ꓬꓰ-ꓢꓴ ꓢꓲ ꓫꓬ ꓖꓴ ꓡꓰ ꓟ ꓠꓲꓹ ꓟ ꓑꓮꓲ (ꓧꓳꓟꓲꓡꓬ)

ꓬꓰ-ꓢꓴ ꓢꓲꓺ ꓫꓬꓹ ꓟ ꓠꓲꓹ ꓟ ꓑꓮꓲ ꓦꓬꓼ ꓠꓬꓲ

ꓧꓳꓽ-ꓫꓲ-ꓬ ꓕꓳꓽ ꓶ 11: 1, 3-4, 8-9

ꓬꓲ-ꓢꓷ-ꓡꓰ ꓠꓬ ꓤ ꓠꓱ ꓤ ꓥ ꓢꓰꓽ ꓕꓯ꓾ ꓥꓪ ꓬꓲ ꓔꓯ ꓠꓲꓹ ꓠꓵ ꓢꓲ꓾ ꓥꓪ ꓤ ꓔꓯ ꓬꓲ-ꓙꓲ ꓟꓵꓽ ꓗꓪ ꓐꓰ ꓘꓴ ꓓꓳ ꓡꓻꓳ꓿ ꓖꓳ ꓡꓱ ꓥ_ ꓟꓲ ꓬꓲ-ꓒ-ꓡꓲ ꓔꓯ ꓙ ꓖꓴ ꓫꓱꓽ ꓟꓸ ꓖꓶ ꓢꓴ ꓠꓬ ꓥꓪ ꓥ ꓡꓳ꓿ ꓥꓪ ꓡꓯ ꓖꓳꓼ ꓠꓯꓸꓼ ꓗꓪ ꓬꓲ ꓪ ꓔꓯ ꓔꓯꓹ ꓖꓶ_ ꓡꓳ꓿ ꓬꓲ ꓪ ꓔꓯ ꓫꓬꓹ ꓓꓻ ꓡꓰ ꓝꓲ ꓢꓴ ꓠꓬ ꓥꓪ ꓥ ꓡꓳ꓾ ꓐꓰ ꓬꓲ ꓪ ꓟꓽ ꓢꓷ꓿ ꓥꓪ ꓬꓲ ꓪ ꓔꓯ ꓠꓲꓹ ꓗꓳꓺ ꓟꓬ ꓗꓳ ꓚ_ ꓐꓰ꓾ ꓠꓵꓻ ꓠꓲꓹ ꓚ ꓡꓰ ꓖꓳꓻ ꓖꓶ_ ꓡꓳ꓿ ꓖꓳ ꓡꓱ ꓢꓲ ꓥꓪ ꓠꓬ ꓬꓲ ꓪ ꓟꓷ ꓠꓷꓹ ꓗꓪ ꓟ ꓐꓽ ꓛꓬ ꓒꓶꓻ ꓩꓴ ꓗꓷ ꓢꓴ_ ꓡꓰ ꓐꓰ ꓗꓹ ꓢꓲ꓾ ꓬꓲ ꓪ ꓟꓲꓽ ꓙꓬ ꓗꓪ ꓗꓴ ꓗꓴ ꓟꓴ ꓬꓰ ꓢꓲ ꓬꓲ ꓪ ꓔꓯ ꓜ ꓓꓴ ꓚꓸ ꓖꓶ ꓗꓷꓳ꓿ ꓬꓲ-ꓒ-ꓡꓲꓳ꓾ ꓥꓪ ꓠꓴꓻ ꓔꓯ ꓮ ꓡꓲ ꓩꓴ ꓗꓷ ꓓ ꓢꓰꓽ꓿ ꓬꓲ-ꓢꓷ-ꓡꓰꓳ꓾ ꓥꓪ ꓠꓴꓻ ꓔꓯ ꓮ ꓡꓲ ꓡꓳꓺ ꓗꓷ ꓓ ꓓꓳꓺꓽ꓿ ꓮ-ꓓꓷ-ꓟ ꓘꓹ ꓒꓱ_ ꓡꓰ ꓐꓰ ꓮ ꓡꓲ ꓗꓷ ꓡꓰ ꓝꓲ ꓓ ꓢꓰꓽ꓿ ꓤꓰ-ꓐꓴ-ꓟꓷ ꓡꓳ ꓒꓱ_ ꓡꓰ ꓐꓰ꓾ ꓥꓪ ꓠꓴꓻ ꓔꓯ ꓮ ꓡꓲ ꓬꓰ ꓖꓶ ꓓ ꓓꓳꓺꓽ꓿ ꓥꓪ ꓙꓽ ꓡꓰꓼ ꓡ ꓢꓲ꓾ ꓥꓪ ꓫꓱ ꓤ ꓠꓲꓹ_ ꓟꓲ ꓕꓲ ꓛꓳ_ ꓡꓱꓻ ꓔꓴ ꓡ_ ꓡꓳ꓿ ꓥꓪ ꓦꓶ ꓞ ꓠꓲꓹ ꓔꓯ ꓥꓪ ꓟꓽ ꓐꓬ ꓔꓴ ꓡ ꓝꓲ꓿ ꓥꓪ ꓠꓬ ꓬꓲ-ꓒ-ꓡꓲ ꓔꓯ ꓝꓮꓲ ꓟꓽ ꓒꓬꓹ ꓟꓶ ꓡꓰ ꓝꓲꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓠꓽ ꓪꓴ-ꓢ ꓥ ꓡꓳ꓾ ꓞꓳ ꓤ ꓟꓽ ꓥ꓿ ꓠꓴ ꓪ ꓗꓳ ꓡꓳ ꓗꓪ ꓢꓲ-ꓫꓬ-ꓢꓴ ꓖꓳ ꓕꓲ ꓣꓳ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓒꓬꓹ ꓟꓶ ꓬꓰ ꓝꓲ ꓠꓹ ꓟ ꓥꓪ ꓟꓽ ꓡ꓿

ꓬꓲ-ꓩꓴ-ꓢꓳ 3ꓽ 8-12ꓹ 14-19

ꓕꓱ ꓟ ꓑꓶ ꓓꓴ ꓥꓪ ꓠꓬ ꓟꓴꓽ ꓗꓪˍ ꓐꓰ ꓟꓲ ꓠꓯ ꓕꓯ ꓢꓲ ꓗꓪ ꓟ ꓞꓳ ꓪꓳꓼ ꓥ ꓕ ꓑꓳ ꓔꓯ ꓟꓬꓱꓺ ꓟꓬꓱ ꓖꓶ ꓢꓴ ꓐꓹ ꓐ ꓟꓲꓽ ꓙꓬ ꓗꓪ ꓛꓲ ꓝꓲꓸ ꓖꓶ ꓢꓲ ꓕꓱ ꓡꓱ ꓶꓼ ꓓꓰˍ ꓡꓳ꓿ 16 ꓐꓹ ꓐ ꓡꓰ ꓬꓲ ꓐꓳ ꓞꓹ ꓟ ꓟꓬꓱ ꓓꓳꓽ ꓮ ꓡꓲ ꓙꓳˍ ꓠꓬ꓾ ꓬꓲ ꓦ ꓗꓪ ꓐꓰ ꓠꓴ ꓪꓽ ꓠꓲꓹ ꓟ ꓠꓯꓸꓼ ꓗꓪ ꓪꓽ ꓠꓬꓲˍ ꓟ ꓢꓯꓼ ꓖꓳ ꓡꓱ ꓖꓶ ꓡ ꓠꓹ ꓟ꓾ 17 ꓠꓴ ꓪꓽ ꓙꓵꓻ ꓠꓲꓹ ꓑꓶ ꓓꓴ ꓙꓲ-ꓢꓴ ꓠꓬ ꓠꓴ ꓪꓽ ꓠꓲꓹ ꓟ ꓠꓯꓸꓼ ꓗꓪ ꓔꓬ ꓡ ꓟ ꓗꓪ ꓐꓰ꓾ ꓠꓴ ꓪꓽ ꓠꓬ ꓠꓵꓻ ꓠꓲꓹ ꓗꓪ ꓬꓲ ꓚꓰ ꓜꓳꓺ ꓕꓶꓻ ꓡꓰ ꓢꓲ꓾ 18 ꓙꓲ-ꓢꓴ ꓠꓵ ꓠꓲꓹ ꓮ ꓦꓲꓺ ꓛꓲ꓾ ꓮꓸ ꓫꓵꓺ ꓛꓲ꓾ ꓮ ꓟꓴ ꓛꓲ꓾ ꓮ ꓠꓯꓸ ꓛꓲ ꓙꓳˍ ꓟ꓾ ꓠꓴ ꓪꓽ ꓠꓬ ꓪꓴ-ꓢ ꓔꓯ ꓦ ꓡꓱ ꓢꓴ ꓐꓴ ꓮꓽ ꓙꓵꓽˍ ꓐꓰ ꓕꓲꓽ ꓡꓰꓹꓼ꓾ ꓙꓽ ꓜꓲꓼˍ ꓟ ꓢꓯꓼ ꓙꓳ ꓡ ꓠꓹ ꓟ ꓐꓰ꓾ 19 ꓙꓽ ꓜꓲꓼˍ ꓟ ꓥ ꓕ ꓑꓳ ꓕꓯ ꓢꓲ ꓘꓳꓻ ꓙꓰ ꓟ ꓙꓲ-ꓢꓴ ꓠꓵ ꓠꓲꓹ ꓔꓯ ꓠꓴ ꓪꓽ ꓢꓷꓸ ꓡꓰ ꓢꓲ꓾ ꓪꓴ-ꓢ ꓐꓲꓺ ꓞꓹ ꓟ ꓮꓽ ꓙꓵ ꓠꓴ ꓪꓽ ꓔꓯ ꓐꓲ ꓡꓰ ꓝꓲ ꓠꓹ ꓟ ꓓꓰꓽˍ ꓡꓳ꓿

ꓬꓳ-ꓦ 19ꓽ 31- 37

ꓖꓳ ꓗꓸ ꓠꓯꓸ ꓕꓲ ꓠꓬꓲ ꓠꓬ꓾ ꓬꓴ-ꓔ ꓡ ꓞꓳ ꓐꓴ ꓠꓽ ꓦꓬꓼ ꓠꓬꓲ ꓥ ꓠꓬꓲ꓾ ꓠꓽ ꓦꓬꓼ ꓠꓬꓲ ꓗꓪ ꓫꓵꓻ ꓟꓳ ꓔꓯ ꓡꓯꓼ ꓐꓳ ꓔꓶꓸ ꓓꓴ ꓗꓪ ꓟꓽ ꓥꓳ ꓞꓹ ꓝꓲ ꓠꓹ ꓟ꓾ ꓬꓲ ꓪꓽ ꓛꓲ ꓒꓯꓹ ꓲ'ꓼ ꓘꓳꓹ ꓗꓷ ꓢꓲ ꓣꓴ ꓬꓯꓼ ꓗꓷ ꓝꓲ꓾ ꓐꓰ ꓒꓲ-ꓡ ꓔꓯ ꓓꓰꓽˍ ꓡꓳ꓿ 32 ꓖꓳ ꓡꓱ ꓠꓬꓲ ꓟꓯꓼ ꓤ ꓐꓴ ꓡ ꓢꓲ꓾ ꓬꓰ-ꓢꓴˍ ꓐꓰ ꓕꓲ ꓪꓺꓼ ꓕꓯꓼ ꓔꓶꓸ ꓔ ꓢꓴ꓾ ꓬꓲ ꓪꓴꓸ ꓕꓲ ꓣꓳ ꓟˍ ꓐꓰ ꓠꓱꓸ ꓐꓯꓼ ꓕꓲ ꓣꓳ ꓟ ꓛꓲ ꓒꓯꓹ ꓔꓯ ꓲ'ꓼ ꓘꓳꓹ ꓗꓷˍ ꓡꓳ꓿ 33 ꓖꓳ ꓡꓱ ꓥ ꓟꓲ ꓬꓰ-ꓢꓴ ꓔꓯ ꓚꓳꓺ ꓛꓲ ꓡ ꓢꓲ ꓬꓲ ꓫꓵꓻ ꓞꓹ ꓟ ꓔꓯ ꓟꓳ ꓗꓷ ꓠꓬ꓾ ꓬꓲ ꓛꓲ ꓒꓯꓹ ꓟꓽ ꓲ'ꓼ ꓘꓳꓹ ꓗꓷ꓿ 34 ꓖꓳ ꓡꓱ ꓥ ꓟꓲ ꓟꓯꓼ ꓤ ꓕꓲ ꓣꓳ ꓠꓬ ꓐꓽ ꓥꓷꓹ ꓡꓰ ꓬꓲ ꓙꓳꓽ ꓐꓬ ꓗꓪ ꓗꓸ ꓗꓷ ꓠꓬ꓾ ꓞꓼ ꓐꓰ ꓫꓵꓽˍ ꓐꓰ ꓬꓲꓻ ꓙꓬ ꓓꓳ ꓡ ꓡꓳ꓿ 35 ꓕꓱ ꓟ ꓔꓯ ꓟꓳꓻ ꓗꓷ ꓢꓴ ꓗꓪ ꓟ ꓕꓲ ꓣꓳ ꓡꓰ ꓢꓷꓸ ꓙ ꓟꓳ ꓙ ꓢꓲ꓾ ꓠꓴ ꓪꓽˍ ꓟꓲ ꓙꓵꓻ ꓠ ꓟ꓾ ꓬꓲ ꓢꓷꓸ ꓙ ꓟꓳ ꓙˍ ꓟ ꓠꓬ ꓔꓱꓹˍ ꓟ ꓥ ꓡꓳ꓾ ꓐꓰ ꓬꓲ ꓢꓷˍ ꓡꓳ꓿ 36 ꓕꓱ ꓟꓬ ꓙꓰꓽ ꓗꓷ ꓡꓰˍ ꓟ ꓠꓬ꓾ ꓬꓲ ꓪꓳꓼ ꓔꓳ ꓕꓲ ꓕꓳꓸˍ ꓟꓲ ꓟꓽ ꓘꓳꓹ ꓡꓰ꓾ ꓐꓰ ꓢꓲꓽ ꓫꓬ ꓕꓳ ꓶ ꓗꓪ ꓐꓯ ꓔ ꓟ ꓐꓲ ꓡꓰˍ ꓟ ꓥ ꓡꓳ꓿ 37 ꓝꓮꓲ ꓢꓲꓽ ꓫꓬ ꓕꓳ ꓶ ꓠꓱꓸ ꓐꓯꓼ ꓕꓲ ꓝꓲꓸ ꓗꓪ꓾ ꓬꓲ ꓪꓽ ꓡꓰ ꓗꓸ ꓗꓷ ꓢꓴ ꓕꓲ ꓣꓳ ꓟ ꓔꓯ ꓬꓲ ꓪꓽ ꓡꓳꓸ ꓠꓬꓲˍ ꓥꓳ꓾ ꓐꓰ ꓐꓯˍ ꓢꓰꓽ ꓡꓳ꓿