ꓟ-ꓡꓲ ꓠꓬ ꓬꓲ-ꓡꓲ-ꓫ-ꓑꓷ ꓔꓬ ꓗꓪ ꓙꓰ_ ꓟ

ꓡꓴ-ꓘ ꓕꓳꓽ ꓶ 1: 39-56

 ꓖꓳ ꓗ ꓠꓯ ꓟ-ꓡꓲ ꓔꓴ ꓢꓲ꓾ ꓪꓼ ꓚꓲ ꓟꓵ ꓗꓪ ꓠꓲꓹ ꓞ ꓙꓰ ꓢꓲ ꓠꓬꓲ꓾ ꓬꓴ-ꓔ ꓡꓳ ꓒꓱ ꓕꓲ ꓟ ꓗꓪ ꓛꓲ ꓬꓰ ꓠꓬ꓾ ꓢ-ꓚꓬ-ꓡꓲ-ꓬ ꓦꓲꓻ ꓗꓪ ꓓꓵꓽ ꓡꓰ ꓢꓲ꓾ ꓬꓲ-ꓡꓲ-ꓫ-ꓑꓷ ꓔꓯ ꓒꓵꓽ ꓗ ꓬꓰ ꓖꓶ_ ꓡꓳ꓿ ꓟ-ꓡꓲꓹ ꓒꓵꓽ ꓗ ꓬꓰ_ ꓟ ꓔꓯ ꓬꓲ-ꓡꓲ-ꓫ-ꓑꓷ ꓑ ꓙ ꓗꓷ ꓟꓶꓽ ꓕꓯ꓾ ꓬꓲ ꓔꓯ ꓶꓻ ꓞ_ ꓟ ꓤ ꓠꓱ ꓠꓬ ꓤ ꓘꓶꓻ ꓗꓪ ꓔꓷꓹ ꓡꓵꓺ ꓡ_ ꓡꓳ꓿ ꓬꓲ-ꓡꓲ-ꓫ-ꓑꓷ ꓔꓯ ꓢꓲ-ꓫꓬ-ꓟ-ꓦ ꓐꓲꓺ ꓡꓰ ꓢꓲ꓾ ꓢꓯꓼ ꓓꓽ ꓟ ꓡꓰ ꓘꓴꓻ ꓢꓲ ꓠꓬꓲ꓾ ꓤ ꓟꓶ ꓤ ꓮ ꓙꓵ ꓟ ꓗꓪ ꓶꓼ ꓙꓳ ꓫꓱꓹ ꓙꓳ ꓢꓴ ꓠꓬ ꓠꓴ ꓥ ꓡꓳ꓿ ꓠꓴ ꓖꓳ ꓓꓱ ꓗꓪ ꓶꓻ ꓞ_ ꓟ_ ꓟꓲ ꓶꓼ ꓙꓳ ꓫꓱꓹ ꓙꓳ_ ꓡꓳ꓿ ꓥꓪ ꓮꓽ ꓟ ꓥ ꓠꓬꓲ꓾ ꓥꓪ ꓢꓲꓺ ꓒ ꓬꓲ ꓟꓹ ꓟ ꓥꓪ ꓔꓯ ꓔꓱꓹ ꓠꓬꓲ ꓡ_ ꓡꓳꓺꓽ꓿ ꓠ ꓠꓹ ꓔ꓾ ꓠꓴ ꓒꓵꓽ ꓗ ꓬꓰ_ ꓟ ꓢꓯꓼ ꓥꓪ ꓑ ꓙ ꓗꓷ ꓟꓶꓽ ꓕꓯ꓾ ꓥꓪ ꓤꓽ ꓘꓶꓻ ꓗꓪ ꓓꓯ_ ꓟ ꓤ ꓠꓱ ꓠꓬ ꓗꓹ ꓛꓲ ꓠꓬꓲ ꓔꓷꓹ ꓡꓵꓺ ꓡ_ ꓡꓳ꓿ ꓢꓲꓺ ꓒ ꓬꓲ ꓔꓯ ꓐꓯ_ ꓟ ꓮ ꓙꓵ ꓐꓲ ꓡ_ ꓥꓳ꓾ ꓐꓰ ꓙꓵꓻ ꓢꓴ ꓤ ꓟꓶ ꓤ ꓬꓲ ꓠꓬ ꓶꓼ ꓙꓳ ꓫꓱꓹ ꓙꓳ_ ꓡꓳ꓾ ꓐꓯ_ ꓡꓳ꓿ ꓟ-ꓡꓲ ꓠꓬ ꓕꓱ ꓡꓱ ꓐꓯ_ ꓡꓳ꓾ ꓥꓪ ꓠꓲꓹ ꓟ ꓠꓬ ꓢꓲꓺ ꓒ ꓔꓯ ꓫꓱꓸ ꓖꓶ ꓔꓬ_ ꓡꓳ꓿ ꓥꓪ ꓦꓻ ꓠꓬ ꓪꓴ-ꓢ ꓥꓪ ꓚꓬꓴ ꓢꓲꓺ ꓒ ꓠꓯꓸꓼ ꓗꓪ ꓗꓹ ꓛꓲ ꓔꓬ_ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓚꓳ ꓟ ꓥꓪ ꓟꓽ ꓒꓵꓽ ꓟ ꓔꓯ ꓬꓲ ꓠꓬꓲꓺ ꓙ_ ꓡꓳ꓿ ꓠꓬꓲ ꓠꓹ꓾ ꓕꓱ ꓡꓱ ꓖꓳ ꓑꓳ ꓕꓲ ꓤꓶ ꓡꓰ ꓕꓲ ꓤꓶ ꓢꓴ ꓠꓬ ꓥꓪ ꓔꓯ ꓶꓼ ꓙꓳ ꓫꓱꓹ ꓙꓳ ꓢꓴ꓾ ꓐꓰ ꓘꓴ_ ꓥꓳ꓿ ꓮ ꓡꓲꓳ ꓐꓯ ꓠꓬ ꓪꓽ-ꓠꓬꓲ-ꓢꓴ ꓖꓳ ꓕꓲ ꓣꓳ ꓥꓪ ꓐꓱ ꓶ ꓟꓬꓱꓽ ꓓꓽ ꓟ ꓬꓰ ꓖꓶ ꓡꓻꓳ꓿ ꓬꓲ ꓟꓬꓱꓺ ꓠꓬ ꓢꓲ ꓫꓬ_ ꓡꓳ꓿ ꓬꓲ ꓔꓯ ꓙꓳꓺ ꓒꓵꓽ ꓢꓴ ꓠꓬ꓾ ꓕꓲ ꓤꓶꓻ ꓡꓰ ꓕꓲ ꓤꓶ ꓬꓲ ꓫꓱꓸ ꓤ_ ꓟ ꓟꓶ_ ꓥꓳ꓿ ꓬꓲ ꓡꓯ ꓪꓵꓼ ꓡꓰ ꓬꓲ ꓢꓯꓼ ꓙꓳ_ ꓟ ꓟꓳꓸ ꓖꓶ ꓡꓻꓳ꓿ ꓙꓽ ꓠꓲꓹ ꓗꓪ ꓠꓲ ꓘꓹ ꓢꓴ ꓔꓯ ꓬꓲ ꓡꓰ ꓖꓼ ꓦ ꓗꓷ_ ꓡꓳ꓿ ꓬꓲ ꓠꓬ ꓙꓵꓽ ꓪ ꓙꓳ ꓢꓴ ꓔꓯ ꓙꓵꓽ ꓠꓬꓲꓸ ꓕꓲ ꓗꓪ ꓐꓰ ꓣꓴ ꓬꓯꓼ ꓡꓰ ꓢꓲ꓾ ꓟꓽ ꓒꓵꓽ ꓟ ꓡ ꓞꓳ ꓔꓯ ꓓꓳꓹ ꓟꓴ_ ꓡꓳ꓿ ꓦꓰꓼ ꓟꓷꓼ ꓢꓴ ꓔꓯ ꓟꓲꓻ_ ꓟ ꓜꓽ ꓓꓴ ꓡꓰ ꓐꓳ ꓡꓰ ꓝꓲ_ ꓡꓳ꓿ ꓞꓳ ꓐꓳ ꓔꓯ ꓠꓬ ꓬꓲ ꓖꓳꓽ ꓬꓲꓼ ꓙꓰ ꓝꓲ_ ꓡꓳ꓿ ꓣꓳ ꓒꓵꓽ ꓒ ꓐꓴ ꓔꓯ ꓖꓶ ꓙ ꓟꓳ_ ꓟ_ ꓡꓰ ꓐꓰ꓾ ꓬꓲ ꓠꓬ ꓕꓲ ꓞꓲꓼ ꓕꓲ ꓑ ꓗꓪ ꓛꓲ ꓮ-ꓐ-ꓡ-ꓦ_ ꓐꓰ ꓬꓲ ꓞꓲ ꓤ ꓡꓯꓹ ꓤ ꓔꓯ ꓫꓱꓸ ꓤ_ ꓟ ꓔꓯ ꓓꓵꓽ ꓙ ꓔ ꓢꓲ꓾ ꓬꓲ ꓠꓬ ꓬꓲ ꓚꓳ ꓑ ꓬꓲ-ꓢꓷ-ꓡꓰ ꓔꓯ ꓬꓰ ꓙ_ ꓡꓳ꓾ ꓐꓯ_ ꓡꓳ꓿ ꓟ-ꓡꓲ ꓠꓬ ꓬꓲ-ꓡꓲ-ꓫ-ꓑꓷ_ ꓐꓰ ꓦ ꓐ ꓢ ꓟ ꓛꓲ ꓔꓬ ꓗꓷ ꓠꓬ꓾ ꓬꓲ ꓦꓲ ꓗꓪ ꓬꓲꓼ ꓙꓰ_ ꓡꓳ꓿