ꓟꓶꓸꓹ ꓐꓳꓽ ꓠꓲꓽ ꓔꓯ ꓖꓼ ꓓꓳ ꓗꓷ_ ꓟ

Monday, February 24, 2020

ꓛꓳ ꓒꓯꓹ ꓐꓴ ꓔꓬ ꓗꓪ ꓬꓲ ꓪ ꓛꓲ ꓡ ꓠꓬ꓾ ꓬꓲ ꓪ ꓚꓳ ꓡꓳ ꓗꓪ ꓡ ꓞꓳ ꓬꓲ ꓜꓴ ꓓꓽ ꓟ ꓔꓬ_ ꓟ ꓔꓯ ꓬꓲ ꓪ ꓟꓳꓻ_ ꓡꓳ꓿ ꓝꓮꓲ ꓕꓳ ꓶ ꓐꓳ ꓒ ꓐꓴ ꓕꓲ ꓐꓱ ꓠꓬ ꓬꓲ ꓪ_ ꓐꓰ ꓧꓳꓺ ꓡꓯ ꓘꓳ ꓔꓬ_ ꓡꓳ꓿ꓡ ꓞꓳ ꓬꓲ ꓜꓴ ꓮ ꓙꓵ ꓠꓬ ꓬꓰ-ꓢꓴ ꓔꓯ ꓟꓳ ꓗꓷ ꓟꓶꓽ ꓕꓯ꓾ ꓬꓲ ꓪ ꓓꓵ ꓙ ꓟꓶ ꓖꓴ ꓟꓽ ꓓ ꓢꓲ꓾ ꓬꓲ ꓔꓯ ꓔꓷꓹ ꓙꓰ ꓢꓲ ꓠꓬꓲ ꓒꓵꓽ ꓗ ꓬꓰ_ ꓡꓳ꓿ ꓬꓲ ꓬꓲ ꓪ ꓔꓯ꓾ ꓠꓴ ꓪ ꓠꓬ ꓬꓲ ꓪ_ ꓐꓰ ꓮ ꓫꓵ ꓧꓳꓺ ꓡꓯ ꓘꓳ ꓔꓬ_ ꓡꓳꓺꓽ꓾ ꓐꓰ ꓠ ꓠꓬꓲ_ ꓡꓳ꓿ ꓖꓳ ꓡꓱ ꓠꓬ ꓬꓲ ꓜꓴ ꓗꓳ ꓡꓳ ꓗꓪ ꓟ ꓕꓲ ꓣꓳ ꓬꓲ ꓔꓯ ꓕꓱ ꓡꓱ ꓒꓳꓹ ꓖꓶ_ ꓡꓳ꓾ ꓟꓸ ꓒꓽꓳ꓾ ꓥꓪ ꓮ ꓐꓲ ꓔꓯ ꓟꓶꓻ ꓠꓲꓽ ꓕꓲ ꓟ ꓓꓯꓹ ꓠꓬꓲ꓾ ꓠꓴ ꓔꓬ ꓗꓪ ꓧꓳꓽ ꓔꓯꓹ ꓡ_ ꓡꓳ꓿ ꓬꓲ ꓔꓯ ꓮ ꓕꓯ ꓚꓵꓹ ꓡ_ ꓠꓬ ꓮ ꓕꓯ꓾ ꓬꓲ ꓔꓯ ꓷꓹ ꓐꓱꓽ ꓩꓴ ꓗꓷ_ ꓡꓳ꓿ ꓖꓳ ꓡꓱ ꓢꓲ ꓟꓷꓽ ꓶꓻ ꓦꓵꓸ ꓓꓳ ꓡ ꓢꓲ꓾ ꓢꓶꓽ ꓛꓲ ꓶꓼ ꓢꓲ ꓠꓬꓲ꓾ ꓗꓳꓹ_ ꓟꓲ ꓗꓳꓹ ꓡꓰ_ ꓡꓳ꓿ ꓠꓴ ꓛꓳ ꓒꓯ ꓐꓴ ꓔꓯ꓾ ꓠꓲꓽ ꓕꓱ ꓟ ꓖꓼ ꓓꓳ ꓙ ꓡꓯ ꓐꓯ ꓖꓶ_ ꓟꓲ꓾ ꓬꓲ ꓪ ꓬꓰ ꓟꓽ ꓐ ꓡ꓾ ꓐꓯ_ ꓡꓳ꓿ ꓬꓲ ꓠꓬ ꓬꓲ ꓪ ꓔꓯ ꓕꓱ ꓡꓱ ꓒꓳꓹ ꓖꓶ_ ꓡꓳ꓾ ꓙꓵꓻ ꓠꓲꓹ ꓟꓽ ꓙꓳ ꓟ ꓕꓲ ꓤꓶ ꓢꓴꓳ꓾ ꓥꓪ ꓠꓴ ꓪ ꓔꓯ ꓮ ꓟꓶ ꓛꓲ ꓔꓬ_ ꓥꓳ ꓪꓺꓽ꓾ ꓥꓪ ꓠꓴ ꓪ ꓔꓯ ꓮ ꓟꓶ ꓛꓲ ꓜꓲꓽ ꓖꓶ_ ꓥꓳ ꓪꓺꓽ꓾ ꓬꓲ ꓔꓯ ꓥꓪ ꓔꓬ ꓗꓪ ꓧꓳꓽ ꓔꓯꓹ ꓡꓯ꓾ ꓐꓯ_ ꓡꓳ꓿ ꓖꓳ ꓡꓱ ꓠꓬ ꓬꓲ ꓪ ꓬꓲ ꓔꓯ ꓧꓳꓽ ꓔꓯ ꓡ_ ꓡꓳ꓿ ꓠꓲꓽ ꓠꓬ ꓬꓰ-ꓢꓴ ꓔꓯ ꓟꓳ ꓗꓷ ꓟꓶꓽ ꓕꓯ꓾ ꓬꓲ ꓡꓰ ꓤ ꓠꓱ ꓤ ꓔꓯ ꓮ ꓘꓶ ꓘꓶ ꓚꓵꓹ ꓠꓬꓲ꓾ ꓟꓲ ꓛꓬ ꓗꓪ ꓓꓳꓽ ꓡꓰ ꓢꓲ꓾ ꓟꓷꓽ ꓶꓻ ꓦꓵꓸ ꓓꓳ ꓠꓬꓲ꓾ ꓗꓶꓺ ꓡꓶ ꓠꓽ ꓗꓶ ꓡꓶ ꓗꓷ ꓡꓰ_ ꓡꓳ꓿ ꓬꓰ-ꓢꓴ ꓡꓰ ꓬꓲ ꓐꓹ ꓐ ꓔꓯ꓾ ꓬꓲ ꓔꓯ ꓕꓱ ꓡꓱ ꓗꓷ ꓡꓰ_ ꓟ ꓮ ꓟꓶ ꓛꓲ ꓥ ꓡꓳꓺꓽ꓾ ꓐꓰ ꓠ ꓠꓬꓲ_ ꓡꓳ꓿ ꓬꓲ ꓠꓬ ꓕꓱ ꓡꓱ ꓐꓯ_ ꓡꓳ꓾ ꓤ ꓠꓱ ꓤ ꓕꓯ ꓡꓰ ꓥ ꓡꓳ꓿ ꓝꓮꓲ ꓬꓲ ꓔꓯ ꓫꓵꓻ ꓝꓲ ꓠꓹ ꓟ ꓮ ꓔꓳꓸ ꓗꓪ ꓥ_ ꓟꓲ꓾ ꓬꓲ ꓙꓬ ꓗꓪ ꓥ_ ꓟꓲ꓾ ꓬꓲ ꓔꓯ ꓮ ꓟꓬꓹ ꓧꓪꓹ ꓡꓱꓸ ꓓꓵ ꓙꓰ ꓝꓲ_ ꓡꓳ꓿ ꓠꓴ ꓮ ꓫꓵꓽ ꓬꓰ ꓐ ꓡ_ ꓠꓬ꓾ ꓥꓪ ꓠꓴꓽ ꓔꓯ ꓫꓱꓸ ꓤ ꓢꓲ ꓬꓰ ꓙ ꓡꓯ꓾ ꓐꓯ_ ꓡꓳ꓿ ꓬꓰ-ꓢꓴ ꓬꓲ ꓔꓯ꓾ ꓐ ꓡ_ ꓠꓬꓺꓽ꓿ ꓙꓵꓻ ꓠꓲꓹ ꓙꓳ ꓢꓴ ꓐꓱ ꓶ ꓮ ꓫꓵꓽ_ ꓟꓲ ꓐ ꓡ_ ꓥꓳ꓾ ꓐꓯ_ ꓡꓳ꓿ ꓞꓼ ꓐꓰ ꓤ ꓠꓱ ꓬꓲ ꓐꓹ ꓐ ꓘꓴꓻ ꓢꓲ꓾ ꓥꓪ ꓙꓵꓻ_ ꓡꓳ꓾ ꓥꓪ ꓙꓵꓻ ꓟꓽ ꓡꓳꓼ ꓟ ꓗꓪ ꓠꓴ ꓬꓰ ꓙ ꓡꓯ꓾ ꓐꓯ_ ꓡꓳ꓿ ꓡ ꓞꓳ ꓬꓲ ꓜꓴ ꓔꓷꓹ ꓜꓲꓼ ꓡ_ ꓟ ꓔꓯ ꓬꓰ-ꓢꓴ ꓟꓳ ꓗꓷ ꓠꓬ꓾ ꓬꓲ ꓡꓰ ꓟꓽ ꓫꓬ ꓠꓲꓽ ꓔꓯ ꓕꓼ ꓢꓲ꓾ ꓟꓶꓻ ꓐꓳꓽ ꓠꓲꓽ ꓠꓴꓳ꓾ ꓥꓪ ꓠꓴ ꓔꓯ ꓕꓵꓼ ꓪ ꓖꓶ_ ꓠꓬꓲ꓾ ꓬꓲ ꓔꓯ ꓐꓰ ꓓꓳ ꓡꓯ꓿ ꓕꓱ ꓡꓱ ꓖꓳ ꓑꓳ ꓬꓲ ꓔꓯ ꓕꓽ ꓓꓵ ꓡꓰ꓾ ꓐꓯ_ ꓡꓳ꓿ ꓠꓲꓽ ꓠꓬ ꓘꓴꓻ ꓔꓴ ꓡ ꓢꓲ꓾ ꓬꓲ ꓔꓯ ꓮ ꓘꓶꓸ ꓚꓵꓹ ꓢꓲ ꓠꓬꓲ ꓓꓳ ꓡ_ ꓡꓳ꓿ ꓤ ꓠꓱ ꓠꓬ ꓫꓵꓻ ꓟ_ ꓡꓰ ꓐꓰ ꓗꓷ ꓡꓰ ꓠꓬꓲ꓾ ꓬꓲ ꓪ ꓟꓬꓽ ꓠꓬꓲ ꓕꓲ ꓐꓱ ꓠꓬ꓾ ꓬꓲ ꓠꓽ ꓫꓵꓻꓳ꓾ ꓐꓯ_ ꓡꓳ꓿ ꓬꓰ-ꓢꓴ ꓠꓽ ꓬꓲ ꓡꓯ ꓒꓯꓹ ꓗꓪ ꓣꓴ ꓢꓲ꓾ ꓬꓲ ꓔꓯ ꓖꓳꓻ ꓖꓶ ꓗꓷ ꓠꓬ꓾ ꓬꓲ ꓦꓰꓼ ꓔꓴ ꓡ_ ꓡꓳ꓿ ꓦꓲ ꓠꓯꓸꓼ ꓗꓪ ꓬꓰ-ꓢꓴ ꓓꓵ ꓡꓰ ꓠꓬ꓾ ꓬꓲ ꓛꓳ ꓒꓯ ꓐꓴ ꓘꓳ ꓫꓱ ꓫꓱ_ ꓐꓰ ꓬꓲ ꓔꓯ꓾ ꓮ ꓡꓲ ꓗꓷ ꓡꓰ ꓠꓬꓲ ꓥꓪ ꓠꓴꓽ ꓠꓬ ꓠꓲꓽ ꓔꓯ ꓖꓼ ꓓꓳ ꓗꓷ ꓟꓽ ꓐ ꓡ ꓡꓳꓺꓽ꓾ ꓐꓰ ꓠ ꓠꓬꓲ_ ꓡꓳ꓿ ꓬꓰ-ꓢꓴ ꓠꓬ ꓬꓲ ꓪ ꓔꓯ꓾ ꓕꓱ ꓡꓱ ꓫꓵ ꓠꓽ ꓜ ꓓꓴ ꓟꓽ ꓜꓽ ꓬꓰ ꓢꓲ ꓪ ꓘꓴ_ ꓟ ꓗꓪ ꓐꓰ ꓟꓽ ꓥ ꓠꓬ ꓖꓼ ꓓꓳ ꓡ ꓟꓽ ꓐ ꓡ꓾ ꓐꓯ_ ꓡꓳ꓿ ꓟ-ꓘꓳ ꓕꓳꓽ ꓶ 9: 14-29