ꓪꓴ-ꓢ ꓗꓴꓷꓼ ꓠꓽ ꓣꓳꓽ ꓗꓳ ꓡꓳ ꓗꓪ ꓓꓹ ꓡꓳ꓾

ꓪꓴ-ꓢ ꓗꓴꓷꓼ ꓠꓶꓽ ꓡ ꓔꓬ ꓟ ꓔꓯ ꓣꓳ ꓠꓬ ꓡꓳꓸ ꓢꓷꓸ ꓡ ꓟꓽ ꓓ= ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓒ-ꓡꓲ-ꓢꓷ ꓐꓴ ꓡꓰ꓾ ꓪꓴ-ꓢ ꓗꓴꓷꓼ ꓮ ꓕꓯꓽ ꓕꓲ ꓝꓲꓸ ꓗꓪ ꓛꓲ ꓡˍ ꓥꓳ ꓪ? ꓐꓰ ꓠ ꓠꓬꓲˍ ꓕꓯ ꓬꓰ-ꓢꓴ ꓡꓰ ꓬꓲ ꓪ ꓔꓯ꓾ ꓪꓴ-ꓢ ꓗꓴꓷꓼ ꓛꓲ ꓡˍ ꓟ ꓠꓬ ꓟꓬ ꓢꓶꓽ ꓡꓰ ꓡꓳꓸ ꓓꓳ ꓡˍ ꓡꓳ ꓫꓵꓽ ꓟꓽ ꓥ= ꓢꓴ ꓡꓰ꓾ ꓠꓬꓲ ꓠꓹ꓾ ꓕꓱ ꓗꓪ ꓥ ꓡꓳ꓾ ꓥ ꓠꓬ ꓖꓳ ꓗꓪ ꓥ ꓡꓳ꓾ ꓐꓰˍ ꓟꓲ ꓟꓽ ꓐꓯ ꓖꓶ ꓡ= ꓮ ꓡꓲꓳ ꓐꓯ ꓠꓬ ꓪꓴ-ꓢ ꓗꓴꓷꓼ ꓠꓽ ꓠꓴ ꓪ ꓗꓳ ꓡꓳ ꓗꓪ ꓓꓹ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ=

ꓢꓲꓽ ꓫꓬ ꓕꓳ ꓶ ꓝꓲꓸ ꓕꓱ ꓟ ꓬꓲ ꓟꓸ ꓟꓲꓽ ꓠꓬ ꓟꓴ ꓗꓪ ꓗꓴꓷꓼ ꓮ ꓡꓰ ꓕꓲ ꓝꓲꓸ ꓗꓪ ꓛꓲ ꓡˍ ꓐꓯ ꓟ ꓔꓯ ꓓꓵꓽ ꓙ ꓟꓬꓽ ꓔꓬꓹ ꓪˍ ꓟ ꓬꓲ ꓙꓵꓹ ꓟꓽ ꓥ꓾ ꓕꓱ ꓟ ꓠꓬ ꓣꓳ ꓠꓯꓸꓼ ꓗꓪ ꓙꓳˍ ꓟ ꓗꓴꓷꓼ ꓚꓱꓹ ꓔꓯ ꓐꓯ ꓟ ꓥ ꓡꓳ= ꓝꓮꓲ ꓪꓴ-ꓢ ꓗꓴꓷꓼ ꓠꓬ ꓣꓳ ꓡꓯꓼ ꓟꓽ ꓑꓰ꓾ ꓡꓳꓸ ꓟꓽ ꓑꓰ ꓟ ꓗꓪ ꓟꓽ ꓓꓹ= ꓶꓽ ꓤ ꓗꓪ ꓟꓽ ꓓꓹ= ꓣꓳ ꓐꓴ ꓐꓱ ꓶ ꓠꓬ ꓬꓰ-ꓢꓴ ꓫꓵꓻˍ ꓟ ꓐꓰ ꓢꓯꓸ ꓬꓲꓼ ꓡˍ ꓟ ꓠꓬ ꓣꓳ ꓡꓯꓼ ꓟꓶ ꓓꓹ ꓟ ꓗꓪ ꓙꓳˍ ꓟ ꓪꓴ-ꓢ ꓬꓲ ꓗꓴꓷꓼ ꓥ ꓡꓳ= ꓖꓳ ꓡꓱ ꓠꓬꓲ ꓪꓴ-ꓢ ꓗꓴꓷꓼ ꓠꓽ ꓠꓴ ꓪ ꓗꓳ ꓡꓳ ꓗꓪ ꓓꓹ ꓡꓳ꓾ ꓐꓰ ꓐꓯ ꓔ ꓟ ꓥ ꓡꓳ= ꓢꓲꓺ ꓒ ꓬꓰ-ꓢꓴ ꓬꓲ ꓟꓸ ꓟꓲꓽ ꓟꓸ ꓖꓶˍ ꓟ ꓐꓰ ꓠꓻ ꓫꓬꓹ ꓖꓶˍ ꓟ꓾ ꓫꓵꓻ ꓢꓴ ꓔꓯ ꓢꓯꓸ ꓬꓲꓼ ꓡ ꓝꓲˍ ꓟ꓾ ꓠꓲꓽ ꓖꓼ ꓓꓳ ꓖꓶꓽˍ ꓟ ꓗꓪ ꓐꓰ ꓟꓴꓽ ꓗꓪ ꓗꓴꓷꓼ ꓗꓪ ꓖꓳ ꓗꓪ ꓓꓹ ꓟ ꓥ ꓡꓳ= ꓧꓶꓸ ꓕꓯ ꓡꓰ ꓣꓳ ꓗꓳ ꓡꓳ ꓗꓪ ꓓꓹ ꓟ ꓥ ꓡꓳ=

ꓢꓲꓺ ꓒ ꓬꓰ-ꓢꓴ ꓠꓬ ꓣꓳ ꓗꓳ ꓡꓳ ꓗꓪ ꓔꓬ ꓡꓳ= ꓫꓱꓸ ꓤ ꓠꓲꓹ ꓙꓳˍ ꓕ ꓑꓳꓸ ꓬꓲ ꓗꓴꓷꓼ ꓠꓬ ꓖꓳ ꓗꓪ ꓓꓹ ꓡꓳ= ꓣꓱꓽ ꓛꓰꓽ ꓗꓪ ꓐꓰ ꓟꓬꓱꓽ ꓬꓰˍ ꓕ ꓑꓳꓸ ꓖꓳ ꓗꓪ ꓬꓲ ꓗꓴꓷꓼ ꓓꓹ ꓡꓳ= ꓪꓴ-ꓢ ꓠꓬ ꓵꓻ ꓖꓴ ꓟꓽ ꓓ ꓟ ꓚꓱꓹ ꓗꓪ ꓐꓰ ꓣꓳ ꓗꓳ ꓡꓳ ꓗꓪ ꓮ ꓕꓯ ꓟꓲ ꓔꓬ ꓡꓳ= ꓣꓳ ꓐꓴ ꓠꓬ ꓪꓴ-ꓢ ꓔꓬ ꓟ ꓔꓯ ꓟꓳꓻ ꓐ ꓡ ꓠꓹ ꓟ ꓮ ꓕꓯ ꓟꓲ ꓢꓯꓼ ꓕꓵꓼ ꓠ ꓗꓹ ꓡꓳ=

ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓣꓳ ꓓꓵꓽ ꓙ ꓠꓬꓲ ꓠ ꓔ ꓟ ꓠꓬ ꓪꓴ-ꓢ ꓗꓴꓷꓼ ꓠꓬ ꓣꓳ ꓠꓯꓸꓼ ꓗꓪ ꓙꓳˍ ꓟ ꓔꓯ ꓟꓳꓻ ꓗꓷꓳ? ꓣꓳ ꓤꓶꓻ ꓙꓵꓽ ꓠꓹ ꓟ ꓢꓲ ꓒ ꓬꓰ-ꓢꓴ ꓔꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓓꓰꓽ ꓔꓬ ꓡ? ꓢꓲꓺ ꓒ ꓬꓰ-ꓢꓴ ꓔꓯ ꓣꓳ ꓢꓲꓺ ꓒ ꓕꓲ ꓣꓳˍ ꓡꓰ ꓐꓰ ꓢꓷꓸ ꓙ ꓟꓳ ꓙ ꓔ ꓡ? ꓐꓯ ꓟ ꓔꓯ ꓣꓳ ꓓꓵꓽ ꓙ ꓠꓬꓲ ꓡꓯ= ꓣꓳ ꓠꓬ ꓬꓲ ꓔꓯ ꓟ ꓽ ꓠꓽ ꓠꓽ ꓧꓪ ꓠ ꓔ ꓡꓳ= ꓕꓱ ꓡꓱ ꓬꓰˍ ꓠꓬ ꓣꓳ ꓠꓲꓹ ꓟ ꓠꓬ ꓢꓲꓺ ꓡꓲꓺ ꓗꓹ ꓛꓲꓽ ꓡ ꓢꓲ ꓪꓴ-ꓢ ꓗꓴꓷꓼ ꓠꓬ ꓣꓳ ꓠꓯꓸꓼ ꓗꓪ ꓒꓬꓱꓼ ꓡˍ ꓟ ꓥ ꓡꓳ= “ꓮ ꓡꓲꓳ ꓐꓯ ꓠꓬ ꓪꓴ-ꓢ ꓗꓴꓷꓼ ꓠꓽ ꓠꓴ ꓪ ꓗꓳ ꓡꓳ ꓗꓪ ꓓꓹ ꓡꓳ=”