ꓬꓲꓻ ꓡꓯꓼ ꓟꓰꓼ ꓔꓯ ꓠꓽ ꓡꓰ ꓝꓲˍ ꓟ

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓥ ꓟ ꓟ-ꓕꓲ 8ꓽ23-27 ꓠꓬ꓾

ꓢꓲ ꓒ ꓬꓰ-ꓢꓴ ꓐꓰ ꓬꓲ ꓝꓲ ꓓꓴ ꓐꓴ ꓠꓬ ꓡꓲꓺ ꓜꓶꓽ ꓢꓲ ꓓꓴ ꓓꓳ ꓙꓰˍ ꓕꓯ ꓢꓲ ꓒ ꓬꓰ-ꓢꓴ ꓠꓬ ꓪꓴꓽ ꓧꓶˍ ꓟ ꓑꓶꓸ ꓓꓴ ꓡꓲꓺ ꓕꓯꓽ ꓢꓲ ꓗꓪ ꓬꓲꓼ ꓟꓶ ꓔꓬ ꓡꓳ= ꓖꓳ ꓕꓯ ꓟꓲꓽ ꓦꓲ ꓕꓳꓽ ꓥꓳꓽ ꓓ ꓟ ꓙꓱꓼ ꓡ ꓢꓲ ꓠꓬꓲ ꓬꓲꓻ ꓡꓯꓼ ꓟꓰꓼ ꓡꓰ ꓡꓲꓺ ꓔꓯ ꓖꓴ ꓓꓵꓽ ꓙꓰˍ ꓐꓰ ꓗꓹ ꓕꓯ ꓬꓲ ꓝꓲ ꓓꓴ ꓐꓴ ꓠꓬ ꓙꓳꓺ ꓡꓰ ꓢꓲ ꓠꓬꓲ ꓢꓲ ꓒ ꓬꓰ-ꓢꓴ ꓔꓯ ꓘꓴˍ ꓟ ꓟꓸ ꓟꓲꓽ ꓥ ꓡꓳ= ꓢꓲ ꓒ ꓬꓰ-ꓢꓴ ꓡꓰ ꓬꓲ ꓪ ꓔꓯ ꓙꓵꓻ ꓠꓲꓹ ꓣꓳ ꓢꓴ ꓐꓴꓳ꓾ ꓮ ꓫꓵꓽ ꓪꓴꓸ ꓠꓬꓲ ꓙꓳꓺˍ ꓡ? ꓐꓯ ꓢꓲ ꓬꓲꓻ ꓡꓯꓼ ꓟꓰꓼ ꓔꓯ ꓠꓽ ꓡꓰ ꓝꓲˍ ꓟ ꓟꓸ ꓟꓲꓽ ꓥ ꓡꓳ=

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓤꓶꓻ ꓠꓬ ꓡꓲꓺ ꓕꓲ ꓟ ꓔꓯ ꓫꓱꓸˍ ꓡꓳ= ꓣꓳ ꓠꓬ ꓡꓲꓺ ꓜꓶꓽ ꓢꓲ ꓓꓴ ꓓꓳ ꓙꓰ ꓔꓬ ꓟ ꓞꓳ ꓤ ꓥ ꓡꓳ= ꓣꓳ ꓜꓶꓽ ꓔ ꓟ ꓡꓲꓺ ꓘꓴꓽ ꓗꓪ ꓢꓲ ꓒ ꓬꓰ-ꓢꓴ ꓥˍ ꓟꓲ ꓣꓳ ꓐꓰ ꓕꓲ ꓡꓰꓹ ꓔꓬ ꓡꓳ= ꓖꓳ ꓡꓱ ꓐꓯ ꓥ ꓟꓲ꓾ ꓕꓲ ꓖ ꓕꓲ ꓧꓪꓹ ꓠꓬ ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓟˍ ꓡꓰ ꓐꓰ ꓟꓲꓽ ꓦꓲ ꓕꓳꓽ ꓥꓳꓽ ꓙꓱꓼ ꓡˍ ꓕꓯ ꓬꓲꓻ ꓡꓯꓼ ꓟꓰꓼ ꓓ ꓟ ꓡꓰ ꓣꓳ ꓔꓯ ꓙꓴꓽ ꓡˍ ꓕꓯ꓾ ꓢꓲ ꓒ ꓬꓰ-ꓢꓴ ꓠꓬ ꓣꓳ ꓐꓰ ꓔꓬ ꓡꓳ ꓐꓯ ꓟ ꓔꓯ ꓟꓲ ꓡꓰꓹ ꓗꓷ ꓢꓲ ꓠꓬꓲ ꓙꓳꓺ ꓛꓱꓽ ꓡˍ ꓡꓳ= ꓘꓴꓻ ꓓꓰꓽ ꓔꓴ ꓡˍ ꓡꓳ= ꓠꓽ ꓖꓴˍ ꓟꓲ ꓧꓪ ꓟꓽ ꓟꓶ ꓠꓬꓲ ꓙꓳꓺ ꓛꓱꓽ ꓡˍ ꓡꓳ=

ꓢꓲꓽ ꓫꓬ ꓕꓳ ꓶ ꓗꓪ ꓝꓲ ꓓꓴ ꓐꓴ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓪ ꓐꓰ ꓔꓬ ꓟ ꓔꓯ ꓟꓲ ꓡꓰꓹ ꓗꓷ ꓢꓲ ꓠꓬꓲ ꓟꓲꓽ ꓦꓲ ꓓ ꓟ ꓙꓱꓼ ꓡˍ ꓕꓯ꓾ ꓬꓲꓻ ꓡꓯꓼ ꓟꓰꓼ ꓓꓽ ꓟ ꓙꓴꓽ ꓡˍ ꓕꓯ ꓬꓲ ꓪ ꓠꓬ ꓮ ꓘꓶꓸ ꓙꓳꓺ ꓢꓲ ꓠꓬꓲ ꓘꓴˍ ꓡꓳ= ꓖꓳ ꓡꓱ ꓠꓬꓲ ꓢꓲ ꓒ ꓬꓰ-ꓢꓴ ꓬꓲ ꓪ ꓔꓯ ꓐꓯ ꓖꓶˍ ꓟˍ ꓡꓰ ꓐꓰ ꓣꓳ ꓤꓶꓻ ꓗꓪ ꓥ ꓟꓲ ꓢꓲ ꓒ ꓬꓰ-ꓢꓴ ꓠꓬ ꓣꓳ ꓐꓰ ꓔꓬ ꓡꓳ ꓐꓯ ꓟ ꓔꓯ ꓮ ꓕꓯ ꓟꓲ ꓟꓲ ꓡꓰꓹ ꓟꓽ ꓓ=

ꓣꓳ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓙꓵꓻˍ ꓕꓯ꓾ ꓢꓲ ꓒ ꓬꓰ-ꓢꓴ ꓠꓬ ꓣꓳ ꓐꓰ ꓔꓬ ꓟ ꓔꓯ ꓣꓳ ꓘꓳ ꓣꓴˍ ꓕꓯ ꓣꓳ ꓙꓰ ꓔꓬ ꓟ ꓚꓱꓹ꓾ ꓣꓳ ꓓꓵꓽ ꓙꓽˍ ꓟ ꓮ ꓙꓵꓽ ꓗꓪ ꓢꓲ ꓒ ꓬꓰ-ꓢꓴ ꓠꓬ ꓣꓳ ꓐꓰ ꓕꓲ ꓡꓰꓹ ꓔꓬ ꓡꓳ= ꓣꓳ ꓤꓶꓻ ꓗꓪ ꓔꓳꓹ ꓜꓳꓽ ꓠ ꓔ ꓟ꓾ ꓣꓳ ꓟꓽ ꓓꓵꓽ ꓙꓽ ꓔ ꓟ ꓫꓸ ꓙꓵ ꓟꓷꓼ ꓙꓵ ꓓꓴ꓾ ꓝꓮꓲ ꓠꓲꓹ ꓟ ꓠꓬ ꓜꓲꓽ ꓔ ꓟꓽ ꓐ ꓡ ꓠ ꓛꓲ ꓒꓬꓱꓼ ꓡˍ ꓟ ꓫꓵꓽ ꓪꓴ꓾ ꓟꓬ ꓑꓬ ꓓꓴ ꓬꓲ ꓫꓵꓽ ꓬꓲ ꓙꓰꓽ꓾ ꓕꓱ ꓡꓱ ꓔꓳꓹ ꓜꓳꓽ ꓡ ꓕꓯ ꓢꓲ ꓒ ꓬꓰ-ꓢꓴ ꓠꓬ ꓣꓳ ꓐꓰ ꓔꓬ ꓡꓳ ꓐꓯ ꓟ ꓔꓯ ꓮ ꓕꓯ ꓟꓲ ꓓꓵꓽ ꓙꓽ ꓠ ꓔ ꓡꓳ=

ꓕꓲ ꓖ ꓕꓲ ꓧꓪꓹ ꓢꓲ ꓒ ꓬꓰ-ꓢꓴ ꓠꓬ ꓣꓳ ꓤꓶꓻ ꓗꓪ ꓬꓲꓼ ꓟꓶ ꓔꓬ ꓗꓴꓸˍ ꓡꓳ= ꓣꓳ ꓫꓸ ꓙꓵ ꓔꓬ ꓟ ꓔꓯ ꓬꓲ ꓟꓽ ꓟꓳꓻ ꓟˍ ꓡꓰ ꓐꓰ꓾ ꓣꓳ ꓥꓴꓻ ꓔꓬ ꓟ ꓟꓬ ꓐꓲ ꓔꓯ ꓢꓲ ꓒ ꓬꓰ-ꓢꓴ ꓟꓽ ꓟꓳꓻ ꓟ ꓡꓰ ꓐꓰ ꓣꓳ ꓚꓬꓹ ꓪˍ ꓟˍ ꓟꓲ ꓙꓳˍ ꓡꓳ= ꓣꓳ ꓔꓳꓹ ꓜꓳꓽ ꓔꓬ ꓟ ꓫꓵꓽ ꓪꓴ꓾ ꓝꓮꓲ ꓣꓳ ꓦꓲꓻ ꓘꓴꓽ ꓗꓪ ꓔꓳꓹ ꓜꓳꓽ ꓔꓬ ꓟ ꓫꓸ ꓙꓵ ꓓꓴ ꓮ ꓟꓬꓹ ꓐꓱ ꓶ ꓣꓳ ꓮ ꓡꓲ ꓘꓶ ꓛꓲ ꓪꓽ ꓘꓴ ꓔꓬ ꓥ ꓟꓲ ꓢꓲ ꓒ ꓬꓰ-ꓢꓴ ꓠꓬ ꓟꓽ ꓓꓽ ꓔꓳꓹ ꓖꓶ ꓡ ꓟ ꓦꓬꓼ ꓠꓬꓲˍ ꓟꓲ ꓙꓳˍ ꓥꓳ= ꓣꓳ ꓤꓶꓻ ꓠꓯꓸꓼ ꓗꓪ꓾ ꓣꓳ ꓜꓶꓽ ꓔ ꓟ ꓡꓲꓺ ꓘꓴꓽ ꓗꓪ ꓢꓲꓺ ꓒ ꓬꓰ-ꓢꓴ ꓬꓲꓼ ꓟꓶ ꓔꓬ ꓟ ꓡꓰ ꓐꓰ ꓮ ꓡꓲ ꓗꓪ ꓐꓰ ꓘꓴˍ ꓥ ꓟꓲ꓾ ꓢꓯꓼ ꓓꓽ ꓟ ꓐꓰ ꓘꓴˍ ꓥ ꓟꓲ ꓢꓲ ꓒ ꓬꓰ-ꓢꓴ ꓠꓬ ꓟꓽ ꓓꓽ ꓔꓳꓹ ꓡˍ ꓟ ꓡꓰ ꓐꓰ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓓꓵꓽ ꓙꓽ ꓟꓶ ꓗꓴꓸˍ ꓡꓳ=

ꓖꓳ ꓡꓱ ꓐꓯ ꓥ ꓟꓲ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓠꓬ ꓣꓳ ꓐꓱ ꓶ ꓦꓻ ꓢꓯꓼ ꓪ ꓣꓴ ꓓꓴ ꓬꓲ ꓓ ꓟ ꓥ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓣꓳ ꓐꓰ ꓕꓲ ꓡꓰꓹ ꓔꓬ ꓟ ꓑꓶꓸ ꓓꓴ ꓬꓲꓻ ꓡꓯꓼ ꓟꓰꓼ ꓠꓬ ꓣꓳ ꓔꓯ ꓓꓶꓽ ꓡ ꓟꓽ ꓐ ꓡ= ꓟꓲꓽ ꓦꓲ ꓕꓳꓽ ꓥꓳꓽ ꓠꓬ ꓣꓳ ꓔꓯ ꓐꓬ ꓡꓰ ꓝꓲ ꓟꓽ ꓐ ꓡ= ꓮ ꓡꓲꓳ ꓐꓯ ꓠꓬ ꓢꓲ ꓒ ꓬꓰ-ꓢꓴ ꓠꓬ ꓣꓳ ꓐꓰ ꓔꓬ ꓡꓳ= ꓣꓳ ꓡꓲꓺ ꓘꓴꓽ ꓠꓯꓸꓼ ꓗꓪ ꓢꓲ ꓒ ꓪꓴꓽ ꓧꓶ ꓠꓽ ꓔꓬ ꓡꓳ= ꓣꓳ ꓡꓲꓺ ꓘꓴꓽ ꓗꓪ ꓔꓬ ꓢꓲ ꓬꓲ ꓠꓬ ꓣꓳ ꓔꓯ ꓙ ꓖꓴ ꓟꓸ ꓖꓶ ꓔꓬ ꓡꓳ꓾ ꓐꓯ ꓟ ꓔꓯ ꓙꓵꓻˍ ꓕꓯ ꓮ ꓡꓲ ꓫꓵꓽ ꓟꓲꓽ ꓦꓲ ꓕꓳꓽ ꓥꓳꓽ꓾ ꓮ ꓡꓲ ꓫꓵꓽ ꓫꓵꓽ ꓪꓴ ꓥ ꓟꓲ ꓣꓳ ꓔꓯ ꓐꓬ ꓡꓰ ꓝꓲ ꓟꓽ ꓐ ꓡ=

ꓖꓳ ꓡꓱ ꓠꓬꓲ ꓦꓻ ꓢꓯꓼ ꓪ ꓣꓴ ꓡꓯ꓾ ꓬꓲꓼ ꓤ ꓠꓬꓲ ꓤ ꓐꓴꓳ= ꓢꓲ ꓒ ꓬꓰ-ꓢꓴ ꓠꓬ ꓣꓳ ꓐꓰ ꓕꓲ ꓪˍ ꓔꓬ ꓡꓳ= ꓣꓳ ꓘꓴ ꓢꓯꓼ ꓔꓯ ꓬꓲ ꓕꓲ ꓖ ꓕꓲ ꓧꓪꓹ ꓟꓽ ꓑ ꓙꓽ ꓥˍ ꓟꓲ ꓬꓲ ꓠꓬ ꓣꓳ ꓐꓰ ꓔꓬ ꓡꓳ ꓐꓯ ꓟ ꓔꓯ ꓙꓵꓻ ꓢꓲ ꓢꓯꓼ ꓕꓵꓼˍ ꓠꓬ ꓣꓳ ꓠꓲꓹ ꓟ ꓐꓱ ꓶ ꓢꓯꓼ ꓪ ꓙꓳ ꓡˍ ꓥꓳ= ꓣꓳ ꓦ ꓡꓱ ꓐꓳ ꓖꓴ ꓙꓳ ꓡˍ ꓥꓳ ꓐꓯ ꓟ ꓔꓯ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓐꓯ ꓟꓳꓸ ꓖꓶ ꓡ ꓔꓬ ꓡꓳ=