ꓦꓬꓽ ꓛꓳꓽ ꓧꓪ ꓢꓴ ꓔꓯ ꓙꓳ ꓗꓽ_ ꓟ

ꓠꓬꓲꓸ ꓠꓬꓲ ꓟ ꓢꓲ-ꓫꓬ ꓕꓳ ꓶ ꓝꓲꓼ

ꓶ ꓓꓳ ꓫꓱ. ꓓꓳ ꓟ_ꓕꓲ 5ꓽ27-32

ꓠꓴ ꓪ ꓠꓬ-ꓸ ꓢꓴ ꓤ ꓟꓶ ꓔꓯ ꓕꓽ ꓛꓬ-ꓸ ꓐꓯ_ ꓟ ꓑ ꓙꓽ ꓠꓬꓲꓳ= ꓖꓳ ꓡꓱ ꓥ_ ꓟꓲ ꓠꓴ ꓪ ꓔꓯ ꓥꓪ ꓐꓯ ꓖꓶ_ ꓠꓬꓲ-ꓸ ꓮꓽ ꓟ ꓥ_ ꓟꓲ ꓤ ꓟꓶ ꓤ ꓔꓯ ꓡꓳꓸ ꓔ ꓢꓲ ꓦꓯꓸ ꓠꓲꓹ ꓙꓵꓽ_ ꓠꓬ-ꓸ ꓬꓲ ꓠꓽ ꓠꓲꓹ ꓟ ꓠꓯꓸꓼ ꓗꓪ ꓬꓲ_ ꓐꓰ ꓦꓬꓽ ꓛꓳꓽ ꓧꓪ ꓗꓷ ꓟ ꓥ ꓡꓳ= ꓠꓴ ꓟꓬ ꓙ ꓐꓽ ꓡꓰ ꓠꓴ ꓔꓯ ꓡꓱꓸ ꓗꓷ ꓝꓲ_ ꓠꓬ ꓗꓳꓸ ꓓꓳ ꓡ ꓢꓲ ꓡꓳ ꓩꓴ ꓗꓷ= ꓠꓴ ꓟꓬ ꓢꓶꓽ ꓕꓲꓽ ꓐꓽ ꓒꓲꓼ ꓬꓰ ꓟ ꓠꓬ-ꓸ ꓠꓴ ꓕꓲ ꓖꓳ ꓓꓱ ꓡꓱꓸꓼ ꓛꓬꓼ ꓟꓵꓽ ꓗꓪ ꓙꓰ_ ꓟ ꓕꓯꓽ ꓢꓲ ꓙꓲ_ ꓡꓳ= ꓠꓴ ꓡꓯꓼ ꓙ ꓐꓽ ꓡꓰ ꓠꓴ ꓔꓯ ꓡꓱꓸ ꓗꓷ ꓝꓲ_ ꓠꓬ ꓓꓶ ꓡꓳ ꓗꓷ= ꓠꓴ ꓡꓯ ꓒꓯꓹ ꓕꓲꓽ ꓐꓽ ꓒꓲꓼ ꓬꓰ ꓟ ꓠꓬ-ꓸ ꓕꓲ ꓖꓳ ꓓꓱꓸꓼ ꓛꓬꓼ ꓟꓵꓽ ꓗꓪ ꓙꓰ_ ꓟ ꓕꓯꓽ ꓢꓲ ꓙꓲ_ ꓡꓳ= ꓖꓳ ꓟ_ ꓡꓰ ꓟꓽ ꓞꓲ-ꓸ ꓮꓽ ꓟ ꓥ_ꓟꓲ ꓬꓲ ꓤ ꓟꓶ ꓔꓯ ꓡꓳ ꓗꓷ ꓠꓬ-ꓸ ꓬꓲ ꓡꓰ ꓬꓲ ꓔꓯ ꓤ ꓟꓶ ꓡꓳ ꓗꓷ ꓟ ꓕꓳ ꓶ ꓖꓶ ꓠ ꓗꓹ ꓡꓳ-ꓸ ꓐꓯ_ ꓟ ꓐꓯ ꓘꓶꓽ ꓙꓳ_ ꓡꓳ= ꓖꓳ ꓡꓱ ꓥ_ ꓟꓲ ꓠꓴ ꓪ ꓔꓯ ꓥꓪ ꓐꓯ ꓖꓶ_ ꓠꓬꓲ-ꓸ ꓮꓽ ꓟ ꓥ_ ꓟꓲ ꓟꓽ ꓢꓲ ꓟꓽ ꓫꓬ ꓟ ꓝꓴꓲ ꓪꓴꓸ ꓠꓬꓲ ꓟꓽ ꓥ ꓥ ꓬꓲ ꓤ ꓟꓶ ꓔꓯ ꓡꓳ ꓗꓷ ꓢꓲ-ꓸ ꓬꓲ ꓤ ꓟꓶ ꓠꓬ ꓠꓱꓸ ꓐꓯꓼ ꓤ ꓖꓴ ꓧꓪ ꓙꓰ ꓐꓭ ꓠꓬ ꓬꓲ ꓔꓯ ꓦꓬꓽ ꓛꓳꓽ ꓧꓪ ꓟ ꓗꓷ ꓡꓰ ꓝꓲ_ ꓟ ꓥ ꓡꓳ= ꓤ ꓟꓶ ꓤ ꓖꓳ ꓟ ꓔꓯ ꓫ ꓢꓴ_ ꓟꓲ ꓦꓬꓽ ꓛꓳꓽ ꓧꓪ ꓒꓽ ꓗꓷ ꓡꓰ_ꓥꓳ=

2 ꓘꓳ-ꓡꓱ-ꓕꓴ 4ꓽ7-15

ꓖꓳ ꓡꓱ ꓢꓲ ꓮ ꓙꓵꓽ ꓟ ꓕꓯꓽ ꓢꓲ ꓘꓳꓸꓹ ꓙꓰ ꓟ ꓪ ꓠꓬꓲ_ ꓟ ꓕꓱ ꓟ ꓠꓬ-ꓸ ꓣꓳ ꓚꓲ ꓛꓬ ꓗꓪ ꓐꓰ ꓟꓽ ꓥ ꓥ-ꓸ ꓪꓴ-ꓢ ꓗꓪ ꓐꓰ ꓥ ꓟ ꓟꓳꓸ ꓖꓶ ꓓꓳ ꓡ ꓠꓹ ꓟ ꓒꓵꓽ ꓶ ꓕꓱ ꓟ ꓠꓬ ꓣꓳ ꓠꓱꓸ ꓦꓱꓽ ꓡꓴꓸꓹ ꓗꓪ ꓙꓳ_ ꓡꓳ= ꓥꓪ ꓠꓴꓽ ꓠꓬ ꓮ ꓟꓬꓹ ꓒꓳꓹ ꓗꓪ ꓫꓸꓙꓵ_ ꓟ ꓔꓳꓹ ꓜꓳꓽ ꓥ_ꓟꓲ-ꓸ ꓠꓲꓹ ꓗꓷꓹ ꓟꓬ ꓗꓷꓹ ꓠꓬꓲ ꓟꓽ ꓗꓷ ꓡꓰ= ꓓꓵ ꓙ ꓪꓴꓽ ꓧꓶꓸꓹ_ ꓟꓲ ꓥꓳ ꓡꓳꓸ ꓓꓵ ꓒꓲꓼ ꓬꓰ ꓠ ꓛꓲ ꓟꓽ ꓗꓷ ꓡꓰ= ꓗꓸ ꓧꓪ ꓟꓶ_ ꓟꓲ ꓒꓰ ꓗꓷ ꓟꓶ_ ꓟ ꓟꓽ ꓥ= ꓓꓶꓽ ꓓꓳꓽ ꓡꓰ_ ꓟꓲ ꓟꓽ ꓐꓬ ꓡꓰ= ꓬꓰ-ꓢꓴ ꓢꓯꓸ ꓔꓬ ꓟ ꓥꓪ ꓠꓴꓽ ꓖꓳ ꓓꓱ ꓗꓪ ꓐꓰ ꓟꓳꓸ ꓖꓶ ꓓꓳ ꓡ ꓠꓹ ꓟ-ꓸ ꓢꓲ ꓒꓽ ꓬꓰ-ꓢꓴ ꓫꓵꓸꓹ_ ꓟ_ ꓟꓲ ꓥꓪ ꓠꓴꓽ ꓖꓳ ꓓꓱ ꓗꓪ ꓮ ꓕꓯ_ ꓟꓲ ꓟꓯꓸꓹ ꓞꓹ ꓡꓳ= ꓮ ꓡꓲꓳ ꓐꓯ ꓠꓬ ꓬꓰ-ꓢꓴ ꓢꓯꓸ ꓔꓬ ꓟ ꓠꓬ-ꓸ ꓫꓵꓸꓹ ꓗꓴ_ ꓟ ꓥꓪ ꓠꓴꓽ ꓧꓪꓽ ꓖꓳ ꓓꓱ ꓗꓪ ꓟꓳꓸ ꓖꓶ ꓓꓳ ꓡ ꓠꓹ ꓟ-ꓸ ꓥꓪ ꓠꓴꓽ ꓠꓬ ꓮ ꓕꓯ_ ꓟꓲ ꓬꓰ-ꓢꓴ ꓐꓱ ꓶ ꓫꓵꓸꓹ_ ꓟ ꓙꓲꓸꓹ ꓣꓴꓽ ꓓꓴ ꓙꓳ_ ꓡꓳ= ꓖꓳ ꓟ ꓗꓪ ꓐꓰ ꓥꓪ ꓠꓴꓽ ꓠꓯꓸꓼ ꓗꓪ ꓠꓬꓫꓵꓸꓹ_ ꓟ ꓢꓯꓼ ꓕꓵꓼ ꓔꓬ ꓢꓲ-ꓸ ꓠꓴ ꓪ ꓠꓯꓼ ꓗꓪ ꓠꓽ ꓢꓯꓼ ꓟꓬ ꓢꓯꓼ ꓕꓵꓼ ꓔꓬ ꓡꓳ= ꓖꓳ ꓡꓱ ꓥ_ ꓟꓲ ꓕꓳ ꓶ ꓗꓪ-ꓸ ꓥꓪ ꓙꓵꓸꓹ_ ꓠꓬꓲ ꓥꓪ ꓫ ꓕꓱ ꓗꓷꓳ-ꓸ ꓐꓰ ꓐꓳ ꓔ ꓟ_ ꓡꓰ ꓐꓰ-ꓸ ꓥꓪ ꓠꓴꓽ_ ꓟꓲ ꓖꓳ ꓟ_ ꓡꓰ ꓐꓰ ꓙꓵꓸꓹ ꓢꓲ ꓫꓸ ꓕꓱ_ ꓟ ꓥ ꓡꓳ= ꓮ ꓡꓲꓳ ꓐꓯ ꓠꓬ ꓢꓲ ꓒꓽ ꓬꓰ-ꓢꓴ ꓔꓯ ꓢꓯꓸ ꓬꓲꓼ ꓡ ꓝꓲ ꓢꓴ ꓡꓰ ꓣꓳ ꓔꓯ_ ꓟꓲ ꓬꓰ-ꓢꓴ_ ꓐꓰ ꓕꓲ ꓪ_ ꓢꓯꓸ ꓬꓲꓼ ꓡ ꓝꓲ ꓢꓲ-ꓸ ꓥꓪ ꓠꓴꓽ ꓔꓯ ꓠꓬ ꓠꓴ ꓪ_ ꓐꓰ ꓕꓲ ꓪ_ ꓬꓲ ꓟꓲꓽ ꓙꓬ ꓗꓪ ꓧꓳꓽ ꓙꓰ_ ꓥꓳ-ꓸ ꓐꓰ ꓥꓪ ꓠꓴꓽ ꓢꓷꓸ_ ꓡꓳ= ꓕꓱ ꓟ ꓮ ꓙꓵꓽ ꓠꓬ ꓠꓴ ꓪ ꓙꓲꓸꓹ ꓖꓴ ꓥ ꓢꓲ-ꓸ ꓪꓴ-ꓢ ꓣꓱ ꓛꓰ ꓡꓰ ꓡ ꓞꓳ ꓮꓽ ꓟꓬꓹ ꓔꓯ ꓡꓯꓼ ꓛꓲ ꓬꓰ ꓢꓲ ꓠꓬꓲ-ꓸ ꓪꓴ-ꓢ ꓬꓲ ꓟꓬꓱ ꓓꓳꓽ ꓔꓯ ꓓꓳꓹ ꓟꓴ ꓢꓴ ꓟꓬꓽ ꓡ ꓠꓹꓟ ꓥ ꓡꓳ=