ꓠꓴ ꓪ ꓠꓬ ꓟꓵꓽ ꓗꓳꓹ ꓓꓵ ꓓꓵ ꓙꓰ ꓢꓲ꓾ ꓞꓳ ꓫꓵꓽ ꓞꓳ ꓙꓰꓽ ꓥ ꓕ ꓑꓳꓸ ꓔꓯ ꓶꓼ ꓓꓳ ꓫꓱꓹ ꓓꓳ ꓚ ꓟꓸ ꓖꓶ꓾ ꓐꓰ ꓬꓰ-ꓢꓴ ꓡꓰ ꓐꓯ ꓡꓳ

ꓟ-ꓘꓳ = 16ꓽ15-20

ꓬꓰ-ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ꓾ ꓠꓴ ꓪ ꓠꓬ ꓟꓵꓽ ꓗꓳꓹ ꓓꓵ ꓓꓵ ꓙꓰ ꓢꓲ꓾ ꓞꓳ ꓫꓵꓽ ꓞꓳ ꓙꓰꓽ ꓥ ꓕ ꓑꓳꓸ ꓔꓯ ꓶꓼ ꓓꓳ ꓫꓱꓹ ꓓꓳ ꓚ ꓟꓸ ꓖꓶ= ꓙꓵꓻ ꓢꓲ ꓖꓳ ꓓꓱ ꓔꓲꓹ ꓟꓶ ꓢꓴ ꓠꓽ ꓚꓬꓴꓸ ꓟꓶˍ ꓥꓳ= ꓟꓽ ꓙꓵꓻ ꓢꓴ ꓠꓽ ꓛꓬ ꓒꓵꓽ ꓟꓶˍ ꓥꓳ=

ꓙꓵꓻ ꓢꓴ ꓔꓯ ꓠꓽ ꓢꓷ  ꓸ ꓡꓰ ꓓꓴ ꓕꓱ ꓟꓬ ꓫꓵꓽ ꓛꓳ ꓡˍ ꓥꓳ= ꓬꓲ ꓪ ꓠꓬ ꓥꓪ ꓟꓬꓱ ꓗꓪ ꓐꓰ ꓠꓲꓽ ꓖꓼˍ ꓥꓳ= ꓬꓲ ꓪ ꓠꓬ ꓥꓳꓽ ꓬꓲ ꓫꓵꓼ ꓫ ꓕꓱˍ ꓥꓳ= ꓩꓴ ꓔꓯˍ ꓟꓲ ꓬꓲ ꓪ ꓣꓴˍ ꓥꓳ= ꓬꓲ ꓪ ꓮ ꓡꓰ ꓠꓻ ꓢꓴ ꓒꓬꓼ ꓢꓴ ꓔꓯ ꓡꓯ ꓒꓯꓹ ꓚꓰꓹ ꓖꓶˍ ꓠꓬ ꓓꓻ ꓡꓰˍ ꓥꓳ꓾ ꓐꓯˍ ꓡꓳ=

ꓢꓲ ꓒꓽ ꓬꓰ-ꓢꓴ ꓬꓲ ꓪ ꓔꓯ ꓫꓸ ꓕꓱ ꓓꓳ ꓡꓰ ꓠꓬ꓾ ꓬꓲ ꓔꓯ ꓟꓴ ꓗꓪ ꓗꓪ ꓔꓯꓹ ꓓꓯ ꓙꓰ ꓢꓲ꓾ ꓪꓴ-ꓢ ꓡꓯꓼ ꓙ ꓕꓲ ꓛꓱꓽ ꓗꓪ ꓠꓬꓲꓸ ꓠꓸ ꓡꓰꓳ= ꓖꓳ ꓡꓱ ꓠꓬ ꓬꓲ ꓛꓳ ꓒꓯꓹ ꓐꓴ ꓓꓳ ꓙꓰ ꓢꓲ꓾ ꓮ ꓡꓲ ꓗꓪˍ ꓟꓲ ꓟꓸ ꓟꓲꓽ ꓚ ꓟꓸ ꓖꓶ ꓙꓰˍ ꓡꓳ= ꓢꓲ ꓒꓽ ꓠꓬ ꓬꓲ ꓪˍ ꓐꓰ ꓕꓲ ꓪˍ ꓟꓬꓱꓽ ꓬꓰ ꓢꓲ꓾ ꓬꓲ ꓪ ꓚ ꓟꓸ ꓖꓶˍ ꓟ ꓐꓯ ꓘꓶ ꓔꓯ ꓢꓷꓸ ꓡꓰ ꓢꓴ ꓛꓳ ꓩꓴ ꓡˍ ꓟ ꓡꓰ ꓗꓸ ꓚꓵ ꓬꓰ ꓢꓲ ꓕꓶ ꓡꓰ ꓝꓲˍ ꓡꓳ=

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓝꓲꓸ ꓗꓪ ꓐꓰ ꓣꓳ ꓓꓵꓽ ꓙ ꓠꓬꓲ ꓠꓹ ꓟ ꓠꓬ꓾

ꓬꓰ-ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓟꓵꓽ ꓗꓳꓹ ꓓꓵ ꓓꓵ ꓙꓰ ꓢꓲ꓾ ꓞꓳ ꓤ ꓥ ꓕ ꓑꓳꓸ ꓔꓯ ꓶꓼ ꓓꓳ ꓫꓱꓹ ꓓꓳ ꓚꓺ ꓟꓸ ꓖꓶ ꓠꓹ ꓟ  ꓬꓲ ꓝꓲ ꓓꓴ ꓐꓴ ꓔꓯ ꓟꓬꓱꓽ ꓖꓶ ꓔ ꓡꓳ꓾ ꓐꓰ ꓣꓳ ꓑ ꓙꓽ ꓪˍ ꓡꓳ= ꓶꓼ ꓓꓳ ꓫꓱꓹ ꓓꓳ ꓚꓺ ꓒꓬꓱꓺˍ ꓟ ꓡꓰꓽ ꓟꓽ ꓞꓲꓺ ꓢꓷꓸ ꓡꓰ ꓓꓴ꓾ ꓓꓵꓽ ꓙ ꓟꓶ ꓓꓴ ꓔꓯˍ ꓟꓲ ꓬꓰ ꓓꓳ ꓡˍ ꓥꓳ ꓐꓰ ꓐꓯ ꓖꓶˍ ꓡꓳ= ꓝꓲ ꓓꓴ ꓐꓴ ꓠꓬ ꓠꓲꓽ ꓔꓯ ꓖꓼ ꓓꓳ ꓐ ꓡ ꓢꓲ꓾ ꓥꓳꓽ ꓫꓵꓽ ꓥꓳꓽ ꓙꓰꓽ ꓮ ꓟꓬꓹ ꓔꓯ ꓟꓲ ꓫꓸ ꓕꓱ ꓐ ꓡˍ ꓥꓳ꓾ ꓠꓻ ꓢꓴ ꓐꓴ ꓔꓯ ꓥˍ ꓟꓲ ꓬꓲ ꓪ ꓠꓻ ꓫꓬꓹ ꓖꓶ ꓐ ꓡˍ ꓥꓳ꓾ ꓐꓰ ꓐꓯ ꓡꓳ=

ꓢꓲꓺ ꓒ ꓬꓰ-ꓢꓴ ꓠꓬ ꓬꓲ ꓟꓬꓱꓽ ꓐꓬꓱꓽ ꓘꓶꓽ ꓔꓯ ꓝꓸ ꓢꓲ ꓬꓰ ꓠꓹ ꓟ ꓐꓱ ꓶ ꓣꓳ ꓐꓴ ꓔꓯ ꓥˍ ꓟꓲ ꓠꓬꓲꓸ ꓠꓬꓲ ꓗꓪ ꓘꓴꓻ ꓔꓬ ꓟ ꓥ ꓡꓳ= ꓣꓳ ꓣꓱꓽ ꓬꓰ ꓚꓱꓹ ꓗꓪ ꓐꓰ ꓢꓴ ꓔꓯ ꓟꓸ ꓖꓶ ꓠꓹ ꓟ ꓘꓴꓻ ꓔꓬ ꓡꓳ= ꓣꓳ ꓙ ꓫꓱꓽ ꓚꓱꓹ ꓗꓪ ꓐꓰ ꓢꓴ ꓔꓯ ꓟꓸ ꓟꓲꓽ ꓚꓺ ꓖꓶ ꓠꓹ ꓟ ꓘꓴꓻ ꓔꓬ ꓡꓳ= ꓕꓱ ꓟ ꓐꓱ ꓶ ꓣꓳ ꓔꓯ ꓘꓴꓻ ꓔꓬ ꓟ ꓥ ꓡꓳ=

ꓟꓬꓽ ꓠꓬꓲ ꓬꓳꓸ ꓚꓵˍ ꓟ ꓠꓬ꓾ ꓣꓳ ꓐꓴ ꓠꓬ ꓢꓲꓺ ꓒ ꓬꓰ-ꓢꓴ ꓞꓳ ꓙꓳ ꓗꓷ ꓟˍ ꓡꓰ ꓐꓰ ꓞꓳ ꓙꓳ ꓢꓯꓸ ꓔꓬ ꓠꓹ ꓟ ꓥ ꓡꓳ= ꓢꓲꓺ ꓒ ꓬꓰ-ꓢꓴ ꓠꓲꓹ ꓠꓵꓻ ꓗꓷ ꓟ ꓡꓰ ꓐꓰ ꓣꓳ ꓐꓴ ꓥˍ ꓟꓲ ꓠꓲꓹ ꓠꓵꓻ ꓠ ꓗꓹ ꓡꓳ= ꓣꓳ ꓐꓴ ꓠꓬ ꓣꓳ ꓔꓯ ꓙꓳˍ ꓟ ꓡꓯꓼ ꓫꓴ꓾ ꓣꓳ ꓬꓰ ꓐ ꓡˍ ꓟ ꓣꓳ ꓢꓷꓸ ꓔ ꓟ꓾ ꓝꓮꓲ ꓣꓳ ꓔꓯ ꓣꓱꓽ ꓖꓴ ꓟꓽ ꓓ ꓙꓳˍ ꓟ ꓣꓱꓽ ꓛꓰꓽ ꓐꓴ ꓔꓯ ꓢꓲꓺ ꓒ ꓬꓰ-ꓢꓴ ꓬꓰ ꓗꓷ ꓟˍ ꓡꓰ ꓐꓰ ꓢꓴ ꓔꓯ ꓐꓱ ꓖꓶ ꓠꓹ ꓟ ꓥ ꓡꓳ=

ꓠꓬꓲꓸ ꓠꓬꓲ ꓣꓳ ꓐꓴ ꓠꓬ ꓢꓲꓺ ꓒ ꓬꓰ-ꓢꓴ ꓬꓲ ꓛꓲꓺ ꓓꓴ   ꓗꓪ ꓫꓱꓽ ꓙꓰ ꓔꓬ ꓟ ꓔꓯ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓗꓷ ꓔ ꓢꓲ꓾ ꓣꓳ ꓐꓴ ꓠꓬ ꓢꓲꓺ ꓒ ꓬꓰ-ꓢꓴ ꓔꓯ ꓛꓳꓻ ꓒꓵꓽ ꓢꓴ ꓒꓬꓱꓼ ꓡ ꓠꓹ ꓟ ꓐꓱ ꓶ ꓪꓽ ꓘꓴ ꓡꓯ=