ꓢꓴ-ꓩꓲ ꓐꓰ ꓙꓲ-ꓧꓮꓓ (Dialogue with other Religions)

ꓢꓴ-ꓩꓲ ꓐꓯꓹ ꓟ ꓠꓬ ꓮ-ꓡ ꓪꓴ-ꓢ ꓠꓵ ꓠꓲꓹ ꓐꓰ ꓙꓽ ꓜꓲꓼ ꓠꓲꓹ ꓢꓷꓸ ꓠꓲꓹ ꓔꓯ ꓪꓴꓸ ꓓꓵ ꓛꓹ ꓢꓲ ꓧꓪꓹ ꓟ ꓟꓬꓱꓽ ꓬꓰˍ ꓟ ꓬꓲ ꓜꓴ ꓬꓲ ꓟꓯꓼ ꓔꓯ ꓐꓯꓹ ꓟ ꓥ ꓪ= ꓕꓱ ꓟ ꓬꓲ ꓜꓴ ꓬꓲ ꓟꓯꓼ ꓗꓪ ꓓꓵꓽ ꓟꓴ ꓫꓱꓹ ꓢꓴ ꓬꓲ ꓜꓴ ꓬꓲ ꓟꓯꓼ ꓘꓴ ꓗꓪ ꓐꓹ ꓢꓴ ꓮꓽ ꓙꓵꓽ ꓔꓯ ꓢꓴ-ꓩꓲ ꓐꓴ ꓐꓰ ꓕꓱ ꓡꓰ ꓐꓯ ꓔꓬꓹ ꓟ ꓥ ꓪ= ꓚꓵꓸ ꓛꓬꓽ ꓕꓲꓽ ꓞꓲꓼ ꓡꓱꓸꓼ ꓔꓯ ꓮ-ꓡ ꓪꓴ-ꓢ ꓐꓱ ꓶ ꓡꓯꓼ ꓙꓱˍ ꓟ ꓔꓳꓹ ꓙˍ ꓟ ꓟꓬꓱꓽ ꓬꓰ ꓠꓹ ꓟ ꓪꓽ ꓘꓴ ꓢꓯꓼ ꓕꓵꓼ ꓠꓹ ꓟ ꓐꓱ ꓶ ꓐꓯ ꓘꓶꓽ ꓛꓹ ꓢꓲ ꓛꓳ ꓠꓬꓲ ꓔ ꓟ ꓜꓴ ꓐꓴ ꓥˍ ꓡꓳ= ꓬꓲ ꓪꓽ ꓠꓬ ꓘꓴ ꓜꓲꓼ ꓞꓳ ꓬꓲ ꓫꓵꓼ ꓕꓲꓽ ꓟꓹ ꓔꓶ ꓡꓰꓹ ꓟ ꓠꓽ ꓟꓽ ꓥ= ꓟꓴ-ꓢ-ꓡꓲꓟ ꓢꓲꓺ ꓤꓼ ꓐꓴ ꓐꓯꓹ ꓟ ꓘꓴꓽ ꓗꓪ ꓟ ꓙꓵ ꓠꓲꓹ ꓚꓱꓹ ꓔꓯ ꓮꓽ ꓘꓶꓸ ꓢꓯꓹ ꓕꓵꓼˍ ꓟ ꓚꓵꓸ ꓛꓬ ꓕꓲꓽ ꓞꓲꓼ ꓡꓱꓸꓼ ꓔꓯ ꓪꓴ-ꓢ ꓠꓯꓸꓼ ꓗꓪ ꓡꓯꓽ ꓙꓱ ꓢꓲ ꓢꓯꓼ ꓕꓵꓼˍ ꓟ ꓬꓲ ꓜꓴ ꓬꓲ ꓟꓯꓼ ꓐꓴ ꓥˍ ꓡꓳ= ꓬꓲ ꓪꓽ ꓠꓬ ꓫ-ꓣꓲ-ꓬ ꓐꓯꓹ ꓟ ꓛꓳ ꓚꓱꓹ ꓔꓯ ꓟꓽ ꓛꓳꓹ ꓟ ꓠꓽ ꓟꓽ ꓥ= ꓫ-ꓣꓲ-ꓬ ꓐꓯꓹ ꓟ ꓠꓬ ꓲ-ꓢ-ꓡꓮꓟ ꓙꓵ ꓠꓲꓹ ꓔꓯ ꓔꓶ ꓢꓴ ꓟꓴ-ꓧ-ꓟꓮꓓ ꓡꓰ ꓐꓳ ꓔ ꓟ ꓛꓳ ꓚꓱꓹ ꓙꓵꓽ ꓗ ꓔꓯ ꓐꓯꓹ ꓟ ꓥ ꓪ= ꓬ-ꓔꓯ ꓐꓯꓹ ꓟ ꓮ ꓕꓯꓽ ꓥˍ ꓟꓲ ꓙꓵ ꓠꓲꓹ ꓚꓱꓹ ꓗꓪ ꓢꓯꓼ ꓕꓵꓼˍ ꓟ ꓪꓽ ꓘꓴ ꓢꓯꓼ ꓕꓵꓼˍ ꓟ ꓬꓲ ꓜꓴ ꓬꓲ ꓟꓯꓼ ꓥ ꓪ= ꓟꓬꓽ ꓠꓬꓲ ꓐꓶꓹ ꓠꓬꓲ ꓚꓵꓸ ꓛꓬꓽ ꓔꓵꓹ ꓚꓵꓸ ꓛꓬꓽ ꓥꓪ ꓠꓬ ꓦ ꓕꓲꓽ ꓒꓳꓹ ꓔꓯ ꓢꓲ ꓙꓵ ꓠꓲꓹ ꓚꓱꓹ ꓗꓪ ꓢꓯꓼ ꓕꓵꓼ ꓓꓴ ꓥꓳꓻ ꓐꓰ ꓓꓵꓽ ꓙꓽ ꓢꓲ ꓢꓯꓼ ꓕꓵꓼ ꓠꓹ ꓟ ꓐꓱ ꓶ ꓐꓯ ꓢꓲ ꓕꓱ ꓟ ꓜꓴ ꓠꓯꓸꓼ ꓗꓪ ꓓꓵꓹ ꓟ ꓥˍ ꓡꓳ= ꓟꓴ-ꓧ-ꓟꓮꓓ ꓫꓵ ꓗꓸ ꓠꓯꓸ ꓢꓲ ꓗꓪ ꓮꓓ 632 ꓘꓳꓼ ꓗꓪ ꓚꓳꓸ ꓓꓽ ꓪꓴꓸ ꓔꓴ ꓡꓹ ꓟ ꓬꓲ ꓜꓴ ꓬꓲ ꓟꓯꓼ ꓥˍ ꓡꓳ= ꓬꓲ ꓪꓽ ꓬꓲ ꓜꓴ ꓬꓲ ꓟꓯꓼ ꓔꓯ ꓟ ꓟꓽ ꓓ ꓔꓶ ꓐꓬꓱꓽ ꓠꓬ ꓙꓵ ꓠꓲꓹ ꓠꓯꓸꓼ ꓗꓪ ꓙꓵ ꓔꓬꓹ ꓢꓴ ꓮꓽ ꓙꓵꓽ ꓕꓲꓽ ꓠꓲꓹ ꓕꓲꓽ ꓪꓼ ꓟꓬꓱꓽ ꓬꓰ ꓢꓲ ꓢꓯꓼ ꓕꓵꓼ ꓠꓹ ꓟ ꓪꓴ-ꓢ ꓠꓱ ꓠꓲꓹ ꓠꓯꓸꓼ ꓗꓪ ꓕꓲꓽ ꓠꓲꓹ ꓕꓲꓽ ꓪꓼ ꓪꓽ ꓡꓯꓽ ꓘꓳ ꓫꓱꓹ ꓡꓯꓽ ꓘꓳ ꓢꓲ ꓦ ꓕꓲꓽ ꓒꓳꓹ ꓔꓯ ꓢꓲ ꓢꓯꓼ ꓕꓵꓼ ꓠꓹ ꓟ ꓐꓱ ꓶ 2ꓸ ꓙꓲ-ꓧꓮꓓ ꓐꓯꓹ ꓟ ꓬꓲ ꓟꓸ ꓟꓲꓽ ꓔꓯ ꓟꓬꓽ ꓠꓬꓲ ꓢꓷꓸ ꓡꓰ ꓠꓹ ꓟ ꓐꓱ ꓶ ꓢꓯꓼ ꓕꓵꓼ ꓠꓹ ꓟ ꓐꓱꓹ ꓶ 3ꓸ ꓫꓵꓽ ꓕꓲꓽ ꓫꓵꓽ ꓠꓬ ꓚꓵꓸ ꓛꓬꓽ ꓕꓲꓽ ꓞꓲꓼ ꓗꓪ ꓕꓲꓽ ꓠꓬꓲ ꓡꓰ ꓕꓲꓽ ꓠꓬꓲ ꓦ ꓕꓲꓽ ꓒꓳꓹ ꓔꓯ ꓢꓲ ꓢꓯꓼ ꓕꓵꓼˍ ꓟ ꓗꓪ ꓐꓰ ꓪꓴ-ꓢ ꓐꓰ ꓮ ꓕꓯꓽ ꓥˍ ꓟꓲ ꓝꓸ ꓡꓯꓽ ꓘꓳ ꓟꓶ ꓢꓲ ꓪꓴ-ꓢ ꓐꓰ ꓕꓲꓽ ꓪꓼ ꓔꓬ ꓟꓶ ꓠꓹ ꓟ ꓐꓱ ꓶ ꓢꓯꓼ ꓕꓵꓼ ꓠꓹ ꓟ ꓐꓱ ꓶ ꓥˍ ꓡꓳ= 

ꓢꓴ-ꓩꓲ ꓐꓯꓹ ꓟ ꓕꓱ ꓟ ꓬꓲ ꓜꓴ ꓬꓲ ꓟꓯꓼ ꓔꓯ ꓓꓽ ꓪꓴꓸ ꓒꓴꓹ ꓟ ꓔꓶꓸ ꓠꓬ ꓟꓶ-ꓓꓲ-ꓠ ꓡꓳ ꓒꓱ ꓗꓪ ꓥˍ ꓡꓳ= ꓟꓶ-ꓓꓲ-ꓠ ꓡꓳ ꓒꓱ ꓠꓬ ꓟꓴ-ꓧ-ꓟꓮꓓ ꓛꓰꓹ ꓙꓰ ꓢꓲ ꓲ-ꓢ-ꓡꓮꓟ ꓙꓵ ꓠꓲꓹ ꓔꓯ ꓓꓽ ꓪꓴꓸ ꓔꓶ ꓡꓹ ꓟ ꓕꓶꓸ ꓥˍ ꓡꓳ= ꓮ-ꓡꓲ ꓲ-ꓐꓮꓠ-ꓔ-ꓡꓲꓑ ꓐꓯꓹ ꓢꓴ ꓟ ꓡꓰ ꓓꓽ ꓪꓴꓸ ꓒꓴ ꓔꓴ ꓡꓹ ꓟ ꓬꓲ ꓜꓴ ꓬꓲ ꓟꓶꓼ ꓥˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓠꓲ ꓬꓲ ꓔꓯ ꓠꓬ ꓢꓴ-ꓩꓲ ꓢꓴ ꓠꓯꓸꓼ ꓗꓪ ꓐꓰ ꓓꓽ ꓪꓴꓸ ꓢꓲꓽ ꓫꓬ ꓢꓴꓺ ꓐꓰ ꓕꓱ ꓡꓰ ꓘꓳꓹ ꓣꓴ ꓔꓬꓹ ꓟ ꓥ ꓪ= ꓢꓴ-ꓩꓲ ꓐꓴ ꓟꓬꓱꓽ ꓬꓰꓹ ꓟ ꓢꓯꓼ ꓕꓵꓼˍ ꓟ ꓚꓱꓹ ꓔꓯ ꓙꓲ-ꓧꓮꓓ ꓐꓯꓹ ꓟ ꓥ ꓐꓶ= ꓙꓲ-ꓧꓮꓓ ꓐꓯꓹ ꓟ ꓠꓬ ꓢꓯꓼ ꓕꓵꓼ ꓠꓲꓹ ꓐꓯꓹ ꓟ ꓬꓲ ꓟꓸ ꓟꓲꓽ ꓓꓳꓹ ꓟ ꓕꓲꓽ ꓟ ꓥ ꓐꓶ= ꓙꓲ-ꓧꓮꓓ ꓐꓯꓹ ꓟ ꓠꓬ ꓢꓯꓼ ꓗꓷ ꓢꓲ ꓢꓯꓼ ꓕꓵꓼˍ ꓟ ꓢꓯꓼ ꓗꓷ ꓢꓲ ꓢꓯꓼ ꓕꓵꓼˍ ꓟ ꓬꓲ ꓟꓸ ꓟꓲꓽ ꓥ ꓐꓶ= ꓕꓱ ꓡꓰ ꓙꓲ-ꓧꓮꓓ ꓐꓯꓹ ꓟ ꓢꓯꓼ ꓗꓷ ꓢꓲ ꓢꓯꓼ ꓔꓵꓼ ꓢꓲ ꓟꓬꓱꓽ ꓬꓰ ꓠꓹ ꓟ ꓐꓱ ꓶ ꓐꓯ ꓘꓶꓽ ꓛꓹ ꓐ ꓡꓹ ꓢꓴ ꓕꓯ ꓟꓴ-ꓙ-ꓧꓲꓓ ꓐꓯꓹ ꓐꓶ= ꓖꓳ ꓟ ꓑꓶ ꓓꓴ ꓠꓲ ꓟꓴ-ꓙ-ꓧꓲꓓ ꓐꓯꓹ ꓟ ꓠꓬ ꓢꓯꓼ ꓗꓷ ꓢꓲ ꓢꓯꓼ ꓕꓵꓼ ꓐ ꓡꓹ ꓢꓴ ꓟꓬꓱꓽ ꓬꓰ ꓐ ꓡꓹ ꓢꓴ ꓐꓯꓹ ꓟ ꓬꓲ ꓟꓸ ꓟꓲ ꓥˍ ꓐꓶ= ꓖꓳ ꓡꓰ ꓥˍ ꓟꓲ ꓮꓽ ꓟꓬꓹ ꓔꓯ ꓠꓬ ꓟꓴ-ꓙ-ꓧꓲ-ꓓꓰꓠ ꓐꓯꓹ ꓟ ꓥ ꓪ= ꓢꓯꓼ ꓗꓷ ꓢꓲ ꓢꓯꓼ ꓕꓵꓼ ꓐ ꓡ꓾ ꓟꓬꓱꓽ ꓬꓰ ꓐ ꓡ ꓢꓴ ꓐꓴ ꓐꓯꓹ ꓟ ꓬꓲ ꓟꓸ ꓟꓲꓽ ꓥˍ ꓡꓳ=

ꓪꓴ-ꓢ ꓠꓲꓹ ꓡꓶꓽ ꓔꓯ ꓛꓳ ꓫꓱꓽ ꓐ ꓡ ꓠꓹ ꓟ ꓐꓱ ꓶ ꓠꓬ ꓢꓯꓼ ꓗꓷ ꓢꓲ ꓢꓯꓼ ꓕꓵꓼ ꓠ ꓗꓹ ꓡꓳ= ꓚꓵꓸ ꓛꓬꓽ ꓞꓲꓼ ꓔꓯ ꓡꓯꓼ ꓙꓱꓽ ꓠ ꓗ_ ꓡꓳ= ꓠꓲꓹ ꓟ ꓒꓳꓹ ꓡꓰꓼ ꓢꓲ ꓙꓽ ꓣꓳˍ ꓟ ꓠꓲꓹ ꓟ ꓠꓲꓹ ꓟ ꓙꓳ ꓠ ꓗˍ ꓡꓳ= ꓙꓲ-ꓧꓮꓓ ꓐꓯꓹ ꓟ ꓚꓱꓹ ꓔꓯ ꓗꓳ-ꓣꓮꓠ ꓢꓲꓽ ꓫꓬ ꓕꓳꓽ ꓶ ꓗꓪ ꓛꓳ ꓠꓲ ꓠꓬ 25ꓽ 52 ꓗꓪ ꓖꓳ ꓟ ꓑꓶꓸ ꓓꓴ ꓙꓵ ꓠꓲꓹ ꓟꓽ ꓙꓳ ꓢꓴ ꓐꓶꓽ ꓞꓳ ꓐꓴ ꓔꓯ ꓕꓯ ꓠ ꓠ= ꓬꓲ ꓪꓽ ꓔꓯ ꓮ ꓕꓯ ꓥˍ ꓟꓲ ꓔꓳ ꓠꓹ ꓗˍ ꓡꓳ= ꓘꓳꓹ ꓣꓴˍ ꓟ ꓕꓽ ꓬꓰ= ꓖꓳ ꓟ ꓪꓴꓸ ꓠꓬꓲ ꓟꓴ-ꓢ-ꓡꓲꓟ ꓐꓴ ꓠꓬ ꓚꓵꓸ ꓛꓬꓽ ꓕꓲꓽ ꓞꓲꓼ ꓡꓱꓸꓼ ꓔꓯ ꓙꓵ ꓠꓲꓹ ꓐꓱ ꓶ ꓗꓽ ꓕꓸ ꓙ ꓠꓹ ꓟ ꓡꓳꓸ ꓙ ꓑꓳꓽ ꓙ ꓠꓹ ꓟ ꓐꓱ ꓶ ꓟꓬꓱꓽ ꓓꓽ ꓟ ꓟꓯ ꓠ ꓗˍ ꓡꓳ ꓐꓰ ꓙꓵ ꓔꓬˍ ꓡꓳ= ꓖꓳ ꓟ ꓑꓶꓸ ꓓꓴ ꓟꓴ-ꓢ-ꓡꓲꓟ ꓐꓴ ꓠꓬ ꓠꓱꓸ ꓐꓯꓹ ꓚꓱꓹ ꓗꓪ ꓟꓽ ꓪꓽ ꓡꓯꓽ ꓘꓳ ꓟꓽ ꓫꓱꓹ ꓡꓯꓽ ꓘꓳꓹ ꓥˍ ꓟꓲ ꓙꓵ ꓠꓲꓹ ꓚꓱꓹ ꓗꓪ ꓠꓬ ꓮ ꓕꓯꓽ ꓥˍ ꓟꓲ ꓪꓽ ꓡꓯꓽ ꓘꓳ ꓫꓱꓹ ꓡꓯꓽ ꓘꓳ ꓢꓲ ꓙꓵ ꓠꓲꓹ ꓔꓯ ꓮ ꓕꓯꓽ ꓥˍ ꓟꓲ ꓗꓽ ꓕꓯꓸ ꓙꓹ ꓟ ꓡꓳꓸ ꓙ ꓑꓳꓽ ꓙꓹ ꓟ ꓔꓯ ꓕꓲꓽ ꓠꓲꓹ ꓕꓲꓽ ꓪꓼ ꓬꓰˍ ꓡꓳ= ꓟꓴ-ꓢ-ꓡꓲꓟ ꓙꓵ ꓠꓲꓹ ꓕꓯ ꓟꓽ ꓘꓳꓹ ꓣꓴ ꓢꓴ ꓙꓵ ꓠꓲꓹ ꓔꓯ ꓔꓳꓹ ꓢꓴ ꓥ ꓕ ꓑꓳ ꓔꓯ ꓧꓪꓸ ꓡꓰ ꓠꓹ ꓟ ꓮ ꓕꓯꓽ ꓥˍ ꓟꓲ ꓢꓯꓼ ꓕꓵꓼˍ ꓡꓳ=                            

                                                                                       

Add new comment

1 + 5 =