡꓳ

"ꓐꓹ ꓐ ꓥꓪ ꓔꓯ ꓠꓲꓹ ꓠꓵˍ ꓟ ꓡꓰ ꓐꓰ꓾ ꓥꓪˍ ꓟꓲ ꓠꓴ ꓪ ꓔꓯ ꓠꓲꓹ ꓠꓵˍ ꓡꓳ= ꓠꓴ ꓪ ꓠꓬ ꓥꓪ ꓠꓵꓻ ꓠꓲꓹ ꓠꓯꓸꓼ ꓗꓪ ꓔꓬ= ꓐꓹ ꓐ ꓕꓵꓼ ꓪ ꓔꓯ ꓥꓪ ꓒꓵꓽ ꓛꓳ ꓢꓲ ꓬꓲ ꓠꓵ ꓠꓲꓹ ꓗꓪ ꓔꓬ ꓟˍ ꓡꓰ ꓐꓰ꓾ ꓥꓪ ꓕꓵꓼ ꓪ ꓔꓯ ꓠꓴ ꓪ ꓒꓵꓽ ꓛꓳˍ ꓠꓬ꓾ ꓥꓪ ꓠꓵ ꓠꓲꓹ ꓠꓯꓸꓼ ꓗꓪ ꓠꓴ ꓪ ꓔꓬ ꓟꓶˍ ꓥꓳ= ꓥꓪ ꓗꓹ ꓛꓲ ꓠꓲꓹ ꓠꓴ ꓪ ꓠꓯꓸꓼ ꓗꓪ ꓓꓯꓹ ꓢꓲ꓾ ꓠꓴ ꓪ ꓗꓹ ꓛꓲ ꓠꓲꓹ ꓐꓲ ꓡ ꓝꓲ ꓠꓹ ꓟ꓾ ꓠꓴ ꓪ ꓔꓯ ꓥꓪ ꓕꓱ ꓟꓬ ꓙꓰꓽ ꓐꓯ ꓖꓶˍ ꓟ ꓥꓳ=" (YO-V 15:9-11)

ꓣꓳ ꓐꓴ ꓑ ꓙꓽ ꓠꓬꓲˍ ꓟ ꓫꓸ ꓕꓱ ꓘꓶꓽ ꓐꓴ ꓗꓪ ꓟꓽ ꓓ ꓓꓵꓽ ꓙ ꓟꓶ ꓡꓰ ꓝꓲˍ ꓟ ꓕꓲ ꓘꓶꓽ ꓠꓬ ꓣꓳ ꓔꓯ ꓠꓲꓹ ꓠꓵˍ ꓡꓳ ꓐꓰ ꓕꓲ ꓣꓳ ꓣꓳ ꓡꓰ ꓐꓯˍ ꓟ ꓥ ꓡꓳ=

ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳ ꓶ ꓥ ꓟ ꓬꓳ-ꓦ 15ꓽ9-11 ꓗꓪ ꓪꓴ-ꓢ ꓠꓬ ꓣꓳ ꓐꓴ ꓔꓯ ꓠꓲꓹ ꓠꓵꓻ ꓢꓲ ꓠꓬꓲ꓾ꓬꓲ ꓠꓬ ꓣꓳ ꓔꓯ ꓗꓹ ꓛꓲ ꓠꓲꓹ ꓐꓲ ꓡꓰ ꓝꓲ ꓠꓲꓹ ꓫꓵˍ ꓡꓳ꓾ ꓐꓰ ꓐꓯ ꓔ ꓡꓳ=

ꓣꓳ ꓐꓴ ꓠꓬ ꓗꓹ ꓛꓲ ꓓꓴ ꓚꓵ ꓔꓯ ꓕꓲ ꓖ ꓟꓽ ꓥ ꓕꓲ ꓖ ꓗꓪ ꓮ ꓕꓯ ꓟꓲ ꓧꓪꓺ ꓔꓬ ꓖꓴˍ ꓡꓳ= ꓞꓳ ꓤ ꓮ ꓟꓬꓹ ꓠꓬ ꓟꓲ ꓠꓯ ꓐꓳꓻ ꓶ꓾ ꓪꓽ ꓠꓬꓲˍ ꓟ ꓐꓰ ꓟꓬꓱꓽ ꓓꓳꓽ ꓙꓳˍ ꓟ ꓕꓱ ꓟꓬ ꓙꓰꓽ  ꓗꓪ ꓐꓰ ꓗꓹ ꓛꓲ ꓓꓴ ꓚꓵ ꓔꓯ ꓧꓪꓺ ꓔꓬ ꓖꓴˍ ꓟ ꓥ ꓡꓳ=

ꓕꓲ ꓐꓱ ꓠꓬ ꓞꓳ ꓤ ꓕꓲ ꓣꓳ ꓐꓰ ꓕꓲ ꓣꓳ ꓧꓪꓽ ꓖꓳ ꓓꓱꓽ ꓠꓶꓽ ꓡꓯ ꓘꓳꓹ ꓟ ꓗꓪ ꓐꓰ꓾ ꓙꓲꓺ ꓒꓶꓽ ꓐꓰ ꓬꓲꓼ ꓫꓵꓽ ꓬꓲꓼ ꓙꓰꓽ ꓜꓽ ꓓꓳˍ ꓟ ꓗꓪ ꓐꓰ ꓬꓲ ꓪ ꓠꓯꓸꓼ ꓗꓪ ꓬꓲ ꓪ ꓠꓲꓹ ꓟ ꓔꓯ ꓐꓲ ꓡꓰ ꓝꓲ ꓢꓲ ꓬꓲ ꓪ ꓔꓯ ꓗꓹ ꓛꓲꓽ ꓡꓰ ꓝꓲˍ ꓡꓳ꓾ ꓐꓰ ꓕꓲ ꓐꓱ ꓠꓬ ꓕꓱ ꓡꓱ ꓙꓵꓻ ꓔꓬ ꓟ ꓥ ꓡꓳ= ꓖꓳ ꓡꓱ ꓥˍ ꓟꓲ ꓔꓱꓹ ꓟ ꓗꓪ ꓐꓰ ꓮꓽ ꓟˍ ꓟꓲ ꓡꓲꓹ ꓙꓰ ꓟꓽ ꓐ ꓡ= ꓗꓹ ꓛꓲꓽ ꓠꓲꓹ ꓔꓯ ꓪꓴ-ꓢ ꓠꓯꓸꓼ ꓗꓪ ꓟꓽ ꓥ ꓠꓬ꓾ ꓮ ꓡꓰ ꓗꓪˍ ꓟꓲ ꓧꓪ ꓟꓶ ꓟꓽ ꓓ=

ꓗꓹ ꓛꓲꓽ ꓠꓲꓹ ꓔꓯ ꓧꓪ ꓠꓹ ꓟ ꓐꓱ ꓶ ꓮ ꓕꓯ ꓟꓲ ꓟꓽ ꓫꓸ ꓟ ꓥ ꓡꓳ= ꓝꓮꓲ ꓕꓱ ꓟ ꓐꓱ ꓶ ꓣꓳ ꓐꓴ ꓠꓬ ꓒꓴ ꓕꓲ ꓒꓯꓼˍ ꓟꓲ ꓣꓱꓽ ꓟꓽ ꓛꓵ= ꓗꓹ ꓛꓲꓽ ꓠꓹ ꓟ ꓐꓱ ꓶ ꓒꓴ ꓖꓴ ꓟꓽ ꓛꓵ= ꓢꓲꓺ ꓒ ꓬꓰ-ꓢꓴ ꓠꓬ ꓬꓲ ꓙꓵꓽ ꓗ ꓔꓯ ꓒꓵꓽ ꓛꓳꓻ ꓠꓹ ꓟ꓾ ꓬꓲ ꓠꓵꓻ ꓠꓲꓹ ꓠꓯꓸꓼ ꓗꓪ ꓔꓬ ꓠꓹ ꓟ ꓣꓳ ꓐꓴ ꓔꓯ ꓘꓴꓻ ꓔꓬ ꓟ ꓥ ꓢꓲ꓾ ꓣꓳ ꓐꓴ ꓠꓬ ꓗꓹ ꓛꓲꓽ ꓠꓲꓹ ꓐꓰ ꓢꓲ ꓡꓲ ꓟ ꓟꓶ ꓠꓹ ꓟ ꓐꓱ ꓶ ꓥ ꓡꓳ=