ꓬꓳ-ꓦ ꓪꓴꓸ ꓓꓵ ꓓꓶ ꓗꓷ ꓟ

ꓟ-ꓘꓳ ꓕꓳꓽ ꓶ 6: 17-29

 ꓮ ꓡꓲꓳ ꓐꓯ ꓠꓬ ꓩꓴ-ꓡꓲ ꓠꓽ ꓬꓲ ꓠꓬꓲ ꓤ ꓒꓲꓹ-ꓡꓲ ꓤ ꓟꓶ ꓩꓴ-ꓡꓳ-ꓓꓲ ꓐꓱ ꓶ꓾ ꓬꓲ ꓝꓲ ꓓꓴ ꓝꓲ ꓩꓴ ꓗꓷ ꓢꓲ꓾ ꓬꓳ-ꓦ ꓔꓯ ꓣꓴ ꓢꓲ ꓠꓬꓲ꓾ ꓐꓱ ꓓꓴꓽ ꓗꓪ ꓞꓳꓹ ꓔ_ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓠꓽ ꓧꓶꓸ ꓕꓯ ꓡꓰ ꓩꓴ-ꓡꓳ-ꓓꓲ ꓔꓯ ꓫꓺ ꓔ_ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓳ-ꓡꓰ ꓩꓴ-ꓡꓲ ꓔꓯ꓾ ꓠꓴ ꓠꓬꓲ ꓤ ꓬꓲ ꓤ ꓟꓶ ꓔꓯ ꓫꓺ_ ꓟ ꓠꓬ꓾ ꓟꓽ ꓓ ꓟ ꓥ ꓡꓳ꓾ ꓐꓯ_ ꓡꓳ꓿ ꓖꓳ ꓡꓱ ꓠꓬ ꓩꓴ-ꓡꓳ-ꓓꓲ ꓬꓲ ꓔꓯ ꓠꓲꓹ ꓟ ꓦꓶ ꓢꓲ ꓬꓲ ꓔꓯ ꓢꓰꓼ ꓠꓲꓹ ꓫꓵ_ ꓡꓳ꓿ ꓖꓳ ꓡꓱ ꓥ_ ꓟꓲ ꓬꓲ ꓔꓯ ꓢꓰꓼ ꓟꓽ ꓪ꓿ ꓮ ꓡꓲꓳ ꓐꓯ ꓠꓬ ꓬꓳ-ꓦ ꓠꓽ ꓙꓲ ꓫꓬ_ ꓟ_ ꓐꓰ ꓢꓲ ꓫꓬ_ ꓟ ꓡ ꓞꓳ ꓥ ꓟ ꓩꓴ-ꓡꓲ ꓢꓷ_ ꓠꓬꓲ꓾ ꓬꓲ ꓔꓯ ꓙꓳꓺ ꓢꓲ꓾ ꓮ ꓡꓲ ꓟꓽ ꓗꓷ ꓡꓰ ꓝꓲ꓿ ꓬꓳ-ꓦ ꓐꓯ_ ꓟ ꓔꓯ ꓩꓴ-ꓡꓲ ꓠ ꓠꓹ ꓟꓶ ꓠꓬ꓾ ꓬꓲ ꓮ ꓘꓶꓸ ꓓꓵ ꓙ ꓟꓬꓽ_ ꓡꓳ꓿ ꓖꓳ ꓡꓱ ꓥ_ ꓟꓲ ꓬꓲ ꓔꓯ ꓠꓲꓹ ꓒꓴ ꓒꓴ_ ꓐꓰ ꓠ ꓠꓹ_ ꓡꓳ꓿ ꓩꓴ-ꓡꓲ ꓬꓲ ꓦꓵꓻ ꓦꓬꓼ ꓠꓬꓲ ꓗꓪ꓾ ꓬꓲ ꓢꓲꓽ ꓒ ꓐꓴ_ ꓐꓰ꓾ ꓟꓯꓼ ꓢꓲꓽ ꓒ ꓐꓴ_ ꓐꓰ꓾ ꓖ-ꓡꓲ-ꓡꓲ ꓟꓵꓽ ꓗꓪ ꓟ ꓞꓳ ꓪꓴꓽ ꓞꓳ ꓔꓲ ꓐꓴ ꓔꓯ ꓜꓻ ꓕꓲ ꓜꓽ ꓫꓳ_ ꓕꓯ꓾ ꓜꓳꓽ ꓡ_ ꓟ ꓦꓬꓼ ꓠꓬꓲ ꓛꓲ ꓡ_ ꓡꓳ꓿ ꓮ ꓡꓲꓳ ꓐꓯ ꓠꓬ ꓩꓴ-ꓡꓳ-ꓓꓲ ꓬꓲ ꓮꓸ ꓟꓲꓽ ꓓꓵ ꓙꓰ ꓢꓲ ꓗꓪꓺ ꓛꓰꓹ ꓟꓳꓸ ꓖꓶ ꓗꓷ ꓠꓬ꓾ ꓩꓴ-ꓡꓲ_ ꓐꓰ ꓬꓲ_ ꓐꓰ ꓕꓲ ꓪꓺꓼ ꓜ ꓜꓽ ꓢꓴ ꓮ ꓙꓵ ꓠꓲꓹ ꓒꓴ ꓠꓬꓲ꓾ ꓪ ꓔꓲ ꓡꓰ ꓤ ꓟꓶ ꓡꓯꓸ ꓔꓯ꓾ ꓠꓴ ꓮ ꓫꓵ ꓠꓵ_ ꓟꓲ ꓥꓪ ꓔꓯ ꓓꓰꓽ_ ꓠꓬ ꓥꓪ ꓠꓴ ꓔꓯ ꓖꓶ_ ꓥꓳ꓾ ꓐꓰ ꓐꓯ ꓗꓷꓳ꓿ ꓖꓳ ꓟ_ ꓡꓰ ꓟꓽ ꓞꓲ ꓤ ꓟꓶ ꓡꓯꓸ ꓟꓲ ꓙꓬ ꓗꓪ ꓬꓲ ꓪꓵꓼ ꓢꓲ꓾ ꓠꓴ ꓮ ꓫꓵ_ ꓟꓲ ꓥꓪ ꓔꓯ ꓓꓰꓽ_ ꓠꓬ꓾ ꓥꓪ ꓗꓴꓷꓼ ꓕꓲ ꓐꓶꓽ ꓛꓲ ꓥ_ ꓟꓲ꓾ ꓥꓪ ꓠꓴ ꓔꓯ ꓖꓶ_ ꓥꓳ꓾ ꓐꓰ ꓙꓱꓽ ꓪꓵꓼ_ ꓡꓳ꓿ ꓖꓳ ꓡꓱ ꓠꓬ ꓤ ꓟꓶ ꓡꓯꓸ ꓓꓳ ꓙꓰ ꓢꓲ ꓬꓲ ꓟꓹ ꓟ ꓔꓯ꓾ ꓥꓪ ꓮ ꓫꓵ ꓓꓰꓽ ꓬꓰ ꓓꓳꓺꓽ꓾ ꓐꓯ_ ꓡꓳ꓿ ꓖꓳ ꓡꓱ ꓠꓬ ꓬꓲ ꓡꓰ꓾ ꓖꓳ ꓓꓱ ꓔꓲꓹ ꓖꓶ ꓢꓴ ꓬꓳ-ꓦ ꓪꓴꓸ ꓓꓵ ꓓꓰꓽ ꓬꓰ꓾ ꓐꓯ_ ꓡꓳ꓿ ꓬꓲ ꓠꓬ ꓞꓼ ꓐꓰ ꓪ ꓔꓲ ꓔꓬ ꓗꓪ ꓞꓽ ꓞꓽ_ ꓡꓰ ꓓꓵꓽ ꓡꓰ ꓢꓲ ꓕꓱ ꓡꓱ ꓓꓰꓽ_ ꓡꓳ꓾ ꓖꓳ ꓓꓱ ꓔꓲꓹ ꓖꓶ ꓢꓴ ꓬꓳ-ꓦ ꓪꓴꓸ ꓓꓵ꓾ ꓠꓴ ꓮ ꓟꓶ ꓬꓲ ꓕꓱ ꓡꓱ ꓐꓯꓻ ꓗꓪ ꓗꓶꓺ ꓖꓶ ꓡ_ ꓟ ꓥꓪ ꓠꓵ_ ꓡꓳ꓾ ꓐꓯ_ ꓡꓳ꓿ ꓖꓳ ꓡꓱ ꓠꓬ ꓪ ꓔꓲ ꓠꓲꓹ ꓟ ꓮ ꓘꓶ ꓫꓸ_ ꓡꓳ꓿ ꓖꓳ ꓡꓱ ꓥ_ ꓟꓲ ꓬꓲ ꓪꓵꓼ ꓘꓶꓽ_ ꓐꓰ ꓬꓲ_ ꓐꓰ ꓕꓲ ꓪꓺꓼ ꓜ ꓜꓽ ꓔꓬ ꓢꓴ ꓪꓴꓸ ꓠꓬꓲ꓾ ꓬꓲ ꓔꓯ ꓟꓽ ꓖꓶ ꓐꓰ ꓢꓸ ꓬꓰꓽ ꓠꓲꓹ ꓟꓽ ꓫꓵ꓿ ꓖꓳ ꓡꓱ ꓠꓬ ꓞꓼ ꓐꓰ ꓪ ꓔꓲ ꓡꓰ ꓬꓲ ꓔ ꓙ ꓟꓯꓼ ꓕꓲ ꓣꓳ ꓝꓲ ꓩꓴ ꓗꓷ ꓢꓲ꓾ ꓬꓳ-ꓦ ꓪꓴꓸ ꓓꓵ ꓔꓯꓹ ꓡ ꓠꓹ ꓟ ꓕꓵꓼ ꓪ ꓖꓶ_ ꓡꓳ꓿ ꓖꓳ ꓡꓱ ꓠꓬ ꓬꓲ ꓠꓽ ꓐꓱ ꓓꓴꓽ ꓗꓪ ꓙꓰ ꓢꓲ꓾ ꓬꓳ-ꓦ ꓪꓴꓸ ꓓꓵ ꓓꓶꓺ ꓗꓷ_ ꓡꓳ꓿ ꓬꓲ ꓪꓴꓸ ꓓꓵ ꓠꓬ ꓐꓯꓻ ꓗꓪ ꓗꓶꓺ ꓔꓯꓹ ꓡ ꓢꓲ꓾ ꓤ ꓟꓶ ꓡꓯꓸ ꓔꓯ ꓖꓶ ꓢꓲ ꓠꓬꓲ꓾ ꓤ ꓟꓶ ꓡꓯꓸ ꓠꓬ ꓬꓲ ꓟꓹ ꓟ ꓔꓯ ꓖꓶ_ ꓡꓳ꓿ ꓬꓳ-ꓦ ꓬꓲ ꓛꓳ ꓒꓯ ꓐꓴ ꓑ ꓙ ꓗꓷ ꓠꓬ꓾ ꓬꓲ ꓪ ꓡ ꓢꓲ꓾ ꓬꓲ ꓫꓵꓻ ꓟꓳꓻ ꓔꓯꓹ ꓙꓰ ꓢꓲ ꓠꓬꓲ꓾ ꓡꓱ ꓜꓴ ꓠꓯꓸꓼ ꓗꓪ ꓗꓶꓺ ꓔ_ ꓡꓳ꓿

 

Add new comment

14 + 1 =