ꓓꓳꓽ ꓦ ꓩꓴ ꓡˍ ꓟ (1) – 2 ꓦ 23 ꓠꓬꓲ꓾2023

ꓓꓳꓽ ꓦ ꓩꓴ ꓡˍ ꓟ (1) – 2 ꓦ 23 ꓠꓬꓲ꓾2023

ꓐꓮꓠ-ꓒꓴꓹ-ꓪꓯ (ꓬꓲ ꓫꓵꓸ ꓫꓵꓸ ꓢꓴ ꓦꓲ) ꓠꓬ ꓐꓮꓠꓖꓗꓳꓗ ꓗ-ꓕꓳ-ꓡꓲꓗ ꓢꓽ-ꓢꓶ-ꓠꓽ ꓬꓲꓸ ꓪꓴꓽ ꓓꓰˍ ꓟ ꓦ ꓡꓱꓻ ꓚꓱꓹ ꓔꓯ ꓟꓳꓸ ꓢꓷꓸ ꓠꓲꓹ ꓟꓸ ꓖꓶ ꓖꓴ ꓥ ꓢꓲ꓾ 2 ꓦ 24 ꓠꓬꓲ ꓗꓪ ꓐꓰ 26 ꓠꓬꓲ ꓗꓪ ꓛꓲꓺ ꓮꓢꓲꓮ ꓗꓴꓷꓼ ꓟꓵꓽ ꓗꓪ ꓟ ꓖꓪ ꓙꓱꓻ ꓜꓲꓼ ꓓꓴ ꓔꓯ ꓖꓳ ꓗꓪ ꓘꓳꓹ ꓣꓴ ꓢꓲ ꓬꓰ ꓓꓴ ꓥꓳ=

ꓖꓪ ꓙꓱꓻ ꓜꓲꓼ ꓑꓮꓲꓽ ꓗꓪ ꓛꓲꓺ ꓡˍ ꓟ ꓝꓲ ꓓꓴ ꓐꓴ ꓠꓬ ꓮꓢꓲꓮ ꓗꓴꓷꓼ ꓗꓪ ꓟ ꓔꓲꓺ ꓒ ꓓꓽ ꓐꓴ ꓜꓴꓻ 17 ꓟ ꓗꓪ ꓐꓰ ꓡˍ ꓟ ꓖꓪ ꓙꓱꓻ ꓜꓲꓼ ꓢꓴ ꓝꓲ ꓓꓴ ꓐꓴ꓾ ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓗꓪ ꓟ ꓔꓲꓺ ꓒ ꓓꓽ ꓜꓴꓻ ꓗꓪ ꓐꓰ ꓔꓲꓺ ꓒ ꓓꓽ 2 ꓣꓳ꓾ ꓮꓢꓲꓮ ꓗꓴꓷꓼ ꓔꓲꓺ ꓒ ꓓꓽ ꓖꓪ ꓙꓱꓻ ꓜꓲꓼ ꓢꓴ ꓐꓴ ꓜꓴꓻ ꓚꓰꓺ (ꓝꓮꓐꓚ) ꓔꓯ ꓔꓶꓺ ꓔ ꓟ ꓗꓴꓷꓼ ꓮ ꓙꓵꓽ 29 ꓗꓴꓷꓼ ꓔꓯ ꓔꓯꓺ ꓔ ꓟ ꓔꓲꓺ ꓒ ꓓꓽ ꓜꓴꓻ ꓐꓴ ꓛꓲꓺ ꓡ ꓗꓷ ꓟ ꓥ ꓡꓳ= ꓕꓱ ꓖꓪ ꓙꓱꓻ ꓜꓲꓼ ꓓꓴ ꓗꓪ ꓔꓲꓺ ꓒ ꓓꓽ ꓚꓮꓣꓓꓲꓠꓮꓡ 6 ꓣꓳ꓾ ꓔꓲꓺ ꓒ ꓓꓽ ꓟ 5 ꓣꓳ꓾ ꓔꓲꓺ ꓒ ꓓꓽ 18 ꓣꓳ꓾ ꓔꓲꓺ ꓒ 28 ꓣꓳ꓾ ꓔꓲꓺ ꓟ 4 ꓣꓳ ꓐꓰ ꓘꓴ ꓜꓲꓼ ꓞꓳ ꓢꓲꓺ ꓤ 19 ꓣꓳ ꓐꓴˍ ꓟꓲ ꓛꓲꓺ ꓡ ꓗꓷꓳ=

ꓪꓴꓽ ꓓꓰ ꓡꓰ ꓟ ꓐꓰ ꓞꓳ ꓤ ꓟꓽ ꓓ ꓔꓬꓹ ꓟꓬꓽˍ ꓟ ꓮꓢꓲꓮ ꓗꓴꓷꓼ ꓠꓬ ꓟꓽ ꓫꓱꓸ ꓡꓯ ꓘꓳ ꓟ ꓡꓲꓽ ꓒꓰꓼ꓾ ꓫꓸ ꓕꓱ ꓥꓳꓽ꓾ ꓞꓳ ꓫꓵꓽ ꓐꓴ ꓐꓰ ꓟꓽ ꓫꓱꓸ ꓡꓯ ꓘꓳ ꓟ ꓦ ꓡꓱꓻ ꓚꓱꓹ ꓐꓴ ꓐꓰ ꓶꓼ ꓙꓳ ꓫꓱꓹ ꓙꓳ ꓔꓬ ꓟ ꓥ ꓡꓳ= ꓪꓴ-ꓢ ꓦ ꓡꓱꓻ ꓚꓱꓹ ꓠꓬ ꓮꓢꓲꓮ ꓗꓴꓷꓼ ꓬꓲ ꓖ ꓮ ꓟꓬꓹ ꓟ ꓗꓪ ꓮ ꓘꓶꓸ ꓣꓳˍ ꓟ ꓞꓳ ꓤ ꓠꓲꓸˍ ꓥ ꓟꓲ꓾ ꓡꓲꓽ ꓒꓰꓼ ꓕꓲ ꓟ ꓡꓰ ꓕꓲ ꓟ ꓡꓵ ꓔꓬ ꓙꓳ ꓔꓬ ꓟ ꓐꓰ ꓡꓲꓽ ꓒꓰꓼ ꓐꓳˍ ꓟ ꓠꓬ ꓘꓴ ꓜꓲꓼ ꓞꓳ ꓤꓶꓻ ꓐꓱ ꓶ ꓠꓲꓹ ꓒꓴ ꓗꓹ ꓛꓲꓽ ꓡꓰ ꓝꓲˍ ꓡꓳ= ꓙꓵꓻ ꓠꓲꓹ꓾ ꓒꓵꓽ ꓶꓽ ꓐꓰ ꓚꓲꓸ ꓟꓶ ꓓꓴ ꓐꓴ ꓠꓬ ꓕꓲ ꓖ ꓐꓰ ꓕꓲ ꓖ ꓟꓽ ꓫꓱꓸ ꓡꓯ ꓘꓳ ꓥˍ ꓟꓲ ꓞꓳ ꓤ ꓗꓳ ꓡꓳ ꓗꓪ ꓕꓲ ꓣꓳ ꓐꓰ ꓕꓲ ꓣꓳ ꓙ ꓡꓯ ꓘꓳˍ ꓟ ꓠꓬ ꓮꓢꓲꓮ ꓞꓳ ꓫꓵꓽ ꓐꓴ ꓔꓯ ꓕꓲ ꓠꓲꓹ ꓕꓲ ꓪ ꓗꓷ ꓡꓰ ꓝꓲˍ ꓡꓳ= ꓢꓲꓺ ꓒ ꓪꓴ-ꓢ꓾ ꓚꓲꓸ ꓛꓬ꓾ ꓚꓳ ꓡꓳ ꓚꓳ ꓫꓵ꓾ ꓟꓲ ꓠꓯ ꓐꓴ ꓐꓰ ꓙ ꓡꓯ ꓘꓳˍ ꓟ ꓮꓢꓲꓮ ꓒꓵꓽ ꓡꓳ ꓠꓬ ꓬꓲꓸ ꓐꓰ ꓕꓲ ꓪ꓾ ꓞꓳ ꓫꓵꓽ ꓞꓳ ꓙꓰꓽ ꓐꓴ ꓬꓲ ꓪ ꓪꓽ ꓡꓯ ꓘꓳꓹ ꓟ ꓐꓰ ꓮꓢꓲꓮ ꓗꓴꓷꓼ ꓑ ꓫꓬ ꓐꓴ ꓪꓽ ꓡꓯ ꓘꓳꓹ ꓟ ꓔꓯ ꓣꓴ ꓔꓯꓹ ꓡˍ ꓡꓳ=

ꓫꓸ ꓓꓴ ꓙꓳˍ ꓥ ꓟꓲ꓾ ꓖꓪ ꓙꓱꓻ ꓜꓲꓼ ꓓꓴ ꓕꓱ ꓟ ꓠꓬ ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓐꓱ ꓶ ꓣꓱꓽ ꓛꓰꓽ ꓐꓰ ꓠꓻ ꓫꓬꓹ ꓖꓶˍ ꓟ ꓙꓵꓹ ꓥ ꓡꓳ ꓐꓰ ꓓꓵꓽ ꓙꓽˍ ꓡꓳ= “ꓦꓲꓻˍ ꓡꓰ ꓐꓰ ꓗꓹ ꓟ ꓘꓴ ꓜꓲꓼ ꓞꓳ” ꓬꓲ ꓒꓬꓱꓽ ꓠꓬ ꓖꓪ ꓙꓱꓻ ꓜꓲꓼ ꓓꓴ ꓕꓱ ꓟ ꓗꓪ ꓮ ꓙꓵꓽ ꓔꓺ ꓐ ꓡˍ ꓟ ꓠꓲꓹ ꓟ ꓐꓰ ꓟꓬꓽ ꓠꓬꓲ ꓪꓴꓽ ꓡ ꓠ ꓬꓰ ꓐ ꓡˍ ꓟ ꓫꓸ ꓑꓬ ꓖꓴ ꓕꓲ ꓟˍ ꓡꓰ ꓐꓰ ꓔꓯꓺ ꓔ ꓡꓳ= ꓟꓽ ꓓ ꓟꓽ ꓞꓽ ꓬꓰˍ ꓟ꓾ ꓟꓽ ꓢꓲꓺ ꓡꓲ ꓟ ꓐꓰ ꓫꓸ ꓙꓵ ꓟꓷꓼ ꓙꓵˍ ꓟ ꓡꓰꓽ ꓟꓽ ꓞꓲꓺ ꓪꓴ-ꓢ ꓬꓲ ꓦ ꓔꓬ ꓟ ꓮ ꓙꓵꓽ ꓗꓪ ꓪꓴ-ꓢ ꓠꓬ ꓬꓲ ꓦꓲꓻ ꓔꓯ ꓫꓬꓹ ꓐ ꓡˍ ꓟ ꓔꓯˍ ꓟꓲ ꓟꓳꓸ ꓖꓶˍ ꓡꓳ= ꓟꓽ ꓓ ꓬꓳꓸ ꓚꓵˍ ꓟ ꓠꓬ ꓪꓴ-ꓢ ꓬꓲ ꓦꓲꓻ ꓘꓴꓽ ꓗꓪ ꓞꓳ ꓤ ꓮ ꓙꓵꓽ ꓐꓱ ꓶ ꓔꓬꓹ ꓖꓴ ꓙꓳˍ ꓡꓳ= ꓮ ꓡꓰ ꓟ ꓔꓯ ꓥˍ ꓟꓲ ꓟꓽ ꓡꓳꓺ ꓔ= ꓫꓵꓽ ꓪꓴ ꓕꓱ ꓟ ꓗꓪ꓾ ꓧꓶꓸ ꓕꓯ ꓟ ꓙꓵꓹ ꓕꓯ “ꓥꓪ ꓠꓬ ꓡꓳꓺ ꓒꓰꓹ ꓔ ꓟ ꓟꓶˍ ꓡꓳ” ꓐꓰ ꓓꓵꓽ ꓙ ꓔꓬ ꓢꓴ ꓐꓴ ꓠꓬ ꓮ ꓟꓶ ꓟ ꓙꓵꓹ ꓕꓯ ꓟꓴ ꓡꓳꓹ ꓬꓰ ꓢꓲ ꓠꓲꓹ ꓟ ꓡꓱꓻ ꓖꓴ ꓥ ꓟ ꓪꓴ-ꓢ ꓬꓲ ꓦꓲꓻ ꓕꓱ ꓟ ꓗꓪ ꓬꓲ ꓪ ꓐꓱ ꓶ ꓔꓬꓹ ꓖꓴ ꓙꓳˍ ꓟ ꓔꓯ ꓢꓷꓸ ꓡ ꓔꓬ ꓡꓳ=

ꓦꓲꓻ ꓬꓲꓸ ꓒꓬꓱꓽ ꓠꓬ ꓟꓲ ꓠꓯ ꓞꓳ ꓤ ꓖꓳ ꓓꓱꓽ ꓣꓴ ꓢꓲ ꓒꓬꓱꓽ ꓟꓳꓻ ꓡ ꓟ ꓗꓪ ꓐꓰ ꓕꓲ ꓝꓸ ꓣꓳ ꓐꓴ ꓗꓳ ꓡꓳ ꓗꓪ ꓢꓲꓺ ꓒ ꓬꓰ-ꓢꓴ ꓠꓬ ꓬꓲꓸ ꓦꓲꓻ ꓔꓯ ꓫꓬꓹ ꓔꓲꓸ ꓬꓰ ꓟ ꓔꓯ ꓚꓲꓸ ꓟꓶ ꓡꓰ ꓝꓲˍ ꓡꓳ= ꓖꓳ ꓟ ꓑꓶꓸ ꓓꓴ ꓪꓴ-ꓢ ꓬꓲꓸ ꓦꓲꓻ ꓥˍ ꓟꓲ ꓪꓴ-ꓢ ꓐꓰ ꓥˍ ꓟꓲ꓾ ꓞꓳ ꓤ ꓐꓰ ꓞꓳ ꓤ ꓥˍ ꓟꓲ ꓜꓲꓺ ꓡꓯ ꓘꓳ ꓖꓴ ꓒꓬꓱꓼ ꓡˍ ꓡꓳ= ꓮ ꓟꓶ ꓕꓯ ꓦꓲ ꓚꓰꓺ ꓡꓰ ꓐꓰ ꓟꓳꓻ ꓪˍ ꓟ ꓦꓲꓻ ꓖꓳ ꓟ ꓠꓬ ꓞꓲꓽ ꓫꓬꓹ ꓟ ꓶꓼ ꓤ ꓫꓱꓹ ꓤ ꓔꓯ ꓘꓳꓹ ꓣꓴ ꓪˍ ꓟ ꓐꓰ ꓖꓳ ꓟ ꓔꓯ ꓟꓶˍ ꓟ ꓔꓯꓺ ꓐꓬꓱꓽ ꓔꓯ ꓝꓮꓲ ꓕꓲ ꓧꓪꓹ ꓡꓵꓹ ꓫꓴ ꓖꓶ ꓝꓲˍ ꓡꓳ= ꓖꓪ ꓙꓱꓻ ꓜꓲꓼˍ ꓟ ꓟꓬꓱꓽ ꓠꓬ ꓞꓳ ꓜꓴꓻ ꓐꓴ ꓕꓲ ꓪꓽ ꓜꓲꓼ ꓡꓳꓽˍ ꓟ ꓡꓰ ꓐꓰ ꓕꓲ ꓠꓲꓹ ꓕꓲ ꓪ ꓙ ꓫꓱꓽ ꓙꓰ ꓟ ꓬꓲ ꓬꓳꓸ ꓚꓵˍ ꓟ ꓔꓯ ꓪ ꓜꓲ ꓫꓬꓽ ꓫꓬꓽ ꓡꓰ ꓢꓷꓸ ꓡ ꓢꓲ ꓠꓬꓲ ꓘꓴ ꓜꓲꓼ ꓞꓳ ꓪꓴꓽ ꓡ ꓟꓴ ꓡˍ ꓟ ꓔꓯ ꓒꓬꓱꓼ ꓡ ꓝꓲˍ ꓡꓳ=

ꓝꓲ ꓓꓴ ꓐꓴ ꓕꓲ ꓪꓽ ꓙ ꓫꓱꓽ ꓙꓰ ꓐ ꓡ ꓠꓹ ꓟ꓾ ꓪꓽ ꓘꓴˍ ꓟ ꓗꓪ ꓐꓰ ꓙꓲˍ ꓟ ꓟꓽ ꓙꓲꓻ ꓟ ꓔꓯ ꓢꓷꓸ ꓐ ꓡ ꓠꓹ ꓟ꓾ ꓖꓪ ꓙꓱꓻ ꓠꓹ ꓟ ꓐꓰ ꓔꓱꓹ ꓔꓱꓹ ꓚꓵ ꓚꓵ ꓬꓰ ꓐ ꓡ ꓠꓹ ꓟ ꓐꓱ ꓶ ꓬꓰ ꓙ ꓠꓹ ꓟ ꓛꓳ ꓫꓱꓽ ꓚꓱꓹ ꓔꓯ ꓐꓳ ꓔ ꓡꓳ= ꓡ ꓠꓹ ꓟ 3 ꓠꓬꓲ ꓘꓴꓽ ꓠꓯꓸꓼ ꓗꓪ ꓝꓲ ꓓꓴ ꓐꓴ ꓠꓬ ꓬꓲ ꓪ ꓗꓹ ꓛꓲꓽˍ ꓟ꓾ ꓕꓲ ꓪꓽ ꓙ ꓫꓱꓽˍ ꓟ ꓬꓲ ꓟꓸ ꓟꓲꓽ꓾ ꓫꓸ ꓓꓴ ꓔꓳꓹ ꓜꓳꓽˍ ꓟ ꓐꓰ ꓛꓳ ꓫꓱꓽ ꓠꓹ ꓟ ꓬꓲꓸ ꓚꓱꓹ ꓫꓵꓼ ꓐꓴ ꓔꓯ ꓘꓳꓹ ꓣꓴ ꓠꓹ ꓟ ꓘꓴˍ ꓟ ꓐꓴ ꓔꓯ ꓢꓷꓸ ꓙ ꓩꓴ ꓡˍ ꓥꓳ= ꓖꓳ ꓟ ꓠꓬ ꓮꓢꓲꓮ ꓗꓴꓷꓼ ꓔꓯ ꓠꓻ ꓫꓵꓽ ꓓꓽ ꓟ ꓒꓬꓱꓼ ꓡ ꓝꓲˍ ꓟ ꓠꓲꓹ ꓟ ꓩꓴˍ ꓟ꓾ ꓞꓳ ꓙꓳ ꓢꓯꓸ ꓔꓬ ꓟ ꓚꓱꓹ ꓔꓯ ꓟꓳꓸ ꓪꓽ ꓡꓯꓽ ꓘꓳꓹ ꓟ꓾ ꓓꓵꓽ ꓙ ꓞꓷꓹ ꓔ ꓟ꓾ ꓔꓲꓺ ꓒ ꓤꓶꓻ ꓗꓪ ꓘꓴˍ ꓟ꓾ ꓞꓳ ꓡꓱ꓾ ꓟꓽ ꓙꓳ ꓞꓳ ꓫꓸ ꓐꓴ꓾ ꓙꓵꓻ ꓠꓲꓹ ꓔꓯ ꓟꓳꓸ ꓧꓳꓺ ꓡꓯ ꓘꓳꓹˍ ꓟ(ꓠꓲꓹ ꓘꓹˍ ꓟ) ꓐꓰ ꓮ ꓡꓰ ꓗꓪˍ ꓟꓲ ꓔꓲꓺ ꓒ ꓐꓴ ꓡꓰꓽ ꓧꓳꓽ ꓣꓱꓽ ꓔꓬꓹ ꓟ ꓚꓱꓹ (Clericalism) ꓐꓴ ꓔꓯ ꓥˍ ꓟꓲ ꓖꓪ ꓙꓱꓻ ꓙꓰ ꓓꓴ ꓥꓳ=

ꓖꓪ ꓙꓱꓻ ꓜꓲꓼ ꓓꓴ ꓒꓴ ꓑꓮꓲꓽ ꓟꓲ-ꓢ ꓪꓽ ꓘꓴˍ ꓟ ꓢꓲꓽ-ꓫꓬ-ꓟ-ꓦ ꓪꓴ-ꓢ ꓔꓯ ꓔꓲꓺ ꓖꓶ ꓡꓯꓼ ꓙꓱˍ ꓟ ꓟꓲ-ꓢ ꓪꓽ ꓘꓴˍ ꓟ ꓔꓯ ꓙ-ꓑꓮꓠ ꓗꓴꓷꓼ꓾ ꓔꓳ-ꓚꓬꓳ ꓔꓲꓺ ꓒ ꓓꓽ ꓙꓵꓽ ꓔꓶꓸ ꓐꓰ ꓮꓢꓲꓮ ꓗꓴꓷꓼ ꓗ-ꓔꓳ-ꓡꓲꓗ ꓔꓲꓺ ꓒ ꓓꓽ ꓐꓴ ꓜꓴꓻ ꓗꓪ ꓟ ꓟꓬꓱꓽ ꓢꓲꓺ ꓔꓲꓺ ꓒ ꓓꓽ Tarcisio Isao Kikuchi ꓢꓦꓓ ꓡꓰ ꓧꓳꓽ ꓪꓴꓸ ꓟꓴ ꓢꓲ ꓔꓲꓺ ꓖꓶ ꓓꓴ ꓥ ꓡꓳ= ꓖꓳ ꓗ ꓠꓯꓸ ꓠꓬ ꓓꓵꓽ ꓙꓽ ꓚꓬꓹ ꓠꓬꓲˍ ꓟ ꓐꓰ ꓙꓽ ꓜꓲꓼ ꓠꓲꓹ ꓔꓯ ꓟꓳꓸ ꓬꓲꓸ ꓕꓲꓽ ꓟꓴꓽ ꓐꓴ ꓚꓱꓹ ꓔꓯ ꓛꓲꓺ ꓡ ꓟ ꓬꓲ ꓛꓲꓺ ꓐꓴ ꓔꓯ ꓐꓯ ꓟꓸ ꓖꓶ ꓙ ꓖꓴ ꓟꓸ ꓖꓶˍ ꓟ ꓬꓰˍ ꓥꓳ= ꓖꓪ ꓙꓱꓻ ꓜꓲꓼ ꓖꓴ ꓗꓪ ꓛꓲꓺ ꓡ ꓢꓴ ꓝꓲ ꓓꓴ ꓐꓴ ꓓꓵꓽ ꓙ ꓚꓬꓹ ꓟꓶ ꓔ ꓟ ꓐꓴ ꓔꓯ ꓐꓱ ꓖꓶ ꓡꓯꓽ ꓘꓳ ꓐ ꓡ ꓠꓹ ꓟ ꓬꓲ ꓟꓶꓽ ꓟ(ꓡꓳꓹ ꓬꓰˍ ꓟ) ꓕꓳꓽ ꓶꓽ ꓐꓳ ꓔ ꓟ ꓔꓯ ꓥˍ ꓟꓲ ꓐꓱ ꓖꓶ ꓠꓹ ꓟ ꓥ ꓡꓳ=

ꓪꓴꓽ ꓓꓰ ꓢꓲ ꓬꓲ ꓙꓰꓽ ꓮ ꓟꓬꓹ ꓙꓳˍ ꓟ ꓮꓢꓲꓮ ꓗꓴꓷꓼ ꓞꓳ ꓫꓵꓽ ꓐꓴ ꓡꓰ ꓐꓰ ꓕꓲ ꓠꓲꓹ ꓕꓲ ꓪ ꓙ ꓫꓱꓽ ꓙꓰˍ ꓟ ꓠꓬ ꓣꓳ ꓐꓴ ꓥꓳ ꓡꓳꓸ ꓓꓴ ꓥ ꓡꓳ=