ꓬꓳ-ꓦ ꓪꓴꓸ ꓓꓵ ꓓꓶ ꓗꓷ ꓟ

ꓟ-ꓕꓲ ꓕꓳꓽ ꓶ 14: 1-12

 ꓖꓳ ꓕꓯ ꓡꓲꓸ ꓫꓴ ꓗꓪ ꓟ ꓕꓲ ꓫꓴ ꓙꓵꓽ ꓢꓴ ꓩꓴ-ꓡꓲ ꓠꓬ ꓬꓰ-ꓢꓴ ꓟꓬꓱ ꓓꓳꓽ ꓑ ꓙ ꓗꓷ ꓕꓯ꓾ ꓬꓲ ꓔꓯ ꓣꓱꓽ ꓙ ꓢꓴ ꓐꓴ ꓔꓯ ꓕꓱ ꓡꓱ ꓐꓯ_ ꓡꓳ꓾ ꓕꓱ ꓟ ꓠꓬ ꓖꓳ ꓓꓱ ꓔꓲꓹ ꓖꓶ ꓢꓴ ꓬꓳ-ꓦ ꓥ ꓡꓳ꓿ ꓬꓲ ꓠꓬ ꓫꓵꓻ ꓗꓪ ꓐꓰ ꓢꓯꓸ ꓬꓲꓼ ꓡ_ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓪꓽ ꓠꓬꓲ_ ꓟ ꓕꓱ ꓟꓬ ꓟ ꓬꓲ ꓠꓯꓸꓼ ꓗꓪ ꓢꓯꓼ ꓕꓵ ꓔꓬ_ ꓡꓳ꓾ ꓐꓯ_ ꓡꓳ꓿ ꓮ ꓡꓲꓳ ꓐꓯ ꓠꓬ ꓩꓴ-ꓡꓲ ꓠꓽ ꓬꓲ ꓠꓬꓲ ꓤ ꓒꓲꓹ-ꓡꓲ ꓤ ꓟꓶ ꓩꓴ-ꓡꓳ-ꓓꓲ ꓐꓱ ꓶ ꓬꓳ-ꓦ ꓔꓯ ꓣꓴ ꓢꓲ꓾ ꓞꓳꓹ ꓔ ꓢꓲ ꓠꓬꓲ ꓐꓱ ꓓꓴꓽ ꓗꓪ ꓐꓱ ꓗꓷꓳ꓿ ꓮ ꓡꓲꓳ ꓐꓯ ꓠꓬ ꓬꓳ-ꓦ ꓡꓰ ꓬꓲ ꓔꓯ꓾ ꓠꓴ ꓬꓲ ꓔꓯ ꓫꓺ_ ꓟ ꓠꓬ ꓟꓽ ꓓ ꓟ ꓥ ꓡꓳ꓾ ꓐꓰ ꓐꓯ ꓖꓶ_ ꓡꓳ꓿ ꓩꓴ-ꓡꓲ ꓠꓬ ꓬꓲ ꓔꓯ ꓢꓰꓼ ꓠꓲꓹ ꓫꓵ_ ꓥ_ ꓟꓲ꓾ ꓑ ꓫꓬ ꓐꓴ ꓔꓯ ꓙꓳꓺ_ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪ ꓠꓽ ꓬꓳ-ꓦ ꓔꓯ ꓟꓷ ꓠꓷꓹ ꓝ ꓢꓴ ꓚꓬꓹ ꓔ_ ꓡꓳ꓿ -ꓡꓲ ꓬꓲ ꓦꓵꓻ ꓦꓬꓼ ꓠꓬꓲ ꓛꓲ ꓡ ꓠꓬ꓾ ꓩꓴ-ꓡꓳ-ꓓꓲ ꓬꓲ ꓮꓸ ꓟꓲꓽ ꓠꓽ ꓮ ꓙꓵ ꓢꓴ ꓟꓲ ꓙꓬ ꓗꓪ ꓗꓪ ꓛꓰꓹ ꓢꓲ꓾ ꓩꓴ-ꓡꓲ ꓔꓯ ꓠꓲꓹ ꓒꓴ ꓡꓰ ꓝꓲ_ ꓡꓳ꓿ ꓖꓳ ꓡꓱ ꓠꓬꓲ ꓬꓲ ꓠꓬ ꓙꓱꓽ ꓘꓶꓽ ꓡꓰ꓾ ꓬꓲ ꓮ ꓫꓵ ꓓꓰꓽ_ ꓟꓲ ꓬꓲ ꓔꓯ ꓖꓶ_ ꓥꓳ꓾ ꓐꓰ ꓪꓵꓼ_ ꓡꓳ꓿ ꓤ ꓟꓶ ꓡꓯꓸ ꓠꓬ ꓬꓲ ꓟꓹ ꓟ ꓡꓰ ꓝꓲ_ ꓟ ꓗꓪ ꓐꓰ꓾ ꓖꓳ ꓓꓱ ꓔꓲꓹ ꓖꓶ ꓢꓴ ꓬꓳ-ꓦ ꓪꓴꓸ ꓓꓵ ꓠꓬ ꓐꓯꓻ ꓗꓪ ꓗꓶ ꓢꓲ ꓕꓻ ꓥꓪ ꓔꓯ ꓖꓶ ꓡꓯ꓾ ꓐꓯ_ ꓡꓳ꓿ ꓪ ꓔꓲ ꓠꓬ ꓠꓲꓹ ꓟ ꓫꓸ_ ꓡꓳ꓿ ꓖꓳ ꓡꓱ ꓥ_ ꓟꓲ ꓬꓲ ꓙꓱꓽ ꓘꓶꓽ_ ꓐꓰ꓾ ꓝꓮꓲ ꓬꓲ_ ꓐꓰ ꓕꓲ ꓪꓼ ꓜ ꓜꓽ ꓔꓬ ꓢꓴ ꓪꓴꓸ ꓠꓬꓲ꓾ ꓬꓲ ꓔꓯ ꓖꓶ ꓠꓹ ꓟ ꓕꓵꓼ ꓪ ꓖꓶ_ ꓡꓳ꓿ ꓖꓳ ꓡꓱ ꓠꓬ ꓡ ꓞꓳ ꓝꓲ ꓩꓴ ꓗꓷ ꓢꓲ꓾ ꓐꓱ ꓓꓴꓽ ꓗꓪ ꓬꓳ-ꓦ ꓪꓴꓸ ꓓꓵ ꓓꓶ ꓗꓷ_ ꓡꓳ꓿ ꓬꓲ ꓪꓴꓸ ꓓꓵ ꓠꓬ ꓐꓯꓻ ꓗꓪ ꓗꓶ ꓔꓯꓹ ꓡ ꓢꓲ ꓤ ꓟꓶ ꓡꓯꓸ ꓔꓯ ꓖꓶ ꓗꓷ ꓠꓬ꓾ ꓬꓲ ꓟꓹ ꓟ ꓔꓯ ꓔꓯꓹ ꓖꓶ ꓬꓰ_ ꓡꓳ꓿ ꓖꓳ ꓡꓱ ꓠꓬ ꓬꓳ-ꓦ ꓬꓲ ꓛꓳ ꓒꓯꓹ ꓐꓴ ꓡ ꓢꓲ꓾ ꓬꓲ ꓫꓵꓻ ꓟꓳ ꓔꓯꓹ ꓙꓰ ꓢꓲ ꓠꓬꓲ ꓔꓵꓸ ꓗꓷ ꓠꓬ꓾ ꓬꓰ-ꓢꓴ ꓔꓯ ꓐꓯ ꓖꓶ ꓙꓰ_ ꓡꓳ꓿