ꓪꓴ-ꓢ ꓠꓬ ꓣꓳ ꓤꓶꓸꓹ ꓗꓪ ꓒꓳꓹ ꓡꓲꓼ ꓠꓹ ꓟ ꓐꓱ ꓶ ꓘꓴ_ ꓟ

         ꓪꓴ-ꓢ ꓠꓬ ꓣꓳ ꓤꓶꓸꓹ ꓗꓪ ꓒꓳꓹ ꓡꓲꓼ ꓠꓹ ꓟ ꓐꓱ ꓶ ꓘꓴ_ ꓟ ꓥꓳ= ꓣꓳ ꓠꓲꓹ ꓟ ꓔꓯ ꓪꓴ-ꓢ ꓡꓰ ꓣꓳ ꓐꓰ ꓚꓳ ꓒꓯꓹ ꓐꓴ ꓔꓯ ꓠꓵ ꓠꓲꓹ ꓙꓳ ꓠꓹ ꓟ ꓙꓲ-ꓢꓴ ꓢꓲ ꓤ ꓐꓴ ꓔꓯ ꓐꓯ ꓟ ꓥꓳ= ꓟ-ꓘꓳ ꓽ14-20 ꓬꓰ-ꓢꓴ ꓡꓰ ꓬꓳ-ꓦ ꓔꓯ ꓐꓱ ꓗꓷ ꓗ ꓠꓯꓸ ꓪꓴ-ꓢ ꓶꓼ ꓓꓳ ꓫꓱꓹ ꓓꓳ ꓚ ꓟꓸ ꓖꓶ_ ꓟ ꓥꓳ= ꓢꓲ-ꓒ ꓬꓰ-ꓢꓴ ꓡꓰ ꓟꓸ ꓖꓶ_ ꓟ ꓔꓯ ꓠꓬꓲꓽ ꓚꓱꓹ ꓗꓪ ꓐꓰ ꓟꓳ ꓪ ꓥꓳ= ꓕꓱ ꓕꓲꓽ ꓙꓵꓹ ꓠꓬ ꓐꓲ ꓞꓲꓼ ꓟ ꓦꓬꓼ ꓠꓬꓲꓽ ꓥ ꓡꓳ= ꓦꓬꓼ ꓠꓬꓲꓽ ꓐꓲ ꓡꓸꓸꓳ-ꓸ ꓪꓴ-ꓢ ꓗꓴꓷꓼ ꓠꓶꓽ ꓡꓸꓹꓳ-ꓸ ꓠꓴ ꓪ ꓠꓲꓹ ꓟ ꓡꓶꓸ ꓢꓲ ꓪꓴ-ꓢ ꓶꓼ ꓓꓳ ꓫꓱꓹ ꓓ ꓔꓯ ꓙꓵꓸꓹ-ꓸ ꓐꓯ_ ꓡꓳ= ꓕꓱ ꓗꓪ ꓐꓰ ꓔꓲ-ꓒ ꓪ ꓔꓲ ꓑꓳꓑꓰ ꓝꓣꓮꓠꓚꓲꓢ ꓡꓰ "ꓬꓲ ꓙꓵꓹ ꓐꓰ ꓒꓳꓹ ꓡꓲꓼ ꓟ" ꓚꓱꓹ ꓔꓯ ꓚ ꓟ ꓥꓳ= ꓦꓬꓼ ꓠꓬꓲꓽ ꓠꓶꓽ ꓡꓳ ꓐꓯ ꓟ ꓠꓬ ꓚꓬꓴ ꓙ ꓟ ꓟꓬꓱꓽ ꓚꓵ ꓡ_ ꓟ ꓐꓰ ꓕꓱ ꓕꓲꓽ ꓙꓵꓹ ꓠꓬ ꓪꓴ-ꓢ ꓬꓲ ꓤ ꓤ ꓔꓲꓸ ꓔꓯ ꓟꓲ ꓠꓯ ꓗꓪ ꓝꓲ ꓶꓴ_ ꓟ ꓑꓶꓸ ꓓꓴ ꓟꓴꓽ ꓗꓪ ꓗꓴꓷꓼ ꓠꓬ ꓟꓬ ꓠꓬꓲ ꓠꓶꓽ ꓡ_ ꓟ ꓚꓱꓹ ꓥꓳ ꓐꓰ ꓚ ꓟ ꓥꓳ= ꓚꓬꓴ ꓙ ꓟ ꓠꓬ ꓠꓵ ꓠꓲꓹ ꓗꓪ ꓐꓰ ꓡꓯꓼ ꓫꓴꓸꓸ ꓕꓲꓽ ꓟ ꓥ ꓡꓳ= ꓖꓳ ꓡꓯꓼ ꓫꓴꓸꓹ ꓠꓬ ꓬꓲꓸ ꓒꓵꓽ ꓟꓽ ꓙꓳ ꓖꓶ_ ꓟ ꓑꓶꓸ ꓓꓴ ꓕꓱ ꓡ ꓠꓹ ꓟ ꓘꓴ_ ꓟ ꓒꓳꓹ ꓡꓲꓼ ꓠꓹ ꓟ ꓐꓱ ꓶ ꓘꓴ_ ꓟ ꓥꓳ ꓐꓰ ꓐꓯ ꓟ ꓥꓳ= ꓪꓴ-ꓢ ꓠꓵ ꓠꓲꓹ ꓡꓯꓼ ꓫꓴꓸꓹ ꓥ ꓟꓲ ꓬꓲ ꓔꓯ ꓮ ꓟꓬ ꓠꓲꓹ ꓠꓵ ꓟ ꓔ ꓟꓸ ꓖꓶ ꓠ ꓔ ꓟ ꓬꓲ ꓙꓵꓹ ꓥ ꓟꓲ ꓥ ꓡꓳ= ꓖꓳ ꓟ ꓑꓶꓸ ꓓꓴ ꓣ ꓤꓶꓸꓹ ꓣꓳ ꓔꓬ ꓟ ꓠꓬ ꓪꓴ-ꓢ ꓐꓰ ꓣꓳ ꓚꓳ ꓒꓯꓹ ꓐꓴ ꓔꓯ ꓠꓵ ꓠꓲꓹ ꓟꓸ ꓖꓶ ꓠ ꓔ ꓟ ꓬꓲ ꓙꓵꓹ ꓥꓳ ꓐꓰ ꓐꓯ_ ꓡꓳ=

        ꓣꓳ ꓤꓶꓸꓹ ꓠꓬ ꓠꓬꓲꓽ ꓚꓱꓹ ꓔꓯ ꓚꓳ_ ꓟ ꓥꓳ= ꓕꓲꓽ ꓚꓱꓹ ꓠꓬ ꓬꓲ ꓙꓵꓹ ꓦꓬꓼ ꓠꓬꓲꓽ-ꓸ ꓬꓲ ꓘꓳꓼ ꓐꓰ ꓣꓳ ꓔꓯ ꓙꓵ_ ꓟ ꓥ ꓢꓲ-ꓸ ꓝꓮꓲ ꓕꓲꓽ ꓚꓱꓹ ꓠꓬ ꓣꓳ ꓪꓴ ꓟꓴ ꓡ_ ꓟ ꓙꓵꓹ ꓥ ꓟ ꓫꓳ_ꓟ ꓙꓵꓹ-ꓸ ꓤ ꓠꓱ ꓤ ꓤꓶꓸꓹ-ꓸ ꓞꓳ ꓡꓵ ꓤꓶꓸꓹ-ꓸ ꓞꓳ ꓟꓳ ꓤꓶꓸꓹ-ꓸ ꓐꓰ ꓫꓵ_ ꓟ ꓤꓶꓸꓹ ꓕꓱ ꓡꓱ ꓫꓵꓽ ꓗꓪ ꓐꓰ ꓫꓬꓹ ꓔꓱ ꓔ ꓟ ꓥꓳ= ꓙꓵ ꓠꓲꓹ ꓠꓬ ꓣꓳ ꓤꓶꓸꓹ ꓗꓪ ꓔꓱ_ ꓟ ꓦ ꓕꓲꓽ ꓒꓳꓹ ꓗꓪ ꓧꓪ ꓟꓶꓸꓹ ꓠꓹ ꓟ ꓬꓰ ꓙ ꓟ ꓥꓳ= ꓬꓰ-ꓢꓴ ꓘꓴ_ ꓟ ꓔꓯ ꓮ ꓙꓵꓽ ꓢꓴ ꓠ ꓠꓹ ꓠ ꓔ ꓡꓳ= ꓪꓴ-ꓢ ꓘꓴ_ ꓟ ꓔꓯ ꓐꓯ ꓙ ꓟꓶꓸꓹ ꓠꓹ ꓟ ꓟꓹ ꓟ ꓟ-ꓡꓲ ꓥ ꓟꓲ ꓣꓳ ꓔꓯ ꓬꓰ ꓙ ꓟ ꓥꓳ= ꓟꓲ ꓠꓯ ꓞꓳ ꓤ ꓠꓲꓹ ꓟ ꓗꓪ ꓐꓰ ꓕꓲꓽ ꓞꓸ ꓠꓵ ꓠꓲꓹ ꓐꓰ ꓒꓵꓽ ꓚꓳ ꓟ ꓗꓪ ꓣꓳ ꓔꓯ ꓒꓳꓹ ꓡꓲꓼ ꓠꓹ ꓟ ꓬꓰ ꓙ ꓝꓲ ꓐꓰ ꓐꓯ ꓢꓲ-ꓸ ꓶꓼ ꓓꓳ ꓫꓱꓹ ꓓꓳ ꓔꓯ ꓬꓲꓸ ꓟꓶꓽ ꓢꓲꓼ ꓗꓷ_ ꓟ ꓥꓳ=