ꓠꓲꓹ ꓗꓴ ꓟꓬ ꓗꓴ ꓢꓴ ꓖꓶ ꓙ ꓟꓳ_ ꓟ

Saturday, June 15, 2019

ꓠꓬꓲꓸ ꓠꓬꓲ ꓟ ꓢꓲ-ꓫꓬ ꓕꓳ ꓝꓲꓼ

ꓶ ꓓꓳ ꓫꓱꓸ ꓓꓳ ꓬꓳ-ꓦ 16ꓽ12-15

ꓥꓪ ꓠꓴ ꓪ ꓔꓯ ꓐꓯ ꓖꓶ ꓓꓴ ꓮ ꓟꓬꓹ ꓙꓳ_ ꓢꓰꓽ ꓡꓳ꓿ ꓖꓳ ꓡꓱ ꓥ_ ꓟꓲ ꓮ ꓟꓶ ꓠꓬ ꓠꓴ ꓪ ꓟꓯꓻ ꓟꓽ ꓘꓴ꓿ ꓖꓳ ꓡꓱ ꓥ_ ꓟꓲ ꓔꓱꓹ ꓚꓵ_ ꓟ ꓦꓻ ꓛꓲ ꓡ ꓕꓯ ꓠꓬ꓾ ꓔꓱꓹ ꓚꓵ_ ꓟ ꓮ ꓙꓵ ꓗꓪ ꓬꓲ ꓠꓴ ꓪ ꓔꓯ ꓧꓳꓽ ꓓꓵ ꓙꓰ_ ꓥꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓠꓽ ꓚꓲ ꓛꓬ ꓗꓪ ꓐꓰ ꓟꓽ ꓫ ꓕꓱ꓿ ꓬꓲ ꓑ ꓙ_ ꓟ ꓥ ꓕ ꓑꓳ ꓬꓲ ꓫ ꓕꓱ ꓡ ꓢꓲ꓾ ꓒꓬꓱꓼ ꓡ ꓠꓹ ꓟ ꓫꓵꓽ ꓪꓴ ꓬꓲ ꓠꓴ ꓪ ꓔꓯ ꓟꓳꓸ ꓖꓶ ꓡ_ ꓥꓳ꓿ ꓬꓲ ꓠꓬ ꓥꓪ ꓔꓯ ꓟꓬꓱ ꓓꓳꓽ ꓖꓶ_ ꓥꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓡꓰ ꓥꓪ ꓔꓯ ꓟ ꓣꓴ ꓢꓲ꓾ ꓠꓴ ꓪ ꓔꓯ ꓐꓯ ꓟꓳꓸ ꓖꓶ ꓡ_ ꓥꓳ꓿ ꓐꓹ ꓐ ꓔꓯ ꓙꓳ_ ꓟ ꓥ ꓕ ꓑꓳ ꓠꓬ ꓥꓪ ꓔꓯ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓥꓪ ꓡꓰ꓾ ꓥꓪ ꓔꓯ ꓟ ꓬꓲ ꓣꓴ ꓢꓲ ꓠꓴ ꓪ ꓔꓯ ꓐꓯ ꓟꓳꓸ ꓖꓶ ꓡ_ ꓥꓳ꓾ ꓐꓯ_ ꓡꓳ꓿

ꓥꓳꓽ ꓙꓱꓸꓹ ꓕꓳꓽ ꓶ 8: 22-31

ꓬꓲ ꓟꓬꓱꓽ ꓬꓰ ꓪꓴꓸ ꓔꓴ_ ꓕꓯ ꓬꓰ-ꓧꓳ-ꓧꓪ ꓠꓬ ꓥꓪ ꓔꓯ ꓙꓳ_ ꓡꓳ꓿ ꓮ ꓠꓱ ꓟ ꓚꓰꓼ ꓟꓬꓱꓽ ꓬꓲ ꓪꓴꓸ ꓕꓲ ꓫꓵ ꓟ ꓧꓶꓸ ꓕꓯ ꓡꓰ ꓥꓪ ꓬꓲ ꓔꓯ ꓔꓬ_ ꓡꓳ꓿ ꓕꓲ ꓞꓲ ꓕꓲ ꓑ ꓗꓪ ꓐꓰ꓾ ꓬꓲ ꓚꓰ ꓬꓲ ꓪꓴꓸ ꓗꓪ꓾ ꓟꓲ ꓠꓯ ꓟꓽ ꓙꓳ ꓕꓯ ꓡꓰ ꓥꓪ ꓙꓳꓻ ꓞ_ ꓡꓳ꓿ ꓠꓯꓸ_ ꓟ ꓬꓲ ꓡꓴ ꓐꓱ_ ꓐꓰ ꓬꓲ ꓙꓬ ꓮ ꓟꓬꓹ ꓙꓳ_ ꓟ ꓬꓲꓻ ꓝꓳꓹ ꓟꓶ ꓟꓽ ꓙꓳ ꓕꓯ ꓡꓰ꓾ ꓥꓪ ꓔꓯ ꓦꓵ_ ꓡꓳ꓿ ꓪ ꓚꓲ ꓔꓯ ꓟꓽ ꓚꓰꓼ ꓢꓰ ꓕꓯ꓾ ꓪ ꓡꓴꓸ_ ꓟꓲ ꓟꓽ ꓙꓳ ꓕꓯ ꓡꓰ꓾ ꓪꓴ-ꓢ ꓡꓰ ꓟꓲ ꓠꓯ_ ꓐꓰ ꓖꓳ ꓗꓪ ꓟ ꓬꓰ ꓟꓲ ꓟꓽ ꓚꓰꓼ ꓕꓯ ꓡꓰ꓾ ꓟꓲ ꓠꓯ ꓗꓪ ꓟ ꓠꓱꓸ ꓦꓱꓽ ꓧꓶ ꓟꓽ ꓙꓳ ꓕꓯ ꓡꓰ ꓥꓪ ꓔꓯ ꓦꓵ_ ꓡꓳ꓿ ꓬꓲ ꓡꓰ ꓟꓴ ꓗꓪ ꓔꓯ ꓔꓶ_ ꓕꓯ ꓥꓪ_ ꓟꓲ ꓖꓳ ꓗꓪ ꓔꓬ_ ꓡꓳ꓿ ꓠꓯꓸ_ ꓟ ꓬꓲ ꓡꓴ ꓐꓱ ꓕꓯ ꓢꓲ ꓗꓪ ꓬꓲ ꓡꓰ ꓕꓲ ꓚꓳꓺ ꓐꓳ ꓓꓳ ꓡ_ ꓕꓯ꓾ ꓥꓪ_ ꓟꓲ ꓔꓬ_ ꓡꓳ꓿ ꓕꓯ ꓢꓲ ꓗꓪ ꓟ ꓟꓵꓽ ꓪꓴ ꓔꓯ ꓬꓲ ꓕꓶ ꓡꓰ ꓝꓲ_ ꓕꓯ꓾ ꓠꓯꓸ_ ꓟ ꓬꓲ ꓡꓴ ꓐꓱ ꓗꓪ ꓟ ꓬꓲꓻ ꓝꓳꓹ ꓟꓶ ꓔꓯ ꓬꓲ ꓔꓶ_ ꓕꓯ꓾ ꓬꓲ ꓙꓬ ꓠꓬ ꓬꓲ ꓕꓵꓼ ꓪ ꓔꓯ ꓟꓽ ꓛꓬ ꓡꓰ ꓠꓹ ꓟ꓾ ꓬꓲ ꓡꓰ ꓬꓲꓻ ꓡꓴ ꓐꓱ ꓔꓯ ꓡꓴꓸ ꓞ ꓝꓲ_ ꓕꓯ꓾ ꓥꓪ ꓠꓬ ꓑꓴ ꓙꓵ ꓕꓲ ꓣꓳ_ ꓡꓰ ꓐꓰ ꓪꓴ-ꓢ ꓒ ꓕꓲꓸꓼ ꓗꓪ ꓔꓬ_ ꓡꓳ꓿ ꓥꓪ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓗꓪ ꓬꓲ ꓠꓲꓹ ꓒꓴ ꓓꓴ ꓥ ꓢꓲ꓾ ꓮ ꓕꓯ ꓟꓲ ꓬꓲ ꓟꓲꓽ ꓙꓬ ꓗꓪ ꓗ ꓛꓲ ꓔꓬ_ ꓡꓳ꓿ ꓞꓳ ꓤ ꓔꓬ ꓖꓴ ꓟꓲ ꓠꓯ ꓕꓱ ꓟ ꓗꓪ ꓐꓰ ꓠꓲꓹ ꓒꓴ ꓔꓬ ꓢꓲ꓾ ꓞꓳ ꓤ ꓔꓯ ꓗ ꓛꓲ ꓔꓬ_ ꓡꓳ꓿

ꓣꓳ-ꓟ ꓕꓳꓽ ꓶ 5: 1-5

ꓖꓳ ꓡꓱ ꓠꓬꓲ ꓣꓳ ꓠꓬ ꓙꓵꓻ ꓠꓲꓹ ꓗꓪ ꓐꓰ ꓙꓲ ꓫꓬ_ ꓟ ꓚꓬꓹ ꓟꓶ_ ꓠꓬꓲ꓾ ꓣꓳ ꓢꓲꓺ ꓒ ꓬꓰ-ꓢꓴ ꓙꓲ-ꓢꓴ ꓗꓪ ꓐꓰ ꓪꓴ-ꓢ_ ꓐꓰ ꓧꓳꓹ ꓡꓰ_ ꓡꓳ꓿

ꓝꓮꓲ ꓠꓬ ꓙꓵꓻ ꓠꓲꓹ ꓑꓶ ꓓꓴ ꓣꓳ ꓮ ꓟꓶ ꓦꓰꓼ ꓔꓬ_ ꓟ ꓣꓱ ꓛꓰ ꓕꓱ ꓟ ꓗꓪ ꓓꓵꓽ ꓡꓰ_ ꓟ ꓠꓬ ꓬꓰ-ꓢꓴ ꓗꓪ ꓐꓰ ꓥ ꓢꓲ꓾ ꓪꓴ-ꓢ ꓬꓲ ꓐꓬꓱꓼ ꓡꓱꓼ ꓡꓱꓼ_ ꓟ ꓔꓯ ꓥꓳꓺ ꓡꓳꓸ ꓔꓬ_ ꓠꓬꓲ ꓗꓹ ꓛꓲ_ ꓡꓳ꓿ ꓕꓱ ꓟ_ ꓡꓰꓽ ꓟꓽ ꓞꓲ꓾ ꓣꓳ ꓫ ꓙꓵ_ ꓟ ꓗꓪ_ ꓟꓲ ꓣꓳ ꓗꓹ ꓛꓲ_ ꓡꓳ꓿ ꓮ ꓡꓲꓳ ꓐꓯ ꓠꓬ ꓫ ꓙꓵ_ ꓟ ꓗꓪ ꓐꓰ ꓜꓲꓽ ꓘꓴ ꓠꓲꓹ ꓓꓱꓼ ꓓꓳ ꓡ_ ꓟ ꓣꓳ ꓢꓷ_ ꓡꓳ꓿ ꓜꓲꓽ ꓘꓴ ꓠꓲꓹ ꓠꓬ ꓤꓹ ꓟꓶ ꓗꓷ_ ꓟ ꓓꓳ ꓡ_ ꓡꓳ= ꓤꓹ ꓟꓶ ꓗꓷ_ ꓟ ꓠꓬ ꓥꓳ ꓡꓳꓸ ꓓ0 ꓡ_ ꓡꓳ= ꓥꓳ ꓡꓳꓸ ꓓꓴ ꓠꓬ ꓟꓽ ꓫ ꓔꓳ ꓡꓰ ꓝꓲ= ꓮ ꓡꓲꓳ ꓐꓯ ꓠꓬ ꓪꓴ-ꓢ ꓠꓵꓸꓹ ꓠꓲꓹ ꓠꓬ ꓣꓳ ꓔꓯ ꓖꓶ ꓡ_ ꓟ ꓢꓲ-ꓫꓬ-ꓟ-ꓦ ꓗꓪ ꓐꓰ ꓣꓳ ꓠꓲꓹ ꓟꓸꓼ ꓗꓪ ꓧꓳꓸ ꓧꓳꓽ ꓖꓶꓸꓹ ꓡꓳ-ꓸ ꓐꓰ ꓣꓳ ꓢꓷ_ ꓡꓳ=