ꓶꓸꓹ ꓟꓯꓸꓹ ꓢꓴ ꓪꓴꓽ ꓧꓶ ꓠꓽ ꓟꓶ ꓠꓹꓟ

ꓟ-ꓕꓲ ꓕꓳꓽ ꓶ 11: 28-30

ꓢꓯꓼ ꓕꓵꓼ ꓪꓴ ꓧꓶ ꓢꓲ꓾ ꓡꓲꓽ_ ꓟ ꓶꓻ ꓓꓽ ꓟ ꓟꓯꓻ ꓢꓴ ꓠꓴ ꓪ ꓮ ꓙꓵ ꓠꓬ ꓥꓪ ꓔꓯ ꓡꓯ꓿ ꓖꓳ ꓡꓱ ꓠꓬ ꓥꓪ ꓠꓴ ꓪ ꓔꓯ ꓪꓴꓽ ꓧꓶ ꓠꓽ ꓝꓲ_ ꓥꓳ꓿ ꓥꓪ ꓮꓸ ꓑꓶ ꓟꓯꓻ ꓢꓲ ꓥꓪ ꓔꓯ ꓢꓳꓺ ꓡꓯ꓿ ꓮ ꓡꓲꓳ ꓐꓯ ꓠꓬ ꓥꓪ ꓠꓲꓹ ꓟ ꓠꓬ ꓠꓴꓽ ꓢꓲ ꓙꓻ ꓣꓳꓽ_ ꓡꓳ꓿ ꓖꓳ ꓡꓱ ꓠꓬ ꓠꓴ ꓪ ꓶꓻ ꓟꓬ ꓐꓱ ꓶ ꓪꓴꓽ ꓧꓶ ꓠꓽ ꓖꓴ ꓧꓪ ꓟꓶ_ ꓥꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓮꓸ ꓑꓶ ꓠꓽ ꓟꓯꓻ ꓢ_ ꓡꓳ꓾ ꓥꓪ ꓶꓻ_ ꓟꓲ ꓡꓳꓻ_ ꓡꓳ꓾ ꓐꓯ_ ꓡꓳ꓿

ꓓꓳ ꓙꓰ ꓕꓳꓽ ꓶ 3: 13-20

 ꓖꓳ ꓡꓱ ꓠꓬ ꓟꓳ-ꓫꓲ ꓡꓰ ꓪꓴ-ꓢ ꓔꓯ꓾ ꓥꓪ ꓠꓬ ꓬꓲ-ꓢꓷ-ꓡꓰ ꓡ ꓞꓳ ꓔꓬ ꓗꓪ ꓛꓲ ꓬꓰ ꓢꓲ ꓬꓲ ꓪ ꓔꓯ꓾ ꓠꓴ ꓪ ꓒꓵꓽ ꓒ ꓐꓴ ꓬꓲ ꓪ ꓪꓴ-ꓢ ꓡꓰ ꓥꓪ ꓔꓯ ꓠꓴ ꓪ ꓔꓬ ꓗꓪ ꓝꓲ ꓩꓴ ꓡ_ ꓡꓳ꓾ ꓐꓰ ꓐꓯ ꓖꓶ ꓗꓷ ꓠꓬ꓾ ꓬꓲ ꓪ ꓡꓰ ꓥꓪ ꓔꓯ꓾ ꓬꓲ ꓟꓬꓱꓺ ꓮ ꓡꓲ ꓟꓬꓱꓺ ꓔ_ ꓡꓳꓺꓽ꓾ ꓐꓰ ꓠ ꓠꓬꓲ ꓡ_ ꓠꓬ꓾ ꓥꓪ ꓬꓲ ꓪ ꓔꓯ ꓮ ꓡꓲ ꓐꓯ ꓖꓶ ꓠꓯ_ ꓡꓳꓺꓽ꓾ ꓐꓯ_ ꓡꓳ꓿ ꓖꓳ ꓡꓱ ꓠꓬ ꓪꓴ-ꓢ ꓡꓰ ꓟꓳ-ꓫꓲ ꓔꓯ꓾ ꓥꓪ ꓠꓬ ꓥꓪ ꓙꓵꓽ ꓥꓪ ꓟꓴ ꓙꓳ ꓔꓬ ꓢꓴ ꓥ ꓡꓳ꓾ ꓐꓯ_ ꓡꓳ꓿ ꓠꓴ ꓠꓬ ꓬꓲ-ꓢꓷ-ꓡꓰ ꓡ ꓞꓳ ꓔꓯ ꓕꓱ ꓡꓱ ꓐꓯ ꓖꓶ꓾ ꓥꓪ ꓙꓵꓽ ꓥꓪ ꓟꓴ ꓙꓳ ꓔꓬ ꓢꓴ꓾ ꓐꓰ ꓐꓯ_ ꓟ ꓖꓳ ꓕꓲ ꓣꓳ ꓡꓰ ꓥꓪ ꓔꓯ ꓠꓴ ꓪ ꓔꓬ ꓗꓪ ꓝꓲ ꓩꓴ ꓡ_ ꓡꓳ꓾ ꓐꓯ ꓖꓶ꓾ ꓐꓰ ꓐꓯ_ ꓡꓳ꓿ ꓪꓴ-ꓢ ꓠꓬ ꓟꓳ-ꓫꓲ ꓔꓯ ꓕꓱ ꓡꓱ ꓐꓯ_ ꓢꓰꓽ ꓡꓳ꓾ ꓠꓴ ꓠꓬ ꓬꓲ-ꓢꓷ-ꓡꓰ ꓡ ꓞꓳ ꓔꓯ ꓕꓱ ꓡꓱ ꓐꓯ ꓖꓶ꓾ ꓠꓴ ꓪ ꓒꓵꓽ ꓒ ꓐꓴ ꓬꓲ ꓪ ꓬꓰ-ꓧꓳ-ꓧꓪ ꓪꓴ-ꓢ꓾ ꓮ-ꓐ-ꓡ-ꓦ ꓬꓲ ꓪꓴ-ꓢ_ ꓐꓰ꓾ ꓬꓲ-ꓢ ꓬꓲ ꓪꓴ-ꓢ_ ꓐꓰ꓾ ꓬ-ꓗꓴ ꓬꓲ ꓪꓴ-ꓢ ꓡꓰ ꓥꓪ ꓔꓯ ꓠꓴ ꓪ ꓔꓬ ꓗꓪ ꓝꓲ ꓩꓴ ꓡ_ ꓡꓳ꓿ ꓬꓰ-ꓧꓳ-ꓧꓪ ꓕꓱ ꓟ ꓠꓬ ꓕꓲ ꓞꓲ ꓕꓲ ꓑ ꓗꓪ ꓛꓲ ꓥꓪ ꓟꓬꓱꓺ ꓥ ꓢꓲ꓾ ꓕꓲ ꓤꓶ ꓡꓰ ꓕꓲ ꓤꓶ ꓗꓪ ꓥꓪ ꓔꓯ ꓓꓵꓽ ꓙ ꓛꓲ ꓡ ꓓꓴ ꓥ ꓡꓳ꓿ ꓙꓰ ꓨ꓾ ꓬꓲ-ꓢꓷ-ꓡꓰ ꓞꓳ ꓪꓴ ꓞꓳ ꓔꓲ ꓐꓴ ꓔꓯ ꓘꓴ ꓜꓲꓼ ꓡ ꓢꓲ꓾ ꓬꓲ ꓪ ꓔꓯ ꓕꓱ ꓡꓱ ꓐꓯ ꓖꓶ꓾ ꓠꓴ ꓪ ꓒꓵꓽ ꓒ ꓐꓴ ꓬꓲ ꓪ ꓬꓰ-ꓧꓳ-ꓧꓪ ꓪꓴ-ꓢ꓾ ꓮ-ꓐ-ꓡ-ꓦ ꓬꓲ ꓪꓴ-ꓢ_ ꓐꓰ꓾ ꓬꓲ-ꓢ ꓬꓲ ꓪꓴ-ꓢ_ ꓐꓰ ꓬ-ꓗꓴ ꓬꓲ ꓪꓴ-ꓢ ꓠꓬ ꓥꓪ ꓔꓯ ꓟꓳꓸ ꓖꓶ ꓡ ꓢꓲ ꓕꓱ ꓡꓱ ꓐꓯ_ ꓡꓳ꓾ ꓥꓪ ꓠꓬ ꓚꓵ ꓚꓵ ꓠꓴ ꓪ ꓔꓯ ꓠꓬꓲ ꓙ ꓗꓷꓳ꓿ ꓬꓲ-ꓙꓲ ꓟꓵꓽ ꓢꓴ ꓡꓰ ꓠꓴ ꓪ ꓔꓯ ꓬꓰ ꓖꓶ_ ꓟ ꓮ ꓙꓵ ꓔꓯ ꓥꓪ ꓟꓳꓻ ꓗꓷꓳ꓿ ꓖꓳ ꓡꓱ ꓢꓲ ꓥꓪ ꓠꓬ ꓠꓴ ꓪ ꓔꓯ ꓬꓲ-ꓙꓲ ꓟꓵ ꓗꓪ ꓟ ꓫꓸ ꓙꓵ ꓓꓴ ꓗꓪ ꓐꓰ ꓧꓳꓽ ꓓꓳ ꓡ ꓢꓲ꓾ ꓘꓷ-ꓠ ꓡ ꓞꓳ_ ꓐꓰ꓾ ꓧꓷ-ꓕꓷ ꓡ ꓞꓳ_ ꓐꓰ꓾ ꓬ-ꓟꓳ-ꓡꓲ ꓡ ꓞꓳ_ ꓐꓰ꓾ ꓒꓱ-ꓡꓲ-ꓜꓲ ꓡ ꓞꓳ_ ꓐꓰ꓾ ꓫꓲ-ꓪꓰ ꓡ ꓞꓳ_ ꓐꓰ ꓙꓱ-ꓑꓴ-ꓢꓶ ꓡ ꓞꓳ ꓟꓵꓽ꓾ ꓮ ꓚꓵꓹ_ ꓐꓰ ꓐꓬꓽ ꓬꓲꓻ_ ꓟ ꓟꓵ ꓗꓪ ꓧꓳꓽ ꓛꓲ ꓬꓰ_ ꓥꓳ꓾ ꓐꓰ ꓖꓶ ꓙ ꓟꓳ ꓡꓻꓳ꓾ ꓐꓰ ꓬꓲ ꓪ ꓔꓯ ꓐꓯ ꓖꓶ꓿ ꓖꓳ ꓡꓱ ꓠꓬ ꓬꓲ ꓪ ꓠꓽ ꓠꓴ ꓐꓯ ꓘꓶ ꓔꓯ ꓠ ꓠꓹ ꓥꓳ꓿ ꓠꓴ ꓠꓬ ꓬꓲ-ꓢꓷ-ꓡꓰ ꓞꓳ ꓪꓴ ꓞꓳ ꓔꓲ ꓐꓴ_ ꓐꓰ ꓕꓲ ꓛꓳ_ ꓙꓰ ꓢꓲ꓾ ꓬꓲ-ꓙꓲ ꓪ ꓔꓲ ꓔꓯ ꓕꓱ ꓡꓱ ꓐꓯ ꓖꓶ꓾ ꓦꓲ-ꓐꓱ-ꓣꓴ ꓡ ꓞꓳ ꓥꓪ ꓠꓴ ꓬꓰ-ꓧꓳ-ꓧꓪ ꓪꓴ-ꓢ ꓠꓬ ꓥꓪ ꓠꓴ ꓔꓯ ꓔꓳꓹ ꓜꓳ ꓡꓻꓳ꓾ ꓖꓳ ꓡꓱ ꓠꓬꓲ ꓬꓰ-ꓧꓳ-ꓧꓪ ꓥꓪ ꓠꓴ ꓪꓴ-ꓢ ꓔꓯ ꓔꓲ ꓓꓴ ꓢꓰꓼ ꓔꓲ ꓖꓶ ꓠꓹ ꓟ꓾ ꓮ ꓟꓶ ꓥꓪ ꓠꓴꓽ ꓔꓯ ꓠꓬ ꓡꓲ ꓛꓲ ꓗꓪ ꓢꓽ ꓠꓬꓲ ꓙ ꓖꓴ ꓙꓰ ꓝꓲ ꓡꓯ꓾ ꓐꓰ ꓠꓴ ꓔꓯ ꓓꓰꓽ_ ꓡꓳ꓾ ꓐꓰ ꓐꓯ ꓖꓶ꓿ ꓖꓳ ꓡꓱ ꓥ_ ꓟꓲ ꓪꓽ ꓠꓬꓲ_ ꓟ ꓡꓯ ꓒꓯ ꓟꓽ ꓣꓱ ꓠꓬ꓾ ꓬꓲ-ꓙꓲ ꓪ ꓔꓲ ꓡꓰ ꓠꓴ ꓪ ꓔꓯ ꓟꓽ ꓩꓴ ꓗꓷ ꓟ ꓥꓪ ꓢꓷ_ ꓡꓳ꓿ ꓖꓳ ꓡꓱ ꓠꓬꓲ ꓥꓪ ꓠꓬ ꓡꓯ ꓒꓯ ꓛꓱ ꓓꓳ ꓡ ꓢꓲ꓾ ꓬꓲ-ꓙꓲ ꓡ ꓞꓳ ꓗꓳ ꓡꓳ ꓗꓪ ꓥꓪ ꓬꓰ_ ꓐꓰ ꓬꓰ_ ꓟ ꓓꓵ ꓙ ꓟꓶ ꓓꓴ ꓮ ꓙꓵ ꓟ ꓗꓪ ꓐꓰ ꓬꓲ-ꓙꓲ ꓟꓵ ꓔꓯ ꓓꓶꓽ_ ꓥꓳ꓿ ꓖꓳ ꓗ ꓠꓯ ꓢꓲ_ ꓡꓰꓽ ꓬꓲ ꓠꓬ ꓠꓴ ꓪ ꓔꓯ ꓩꓴ ꓗꓷ_ ꓥꓳ꓿