ꓬꓰ-ꓢꓴ ꓡꓰ ꓖꓶˍ ꓟ ꓢꓲꓺ ꓡꓲꓺ ꓟ

ꓠꓬꓲꓸ ꓠꓬꓲ ꓥꓪꓽ ꓦ ꓡꓲꓸ ꓠꓬꓲ ꓗꓪ ꓟ ꓶ ꓓꓳꓽ ꓫꓱ ꓓꓳ ꓕꓳꓽ ꓶ ꓗꓪ ꓢꓲꓺ ꓒ ꓬꓰ-ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ꓾ ꓬꓲ ꓠꓬ ꓙꓰˍ ꓥꓳ= ꓖꓳ ꓡꓱ ꓠꓬꓲ ꓥꓪ ꓠꓴ ꓪ ꓔꓯ ꓢꓲꓺ ꓡꓲꓺ ꓟ ꓖꓶ ꓔ ꓬꓰˍ ꓥꓳ= ꓥꓪ ꓖꓶˍ ꓟ ꓢꓲꓺ ꓡꓲꓺ ꓟ ꓠꓬ ꓟꓲ ꓠꓯ ꓡꓰ ꓖꓶˍ ꓟ ꓢꓲꓺ ꓡꓲꓺ ꓟ ꓔꓯ ꓟꓽ ꓫꓱꓸ꓾ ꓐꓰ ꓐꓯ ꓔ ꓡꓳ= ꓖꓳ ꓡꓱ ꓠꓬꓲ ꓣꓳ ꓓꓵꓽ ꓙ ꓠꓬꓲ ꓡꓯ=

ꓮꓽ ꓐ ꓮ ꓟ ꓣꓱꓽ ꓢꓴ ꓐꓴ ꓚꓲ ꓛꓬ ꓤ ꓠꓱ ꓤ ꓐꓴ ꓔꓯ ꓙꓲˍ ꓟ ꓡꓰꓽ꓾ ꓧˍ ꓟ ꓡꓰꓽ ꓡꓯ ꓪ ꓖꓶ ꓠꓲꓹ ꓫꓵˍ ꓡꓳ= ꓬꓲ ꓪ ꓟꓲ ꓠꓯ ꓗꓪ ꓐꓰ ꓡꓳꓹ ꓬꓰˍ ꓕꓯ ꓙꓲˍ ꓟ ꓡꓰꓽ ꓧˍ ꓟ ꓡꓰꓽ ꓤꓰ ꓓꓰˍ ꓢꓲ꓾ ꓟꓬꓱ ꓓꓳꓽ ꓥˍ ꓟꓲ꓾ ꓝꓮꓲ ꓬꓲ ꓪ ꓙꓵꓽ ꓪ ꓥˍ ꓟꓲ ꓬꓲ ꓪ ꓤ ꓫꓵꓸ ꓤ ꓠꓱ ꓐꓴ ꓔꓯ ꓙꓲˍ ꓟ ꓡꓰꓼ ꓖꓶˍ ꓡꓳ= ꓠꓬꓲꓹ ꓠꓬꓲ ꓢꓲꓺ ꓒ ꓬꓰ-ꓢꓴ ꓠꓬ ꓟꓴꓽ ꓗꓪ ꓗꓪ ꓟꓽ ꓓꓯ ꓙꓰ ꓢꓰꓽ ꓕꓯ ꓬꓲ ꓝꓲ ꓓꓴ ꓞꓲ ꓠꓬꓲꓽ ꓣꓳ ꓔꓯ꓾ ꓥꓪ ꓢꓲꓺ ꓡꓲꓺ ꓟ ꓠꓴ ꓪ ꓔꓯ ꓖꓶ ꓔ ꓬꓰˍ ꓥꓳ= ꓥꓪ ꓖꓶˍ ꓟ ꓢꓲꓺ ꓡꓲ ꓟ ꓠꓬ ꓟꓲ ꓠꓯ ꓡꓰ ꓖꓶˍ ꓟ ꓢꓲꓺ ꓡꓲꓺ ꓟ ꓔꓯ ꓟꓽ ꓫꓱꓸ=

ꓠꓬꓲꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓗꓹꓸ ꓠꓯ ꓢꓲꓺ ꓛꓳ ꓢꓴ ꓠꓲꓹ ꓟ ꓠꓬ ꓮ ꓕꓯˍ ꓟꓲ ꓢꓲꓺ ꓡꓲꓺ ꓓ ꓠꓹ ꓟ ꓬꓳꓸ ꓚꓵˍ ꓡꓳ= ꓮ ꓡꓲꓳ ꓐꓯˍ ꓠꓬ ꓢꓲꓺ ꓒ ꓬꓰ-ꓢꓴ ꓖꓶˍ ꓟ ꓢꓲꓺ ꓡꓲꓺ ꓟ ꓠꓬ ꓟꓲ ꓠꓯ ꓖꓶˍ ꓟ ꓔꓯ ꓟꓽ ꓫꓱꓸ ꓠꓬꓲ ꓮ ꓡꓲ ꓗꓪˍ ꓟꓲ꓾ ꓮ ꓡꓰ ꓫꓵꓽ ꓦꓬꓼ ꓠꓬꓲ ꓔꓳꓹ ꓜꓳꓽˍ ꓟꓲ ꓠꓲꓹ ꓟ ꓠꓬ ꓠꓲꓹ ꓪꓴꓽ ꓪꓴꓽ ꓡꓰꓽ ꓓꓹ ꓢꓲ꓾ ꓪꓴ-ꓢ ꓔꓯ ꓫꓱꓸ ꓖꓶ ꓓꓳ ꓟꓴ ꓠꓹ ꓟ ꓬꓲ ꓡꓰ ꓢꓯꓼ ꓪ ꓖꓶꓽˍ ꓡꓳ=

ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓣꓳ ꓔꓯ ꓐꓯ ꓖꓶ ꓔꓬ ꓟ ꓠꓬ ꓬꓰ-ꓢꓴ ꓠꓬ ꓬꓲ ꓡꓰ ꓖꓶ ꓔ ꓬꓰˍ ꓟ ꓢꓲꓺ ꓡꓲꓺ ꓟ ꓔꓯ ꓠꓬꓲꓸ ꓠꓬꓲ ꓣꓳ ꓘꓳꓹ ꓣꓴ ꓗꓷ ꓥꓳ ꓪ?= ꓣꓳ ꓠꓲꓹ ꓟ ꓠꓯꓸꓼ ꓗꓪ ꓓꓵꓽ ꓙ ꓟꓬꓽ ꓓꓵꓽ ꓙ ꓫꓸ ꓐꓰ꓾ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓮ ꓕꓯˍ ꓟꓲ ꓓꓵꓽ ꓙ ꓫꓸ ꓔꓬ꓾ ꓮ ꓕꓯˍ ꓟꓲ ꓙꓳꓺ ꓛꓱꓽ ꓔꓬ꓾ ꓮ ꓕꓯˍ ꓟꓲ ꓕꓲ ꓙꓰꓽ ꓙꓰꓽ ꓒꓬꓱꓼ ꓡˍ ꓥ ꓢꓰꓼ? ꓐꓰ ꓓꓵꓽ ꓙ ꓢꓲ ꓠꓲꓹ ꓫ ꓟꓬ ꓫ ꓔꓬ ꓕꓯ ꓠꓽ ꓠꓲꓹ ꓟ ꓠꓯꓸꓼ ꓗꓪ ꓪꓴ-ꓢ ꓖꓶˍ ꓟ ꓢꓲꓺ ꓡꓲꓺ ꓟ ꓐꓯˍ ꓟ ꓟꓽ ꓙꓳ=  ꓪꓴ-ꓢ ꓔꓯ ꓡꓰꓼ ꓙꓵˍ ꓟ ꓙꓵꓻ ꓠꓲꓹ ꓠꓬ ꓮ ꓘꓶꓸ ꓣꓳ ꓓꓹ ꓢꓰꓽ ꓐꓰ ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓣꓳ ꓔꓯ ꓐꓯ ꓟꓸ ꓖꓶ ꓔꓬ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓓꓹ ꓟ ꓠꓲꓹ ꓫ ꓟꓬ ꓫ ꓓꓴ꓾ ꓝꓮꓲ ꓔꓳꓹ ꓜꓳꓽ ꓔꓬ ꓟ ꓫ ꓙꓵꓻ ꓟꓷ ꓙꓵꓻ ꓓꓴ ꓮ ꓙꓵꓽ ꓔꓯ ꓢꓲꓺ ꓒ ꓡꓯꓽ ꓒꓯꓹ ꓗꓪ ꓗꓶ ꓔ ꓢꓲ ꓛꓳ ꓫꓱꓽ ꓙꓰ ꓡꓯ= ꓤ ꓠꓱ ꓤ ꓕꓲ ꓣꓳ ꓬꓲ ꓟꓹ ꓟ ꓒ ꓕꓲꓺ ꓗꓪ ꓔꓬ ꓕꓯ ꓠꓽ ꓗꓹ ꓛꓲꓽ ꓛꓲꓽ ꓡꓰꓽ ꓐꓰ ꓔꓬ ꓪ ꓢꓲ꓾ ꓠꓲꓹ ꓪꓴꓽ ꓪꓴꓽ ꓡꓰꓽ ꓔꓬ ꓟ ꓕꓲ ꓡꓰꓹꓼ ꓣꓳ ꓥˍ ꓟꓲ ꓢꓲꓺ ꓒ ꓟꓲꓽ ꓙꓬ ꓗꓪ ꓔꓬ ꓥꓳ ꓐꓯˍ ꓟ ꓓꓵꓽ ꓙ ꓠꓬꓲ ꓢꓲ꓾ ꓣꓳ ꓒ ꓕꓲꓺ ꓗꓪ ꓢꓲꓺ ꓒ ꓪꓴ-ꓢ ꓔꓬ ꓡꓳ꓾ ꓣꓳ ꓒ ꓕꓲꓺ ꓗꓪ ꓢꓲꓺ ꓒ ꓬꓰ-ꓢꓴ ꓔꓬ ꓡꓳ ꓐꓯ ꓟ ꓔꓯ ꓓꓵꓽ ꓙ ꓠꓬꓲˍ ꓕꓯ ꓠꓽ ꓣꓳ ꓠꓲꓹ ꓟ ꓠꓽ ꓠꓲꓹ ꓪꓴꓽ ꓪꓴꓽ ꓡꓰꓼ ꓗꓷ ꓡꓰ ꓢꓲ꓾ ꓮ ꓕꓯˍ ꓟꓲ ꓣꓳ ꓬꓰˍ ꓟ ꓟꓬꓱꓽ ꓔꓯ ꓜꓳꓽ ꓜꓳꓽ ꓡꓰꓽ ꓬꓰ ꓐ ꓡˍ ꓥꓳ=

ꓖꓳ ꓡꓱ ꓠꓬꓲ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓛꓳ ꓫꓱꓽ ꓬꓰˍ ꓕꓯ ꓪꓴ-ꓢ ꓔꓯ ꓡꓰꓽ ꓦ ꓡꓱ ꓢꓲ ꓪꓴ-ꓢ ꓡꓰ ꓖꓶ ꓔ ꓬꓰˍ ꓟ ꓢꓲꓺ ꓡꓲ ꓟ ꓔꓯ ꓘꓳꓹ ꓣꓴ ꓠꓹ ꓟ ꓢꓯꓼ ꓕꓵꓼ ꓙꓰ ꓡꓯ ꓐꓰ꓾ ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓣꓳ ꓔꓯ ꓐꓯ ꓟꓸ ꓖꓶ ꓡ ꓔꓬ ꓡꓳ=

Add new comment

10 + 4 =