ꓪꓽ ꓤ ꓧꓪ_ ꓟ ꓔꓯ ꓥꓳꓽ

ꓟ-ꓕꓲ ꓕꓳꓽ ꓶ 20: 1-16

 ꓮ ꓡꓲꓳ ꓐꓯ ꓠꓬ ꓟꓴ ꓗꓪ ꓗꓴꓷ ꓠꓽ ꓦꓲꓻ ꓢꓲ ꓒ ꓕꓲ ꓣꓳ_ ꓡꓰ ꓐꓰ ꓗ_ ꓡꓳ꓿ ꓬꓲ ꓠꓬ ꓬꓲ ꓛꓱꓼ ꓡꓱꓼ ꓐꓱ ꓗꓪ ꓟꓬꓱꓽ ꓬꓰ ꓝꓲ_ ꓐꓰ ꓪꓽ ꓧꓪ ꓧꓳꓽ ꓠꓹ ꓟ꓾ ꓠꓯꓼ ꓠꓯꓼ ꓓꓳ ꓙꓰ_ ꓡꓳ꓿ ꓬꓲ ꓠꓬ ꓪꓽ ꓤ ꓐꓴ ꓔꓯ ꓕꓲ ꓠꓬꓲ ꓕꓲ ꓞꓰꓻ꓾ ꓐꓰ ꓐꓯ ꓧꓳꓹ ꓡꓰ ꓠꓬ꓾ ꓬꓲ ꓪ ꓔꓯ ꓛꓱꓼ ꓡꓱ ꓐꓱ ꓗꓪ ꓝꓲ ꓩꓴ ꓙꓰ_ ꓡꓳ꓿ ꓮꓽ ꓡ ꓗꓴ ꓙꓵꓹ ꓗꓪ ꓝꓮꓲ ꓓꓳ ꓙꓰ ꓢꓲ꓾ ꓙꓵꓺ ꓗꓪ ꓠꓱꓸ ꓐꓯ ꓢꓴ ꓮꓽ ꓔꓳ ꓦꓰꓼ ꓔꓬ_ ꓟ ꓔꓯ ꓬꓲ ꓟꓳ_ ꓡꓳ꓿ ꓬꓲ ꓬꓲ ꓪ ꓔꓯ꓾ ꓠꓴ ꓪ_ ꓟꓲ ꓛꓱꓼ ꓡꓱ ꓐꓱ ꓗꓪ ꓙꓰ꓾ ꓥꓪ ꓠꓴ ꓪ ꓔꓯ ꓮ ꓡꓲ ꓖꓶ ꓜꓳꓽ_ ꓠꓬ ꓮ ꓡꓲ ꓖꓶ_ ꓥꓳ꓾ ꓐꓯ_ ꓡꓳ꓿ ꓖꓳ ꓡꓱ ꓠꓬ ꓬꓲ ꓪ_ ꓟꓲ ꓓꓵꓽ ꓙꓰ_ ꓡꓳ꓿ ꓮꓽ ꓡ ꓞꓲ ꓠꓬꓲꓽ ꓙꓵꓹ ꓗꓪ ꓐꓰ ꓢ ꓙꓵꓹ ꓗꓪ_ ꓟꓲ ꓬꓲ ꓝꓮꓲ ꓓꓳ ꓙꓰ ꓢꓲ꓾ ꓖꓳ ꓡꓱ ꓬꓰ_ ꓢꓰꓽ ꓡꓳ꓿ ꓮꓽ ꓡ ꓥꓪꓽ ꓙꓵꓹ ꓗꓪ ꓬꓲ ꓓꓳ ꓙꓰ ꓠꓬ꓾ ꓠꓱꓸ ꓐꓯ ꓢꓴ ꓦꓰꓼ ꓔꓬ_ ꓟ ꓔꓯ ꓟꓳ_ ꓡꓳ꓿ ꓬꓲ ꓠꓬ ꓬꓲ ꓪ ꓔꓯ꓾ ꓠꓴ ꓪ ꓮ ꓫꓵ ꓪꓴ ꓠꓬꓲ ꓕꓲ ꓠꓬꓲ ꓡꓱꓸꓼ ꓕꓱ ꓗꓪ ꓮꓽ ꓔꓳ ꓦꓰꓼ ꓔꓬ_ ꓡꓳꓺꓽ꓾ ꓐꓯ_ ꓡꓳ꓿ ꓬꓲ ꓪ ꓡꓰ꓾ ꓥꓪ ꓠꓴꓽ ꓔꓯ ꓪꓽ ꓧꓪ ꓢꓴ ꓟꓽ ꓙꓳ ꓠꓬꓲ ꓥ ꓡꓳ꓾ ꓐꓯ_ ꓡꓳ꓿ ꓖꓳ ꓡꓱ ꓠꓬ ꓬꓲ ꓡꓰ꓾ ꓠꓴ ꓪ_ ꓟꓲ ꓛꓱꓼ ꓡꓱ ꓐꓱ ꓗꓪ ꓙꓰ꓾ ꓐꓯ ꓖꓶ_ ꓡꓳ꓿ ꓟꓶ ꓘꓶ ꓛꓲ ꓡ ꓠꓬ꓾ ꓐꓱ ꓢꓲꓺ ꓒ ꓡꓰ ꓬꓲ ꓦꓲ ꓙꓵꓽ ꓢꓴ ꓔꓯ ꓕꓱ ꓡꓱ ꓐꓯ_ ꓡꓳ꓾ ꓪꓽ ꓤ ꓐꓴ ꓔꓯ ꓘꓴꓻ ꓔꓯꓹ ꓡ ꓢꓲ꓾ ꓗ ꓠꓯꓸ ꓡ ꓢꓴ ꓗꓪ ꓐꓰ ꓧꓶꓸ ꓕꓯ ꓡ ꓢꓴ ꓗꓪ ꓛꓲ꓾ ꓬꓲ ꓪ ꓔꓯ ꓪꓽ ꓒꓵꓽ ꓖꓶ꓾ ꓐꓯ_ ꓡꓳ꓿ ꓮꓽ ꓡ ꓥꓪꓽ ꓙꓵꓹ ꓗꓪ ꓧꓪ ꓔ_ ꓟ ꓛꓲ ꓡ ꓠꓬ꓾ ꓬꓲ ꓪ ꓮ ꓡꓲ ꓕꓲ ꓣꓳ_ ꓟꓲ ꓒꓴ ꓕꓲ ꓞꓰꓻ ꓟꓶ_ ꓡꓳ꓿ ꓧꓶꓸ ꓕꓯ ꓟꓺ ꓡ ꓗꓷ ꓠꓬ꓾ ꓬꓲ ꓪ ꓠꓽ ꓟꓬꓽ ꓠꓬꓲ ꓟꓶ_ ꓥꓳ꓾ ꓐꓰ ꓓꓵ ꓙ_ ꓡꓳ꓿ ꓖꓳ ꓡꓱ ꓥ_ ꓟꓲ ꓬꓲ ꓪ ꓮ ꓡꓲ ꓕꓲ ꓣꓳ_ ꓟꓲ ꓒꓴ ꓕꓲ ꓞꓰꓻ_ ꓡꓰꓽ ꓟꓶ_ ꓡꓳ꓿ ꓬꓲ ꓪ ꓟꓶ ꓡꓰ ꓠꓬ꓾ ꓐꓱ ꓢꓲꓺ ꓒ ꓔꓯ ꓐꓯ ꓡꓯ ꓘꓳ ꓢꓲ꓾ ꓥꓪ ꓠꓴꓽ ꓠꓬ ꓕꓲ ꓠꓬꓲ ꓡꓱꓸꓼ ꓪꓴꓽ ꓧꓶ ꓢꓲ ꓞꓻ ꓜꓲꓽ_ ꓡꓳ꓿ ꓗ ꓠꓯ ꓡ ꓢꓴ ꓠꓽ ꓕꓲ ꓙꓵꓹ ꓤ_ ꓡꓰꓽ ꓬꓰ_ ꓡꓳ꓿ ꓠꓴ ꓠꓬ ꓬꓲ ꓪ ꓔꓯ ꓥꓪ ꓠꓴꓽ_ ꓐꓰ ꓕꓲ ꓡꓰꓹꓼ ꓗꓷ ꓡꓰ ꓝꓲ_ ꓡꓳ꓾ ꓐꓯ_ ꓡꓳ꓿ ꓬꓲ ꓠꓽ ꓬꓲ ꓪ ꓗꓳ ꓡꓳ ꓗꓪ ꓟ ꓕꓲ ꓣꓳ ꓔꓯ ꓒꓳꓹ ꓖꓶ ꓢꓲ ꓕꓱ ꓡꓱ ꓐꓯ_ ꓡꓳ꓾ ꓗꓪ ꓛꓳꓽꓳ꓾ ꓥꓪ ꓠꓴ ꓔꓯ ꓟꓽ ꓛꓬꓻ ꓡꓰ꓿ ꓠꓴ_ ꓐꓰ ꓥꓪ ꓐꓯ ꓞꓷꓹ ꓔ_ ꓟ ꓠꓬ ꓒꓴꓻ ꓕꓲ ꓞꓰ ꓟꓽ ꓥ ꓡꓺꓽ꓿ ꓠꓴ ꓔꓯ ꓟ ꓔꓯꓹ ꓔ ꓢꓲ ꓙꓰ꓿ ꓥꓪ ꓠꓬ ꓗꓸ ꓠꓯ ꓡ ꓢꓴ_ ꓐꓰ ꓠꓴ ꓔꓯ ꓕꓲ ꓡꓰꓹꓼ ꓖꓶ ꓠꓲꓹ ꓫꓵ_ ꓡꓳ꓿ ꓥꓪ ꓖꓴꓽ ꓙꓴ ꓠꓬ ꓥꓪ ꓚꓲ ꓛꓬ ꓠꓵ_ ꓟ_ ꓡꓰ ꓐꓰ ꓣꓱꓽ ꓟꓽ ꓓ ꓡꓺꓽ꓿ ꓥ ꓠꓬ ꓥꓪ ꓞꓳ ꓙꓲꓻ ꓬꓰ_ ꓟ ꓗꓪ ꓐꓰ ꓠꓴ ꓟꓬ ꓢꓶ ꓠꓲꓺ ꓡꓰ_ ꓡꓺꓽ꓾ ꓐꓯ_ ꓡꓳ꓿ ꓖꓳ ꓡꓱ ꓠꓬꓲ ꓗꓸ ꓠꓯ ꓢꓲ ꓢꓴ ꓠꓽ ꓧꓶꓸ ꓕꓯ ꓗꓷ ꓡꓰ_ ꓥꓳ꓿ ꓧꓶꓸ ꓕꓯ ꓢꓴ ꓠꓬ ꓗꓸ ꓠꓯ ꓗꓷ ꓡꓰ_ ꓥꓳ꓿ ꓹꓮ ꓡꓲꓳ ꓐꓯ ꓠꓬ ꓘꓴꓻ ꓔ_ ꓟ ꓡ ꓞꓳ ꓠꓽ ꓟꓬꓽ_ ꓡꓳ꓾ ꓢꓲꓺ ꓔ_ ꓟ ꓡ ꓞꓳ ꓠꓽ ꓠꓲꓸ_ ꓡꓳ]꓾ ꓐꓰ ꓐꓯ ꓖꓶ_ ꓡꓳ꓿