ꓫꓱꓸ ꓤ ꓕꓯ ꓪꓽ ꓘꓴ- ꓕꓯ ꓜꓽ ꓓꓴ ꓚꓲꓸ_ ꓕꓯ ꓟꓬꓱ ꓓꓳꓽ ꓕꓽ ꓧꓪ ꓠꓯꓹ ꓟ

ꓠꓬꓲꓸ ꓠꓬꓲ ꓟ ꓢꓲ-ꓫꓬ ꓕꓳ ꓝꓲꓼ

 ꓶ ꓓꓳ ꓫꓱꓸ ꓓꓳ ꓟ-ꓕꓲ ꓕꓳꓽ ꓶ 6ꓽ1-6ꓹ16-18

ꓠꓴ ꓪ ꓙꓲ ꓫꓬ_ ꓟ ꓟꓬꓱꓽ ꓬꓰ_ ꓕꓯ꓾ ꓤ ꓟꓳ꓾ ꓞꓳ ꓤ ꓟꓲꓽ ꓙꓬ ꓗꓪ ꓢꓴ ꓔꓯ ꓟꓳꓻ ꓝꓲ ꓠꓹ ꓟ ꓕꓽ ꓬꓰ꓿ ꓟꓽ ꓥ ꓠꓬ ꓟꓴ ꓗꓪ ꓗꓪ ꓔꓬ ꓟ ꓠꓴ ꓪ ꓐꓹ ꓐ ꓬꓲ ꓡꓯ ꓫꓴ ꓠꓴ ꓪ ꓟꓽ ꓟꓶ꓿ ꓖꓳ ꓡꓱ ꓠꓬꓲ ꓠꓴ ꓫꓱꓸ ꓤ ꓓꓴ ꓬꓰ_ ꓕꓯ꓾ ꓠꓲꓹ ꓟ ꓠꓬꓲꓽ ꓔꓱꓹ ꓣꓱꓽ ꓢꓴ_ ꓡꓰ ꓐꓰ꓾ ꓞꓳ ꓤ ꓟꓲꓽ ꓙꓬ ꓗꓪ ꓟꓬꓱ ꓓꓳꓽ ꓟꓶ ꓠꓹ ꓟ꓾ ꓜꓲꓼ ꓦꓲ_ ꓐꓰ ꓙꓵꓺ ꓗꓪ ꓬꓰ_ ꓟ_ ꓡꓰ ꓐꓰ꓾ ꓠꓴ ꓒꓬꓱꓽ ꓕꓯ ꓗꓪ ꓐꓽ ꓡ ꓕꓽ ꓟꓵ꓿ ꓥꓪ ꓠꓴ ꓪ ꓔꓯ ꓔꓱꓹ ꓔꓱ_ ꓐꓰ ꓐꓯ ꓖꓶ_ ꓠꓬꓲ꓾ ꓬꓲ ꓪ ꓡꓯꓼ ꓫꓴ ꓬꓲ ꓪ ꓟꓶ ꓗꓷꓳ꓿ ꓠꓴ ꓠꓽ ꓫꓱꓸ ꓤ ꓓꓴ ꓬꓰ_ ꓕꓯ ꓘꓳ ꓫꓱ ꓫꓱ_ ꓗꓪ ꓬꓰ ꓪ ꓠꓹ ꓟ꓾ ꓠꓴ ꓡꓯꓼ ꓙ ꓕꓲ ꓐꓽ ꓬꓰ_ ꓟ ꓠꓬ ꓡꓯ ꓶꓸ ꓕꓲ ꓐꓽ ꓔꓯ ꓕꓽ ꓢꓷ ꓡꓰ ꓝꓲ꓿ ꓖꓳ ꓡꓱ ꓠꓬ ꓘꓳ ꓫꓱ ꓫꓱ_ ꓗꓪ ꓡꓳꓸ ꓟꓳ_ ꓟ ꓠꓴ ꓐꓹ ꓐ ꓠꓽ ꓠꓴ ꓔꓯ ꓡꓯ ꓫꓴ ꓖꓶ ꓡ_ ꓥꓳ꓿ ꓠꓴ ꓪ ꓪꓽ ꓘꓴ_ ꓕꓯ꓾ ꓠꓲꓹ ꓟ ꓠꓬꓲꓽ ꓔꓱꓹ ꓣꓱꓽ ꓢꓴ ꓔꓯ ꓢꓳꓺ ꓟꓽ ꓓ꓿ ꓮ ꓡꓲꓳ ꓐꓯ ꓠꓬ ꓬꓲ ꓪ ꓠꓽ ꓞꓳ ꓤ ꓔꓯ ꓟꓳꓻ ꓝꓲ ꓠ ꓟ꓾ ꓜꓲꓼ ꓦꓲ ꓠꓯꓸꓼ_ ꓐꓰ ꓙꓻ ꓫꓬꓸ ꓗꓪ ꓦꓰꓼ ꓞ ꓢꓲ ꓪ ꓘꓴ ꓠꓲꓹ ꓫꓵ_ ꓡꓳ꓿ ꓥꓪ ꓠꓴ ꓪ ꓔꓯ ꓔꓱꓹ ꓔꓱ_ ꓐꓰ ꓐꓯ ꓖꓶ_ ꓠꓬꓲ꓾ ꓬꓲ ꓪ ꓡꓯꓼ ꓫꓴ ꓬꓲ ꓪ ꓟꓶ ꓗꓷꓳ꓿ ꓠꓴ ꓠꓽ ꓪ ꓘꓴ_ ꓕꓯ ꓘꓷꓹ ꓖꓳ ꓠꓯꓸꓼ ꓗꓪ ꓓꓵꓽ ꓡꓰ ꓢꓲ꓾ ꓗ ꓘꓶ ꓚꓵꓸ ꓗꓷ ꓢꓲ ꓠꓬꓲ꓾ ꓘꓳ ꓫꓱ ꓫꓱ_ ꓗꓪ ꓠꓴ_ ꓐꓰ ꓔꓬ_ ꓟ ꓠꓴ ꓐꓹ ꓐ ꓔꓯ ꓪ ꓘꓴ꓿ ꓖꓳ ꓡꓱ ꓠꓬ ꓘꓳ ꓫꓱ ꓫꓱ_ ꓗꓪ ꓠꓴ ꓔꓯ ꓡꓳꓸ ꓟꓳ_ ꓟ ꓠꓴ ꓐꓹ ꓐ ꓡꓰ ꓠꓴ ꓔꓯ ꓡꓯꓼ ꓫꓴ ꓖꓶ ꓡ_ ꓥꓳ꓿ ꓠꓴ ꓪ ꓠꓬ ꓜꓽ ꓓꓴ ꓟꓽ ꓜꓽ ꓬꓰ_ ꓕꓯ꓾ ꓠꓲꓹ ꓟ ꓠꓬꓲꓽ ꓔꓱꓹ ꓣꓱꓽ ꓢꓴ_ ꓡꓰ ꓐꓰ ꓠꓲꓹ ꓟ ꓫꓸ ꓒꓬꓱꓽ ꓕꓽ ꓶꓻ ꓝꓲ꓿ ꓮ ꓡꓲꓳ ꓐꓯ ꓠꓬ ꓬꓲ ꓪ ꓠꓽ ꓜ ꓓꓴ ꓟꓽ ꓜꓽ ꓬꓰ_ ꓕꓯ꓾ ꓞꓳ ꓤ ꓔꓯ ꓡꓳꓸ ꓓꓳ ꓡ ꓝꓲ_ ꓐꓰ ꓬꓲ ꓪ ꓒꓬꓱꓽ ꓟꓬ ꓡꓳꓸ ꓫꓸ ꓫꓸ ꓟꓴ ꓗꓷ ꓡꓰ ꓝꓲ_ ꓡꓳ꓿ ꓥꓪ ꓠꓴ ꓪ ꓔꓯ ꓔꓱꓹ ꓔꓱ_ ꓐꓰ ꓐꓯ ꓖꓶ_ ꓠꓬꓲ꓾ ꓬꓲ ꓪ ꓡꓯꓼ ꓫꓴ ꓬꓲ ꓪ ꓟꓶ ꓗꓷꓳ꓿ ꓠꓴ ꓪ ꓠꓽ ꓜ ꓓꓴ ꓟꓽ ꓜꓽ ꓬꓰ_ ꓕꓯ ꓞꓳ ꓤ ꓟꓽ ꓡꓳꓸ ꓓꓳ ꓡ ꓠꓹ ꓟ꓾ ꓘꓳ ꓫꓱ ꓫꓱ_ ꓗꓪ ꓔꓬ_ ꓟ ꓠꓴ ꓪ ꓐꓹ ꓐ ꓔꓯ_ ꓡꓰꓽ ꓡꓳꓸ ꓓꓳ ꓡ ꓝꓲ ꓠꓹ ꓟ꓾ ꓜ ꓓꓴ ꓟꓽ ꓜꓽ ꓬꓰ_ ꓕꓯ꓾ ꓪꓴꓸ ꓓꓵ ꓗꓪ ꓟꓰ ꓞꓶꓻ ꓟꓰ ꓢꓲ꓾ ꓒꓬꓱꓽ ꓟꓬ ꓞꓲꓽ꓿ ꓖꓳ ꓡꓱ ꓠꓬ ꓘꓳ ꓫꓱ ꓫꓱ_ ꓗꓪ ꓡꓳꓸ ꓔꓬ_ ꓟ ꓠꓴ ꓪ ꓐꓹ ꓐ ꓠꓽ ꓠꓴ ꓪ ꓔꓯ ꓡꓯꓼ ꓫꓴ ꓖꓶ ꓡ_ ꓥꓳ꓿

2 ꓘꓳ-ꓡꓱ-ꓕꓴ 9ꓽ6-11

ꓖꓳ ꓡꓱ ꓥ_ ꓟꓲ ꓠꓲꓸ ꓠꓬꓲ ꓤ ꓫꓵꓸ ꓢꓴ ꓠꓬ꓾ ꓠꓲꓸ ꓠꓬꓲ ꓤ ꓫꓺ ꓟꓶ_ ꓢꓰꓽ ꓥꓳ꓿ ꓟꓬꓽ ꓠꓬꓲ ꓫꓵꓸ ꓢꓴ ꓠꓬ꓾ ꓟꓬꓽ ꓠꓬꓲ ꓫꓺ ꓟꓶ_ ꓥꓳ꓿ ꓮꓽ ꓟ ꓠꓲꓹ ꓟ ꓗꓪ ꓚꓴꓽ ꓬꓲꓹ ꓮ ꓡꓲ ꓓꓶꓽ_ ꓠꓬ ꓮ ꓡꓲ ꓖꓶ ꓠꓯ_ ꓡꓳ꓿ ꓠꓲꓹ ꓟ ꓫꓸ ꓫꓸꓼ ꓐꓰ ꓕꓽ ꓬꓰ꓿ ꓟꓽ ꓓ ꓟꓽ ꓞꓽ ꓟꓲ ꓕꓽ ꓬꓰ꓿ ꓮ ꓡꓲꓳ ꓐꓯ ꓠꓬ ꓪꓴ-ꓢ ꓠꓽ ꓗꓹ ꓛꓲ ꓛꓲ_ ꓐꓰ ꓖꓶ ꓡ ꓢꓴ ꓔꓯ ꓠꓲꓹ ꓠꓵ_ ꓡꓳ꓿ ꓠꓴ ꓪ ꓠꓬ ꓮ ꓙꓵ ꓟ ꓗꓪ꓾ ꓮ ꓕꓯ ꓟꓲ꓾ ꓮ ꓡꓲ ꓗꓪ_ ꓟꓲ ꓡꓳꓼ ꓡꓰ ꓢꓲ꓾ ꓙꓲ_ ꓟ ꓟꓬꓱꓽ ꓥ ꓕ ꓑꓳ ꓗꓪ ꓐꓲꓺ ꓡꓶꓽ ꓡꓰ ꓠꓹ ꓟ꓾ ꓪꓴ-ꓢ ꓠꓬ ꓣꓱ ꓛꓰ ꓥ ꓕ ꓑꓳꓸ ꓠꓴ ꓪ ꓔꓯ ꓐꓲꓺ ꓡꓶꓽ ꓡꓰ ꓝꓲ ꓐ ꓡ_ ꓡꓳ꓿ꓕꓱ ꓟ ꓠꓬ ꓕꓳ ꓶ ꓗꓪ꓾ ꓬꓲ ꓠꓬ ꓧꓶꓺ ꓩꓴ ꓗꓷ ꓢꓲ꓾ ꓞꓳ ꓫꓸ ꓔꓯ ꓖꓶ ꓗꓷꓳ꓿ ꓬꓲ ꓙꓲ ꓫꓬ_ ꓟ ꓠꓬ ꓕꓲ ꓞꓲꓼ ꓕꓲ ꓑ ꓓꓹ_ ꓥꓳ꓾ ꓐꓰ ꓐꓳ ꓔ_ ꓟ_ ꓡꓰ ꓐꓰ ꓥ ꓡꓳ꓿ ꓜꓻ ꓫꓵꓸ ꓫꓵꓸ ꓢꓴ ꓔꓯ ꓜ ꓫꓵꓸ ꓡꓳ ꓫꓵꓸ ꓖꓶ ꓢꓲ꓾ ꓜꓽ ꓢꓴ ꓔꓯ ꓜꓽ ꓓꓴ_ ꓟꓲ ꓖꓶ ꓜꓽ ꓢꓴ ꓠꓬ꓾ ꓠꓴ ꓪ ꓫꓵꓸ ꓠꓹ ꓟ ꓜ ꓫꓵꓸ ꓖꓶ ꓡ ꓢꓲ ꓟꓬꓽ ꓡ ꓝꓲ_ ꓥꓳ꓿ ꓝꓮꓲ ꓠꓬ ꓠꓴ ꓪ ꓙꓲ ꓫꓬ_ ꓟ ꓢꓶꓹ ꓢꓶꓽ ꓟꓬꓽ ꓡ ꓝꓲ ꓢꓲ꓾ꓠꓴ ꓪ ꓮ ꓫꓵꓽ ꓗꓪ_ ꓟꓲ ꓐꓳ ꓡ ꓢꓲ꓾ ꓓꓰꓽ ꓖꓶ ꓠꓲꓹ ꓒꓴ_ ꓟ ꓠꓲꓹ ꓟ ꓐꓲꓺ ꓡꓰ ꓠꓬꓲ꓾ ꓥꓪ ꓠꓴꓽ ꓗꓪ ꓐꓰ ꓪꓴ-ꓢ ꓔꓯ ꓫ ꓟꓳ ꓓꓴ ꓬꓰ ꓓꓳ ꓡ_ ꓥꓳ꓿