ꓡꓲ ꓒꓲꓼ ꓠꓯꓼ ꓗꓪ ꓚꓲ ꓛꓬ ꓠꓲꓹ ꓫꓵ_ ꓟ ꓡꓰ ꓐꓰ ꓟꓽ ꓐ ꓡ_ ꓟ ꓬꓰ ꓐ ꓡ_ ꓟ

ꓡꓲ ꓒꓲꓼ ꓐꓰ ꓫꓹ ꓕꓱˍ ꓟ ꓙꓵ, ꓗꓪ ꓠꓬ ꓘꓴ-ꓜꓲ ꓞꓳ ꓡꓰ ꓟ. ꓖꓶ ꓡ ꓟ ꓛꓳ ꓙꓳ ꓢꓯꓸ ꓔꓬ ꓚꓱꓹ ꓠꓯꓼ ꓗꓪ ꓚꓳ ꓡꓲ ꓒꓲꓼ ꓠꓯꓼ ꓗꓪ ꓚꓲ ꓛꓬ ꓠꓲꓹ ꓫꓵ_ ꓟ ꓡꓰ ꓐꓰ ꓟꓽ ꓐ ꓡ_ ꓟ ꓬꓰ ꓐ ꓡ_ ꓟ ꓐꓯ ꓟ ꓙꓵꓽ ꓪ ꓐꓯ ꓟ ꓔꓯ ꓪꓴ ꓓꓵ ꓚꓹ ꓢꓲ ꓐꓯ ꓓꓴ ꓥꓳ= ꓡꓲ ꓒꓲꓼ ꓐꓯ ꓟ ꓠꓬ ꓞꓳ ꓤ ꓕꓲ ꓣꓳ ꓐꓱ ꓶ ꓞꓳ ꓫꓵꓽ ꓕꓲ ꓫꓵ ꓐꓱ ꓶ ꓗꓴꓷꓼ ꓕꓲ ꓗꓴꓷꓼ ꓐꓱ ꓶ ꓮ ꓘꓶꓸ ꓬꓳꓹ ꓚꓵ ꓟ ꓥ ꓪ= ꓡꓲ ꓒꓲꓼ ꓗꓪ ꓐꓰ ꓣꓳ ꓢꓯꓸ ꓔꓬ ꓟ ꓣꓳ ꓪꓴ ꓡ ꓟꓴ ꓡ ꓟ ꓖꓳ ꓟ ꓡꓰ ꓟ ꓞꓲ ꓕꓱ ꓕꓲ ꓙꓵꓹ ꓗꓪ ꓣꓳ ꓮ ꓡꓰ ꓢꓲ ꓢꓯꓸ ꓔꓬ ꓟ ꓔꓯ ꓟꓸ ꓖꓶ ꓐ ꓡ ꓢꓷꓸ ꓝꓲ ꓐ ꓡ ꓡꓳ= ꓡꓲ ꓒꓲꓼ ꓐꓯ ꓟ ꓠꓬ ꓞꓳ ꓤ ꓐꓰ ꓕꓲ ꓪꓽ ꓙꓳˍ ꓟ ꓪꓴꓸ ꓠꓬꓲ ꓡꓲ ꓒꓲꓼ ꓔꓯ ꓞꓳ ꓤ ꓗꓪ ꓐꓰ ꓧꓹ ꓗꓷ ꓟꓽ ꓐ ꓡ= ꓖꓳ ꓟ ꓪꓴꓸ ꓠꓬꓲ ꓞꓳ ꓤ ꓪ ꓙꓵꓽ ꓪ ꓐꓯ ꓕꓯ ꓠꓬ ꓞꓳ ꓫꓵ ꓕꓲ ꓫꓵ ꓡꓲ ꓕꓲ ꓫꓵ ꓬꓲ ꓪ ꓡꓲ ꓒꓲꓼ ꓔꓯ ꓮ ꓕꓯ ꓥ ꓟꓲ ꓒꓵꓽ ꓗꓹ ꓬꓰ ꓢꓲ ꓠꓬꓲ ꓬꓲ ꓪ ꓡꓲ ꓒꓲꓼ ꓔꓯ ꓮ ꓕꓯ ꓥ ꓟꓲ ꓢꓴ ꓔꓯ ꓟꓸ ꓐ ꓡ ꓠ ꓢꓴ ꓟꓲ ꓙꓬ ꓗꓪ ꓬꓰ ꓐ ꓡ ꓠꓹ ꓟ ꓐꓱ ꓶ ꓪ ꓙꓵꓽ ꓪ ꓙꓳ ꓠ ꓔ ꓡꓳ=ꓕꓱ ꓡꓱ ꓬꓰˍ ꓕꓯ ꓢꓴ ꓔꓯ ꓙꓳꓺ ꓓꓴ ꓟꓽ ꓙꓳ ꓒꓴ ꓒꓴ ꓡꓯ ꓡꓯ ꓬꓰ ꓐ ꓡ ꓟ ꓙꓳ ꓠ ꓔ ꓡꓳ=

ꓞꓳ ꓫꓵꓽ ꓞꓳ ꓙꓲ ꓮ ꓟꓬꓹ ꓙꓳ ꓟ ꓗꓴꓷꓼ ꓠꓯꓼ ꓗꓪ ꓔꓬ ꓢꓴ ꓞꓳ ꓫꓵꓽ ꓞꓳ ꓙꓲ ꓐꓴ ꓠꓬ ꓞꓳ ꓫꓵꓽ ꓟꓽ ꓓ ꓟꓬ ꓖꓴ ꓡꓰ ꓢꓴ ꓬꓲ ꓪ ꓡꓲ ꓒꓲꓼ ꓔꓯ ꓗꓴꓷꓼ ꓡꓲ ꓒꓲꓼ ꓐꓰ ꓕꓱ ꓡꓱ ꓢꓪꓼ ꓢꓲ ꓠꓬꓲ ꓬꓰ ꓝꓲ_ ꓟ ꓖꓳ ꓟ ꓡꓲ ꓒꓲꓼ ꓡꓰ ꓐꓰ ꓔꓬ ꓝꓲ_ ꓟ ꓙꓳ ꓡꓳ= ꓵꓸꓹ ꓣꓳ ꓟꓽ ꓟꓬ ꓟ ꓞꓳ ꓣꓳ ꓞꓳ ꓫꓵꓽ ꓐꓴ ꓡꓲ ꓒꓲꓼ ꓔꓯ ꓠꓬꓒꓴ ꓒꓴ ꓡꓯ ꓡꓯ ꓟꓽ ꓬꓰ ꓟ꓾ ꓬꓰ ꓝꓲ_ ꓟ ꓟꓽ ꓖꓶ ꓝꓲ ꓟ ꓕꓱ ꓡꓱ ꓫꓵꓽ ꓙꓳ ꓡꓳ= ꓵꓸꓹ ꓣꓳ ꓟꓽ ꓟꓬ ꓟ ꓞꓳ ꓫꓵꓽ ꓐꓴ ꓫꓸ ꓪ ꓬꓲ ꓪ ꓣꓱꓽ ꓡ ꓟ ꓡꓲ ꓒꓲꓼ ꓥ ꓕ ꓑꓳꓸ ꓔꓯ ꓖꓳ ꓟ ꓡꓰ ꓟ ꓞꓲ ꓬꓲ ꓪ ꓕꓳ ꓶ ꓔꓯ ꓥ ꓟꓲ ꓤ ꓠꓱ ꓐꓴ ꓔꓯ ꓟꓸ ꓖꓶ ꓠꓹ ꓟ ꓐꓰ ꓕꓳ ꓶ ꓫꓬꓹ ꓠꓹ ꓟ ꓕꓱ ꓡꓱ ꓫꓵ ꓑꓶ ꓔ ꓟ_ ꓟꓲ ꓗꓴꓷꓼ ꓘꓴꓽ ꓗꓪ ꓙꓳˍ ꓡꓳ= ꓚꓵ ꓚꓵ ꓐꓯ ꓠꓬ ꓕꓱ ꓡꓱ ꓬꓰ ꓟ ꓑꓶ ꓓꓴ ꓵꓸꓹ ꓢꓴ ꓟꓽ ꓟꓬ ꓟ ꓞꓳ ꓫꓵꓽ ꓐꓴ ꓔꓯ ꓐꓬ ꓡꓰ ꓠ ꓬꓰ_ ꓟ ꓥ ꓡꓳ=

 ꓬꓲ ꓪ ꓚꓺ ꓟꓲ ꓟꓽ ꓙꓳ ꓡꓰ ꓠ ꓬꓰ_ ꓟ ꓬꓲ ꓪ ꓫꓸ ꓪ ꓟꓽ ꓙꓳ ꓡꓰ ꓠ ꓬꓰ_ ꓟ ꓬꓲ ꓪ ꓮꓽ ꓠꓱ ꓗꓪ ꓐꓰ ꓮ ꓟꓶ ꓗꓪ ꓛꓲ  ꓣꓱꓽ ꓡ ꓟ ꓡꓲ ꓒꓲꓼ ꓗ ꓟꓲꓽ ꓮ ꓙꓵ ꓟꓶꓽ ꓡꓰ ꓝꓲ ꓟ ꓕꓱ ꓡꓱ ꓗꓷ ꓡꓰ ꓢꓲ꓾ ꓞꓳ ꓫꓵꓽ ꓥ ꓟꓲ ꓟꓶꓽ ꓡꓰ ꓠ ꓕꓱ ꓡꓱ ꓬꓰ ꓟ ꓥ ꓪ= ꓖꓳ ꓟ ꓑꓶ ꓓꓴ ꓠꓬꓲ  ꓡꓲ ꓒꓲꓼ ꓬꓲ ꓒꓵꓽ ꓔꓯ ꓣꓳ ꓠꓬ  ꓟꓬ ꓠꓬꓲ ꓐꓭ ꓠꓬꓲ ꓒꓵꓽ ꓗꓹ ꓬꓰ ꓢꓲ ꓠꓬ ꓘꓳꓹ ꓣꓴ ꓢꓲ ꓠꓬꓲ ꓞꓳ ꓫꓵꓽ ꓕꓲ ꓫꓵꓽ ꓬꓲ ꓪ ꓙꓵ ꓔꓬ ꓟ ꓙꓵꓻ  ꓠꓲꓹ ꓔꓯ ꓥ ꓟꓲ ꓮ ꓕꓯ ꓥ ꓟꓲ ꓡꓳꓸ ꓙ ꓠꓬꓲ ꓙ ꓔ ꓙ ꓖꓶ ꓢꓲ꓾ ꓡꓳꓸ ꓙ ꓠꓹ ꓟ ꓬꓳꓹ ꓚꓵ_ ꓡꓳ=  ꓖꓳ ꓟ ꓡꓰ ꓐꓰ ꓕꓱ ꓡꓱ  ꓵꓸꓹ ꓣꓳ ꓟꓽ ꓟꓬ ꓟ ꓞꓳ ꓫꓵꓽ ꓐꓴ ꓠꓬ ꓬꓲ ꓪ ꓡꓲ ꓒꓲꓼ ꓬꓲ ꓪ ꓫꓸ ꓪ ꓬꓲ ꓪ ꓕꓳ ꓶ ꓬꓲ ꓪ ꓙꓵꓻ ꓠꓲꓹ ꓔꓯ ꓟꓽ ꓐꓬ ꓡꓰ ꓠ ꓡꓳꓸ ꓙ ꓟ ꓗꓪ ꓐꓰ ꓢꓰꓼ ꓡꓯꓼ ꓘꓳ ꓓꓶꓽ ꓡꓯ ꓘꓳ ꓓꓴ ꓗꓴꓷꓼ ꓘꓴꓽ ꓗꓪ ꓕꓱ ꓡꓱ ꓔꓳꓹ ꓜꓳ ꓡ ꓟ ꓥ ꓡꓳ=