ꓬꓰ-ꓢꓴ ꓬꓲ ꓒꓬꓱꓽ ꓑꓶꓸ ꓡꓰ ꓟ

ꓡꓴ-ꓘ ꓕꓳꓽ ꓶ 9: 28-36

ꓐꓯ ꓘꓶ ꓕꓱ ꓟ ꓐꓯ ꓗꓷ ꓗ ꓠꓯ ꓮꓽ ꓡ ꓦꓰꓼ ꓠꓬꓲ ꓗꓪ꓾ ꓬꓲ ꓠꓬ ꓒꓲ-ꓕꓱ_ ꓐꓰ ꓬꓳ-ꓦ_ ꓐꓰ ꓬ-ꓗꓴ ꓔꓯ ꓧꓳꓽ ꓔ ꓢꓲ꓾ ꓪ ꓘꓴ ꓠꓹ ꓟ ꓪ ꓚꓲ ꓗꓪ ꓓꓯ ꓙꓰ_ ꓡꓳ꓿ꓖꓳ ꓡꓱ ꓠꓬ ꓪꓽ ꓘꓴ ꓔꓬ_ ꓕꓯ꓾ ꓬꓲ ꓶꓻ ꓒꓬꓱꓽ ꓑꓶꓸ ꓡꓰ ꓢꓲ꓾ ꓬꓲ ꓐꓵ ꓞꓶ ꓠꓬ ꓒꓴ ꓛꓹ ꓐꓬꓱꓼ ꓡꓱꓼ ꓟꓴ ꓗꓷ ꓡꓰ_ ꓡꓳ꓿ ꓠꓬꓲ ꓠꓹ꓾ ꓟꓳ-ꓫꓲ_ ꓐꓰ ꓬꓲ-ꓡꓲ-ꓬ ꓬꓲ ꓪ ꓠꓬꓲꓽ ꓣꓳ ꓠꓬ ꓬꓰ-ꓢꓴ_ ꓐꓰ ꓫ ꓕꓱ ꓔꓬ_ ꓡꓳ꓿ ꓬꓲ ꓪ ꓠꓬ ꓐꓬꓱꓼ ꓡꓱꓼ ꓡꓱ ꓟ ꓠꓯꓸꓼ ꓗꓪ ꓟꓳꓸ ꓖꓶ ꓡ ꓢꓲ꓾ ꓙꓱ-ꓣꓴ-ꓢ-ꓡꓱ ꓗꓪ ꓬꓰ-ꓢꓴ ꓫꓵꓻ ꓠꓹ ꓟ_ ꓐꓰ ꓬꓰ ꓓꓳ ꓡ ꓠꓹ ꓟ ꓟꓬꓱꓽ ꓔꓯ ꓫ ꓕꓱ ꓔꓬ_ ꓡꓳ꓿ ꓒꓲ-ꓕꓱ_ ꓐꓰ ꓬꓲ_ ꓐꓰ ꓕꓲ ꓪꓺꓼ ꓔꓬ ꓢꓴ ꓠꓬ ꓬꓲꓼ ꓟꓶ ꓕꓳꓹ_ ꓡꓳ꓿ ꓖꓳ ꓡꓱ ꓥ_ ꓟꓲ ꓬꓲ ꓪ ꓬꓲ ꓜꓶ ꓧꓪꓸ ꓛꓲ ꓡ ꓕꓯ꓾ ꓬꓰ-ꓢꓴ ꓬꓲ ꓐꓬꓱꓼ ꓡꓱꓼ ꓡꓱꓼ ꓟ_ ꓐꓰ꓾ ꓬꓲ_ ꓐꓰ ꓦꓰꓼ ꓞ ꓔꓬ_ ꓟ ꓡ ꓞꓳ ꓖꓳ ꓠꓬꓲꓽ ꓣꓳ ꓔꓯ ꓡꓳꓸ ꓟꓳ_ ꓡꓳ꓿ ꓡ ꓞꓳ ꓖꓳ ꓠꓬꓲꓽ ꓣꓳ ꓠꓬ ꓬꓰ-ꓢꓴ_ ꓐꓰ ꓧꓹ ꓗꓷ_ ꓐꓰ ꓬꓰ_ ꓕꓯ꓾ ꓒꓲ-ꓕꓱ ꓠꓬ꓾ ꓟꓸ ꓒꓽꓳ꓾ ꓕꓱ ꓗꓪ ꓔꓬ ꓠꓬ ꓣꓳ ꓐꓱ ꓶ ꓙꓲꓻ_ ꓡꓳ꓿ ꓥꓪ ꓠꓴꓽ ꓔꓯ ꓦꓲ ꓐꓱ ꓢ ꓟ ꓫꓬꓹ ꓝꓲ ꓡꓯ꓾ ꓠꓴ ꓐꓱ ꓶ ꓕꓲ ꓟ꓾ ꓟꓳ-ꓫꓲ ꓐꓱ ꓶ ꓕꓲ ꓟ꓾ ꓬꓲ-ꓡꓲ-ꓬ ꓐꓱ ꓶ ꓕꓲ ꓟ꓾ ꓐꓯ_ ꓡꓳ꓿ ꓬꓲ ꓮ ꓫꓵꓽ ꓐꓯ ꓔꓬ_ ꓟ ꓠꓽ ꓬꓲ ꓟꓽ ꓢꓷ꓿ ꓕꓱ ꓡꓱ ꓫ ꓕꓱ ꓔꓬ_ ꓕꓯ꓾ ꓟꓴ ꓗꓴꓸ ꓕꓲ ꓘꓴꓸ ꓢꓴꓸ ꓡ ꓢꓲ ꓬꓲ ꓪ ꓔꓯ ꓛꓸ ꓡꓰ_ ꓡꓳ꓿ ꓟꓴ ꓗꓴ ꓑꓲꓸ ꓡ ꓠꓬꓲ꓾ ꓬꓲ ꓪ ꓙꓳꓺ_ ꓡꓳ꓿ ꓟꓴ ꓗꓴꓸ ꓠꓯꓸꓼ ꓗꓪ ꓐꓰ ꓢꓯꓼ ꓓꓳ ꓡ ꓢꓲ꓾ ꓕꓱ ꓟ ꓠꓬ ꓥꓪ ꓮ ꓐꓲ꓾ ꓥꓪ ꓡꓰ ꓢꓲꓺ ꓔ_ ꓟ ꓥ ꓡꓳ꓿ ꓠꓴ ꓪ ꓠꓬ ꓬꓲ ꓔꓯ ꓠꓺ ꓡꓳ꓾ ꓐꓯ_ ꓡꓳ꓿ ꓢꓯꓼ ꓖꓳ ꓟ ꓠꓽ ꓡꓰ ꓠꓬ꓾ ꓬꓰ-ꓢꓴ ꓕꓲ ꓣꓳ ꓔꓯ_ ꓡꓰꓽ ꓟꓳ_ ꓡꓳ꓿ ꓦꓬꓼ ꓠꓬꓲ ꓖꓳ ꓟ ꓗꓪ ꓬꓲ ꓪ ꓟꓽ ꓪꓳꓹ ꓔꓬ ꓢꓲ꓾ ꓬꓲ ꓪ ꓡꓳꓸ ꓟꓳ_ ꓟ ꓮ ꓫꓵ ꓥ_ ꓟꓲ꓾ ꓮ ꓟ ꓔꓯ_ ꓟꓲ ꓟꓽ ꓐꓯ ꓖꓶ꓿