ꓟ-ꓖ-ꓓ-ꓡꓲ ꓢꓴ ꓟ-ꓡꓲ ꓔꓯ ꓟꓳꓸ ꓖꓶ_ ꓟ

Tuesday, April 14, 2020

ꓬꓳ-ꓦ ꓕꓳꓽ ꓶ 20: 11-18

ꓖꓳ ꓡꓱ ꓥ_ ꓟꓲ ꓟ-ꓡꓲ ꓠꓬ ꓡꓱꓽ ꓜꓴ ꓠꓱ ꓫꓱ ꓟꓸꓼ ꓗꓪ ꓦꓰꓼ ꓞ ꓢꓲ ꓥꓴꓻ ꓔꓬ_ ꓡꓳ꓿ ꓬꓲ ꓖꓳ ꓡꓱ ꓥꓴ ꓔꓬ_ ꓕꓯ꓾ ꓬꓲ ꓖꓳ ꓓꓱ ꓗꓴꓺ ꓢꓲ ꓡꓱ ꓜꓴ ꓠꓯꓸꓼ ꓗꓪ ꓡꓳꓸ ꓠꓬꓲ ꓠꓬ꓾ ꓧꓶꓸ ꓕꓯ ꓬꓰ-ꓢꓴ ꓫꓵꓻ ꓟꓳ ꓗꓶꓺ ꓔ ꓖꓴ ꓗꓪ꓾ ꓖꓪꓽ ꓓꓴ ꓒꓴ ꓛꓹ ꓟ ꓖꓪꓽ ꓔ_ ꓟ ꓟꓴ ꓗꓪ ꓝꓲ ꓓꓴ ꓠꓬꓲꓽ ꓣꓳ꓾ ꓕꓲ ꓣꓳ ꓠꓬ ꓪꓴꓸ ꓓꓵ ꓕꓲ ꓑꓶꓸ ꓗꓪ꓾ ꓕꓲ ꓣꓳ ꓠꓬ ꓛꓲ ꓒꓯꓹ ꓕꓲ ꓑꓶꓸ ꓗꓪ ꓠꓬꓲꓸ ꓠ ꓔꓬ_ ꓟ ꓔꓯ ꓬꓲ ꓟꓳ_ ꓡꓳ꓿ ꓖꓳ ꓡꓱ ꓠꓬ ꓬꓲ ꓪ ꓡꓰ꓾ ꓤ ꓟꓶ ꓤꓽꓳ꓾ ꓠꓴ ꓮ ꓫꓵ ꓪꓴ ꓠꓬꓲ ꓥꓴ_ ꓡꓳꓺꓽ꓾ ꓐꓯ_ ꓡꓳ꓿ ꓬꓲ ꓡꓰ꓾ ꓥꓪ ꓢꓲꓺ ꓒ ꓔꓯ ꓬꓲ ꓪ ꓔꓯꓹ ꓙꓰ ꓢꓲ꓾ ꓮ ꓡꓲ ꓗꓪ ꓗꓶ ꓔ ꓬꓰ_ ꓟ ꓥꓪ ꓟꓽ ꓢꓷ ꓠꓬꓲ ꓥꓴ_ ꓡꓳ꓾ ꓐꓯ_ ꓡꓳ꓿ ꓬꓲ ꓕꓱ ꓡꓱ ꓐꓯ ꓗꓷ ꓢꓲ꓾ ꓬꓲ ꓔꓲꓸ ꓒꓳꓹ ꓗꓷ ꓠꓬ꓾ ꓬꓰ-ꓢꓴ ꓦꓰꓼ ꓞ ꓔꓬ_ ꓟ ꓔꓯ ꓟꓳ_ ꓡꓳ꓿ ꓖꓳ ꓡꓱ ꓥ_ ꓟꓲ ꓬꓰ-ꓢꓴ ꓥ ꓟ ꓬꓲ ꓟꓽ ꓢꓷ꓿ ꓬꓰ-ꓢꓴ ꓡꓰ꓾ ꓤ ꓟꓶ ꓤꓽꓳ꓾ ꓠꓴ ꓮ ꓫꓵ ꓪꓴ ꓠꓬꓲ ꓥꓴ_ ꓡꓳꓺꓽ꓿ ꓠꓴ ꓮꓽ ꓟ ꓔꓯ ꓧꓪ_ ꓡꓳꓺꓽ꓾ ꓐꓯ_ ꓡꓳ꓿ ꓟ-ꓡꓲ ꓠꓬ꓾ ꓬꓲ ꓠꓽ ꓐꓱ ꓦꓴ ꓠꓬꓹ ꓢꓴ ꓥ ꓡꓳ ꓓꓵꓽ ꓙ ꓠꓬꓲ꓾ ꓞꓳ ꓔꓲꓺꓳ꓾ ꓠꓴ ꓬꓲ ꓔꓯ ꓕꓱ ꓗꓪ ꓐꓰ ꓔꓯꓹ ꓙꓰ ꓐꓭ ꓠꓬ꓾ ꓮ ꓡꓲ ꓗꓪ ꓗꓶ ꓔ ꓬꓰ_ ꓟ ꓥꓪ ꓔꓯ ꓐꓯ ꓖꓶ ꓡꓯ꓿ ꓥꓪ ꓠꓬ ꓬꓲ ꓔꓯ ꓔꓯꓹ ꓙꓰ ꓠꓲꓹ ꓫꓵ_ ꓡꓳ꓾ ꓐꓯ_ ꓡꓳ꓿ ꓬꓰ-ꓢꓴ ꓡꓰ ꓬꓲ ꓔꓯ꓾ ꓟ-ꓡꓲꓹꓳ꓾ ꓐꓯ_ ꓡꓳ꓿ ꓖꓳ ꓡꓱ ꓠꓬ ꓬꓲ ꓔꓲꓸ ꓒꓳꓹ ꓢꓲ ꓬꓲ ꓔꓯ ꓦꓲ-ꓐꓱ-ꓣꓴ ꓥꓳꓽ ꓡꓰ꓾ ꓣ-ꓐꓳ-ꓠꓲ꓾ ꓐꓯ_ ꓡꓳ꓿ ꓕꓱ ꓕꓲ ꓘꓶꓽ ꓠꓬ꓾ ꓟꓸ ꓒ꓾ ꓐꓯ_ ꓟ ꓥ ꓡꓳ꓿ ꓬꓰ-ꓢꓴ ꓡꓰ ꓬꓲ ꓔꓯ꓾ ꓥꓪ ꓔꓯ ꓕꓽ ꓫꓱꓹ꓿ ꓮ ꓡꓲꓳ ꓐꓯ ꓠꓬ ꓥꓪ ꓠꓽ ꓐꓹ ꓐ ꓔꓯ ꓟꓽ ꓓꓯ ꓙꓰ ꓢꓰꓽ꓿ ꓖꓳ ꓡꓱ ꓥ_ ꓟꓲ ꓥꓪ ꓬꓲꓼ ꓥꓪ ꓠꓬꓲ ꓐꓴ ꓔꓯ ꓙꓰ ꓢꓲ꓾ ꓥꓪ ꓐꓹ ꓐ_ ꓐꓰ ꓠꓴ ꓪ ꓐꓹ ꓐ꓾ ꓥꓪ ꓪꓴ-ꓢ_ ꓐꓰ ꓠꓴ ꓪ ꓪꓴ-ꓢ ꓔꓯ ꓥꓪ ꓓꓯ ꓙꓰ_ ꓥꓳ꓾ ꓐꓰ ꓬꓲ ꓪ ꓔꓯ ꓐꓯ ꓖꓶ ꓬꓰ꓾ ꓐꓯ_ ꓡꓳ꓿ ꓟ-ꓖ-ꓓ-ꓡꓲ ꓢꓴ ꓟ-ꓡꓲꓹ ꓡ ꓢꓲ꓾ ꓛꓳ ꓒꓯꓹ ꓐꓴ ꓔꓯ꓾ ꓢꓲꓺ ꓒ ꓔꓯ ꓥꓪ ꓟꓳꓻ ꓗꓷꓳ꓾ ꓐꓯ ꓖꓶ_ ꓡꓳ꓿ ꓝꓮꓲ ꓠꓬ ꓬꓰ-ꓢꓴ ꓡꓰ ꓬꓲ ꓔꓯ ꓕꓱ ꓟꓬ ꓙꓰꓽ ꓐꓯ ꓖꓶ ꓡ_ ꓟ ꓬꓲ ꓪ ꓔꓯ ꓐꓯ ꓟꓸ ꓖꓶ_ ꓡꓳ꓿