ꓬꓰ-ꓢꓴ ꓐꓱ ꓶ ꓢꓷꓸ ꓙ ꓟꓳ ꓙ ꓓꓴ ꓬꓲ ꓫꓵꓽ ꓬꓲ ꓙꓰꓽ

ꓬꓰ-ꓢꓴ ꓐꓱ ꓶ ꓢꓷꓸ ꓙ ꓟꓳ ꓙ ꓓꓴ ꓬꓲ ꓫꓵꓽ ꓬꓲ ꓙꓰꓽ
ꓬꓳ-ꓦ ꓕꓳꓽ ꓶ 5: 31-47
ꓥꓪ ꓚꓲ ꓛꓬ ꓐꓱ ꓶ ꓢꓷ ꓙ ꓟꓳ ꓙ_ ꓕꓯ ꓠꓽ꓾ ꓥꓪ ꓢꓷ ꓙ ꓟꓳ ꓙ_ ꓟ ꓠꓬ ꓟꓽ ꓔꓱꓹ= ꓥꓪ ꓐꓱ ꓶ ꓢꓷ ꓙ ꓟꓳ ꓙ ꓢꓴ ꓠꓬ ꓬꓲ ꓔꓱ ꓬꓲ ꓕꓲ ꓣꓳ ꓥ ꓡꓳ꓿ ꓖꓳ ꓡꓱ ꓢꓲ ꓬꓲ ꓥꓪ ꓐꓱ ꓶ ꓢꓷ ꓙ ꓟꓳ ꓙ_ ꓟ ꓢꓷ ꓙ ꓟꓳ ꓙ ꓓꓴ ꓠꓬ ꓔꓱꓹ_ ꓟ ꓥ ꓡꓳ꓾ ꓐꓰ ꓥꓪ ꓢꓷ_ ꓡꓳ꓿ ꓠꓴ ꓪ ꓠꓬ ꓬꓳ-ꓦ ꓔꓬ ꓗꓪ ꓝꓲ ꓓꓴ ꓝꓲ ꓩꓴ ꓗꓷ_ ꓡꓳ꓿ ꓬꓲ ꓠꓬ ꓔꓱꓹ_ ꓟ ꓐꓱ ꓶ ꓢꓷ ꓙ ꓟꓳ ꓙ ꓗꓷꓳ꓿ ꓖꓳ ꓡꓱ ꓥ_ ꓟꓲ ꓥꓪ ꓘꓳ ꓣꓴ_ ꓟ ꓢꓷ ꓙ ꓟꓳ ꓙ ꓓꓴ ꓠꓽ ꓞꓳ ꓤ ꓔꓯ ꓐꓰ ꓡ_ ꓟ ꓟꓽ ꓥ꓿ ꓥꓪ ꓕꓱ ꓡꓱ ꓐꓯ_ ꓟ ꓠꓽ ꓠꓴ ꓪ ꓢꓯꓼ ꓟꓬ ꓟꓶ ꓠꓹ ꓟ ꓥ ꓡꓳ꓿ ꓬꓳ-ꓦ ꓠꓽ ꓐꓬꓻ ꓢꓲ ꓣꓳꓺ ꓔꓬ_ ꓟ ꓟꓬ ꓡꓴ ꓥ ꓡꓳ꓿ ꓠꓴ ꓪ ꓠꓬ ꓬꓲ ꓠꓬꓲ ꓟꓳ ꓓꓴ ꓗꓪ ꓕꓲ ꓝꓲꓸ ꓤ ꓗꓹ ꓛꓲ ꓠꓲꓹ ꓫꓵ_ ꓡꓳ꓿ ꓖꓳ ꓡꓱ ꓥ_ ꓟꓲ ꓥꓪ ꓟꓶ_ ꓟ ꓢꓷ ꓙ ꓟꓳ ꓙ ꓓꓴ ꓠꓬ꓾ ꓬꓳ-ꓦ ꓔꓯ ꓐꓰ ꓟꓶ_ ꓟ ꓕꓯ ꓢꓲ ꓪꓴꓽ_ ꓡꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓔꓯ ꓬꓰ ꓐꓲꓺ ꓡꓰ ꓝꓲ ꓠꓹ ꓟ꓾ ꓐꓹ ꓐ ꓡꓰ ꓥꓪ ꓔꓯ ꓖꓶ ꓔ_ ꓟ ꓟꓬꓱꓽ꓾ ꓥꓪ ꓬꓰ ꓔꓬ_ ꓟ ꓟꓬꓱꓽ ꓕꓱ ꓟ ꓠꓬ꓾ ꓐꓹ ꓐ ꓡꓰ ꓥꓪ ꓔꓯ ꓝꓲ ꓩꓴ ꓡꓰ_ ꓡꓳ꓾ ꓐꓰ ꓥꓪ ꓐꓱ ꓶ ꓢꓷ ꓙ ꓟꓳ ꓙ_ ꓡꓳ꓿ ꓥꓪ ꓔꓯ ꓝꓲ ꓩꓴ ꓡꓰ ꓢꓴ ꓐꓹ ꓐ_ ꓟꓲ ꓥꓪ ꓐꓱ ꓶ ꓢꓷ ꓙ ꓟꓳ ꓙ_ ꓡꓳ꓿ ꓬꓲ ꓢꓯꓼ ꓠꓴ ꓪ ꓮ ꓕꓯ ꓟꓲ ꓟꓽ ꓑ ꓙ ꓠꓬꓲ꓾ ꓬꓲ ꓒꓬꓱꓽ_ ꓟꓲ ꓟꓽ ꓟꓳꓻ ꓠꓬꓲ꓿ ꓬꓲ ꓡꓰ ꓝꓲ ꓩꓴ ꓡꓰ ꓢꓴ ꓔꓯ ꓠꓴ ꓪ ꓟꓽ ꓙꓵꓻ ꓠꓬꓲ꓾ ꓬꓲ ꓐꓯ ꓘꓶ ꓠꓴ ꓪ ꓠꓯꓸꓼ ꓗꓪ ꓟꓽ ꓓꓯꓹ꓿ ꓠꓴ ꓪ ꓠꓬ ꓢꓲ ꓫꓬ ꓕꓳ ꓶ ꓗꓪ ꓧꓪ ꓠꓬꓲ ꓟꓰꓹ ꓠꓬꓲ ꓬꓰ_ ꓡꓳ꓿ ꓮ ꓡꓲꓳ ꓐꓯ ꓠꓬ ꓖꓳ ꓗꓪ ꓕꓲ ꓞꓲ ꓕꓲ ꓑ ꓟ ꓢꓯꓼ ꓟꓬ ꓙꓳ_ ꓡꓳ꓾ ꓐꓰ ꓠꓴ ꓪ ꓓꓵꓽ ꓙ_ ꓡꓳ꓿ ꓕꓳ ꓶ ꓕꓱ ꓟ ꓠꓬ ꓥꓪ ꓐꓱ ꓶ ꓢꓷ ꓙ ꓟꓳ ꓙ_ ꓟ ꓥ ꓡꓳ꓿ ꓕꓲ ꓞꓲ ꓕꓲ ꓑ ꓟ ꓢꓯꓼ ꓟꓬ ꓠꓴ ꓪ ꓟꓶ ꓠꓹ ꓟ꓾ ꓠꓴ ꓪꓽ ꓥꓪ ꓔꓯ ꓟꓽ ꓡ꓿ ꓥꓪ ꓠꓽ ꓞꓳ ꓤ ꓔꓯ ꓐꓰ ꓟꓬꓱ ꓓꓳꓽ ꓟꓽ ꓘꓳ ꓣꓴ꓿ ꓖꓳ ꓡꓱ ꓥ_ ꓟꓲ ꓪꓴ-ꓢ ꓠꓵ ꓠꓲꓹ ꓠꓬ ꓠꓴ ꓪ ꓠꓯꓸꓼ ꓗꓪ ꓟꓽ ꓓꓯꓹ꓾ ꓐꓰ ꓥꓪ ꓢꓷ_ ꓡꓳ꓿ ꓥꓪ ꓠꓬ ꓥꓪ ꓐꓹ ꓐ ꓟꓬꓱꓺ ꓗꓪ ꓐꓰ ꓡ_ ꓟ ꓥ_ ꓟꓲ꓾ ꓠꓴ ꓪ ꓥꓪ ꓔꓯ ꓟꓽ ꓘꓳ ꓣꓴ꓿ ꓠꓱ ꓐꓯꓼ ꓢꓴ ꓕꓲ ꓣꓳ ꓬꓲ ꓚꓲ ꓛꓬ ꓟꓬꓱꓺ ꓗꓪ ꓐꓰ ꓡ_ ꓐꓭ ꓠꓬ꓾ ꓠꓴ ꓪ ꓬꓲ ꓔꓯ ꓘꓳ ꓣꓴ_ ꓥꓳ꓿ ꓕꓲ ꓔꓲꓸ_ ꓡꓰꓽ ꓟ ꓪꓴ-ꓢ ꓔꓯ ꓐꓰ ꓡ_ ꓟ ꓟꓬꓱ ꓓꓳꓽ ꓔꓯ ꓠꓴ ꓪ ꓟꓽ ꓧꓪ ꓢꓲ꓾ ꓠꓴ ꓪ ꓕꓲ ꓣꓳ ꓛꓳ ꓕꓲ ꓣꓳ ꓟꓬꓱ ꓓꓳꓽ ꓘꓳ ꓣꓴ ꓡꓯ ꓘꓳ_ ꓟ ꓠꓬ ꓮ ꓡꓲ ꓐꓰ ꓙꓵꓻ ꓐ ꓡ ꓢꓰꓽ꓿ ꓥꓪ ꓠꓬ ꓐꓹ ꓐ ꓟꓲꓽ ꓙꓬ ꓗꓪ ꓠꓴ ꓪ ꓔꓯ ꓗꓳꓹ ꓬꓰ_ ꓥꓳ꓾ ꓐꓰ ꓕꓽ ꓓꓵꓽ ꓙ꓿ ꓠꓴ ꓪ ꓔꓯ ꓗꓳꓹ ꓢꓴ ꓕꓲ ꓣꓳ ꓙꓳ_ ꓡꓳ꓿ ꓖꓳ ꓟ ꓠꓬ ꓠꓴ ꓪ ꓥꓳ ꓡꓳꓸ ꓔ_ ꓟ ꓟꓳ-ꓫꓲ ꓥ ꓡꓳ꓿ ꓟꓳ-ꓫꓲ ꓔꓯ ꓠꓴ ꓪ ꓙꓵꓻ_ ꓕꓯ ꓠꓽ꓾ ꓥꓪ ꓔꓯ_ ꓟꓲ ꓠꓴ ꓪ ꓙꓵꓻ_ ꓡꓳ ꓫꓵ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓐꓳ_ ꓟ ꓠꓬ ꓥꓪ ꓔꓯ ꓖꓴ ꓔ_ ꓟ ꓥ ꓡꓳ꓿ ꓖꓳ ꓡꓱ ꓥ_ ꓟꓲ ꓬꓲ ꓐꓳ ꓔ_ ꓟ ꓔꓯ ꓠꓴ ꓪ ꓟꓽ ꓙꓵꓻ ꓠꓬ꓾ ꓥꓪ ꓐꓯ ꓘꓶ ꓔꓯ ꓠꓴ ꓪ ꓮ ꓡꓲ ꓙꓵꓻ ꓢꓰꓽ꓾ ꓐꓯ_ ꓡꓳ꓿

Add new comment

5 + 1 =