ꓠꓬꓲꓽ ꓧꓪꓹ ꓕꓲ ꓧꓪꓹ ꓡ ꓠꓹ ꓟ ꓐꓯ ꓟꓸ ꓖꓶ_ ꓟ

 ꓠꓳ-ꓪ ꓦꓬꓼ ꓠꓬꓲ ꓗꓪ ꓮ ꓡꓲ ꓥ ꓠꓬ꓾ ꓡ ꓞꓳ ꓮ ꓐꓲ ꓦꓬꓼ ꓠꓬꓲ ꓗꓪ_ ꓟꓲ ꓖꓳ ꓡꓱ ꓗꓷ ꓡꓰ_ ꓥꓳ꓿ ꓠꓳ-ꓪ ꓦꓲ ꓡꓲꓺ ꓓꓽ ꓟ ꓗꓪ ꓓꓵꓽ ꓡꓰ_ ꓕꓲ ꓠꓬꓲ ꓗꓪ ꓛꓲ꓾ ꓬꓲ ꓪ ꓠꓬ ꓜꓽ ꓠꓬꓲ ꓓꓳꓻ ꓠꓬꓲ꓾ ꓤꓽ ꓟꓶ ꓘꓴꓻ ꓠꓬꓲ ꓮꓸ ꓟꓲꓽ ꓩꓴ ꓠꓬꓲ ꓐꓰ ꓬꓰ ꓔꓬ_ ꓟ ꓗꓪ꓾ ꓟꓵꓽ ꓟꓷꓸ ꓡ ꓢꓲ ꓬꓲ ꓪ ꓮ ꓙꓵ ꓔꓯ ꓟꓶꓽ ꓬꓰ ꓝꓲ_ ꓡꓳ꓿ ꓡꓳ-ꓔꓷ ꓦꓬꓼ ꓠꓬꓲ ꓗꓪ_ ꓟꓲ꓾ ꓖꓳ ꓟ_ ꓡꓰ ꓐꓰ ꓬꓲ ꓪ ꓠꓬ ꓜꓽ ꓠꓬꓲ ꓓꓳ ꓠꓬꓲ꓾ ꓪꓴꓻ ꓠꓬꓲ ꓪꓴꓽ ꓠꓬꓲ꓾ ꓓꓳꓽ ꓠꓬꓲ ꓫꓵꓸ ꓠꓬꓲ꓾ ꓦꓲ ꓫꓬꓹ ꓠꓬꓲ ꓬꓰ ꓔꓬ_ ꓡꓳ꓿ ꓖꓳ ꓡꓱ ꓥ_ ꓟꓲ ꓡꓳ-ꓔꓷ ꓢꓳ-ꓓꓳ-ꓟ ꓗꓪ ꓐꓰ ꓓꓳ ꓡ_ ꓕꓲ ꓠꓬꓲ ꓗꓪ꓾ ꓟꓴ ꓗꓪ ꓗꓪ ꓐꓰ ꓮꓸ ꓔꓳꓸ_ ꓐꓰ ꓡꓳꓺ ꓐꓺ ꓦꓻ ꓩꓴ ꓡ ꓢꓲ꓾ ꓬꓲ ꓪ ꓮ ꓙꓵ ꓔꓯ ꓛꓴꓻ ꓛꓰꓹ ꓡꓰ ꓝꓲ_ ꓡꓳ꓿ ꓢꓸ ꓖꓪ ꓡ ꓞꓳ ꓮ ꓐꓲ ꓟꓳꓸ ꓖꓶ ꓡ_ ꓟ ꓦꓬꓼ ꓠꓬꓲ ꓗꓪ_ ꓟꓲ꓾ ꓖꓳ ꓟ_ ꓡꓰ ꓐꓰ ꓗꓷ ꓡꓰ_ ꓥꓳ꓿ ꓖꓳ ꓕꓲ ꓠꓬꓲ ꓗꓪ ꓦꓲꓻ ꓪꓴꓸ ꓓꓵ ꓓꓰꓺ ꓗꓪ ꓔꓬ ꓢꓴ ꓠꓬ꓾ ꓦꓲ ꓠꓯꓸꓼ ꓗꓪ ꓟ ꓖꓴ ꓙꓴ ꓣꓴ ꓠꓹ ꓟ ꓕꓽ ꓬꓯꓼ ꓡꓰ ꓝꓲ꓿ ꓦ ꓟꓲ ꓦ ꓐꓽ ꓗꓪ ꓔꓬ ꓢꓴ_ ꓟꓲ ꓦꓲꓻ ꓗꓪ ꓕꓽ ꓬꓲꓼ ꓙꓰ꓿ ꓡꓳ-ꓔꓷ ꓤ ꓟꓶ ꓔꓯ ꓧꓪꓸ ꓛꓲ ꓔ꓿ ꓚꓲ ꓛꓬ ꓢꓯꓼ ꓟꓬ ꓚꓬꓴ ꓠꓲꓹ ꓫꓵ ꓢꓴ ꓠꓬ꓾ ꓬꓲ ꓢꓯꓼ ꓟꓬ ꓒꓲꓼ ꓬꓰ_ ꓥꓳ꓿ ꓚꓲ ꓛꓬ ꓢꓯꓼ ꓟꓬ ꓒꓲꓼ ꓬꓰ ꓠꓬ꓾ ꓬꓲ ꓢꓯꓼ ꓟꓬ ꓚꓬꓴ ꓟꓶ_ ꓥꓳ꓿ ꓥꓪ ꓠꓴ ꓪ ꓔꓯ ꓐꓯ ꓖꓶ_ ꓠꓬꓲ꓾ ꓖꓳ ꓕꓲ ꓦꓬꓼ ꓗꓪ꓾ ꓘꓹ ꓛꓽ ꓗꓪ ꓡ ꓞꓳ ꓠꓬꓲꓽ ꓣꓳ ꓔꓬ_ ꓠꓬ꓾ ꓕꓲ ꓣꓳ ꓔꓯ ꓔꓯꓹ ꓙꓰ ꓢꓲ ꓕꓲ ꓣꓳ ꓔꓯ ꓗꓶꓺ ꓔ ꓬꓰ_ ꓥꓳ꓿ ꓤ ꓟꓶ ꓤ ꓠꓬꓲꓽ ꓣꓳ ꓡꓳ ꓙꓱꓺ ꓖꓳꓻ ꓔꓬ ꓠꓬ꓾ ꓕꓲ ꓣꓳ ꓔꓯ ꓔꓯꓹ ꓙꓰ ꓢꓲ ꓕꓲ ꓣꓳ ꓔꓯ ꓗꓶꓺ ꓔ ꓬꓰ_ ꓥꓳ꓿ ꓹꓡ ꓞꓳ ꓠꓬꓲꓽ ꓣꓳ ꓦ ꓟꓲ ꓗꓪ ꓔꓬ ꓠꓬ꓾ ꓕꓲ ꓣꓳ ꓔꓯ ꓔꓯꓹ ꓙꓰ ꓢꓲ ꓕꓲ ꓣꓳ ꓔꓯ ꓗꓶꓺ ꓔ ꓬꓰ_ ꓥꓳ]꓿ ꓖꓳ ꓡꓱ ꓠꓬ ꓛꓳ ꓒꓯꓹ ꓐꓴ ꓡꓰ ꓬꓲ ꓔꓯ꓾ ꓢꓲꓺ ꓒꓽꓳ꓾ ꓮ ꓡꓲ ꓗꓪꓺꓽ꓾ ꓐꓯ_ ꓡꓳ꓿ ꓬꓲ ꓡꓰ ꓬꓲ ꓪ ꓔꓯ꓾ ꓫꓵꓻ ꓟꓳ ꓮ ꓡꓲ ꓗꓪ ꓓꓹ ꓠꓬ꓾ ꓠꓸ ꓙꓱꓻ_ ꓟꓲ ꓖꓳ ꓗꓪ ꓜꓲꓼ ꓡ_ ꓥꓳ꓾ ꓐꓯ_ ꓡꓳ꓿  ꓡꓴ-ꓘ ꓕꓳꓽ ꓶ 17: 26-37