ꓡ ꓞꓳ ꓥꓪꓽ ꓔꓴ ꓔꓯ ꓖꓶ ꓜꓽ_ ꓟ

ꓟ-ꓕꓲ ꓕꓳꓽ ꓶ 14: 13-21

ꓬꓰ-ꓢꓴ ꓑ ꓙ ꓗꓷ ꓠꓬ꓾ ꓬꓲ ꓖꓳ ꓗꓪ ꓐꓰ ꓡꓲ ꓜꓶꓽ ꓢꓲ꓾ ꓡꓲ ꓛꓲ ꓘꓳ ꓫꓱ ꓫꓱ_ ꓕꓲ ꓔꓳꓸ ꓗꓪ ꓙꓵ ꓙꓰ_ ꓡꓳ꓿ ꓡ ꓞꓳ ꓬꓲ ꓜꓴ ꓬꓲ ꓟꓯꓼ ꓑ ꓙ ꓗꓷ ꓠꓬ꓾ ꓡꓳ ꓒꓱ ꓮ ꓙꓵ ꓟ ꓗꓪ ꓐꓰ ꓙ ꓖꓴ ꓫꓱꓽ ꓢꓲ ꓬꓲ ꓗ ꓠꓯꓸ ꓢꓲ ꓛꓳ ꓙꓰ_ ꓡꓳ꓿ ꓬꓲ ꓓꓳ ꓡ ꓢꓲ ꓡ ꓞꓳ ꓬꓲ ꓜꓴ ꓓꓽ ꓟ ꓔꓯ ꓟꓳꓻ ꓗꓷ ꓠꓬ꓾ ꓬꓲ ꓬꓲꓸ ꓪ ꓔꓯ ꓫꓱꓸ ꓤ_ ꓡꓳ꓿ ꓖꓳ ꓡꓱ ꓠꓬ ꓬꓲ ꓪ ꓠꓻ ꓢꓴ ꓒꓬꓽ ꓢꓴ ꓔꓯ ꓫꓬꓹ ꓓ ꓡꓰ ꓖꓶ_ ꓡꓳ꓿ ꓟꓰꓻ ꓬꓰ_ ꓕꓯ꓾ ꓛꓳ ꓒꓯꓹ ꓐꓴ ꓬꓲ ꓔꓯ ꓡ ꓢꓲ꓾ ꓟꓵꓽ ꓕꓱ ꓟ ꓠꓽ ꓡꓲ ꓛꓲ ꓥ ꓡꓳ꓾ ꓟꓰꓻ_ ꓟꓲ ꓟꓰ ꓬꓰꓳ꓿ ꓡ ꓞꓳ ꓬꓲ ꓜꓴ ꓬꓲ ꓟꓯꓼ ꓠꓬ ꓘꓹ ꓗꓪ ꓓꓵꓽ ꓙꓰ ꓢꓲ ꓬꓲ ꓪ ꓚꓲ ꓛꓬ ꓜꓽ ꓓꓴ ꓪꓴꓻ ꓬꓰ ꓠꓹ ꓟ ꓬꓲ ꓪ ꓔꓯ ꓬꓲꓼ ꓙꓰ ꓝꓲ꓾ ꓐꓯ_ ꓡꓳ꓿ ꓬꓰ-ꓢꓴ ꓠꓽ ꓬꓲ ꓪ ꓔꓯ꓾ ꓬꓲ ꓪ ꓙꓰ ꓟꓽ ꓛꓵ꓾ ꓬꓲ ꓪ ꓔꓯ ꓠꓴ ꓪ ꓖꓶ ꓜꓽ꓾ ꓐꓯ_ ꓡꓳ꓿ ꓬꓲ ꓪ ꓡꓰ ꓬꓲ ꓔꓯ꓾ ꓥꓪ ꓠꓴꓽ ꓕꓱ ꓗꓪ ꓠꓬ ꓤꓴ ꓒꓵꓼ ꓥꓪꓽ ꓑꓬ ꓥꓪꓸ ꓠꓬꓲꓽ ꓟ_ ꓡꓰꓽ ꓙꓳ_ ꓡꓳ꓾ ꓐꓯ_ ꓡꓳ꓿ ꓬꓲ ꓡꓰ꓾ ꓕꓻ ꓥꓪ ꓔꓯ ꓔꓯꓹ ꓖꓶ ꓡꓯ꓾ ꓐꓯ_ ꓡꓳ꓿ ꓬꓲ ꓠꓬ ꓡ ꓞꓳ ꓬꓲ ꓜꓴ ꓬꓲ ꓟꓯꓼ ꓔꓯ ꓟꓳꓼ ꓗꓪ ꓠꓬꓲꓸ ꓠꓸ ꓠꓹ ꓟ ꓐꓯ ꓘꓶ ꓖꓶ ꓢꓲ꓾ ꓤꓴ ꓒꓵꓼ ꓖꓳ ꓥꓪꓽ ꓑꓬ_ ꓐꓰ ꓥꓪꓸ ꓠꓬꓲꓽ ꓟ ꓣꓴ ꓔ ꓢꓲ꓾ ꓟꓴ ꓗꓪ ꓗꓪ ꓔ ꓥ ꓐꓰ ꓡꓳꓸ ꓢꓲ ꓠꓬꓲ ꓶꓼ ꓥꓳꓽ ꓙꓱꓽ ꓗꓷ ꓠꓬ꓾ ꓤꓴ ꓒꓵꓼ ꓦꓶꓹ ꓢꓲ ꓛꓳ ꓒꓯꓹ ꓐꓴ ꓔꓯ ꓖꓶ_ ꓡꓳ꓿ ꓛꓳ ꓒꓯꓹ ꓐꓴ ꓠꓬ ꓡ ꓞꓳ ꓬꓲ ꓜꓴ ꓬꓲ ꓟꓯꓼ ꓔꓯ ꓖꓶ_ ꓡꓳ꓿ ꓖꓳ ꓡꓱ ꓠꓬ ꓬꓲ ꓪ ꓮ ꓙꓵ ꓢꓴ ꓜꓽ ꓢꓲ ꓐꓳ ꓡꓰ_ ꓡꓳ꓿ ꓜꓽ ꓜꓰꓻ ꓡꓰ_ ꓟ ꓬꓲ ꓧꓶꓽ ꓬꓲ ꓟꓲ ꓬꓲ ꓪ ꓒꓻ ꓐꓲ ꓐꓲ ꓞꓲ ꓠꓬꓲꓽ ꓠꓳꓸ ꓘꓴꓽ ꓖꓳ ꓫ ꓟꓶ_ ꓡꓳ꓿ ꓜꓽ ꓢꓴ ꓠꓬ ꓤ ꓟꓶ ꓤ_ ꓐꓰ ꓤ ꓠꓱ ꓤ ꓟꓽ ꓥ ꓠꓬ꓾ ꓞꓳ ꓑ ꓤ ꓥꓪꓽ ꓔꓴ ꓛꓲ ꓙꓳ_ ꓡꓳ꓿