ꓡ-ꓢ-ꓣꓴ ꓔꓯ ꓢꓯꓸ ꓬꓲꓼ ꓡ ꓝꓲ_ ꓟ

Saturday, March 28, 2020

ꓖꓳ ꓕꓯ ꓟ-ꓡꓲ_ ꓐꓰ ꓬꓲ ꓮ ꓝꓲ ꓟ-ꓕ ꓔꓬ_ ꓟ ꓘꓹ꓾ ꓐꓱ-ꓕ-ꓠꓲ ꓢꓴ ꓡ-ꓢ-ꓣꓴ ꓕꓲ ꓣꓳ ꓠꓬ ꓠꓻ ꓔꓬ_ ꓡꓳ꓿ ꓟ-ꓡꓲ ꓠꓬ ꓢꓲꓺ ꓒ ꓔꓯ ꓫꓳ ꓠꓱ ꓞꓶ ꓡꓰ ꓟꓰꓺ ꓖꓶ ꓢꓲ꓾ ꓬꓲ ꓛꓲ ꓒꓯꓹ ꓗꓪ ꓬꓲ ꓪꓴꓸ ꓗꓴ ꓟ ꓡꓰ ꓫꓵꓹ ꓖꓶ_ ꓟ ꓖꓳ ꓕꓲ ꓣꓳ ꓟ ꓥ ꓡꓳ꓿ ꓠꓻ ꓔꓬ_ ꓟ ꓡ-ꓢ-ꓣꓴ ꓠꓬ ꓬꓲ ꓠꓬꓲ ꓤ ꓥ ꓡꓳ꓿ ꓖꓳ ꓡꓱ ꓠꓬꓲ ꓬꓰ-ꓢꓴ ꓔꓬ ꓗꓪ ꓬꓲ ꓮ ꓝꓲ ꓐꓴ ꓡꓰ ꓢꓴ ꓔꓯ ꓝꓲ ꓢꓲ꓾ ꓢꓲꓺ ꓒꓽꓳ꓾ ꓠꓴ ꓠꓲꓹ ꓠꓵ_ ꓟ ꓡ ꓞꓳ ꓠꓻ ꓔꓬ_ ꓡꓳ꓾ ꓐꓯ_ ꓡꓳ꓿ ꓖꓳ ꓡꓱ ꓥ_ ꓟꓲ ꓬꓰ-ꓢꓴ ꓑ ꓙ_ ꓕꓯ꓾ ꓬꓲ ꓡꓰ꓾ ꓠꓻ ꓕꓱ ꓟ ꓠꓬ ꓫꓵꓻ ꓠꓻ ꓟꓽ ꓥ꓿ ꓪꓴ-ꓢ ꓟꓬꓱ ꓓꓳꓽ_ ꓐꓰ ꓪꓴ-ꓢ ꓬꓲ ꓮ ꓐꓲ ꓟꓬꓱ ꓓꓳꓽ ꓓꓳ ꓡ ꓠꓹ ꓟ ꓥ ꓡꓳ꓾ ꓐꓯ_ ꓡꓳ꓿ ꓬꓰ-ꓢꓴ ꓠꓬ ꓟ-ꓕ_ ꓐꓰ ꓬꓲ ꓠꓬꓲꓺ ꓟ_ ꓐꓰ ꓡ-ꓢ-ꓣꓴ ꓔꓯ ꓠꓲꓹ ꓠꓵ_ ꓡꓳ꓿ ꓬꓲ ꓠꓻ ꓔꓬ_ ꓡꓳ꓾ ꓐꓰ ꓬꓰ-ꓢꓴ ꓑ ꓙ ꓗꓷ_ ꓟꓲ꓾ ꓬꓲ ꓔꓬ ꓟ ꓗꓪ ꓠꓬꓲꓽ ꓠꓬꓲ ꓔꓬ_ ꓢꓰꓽ ꓡꓳ꓿ ꓖꓳ ꓗ ꓠꓯ ꓠꓬ ꓬꓲ ꓡꓰ ꓛꓳ ꓒꓯꓹ ꓐꓴ ꓔꓯ꓾ ꓬꓴ-ꓔ ꓟꓵꓽ ꓗꓪ ꓣꓳꓽ ꓝꓮꓲ ꓕꓲ ꓧꓪꓹ ꓙꓰ ꓡꓯ꓾ ꓐꓯ_ ꓡꓳ꓿ ꓛꓳ ꓒꓯꓹ ꓐꓴ ꓡꓰ ꓬꓲ ꓔꓯ꓾ ꓣ-ꓐꓲꓳ꓾ ꓮ ꓟꓶ ꓢꓲ ꓬꓴ-ꓔ ꓡ ꓞꓳ ꓠꓴ ꓔꓯ ꓭꓸ ꓛꓲ ꓡꓰ ꓡꓳꓺ_ ꓐꓰ ꓬꓰ ꓔꓬ ꓢꓲ꓾ ꓠꓴ ꓖꓳ ꓗꓪ ꓝꓮꓲ ꓕꓲ ꓧꓪꓹ ꓙꓰ_ ꓡꓺꓽ꓾ ꓐꓯ_ ꓡꓳ꓿ ꓬꓰ-ꓢꓴ ꓡꓰ ꓒꓳꓹ ꓖꓶ ꓢꓲ꓾ ꓕꓲꓽ ꓠꓬꓲ ꓗꓪ ꓞꓲ ꓠꓬꓲꓽ ꓙꓵꓹ ꓙꓳ_ ꓡꓳ ꓟꓽ ꓥ ꓡꓺꓽ꓿ ꓮ ꓟ ꓥ_ ꓟꓲ ꓟꓳꓼ ꓡꓳ ꓕꓯ ꓙ ꓖꓴ ꓫꓱꓽ_ ꓠꓬ ꓛꓲ ꓟꓽ ꓕꓲꓽ ꓗꓷ꓿ ꓮ ꓡꓲꓳ ꓐꓯ ꓠꓬ ꓟꓲ ꓠꓯ ꓕꓱ ꓟ ꓗꓪ ꓟ ꓠꓬꓲ ꓟꓳ ꓓꓴ ꓡꓰ ꓬꓲ ꓟꓳ_ ꓡꓳ꓿ ꓖꓳ ꓡꓱ ꓥ_ ꓟꓲ ꓢ ꓘꓪ ꓕꓯ ꓮꓽ ꓟ ꓙ ꓖꓴ ꓫꓱꓽ_ ꓠꓬ꓾ ꓛꓲ ꓕꓲꓽ ꓗꓷ_ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓠꓯꓸꓼ ꓗꓪ ꓠꓬꓲ ꓟꓳ ꓓꓴ ꓟꓽ ꓙꓳ꓾ ꓐꓯ_ ꓡꓳ꓿ ꓕꓱ ꓟꓬ ꓙꓰꓽ ꓟ ꓬꓰ-ꓢꓴ ꓐꓯ ꓗꓷ ꓗ ꓠꓯ ꓬꓲ ꓡꓰ ꓬꓲ ꓛꓳ ꓒꓯ ꓐꓴ ꓔꓯ꓾ ꓣꓳꓽ ꓗꓪ ꓛꓳꓽ ꓡ-ꓢ-ꓣꓴ ꓬꓲꓼ ꓟꓶ ꓔꓬ_ ꓡꓳ꓿ ꓥꓪ ꓠꓽ ꓬꓲ ꓔꓯ ꓬꓲꓼ ꓠꓬꓲꓸ ꓖꓶ ꓠꓹ ꓟ ꓙꓰ_ ꓥꓳ꓾ ꓐꓯ_ ꓡꓳ꓿ ꓖꓳ ꓡꓱ ꓠꓬꓲ ꓛꓳ ꓒꓯ ꓐꓴ ꓡꓰ ꓬꓲ ꓔꓯ꓾ ꓢꓲꓺ ꓒꓽꓳ꓾ ꓬꓲ ꓬꓲꓼ ꓟꓶ ꓔꓬ_ ꓕꓯ ꓠꓽ꓾ ꓬꓲ ꓓꓻ ꓡꓰ_ ꓥꓳ꓾ ꓐꓯ_ ꓡꓳ꓿ ꓬꓰ-ꓢꓴ ꓠꓬ ꓬꓲ ꓫꓵꓻ ꓘꓷ ꓡꓰ ꓟ ꓔꓯ ꓐꓯ_ ꓟ ꓥ ꓡꓳ꓿ ꓬꓲ ꓪ ꓠꓽ ꓮ ꓕꓯ ꓟꓴ ꓕꓯ ꓬꓲꓼ ꓟꓶ_ ꓟ ꓔꓯ ꓐꓯ_ ꓡꓳ ꓓꓵꓽ ꓙ_ ꓡꓳ꓿ ꓖꓳ ꓡꓱ ꓠꓬꓲ ꓖꓳ ꓕꓯ ꓬꓰ-ꓢꓴ ꓬꓲ ꓪ ꓔꓯ ꓔꓱꓹ ꓔꓱ_ ꓐꓰ ꓐꓯ ꓖꓶ_ ꓡꓳ꓾ ꓡ-ꓢ-ꓣꓴ ꓠꓽ ꓫꓵꓻꓳ꓿ ꓠꓴ ꓪ ꓙꓵꓻ ꓡ ꓠꓹ ꓟ꓾ ꓥꓪ ꓖꓳ ꓗꓪ ꓟꓽ ꓔꓬꓹ ꓠꓬꓲ꓾ ꓠꓴ ꓪ ꓐꓱ ꓶ ꓥꓪ ꓠꓲꓹ ꓒꓴ_ ꓡꓳ꓿ ꓮ ꓟꓶ ꓣꓳꓽ ꓬꓲ ꓔꓯ ꓙꓰ ꓡꓯ꓾ ꓐꓯ_ ꓡꓳ꓿ ꓖꓳ ꓡꓱ ꓠꓬ ꓤꓽ ꓜꓱ ꓐꓯ_ ꓟ ꓕꓳ-ꓟ ꓡꓰ ꓬꓲ_ ꓐꓰ ꓕꓲ ꓛꓳ_ ꓟ ꓛꓳ ꓒꓯꓹ ꓐꓴ ꓔꓯ꓾ ꓬꓲ_ ꓐꓰ ꓕꓲ ꓛꓳ_ ꓫꓵꓻ ꓠꓹ ꓟ ꓣꓳꓽ_ ꓟꓲ ꓙꓰ ꓡꓯ꓾ ꓐꓯ_ ꓡꓳ꓿ ꓬꓰ-ꓢꓴ ꓛꓲ ꓬꓰ_ ꓕꓯ꓾ ꓡ-ꓢ-ꓣꓴ ꓠꓽ ꓡꓱ ꓜꓴ ꓗꓪ ꓔꓵꓸ ꓗꓷ_ ꓟ ꓡꓲꓸ ꓠꓬꓲ ꓙꓳ_ ꓟ ꓬꓲ ꓢꓷ ꓡꓰ_ ꓡꓳ꓿ ꓐꓱ-ꓕ-ꓠꓲ ꓠꓬ ꓙꓱ-ꓣꓴ-ꓢ-ꓡꓱ ꓒ ꓕꓲꓸꓼ ꓗꓪ ꓥ ꓡꓳ꓿ ꓮꓽ ꓡ ꓡꓳꓺ ꓔ ꓠꓬꓲꓽ ꓕꓷꓹ ꓛꓲ ꓗꓳꓹ_ ꓡꓳ꓿ ꓟ-ꓕ_ ꓐꓰ ꓟ-ꓡꓲ ꓬꓲ ꓪ ꓠꓬꓲ ꓤꓽ ꓫꓵꓻ ꓟ ꓑꓶ ꓓꓴ꓾ ꓬꓴ-ꓔ ꓡ ꓞꓳ ꓮ ꓟꓬꓹ ꓠꓬ ꓬꓲ ꓪ ꓔꓯ ꓠꓲꓹ ꓟ ꓗꓴ ꓖꓶ ꓠꓹ ꓟ ꓡ_ ꓡꓳ꓿ ꓬꓰ-ꓢꓴ ꓡ_ ꓟ ꓔꓯ ꓟ-ꓕ ꓑ ꓙꓽ ꓠꓬ꓾ ꓬꓲ ꓓꓳ ꓙꓰ ꓢꓲ ꓬꓲ ꓔꓯ ꓞꓵ ꓬꓰ_ ꓡꓳ꓿ ꓟ-ꓡꓲ ꓠꓽ ꓦꓲ ꓗꓪ ꓠꓬꓲꓸ ꓠ ꓔꓬ_ ꓢꓰꓽ ꓡꓳ꓿ ꓖꓳ ꓡꓱ ꓢꓲ ꓟ-ꓕ ꓡꓰ ꓬꓰ-ꓢꓴ ꓔꓯ꓾ ꓢꓲꓺ ꓒꓽꓳ꓾ ꓠꓴ ꓕꓻ ꓔꓬ_ ꓕꓯ ꓠꓽ ꓥꓪ ꓠꓬꓲ ꓤ ꓟꓽ ꓫꓵꓻ ꓡꓳ ꓫꓵ ꓥ ꓡꓳ꓿ ꓮ ꓟꓶ ꓥ_ ꓟꓲ ꓪꓴ-ꓢ ꓔꓯ ꓠꓴ ꓮ ꓫꓵ ꓓꓰꓽ_ ꓠꓬ꓾ ꓪꓴ-ꓢ ꓠꓴ ꓔꓯ ꓮ ꓫꓵꓽ ꓖꓶ ꓡ_ ꓟ ꓥꓪ ꓢꓷ_ ꓡꓳ꓾ ꓐꓯ_ ꓡꓳ꓿ ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴ ꓠꓬꓲ ꓤ ꓠꓬ ꓢꓯꓸ ꓬꓲꓼ ꓡ_ ꓢꓰꓽ ꓥꓳ꓾ ꓐꓯ_ ꓡꓳ꓿ ꓟ-ꓕ ꓡꓰ ꓬꓲ ꓔꓯ꓾ ꓡꓳꓹ ꓬꓰ_ ꓟ ꓦꓬꓼ ꓠꓬꓲ ꓢꓯꓸ ꓬꓲꓼ ꓡ_ ꓟ ꓖꓳ ꓕꓲ ꓝꓲꓸ ꓗꓪ ꓬꓲ ꓝꓮꓲ ꓢꓯꓸ ꓬꓲꓼ ꓡ_ ꓟ ꓔꓯ ꓥꓪ ꓢꓷ_ ꓡꓳ꓾ ꓐꓯ_ ꓡꓳ꓿ ꓬꓰ-ꓢꓴ ꓡꓰ ꓬꓲ ꓔꓯ꓾ ꓥꓪ ꓠꓽ ꓢꓯꓸ ꓬꓲꓼ ꓡ_ ꓟ_ ꓐꓰ ꓢꓯꓼ ꓟꓬ ꓥ ꓡꓳ꓿ ꓥꓪ ꓔꓯ ꓙꓵꓻ ꓢꓴ ꓠꓬ ꓫꓵꓻ ꓘꓷ ꓡꓰ_ ꓟꓲ ꓢꓯꓸ ꓬꓲꓼ ꓡ_ ꓥꓳ꓿ ꓢꓯꓸ ꓔꓬ ꓢꓲ ꓥꓪ ꓔꓯ ꓙꓵꓻ ꓢꓴ ꓥ ꓕ ꓑꓳ ꓠꓬ ꓕꓲ ꓞꓲ ꓟꓽ ꓫꓵꓻ꓿ ꓕꓱ ꓟ ꓔꓯ ꓠꓴ ꓙꓵꓻ_ ꓡꓺꓽ꓾ ꓐꓯ_ ꓡꓳ꓿ ꓟ-ꓕ ꓡꓰ ꓬꓲ ꓔꓯ꓾ ꓢꓲꓺ ꓒꓽꓳ꓾ ꓥ ꓡꓳ꓾ ꓠꓴ ꓠꓽ ꓟꓲ ꓠꓯ ꓗꓪ ꓓꓵꓽ ꓡ ꓠꓹ ꓟ꓾ ꓪꓴ-ꓢ ꓬꓲ ꓮ ꓐꓲ ꓙꓲ-ꓢꓴ ꓥ ꓟ ꓥꓪ ꓙꓵꓻ ꓗꓷꓳ꓾ ꓐꓯ_ ꓡꓳ꓿ ꓕꓱ ꓟ ꓐꓯ ꓗꓷ ꓠꓬ꓾ ꓬꓲ ꓬꓲꓼ ꓙꓰ ꓢꓲ꓾ ꓘꓳ ꓫꓱ ꓫꓱ_ ꓐꓰ ꓬꓲ ꓠꓬꓲ ꓟ ꓟ-ꓡꓲ ꓔꓯ ꓘꓴꓻ ꓬꓰ ꓢꓲ꓾ ꓟꓸ ꓒ ꓖꓪꓻ ꓔꓬ ꓢꓲ ꓠꓴ ꓔꓯ ꓘꓴ_ ꓡꓳ꓾ ꓐꓯ_ ꓡꓳ꓿ ꓕꓱ ꓟ ꓔꓯ ꓟ-ꓡꓲ ꓑ ꓙꓽ ꓠꓬ꓾ ꓬꓲ ꓠꓲꓹ ꓞꓻ ꓔꓴ ꓢꓲ ꓬꓰ-ꓢꓴ ꓔꓯ ꓙꓰ_ ꓡꓳ꓿ ꓬꓰ-ꓢꓴ ꓠꓬ ꓘꓹ ꓠꓯꓸꓼ ꓗꓪ ꓟꓽ ꓓꓵꓽ ꓡꓰ ꓢꓰꓽ꓿ ꓟ-ꓕ ꓬꓲ ꓔꓯ ꓞꓵ_ ꓟ ꓕꓲ ꓔꓳꓸ ꓗꓪ ꓔꓬ_ ꓢꓰꓽ ꓡꓳ꓿ ꓖꓳ ꓕꓯ ꓬꓲ_ ꓐꓰ ꓦꓲ ꓗꓪ ꓔꓬ_ ꓟ꓾ ꓬꓲ ꓔꓯ ꓠꓲꓹ ꓟ ꓗꓴ ꓖꓶ ꓢꓴ ꓬꓴ-ꓔ ꓡ ꓞꓳ ꓐꓴ ꓠꓬ꓾ ꓟ-ꓡꓲ ꓠꓲꓹ ꓞꓻ ꓔꓴ ꓢꓲ ꓓꓳ ꓙꓰ_ ꓟ ꓔꓯ ꓬꓲ ꓪ ꓟꓳꓻ ꓗꓷ ꓠꓬ꓾ ꓬꓲ ꓠꓽ ꓡꓱ ꓜꓴ ꓗꓪ ꓥꓴꓻ ꓙꓰ_ ꓡꓳ ꓓꓵꓽ ꓙ ꓠꓬꓲ꓾ ꓬꓲ ꓔꓯ ꓛꓳ ꓙꓰ_ ꓡꓳ꓿ ꓬꓰ-ꓢꓴ ꓔꓬꓹ ꓗꓪ ꓟ-ꓡꓲ ꓛꓲ ꓡ ꓢꓲ꓾ ꓬꓲ ꓔꓯ ꓟꓳ ꓗꓷ ꓠꓬ꓾ ꓬꓲ ꓛꓲ ꓔꓲ ꓗꓪ ꓟꓳꓼ ꓡꓰ ꓢꓲ꓾ ꓢꓲꓺ ꓒꓽꓳ꓾ ꓠꓴ ꓕꓻ ꓔꓬ ꓕꓯ ꓠꓽ ꓥꓪ ꓠꓬꓲ ꓤ ꓟꓽ ꓫꓵꓻ ꓡꓳ ꓫꓵ ꓥ ꓡꓳ꓾ ꓐꓯ_ ꓡꓳ꓿ ꓟ-ꓡꓲ ꓥꓴ_ ꓟ_ ꓐꓰ ꓬꓲ_ ꓐꓰ ꓡ ꓢꓴ ꓬꓴ-ꓔ ꓡ ꓞꓳ ꓥꓴ_ ꓟ ꓔꓯ ꓬꓰ-ꓢꓴ ꓟꓳ ꓗꓷ ꓠꓬ꓾ ꓬꓲ ꓠꓲꓹ ꓟ ꓫꓸ ꓢꓲ ꓠꓲꓹ ꓙꓽ ꓫꓸ ꓠꓬꓲ꓾ ꓠꓴ ꓪ ꓬꓲ ꓔꓯ ꓮ ꓡꓲ ꓗꓪ ꓗꓶ ꓔ_ ꓡꓳꓺꓽ꓾ ꓐꓯ_ ꓡꓳ꓿ ꓬꓲ ꓪ ꓡꓰ꓾ ꓢꓲꓺ ꓒꓽꓳ꓾ ꓡꓳꓸ ꓠꓬꓲ ꓡꓯ꓾ ꓐꓯ_ ꓡꓳ꓿ ꓬꓰ-ꓢꓴ ꓠꓬ ꓟꓬ ꓐꓰ ꓓꓳ_ ꓡꓳ꓿ ꓖꓳ ꓡꓱ ꓠꓬꓲ ꓬꓴ-ꓔ ꓡ ꓞꓳ ꓡꓰ꓾ ꓠꓬꓲ ꓠꓹ꓾ ꓬꓲ ꓬꓲ ꓔꓯ ꓮ ꓘꓶ ꓠꓲꓹ ꓠꓵ_ ꓐꓷ꓾ ꓐꓯ_ ꓡꓳ꓿ ꓖꓳ ꓡꓱ ꓥ_ ꓟꓲ ꓬꓲ ꓪ ꓕꓲ ꓐꓱ ꓠꓬ꓾ ꓟꓬ ꓔꓶ_ ꓟ ꓔꓯ ꓟꓬ ꓢꓶꓽ ꓒꓴ ꓖꓶ ꓢꓴ ꓕꓱ ꓕꓲ ꓣꓳ ꓠꓬ꓾ ꓡ ꓞꓳ ꓕꓱ ꓟ ꓔꓯ_ ꓟꓲ ꓟꓽ ꓫꓵꓻ ꓠꓹ ꓟ ꓬꓲ ꓬꓰ ꓟꓽ ꓗꓴ ꓡꓺꓽ꓾ ꓐꓯ_ ꓡꓳ꓿ ꓖꓳ ꓡꓱ ꓠꓬ ꓬꓰ-ꓢꓴ ꓝꓮꓲ ꓠꓲꓹ ꓟ ꓫꓸ ꓠꓬꓲ ꓐꓰ ꓡꓱ ꓜꓴ ꓗꓪ ꓡ_ ꓡꓳ꓿ ꓡꓱꓽ ꓜꓴ ꓖꓳ ꓟ ꓠꓬ ꓭꓸ ꓘꓴ ꓥ ꓢꓲ꓾ ꓬꓲ ꓘꓶꓽ ꓗꓪ ꓠꓬ ꓭꓸ ꓛꓲ ꓕꓲ ꓒꓬꓸ ꓫꓱꓺ ꓔ_ ꓡꓳ꓿ ꓬꓰ-ꓢꓴ ꓡꓰ꓾ ꓭꓸ ꓛꓲ ꓔꓯ ꓣꓴ ꓩꓴ ꓗꓷ꓾ ꓐꓯ_ ꓡꓳ꓿ ꓫꓵꓻ ꓘꓷ ꓡꓰ ꓢꓴ ꓬꓲ ꓮ ꓝꓲ ꓟ-ꓕ ꓡꓰ꓾ ꓢꓲꓺ ꓒꓽꓳ꓾ ꓮ ꓟꓶ ꓠꓽ ꓬꓲ ꓫꓵꓻ ꓟꓳ ꓛꓱꓽ ꓠꓱ_ ꓥꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓫꓵꓻ ꓟ ꓡꓲꓸ ꓠꓬꓲ ꓙꓳ_ ꓥꓳ꓾ ꓐꓯ_ ꓡꓳ꓿ ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴ ꓙꓵꓻ_ ꓠꓬ ꓪꓴ-ꓢ ꓟꓬꓱ ꓓꓳꓽ ꓔꓯ ꓠꓴ ꓟꓳ_ ꓥꓳ꓾ ꓐꓰ ꓥꓪ ꓠꓴ ꓔꓯ ꓟꓽ ꓐꓯ ꓖꓶ ꓔ ꓡꓺꓽ꓾ ꓐꓯ_ ꓡꓳ꓿ ꓬꓲ ꓪ ꓡꓰ ꓭꓸ ꓛꓲ ꓣꓴ ꓦ ꓗꓷ ꓠꓬ꓾ ꓬꓰ-ꓢꓴ ꓔꓺ ꓥ ꓐꓰ ꓡꓳꓸ ꓠꓬꓲ ꓢꓲ꓾ ꓐꓹ ꓐꓽꓳ꓾ ꓠꓴ ꓥꓪ ꓔꓯ ꓠ ꓠꓹ ꓗꓷ ꓠꓬꓲ꓾ ꓠꓴ ꓔꓯ ꓫ ꓟꓳ꓿ ꓠꓴ ꓮ ꓕꓯ ꓟꓲ ꓥꓪ ꓔꓯ ꓠ ꓠꓹ ꓖꓶ_ ꓟ ꓥꓪ ꓢꓷ_ ꓡꓳ꓿ ꓖꓳ ꓡꓱ ꓥ_ ꓟꓲ ꓚꓳ ꓡꓳ ꓡꓳ ꓗꓪ ꓦꓰꓼ ꓞ_ ꓟ ꓡ ꓞꓳ ꓬꓲ ꓜꓴ ꓪꓴꓸ ꓠꓬꓲ꓾ ꓠꓴ ꓡꓰ ꓥꓪ ꓔꓯ ꓝꓲ ꓩꓴ ꓡ_ ꓟ ꓔꓯ ꓬꓲ ꓪ ꓙꓵꓻ ꓠꓹ ꓟ ꓥꓪ ꓕꓱ ꓡꓱ ꓐꓯ_ ꓡꓳ꓾ ꓐꓯ_ ꓡꓳ꓿ ꓬꓲ ꓖꓳ ꓡꓱ ꓐꓯ ꓗꓷ ꓠꓬ꓾ ꓢꓯꓼ ꓓꓽ ꓟ ꓡꓰ ꓘꓴ ꓢꓲ꓾ ꓡ-ꓢ-ꓣꓴꓳ꓾ ꓓꓳ ꓡꓯ꓾ ꓐꓯ_ ꓡꓳ꓿ ꓫꓵꓻ ꓘꓷ ꓡꓰ ꓢꓴ ꓠꓬ ꓛꓲ ꓒꓯꓹ ꓡꓯ ꓒꓯ ꓗꓪ ꓟꓶ ꓛ ꓧꓷꓹ ꓛꓵꓼ ꓞ ꓢꓲ ꓓꓳ ꓡ_ ꓡꓳ꓿ ꓬꓲ ꓒꓬꓱꓽ ꓟꓬ ꓗꓪ_ ꓟꓲ ꓡꓯ ꓫꓵꓹ ꓛ ꓡꓰ ꓡꓲꓺ ꓔ_ ꓡꓳ꓿ ꓬꓰ-ꓢꓴ ꓡꓰ ꓬꓲ ꓪ ꓔꓯ꓾ ꓫꓱꓽ ꓙꓰ ꓪ ꓠꓹ ꓟ ꓬꓲ ꓔꓯ ꓒꓶꓻ ꓩꓴ ꓗꓷ꓾ ꓐꓯ_ ꓡꓳ꓿ ꓖꓳ ꓡꓱ ꓠꓬꓲ ꓟ-ꓡꓲ ꓔꓯ ꓔꓱꓹ ꓠꓬꓲ ꓡ ꓢꓴ ꓬꓴ-ꓔ ꓡ ꓞꓳ ꓮ ꓟꓬꓹ꓾ ꓬꓰ-ꓢꓴ ꓬꓰ_ ꓟ ꓔꓯ ꓟꓳꓻ ꓗꓷ ꓠꓬ ꓬꓲ ꓔꓯ ꓙꓵꓻ_ ꓡꓳ꓿ ꓬꓳ-ꓦ ꓕꓳꓽ ꓶ 11:1- 45