ꓓꓳꓻ ꓓꓴ ꓬꓲꓻ ꓙꓬ ꓟꓽ ꓫꓬ ꓟ ꓑꓶꓸ ꓓꓴ ꓣ-ꓘꓮꓲ ꓟꓯꓼ ꓛꓰꓹ ꓑꓬ ꓢꓴ ꓐꓴ ꓔꓬ ꓔꓶꓸ ꓗꓪ ꓞꓳ ꓤ ꓫꓵꓻ ꓟ ꓙꓳˍ ꓟ ꓓꓳꓽ

ꓣ-ꓘꓮꓲ ꓗꓴꓷꓼ ꓫꓴ ꓗꓪ ꓟ ꓞꓳ ꓘꓹ ꓕꓲ ꓐꓱ ꓗꓪ ꓟꓵꓽ ꓛꓴꓽ ꓛꓲ ꓡ ꓠꓬ ꓕꓲ ꓘꓳꓼ ꓡꓰ ꓕꓲ ꓘꓳꓼ ꓬꓲꓻ ꓙꓬ ꓟꓽ ꓙꓳ ꓟ ꓔꓳꓹ ꓜꓳꓽ ꓔꓬ ꓪˍ ꓟ ꓥ ꓡꓳ= ꓖꓳ ꓡꓱ ꓥ ꓟꓲ ꓛꓲ ꓠꓲꓹ ꓕꓲ ꓘꓳꓼ ꓗꓪ ꓠꓬ ꓟꓳ-ꓘ ꓟꓲꓽ ꓦꓲ ꓕꓳꓽ ꓥꓳꓽ ꓙꓱꓼ ꓡ ꓟ ꓑꓶꓸ ꓓꓴ ꓬꓲꓻ ꓙꓬ ꓘꓴꓻ꓾ ꓬꓲꓻ ꓡꓴꓽ ꓐꓱ ꓐꓬ ꓡꓰ ꓟ ꓪꓴꓸ ꓠꓬꓲ ꓗꓳꓸ ꓡ ꓕꓯ ꓟ ꓢꓶꓸ ꓟꓽ ꓞꓲꓺ ꓬꓲꓻ ꓙꓬ ꓟꓽ ꓙꓳ ꓟ ꓫꓵꓽ ꓪꓴ ꓟꓬꓽ ꓠꓬꓲ ꓔꓳꓹ ꓜꓳꓽ ꓔꓬ ꓪˍ ꓡꓳ꓾ ꓝꓮꓲ ꓟꓽ ꓫꓬ ꓟ ꓬꓲꓻ ꓙꓬ ꓣꓱꓽ ꓔꓬ ꓪˍ ꓟ ꓑꓶꓸ ꓓꓴ ꓞꓳ ꓤ ꓫꓵꓻ ꓟ ꓙꓳˍ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓟꓵꓽ ꓛꓴꓽ ꓞꓻ ꓝꓲꓸ ꓗꓪ ꓬꓲꓻ ꓙꓬ ꓟꓽ ꓡꓳꓼ ꓠꓬꓲ꓾ ꓣ-ꓘꓮꓲ ꓗꓴꓷꓼ ꓫꓴ ꓑꓳꓠ-ꓠꓹ-ꓚꓬꓴꓠꓹ ꓡꓳ ꓒꓱ꓾ ꓮ-ꓕꓯꓸ-ꓟꓬꓯꓸ-ꓡꓯꓹ ꓘꓹ ꓗꓪ ꓟ ꓟꓯꓼ ꓛꓰꓹ ꓑꓬ ꓢꓴ ꓐꓴ ꓠꓬ ꓬꓲꓻ ꓙꓬ ꓡꓳ ꓗꓸ ꓗꓪ ꓟ ꓞꓼ ꓐꓳ ꓓꓵˍ ꓟ ꓬꓲꓻ ꓙꓬ ꓔꓯ ꓡꓰꓽ ꓓꓳꓻ ꓔꓬ ꓣꓱꓽ ꓔꓬ ꓪˍ ꓡꓳ= ꓟꓬꓽ ꓠꓬꓲ ꓠꓬ ꓞꓼ ꓐꓳ ꓓꓯꓹˍ ꓟ ꓬꓲꓻ ꓙꓬ ꓣꓱꓽ ꓔꓬ ꓪˍ ꓟ ꓑꓶꓸ ꓓꓴ꓾ ꓖꓳ ꓓꓱꓽ ꓗꓪ ꓖꓶꓽ ꓡꓶꓽ ꓛꓰꓹˍ ꓟ꓾ ꓬꓲ ꓑꓻ ꓓꓲꓻˍ ꓟ ꓒꓬꓱꓼ ꓡ ꓔꓬ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓟꓯꓼ ꓛꓰꓹ ꓑꓬ ꓔꓶꓸ ꓖꓳ ꓟ ꓗꓪ ꓑ ꓫꓬ 700 ꓣꓳ ꓟꓽ ꓞꓲꓺ ꓔꓬ ꓟ ꓥ ꓡꓳ= ꓮ ꓟꓶ ꓟ ꓡꓰ ꓟꓽ ꓫꓬ ꓟ ꓬꓲꓻ ꓙꓬ ꓓꓳꓻ ꓔꓬ ꓪ꓾ ꓣꓱꓽ ꓔꓬ ꓪˍ ꓟ ꓑꓶꓸ ꓓꓴ ꓟꓯꓼ ꓛꓰꓹ ꓑꓬ ꓔꓶꓸ ꓘꓴꓽ ꓗꓪ ꓧꓪꓽ ꓗꓴꓹ ꓙꓲꓻ ꓗꓪ ꓒꓬꓱꓼˍ ꓟ ꓠꓻ ꓫꓵꓽ ꓠꓻ ꓙꓰꓽ ꓐꓰ ꓦꓰꓽ ꓧꓳꓹ ꓠꓻ ꓒꓬꓱꓼ ꓔꓬ ꓠꓬꓲ꓾ ꓠꓻ ꓖꓳ ꓟ ꓑꓶꓸ ꓓꓴ ꓫꓵꓻ ꓟ ꓙꓳˍ ꓡꓳ꓾ ꓐꓰ ꓢꓷꓸ ꓪ ꓡꓳ=