ꓔꓲꓺ ꓒꓽ ꓪꓺ ꓔꓲ ꓝꓣꓮꓠꓚꓲꓢ ꓗꓪ ꓐꓰ ꓮꓟꓮꓜꓳꓠ ꓐꓱ ꓶ ꓠꓯꓺ ꓞꓲꓼ ꓦꓲ ꓡꓲ ꓓꓽ ꓟ ꓦ ꓩꓴ ꓗꓷˍ ꓟ=

ꓔꓲꓺ ꓒꓽ ꓪꓺ ꓔꓲ ꓝꓣꓮꓠꓚꓲꓢ ꓗꓪ ꓐꓰ ꓮꓟꓮꓜꓳꓠ ꓐꓱ ꓶ ꓠꓯꓺ ꓞꓲꓼ ꓦꓲ ꓡꓲ ꓓꓽ ꓟ ꓦ ꓩꓴ ꓗꓷˍ ꓟ=

ꓡꓳꓹ ꓬꓰ ꓟ ꓠ-ꓢ-ꓠꓬꓲ ꓕꓯ Brazil ꓗꓴꓷꓼ Belém do Pará ꓗꓪ ꓔꓲꓺ ꓒꓽ ꓪꓺ ꓔꓲ ꓦ ꓩꓴ ꓗꓷ ꓟ ꓠꓯꓺ ꓞꓲꓼ ꓦꓲ ꓡꓲ ‘’Pope Francis Hospital Ship’’ ꓠꓬ ꓮꓟꓮꓜꓳꓠ ꓐꓱ ꓶꓼ ꓖꓳꓻ ꓓꓱꓽ ꓔꓬꓹ ꓢꓺ ꓓꓴ ꓐꓰ ꓕꓲꓽ ꓪꓺꓽ ꓪꓴ-ꓢ ꓐꓯ ꓘꓶꓽ ꓔꓯ ꓟꓲ ꓣꓴꓺ ꓔꓯꓹ ꓡ ꓝꓲ꓾ ꓐꓰ ꓔꓲꓺ ꓒꓽ ꓪꓺ ꓔꓲ ꓝꓣꓮꓠꓚꓲꓢ ꓡꓰ ꓐꓯ ꓗꓷꓳ=

ꓠꓯꓺ ꓞꓲꓼ ꓦꓲ ꓡꓲ ꓕꓱꓻ ꓟ ꓠꓬ Belem ꓘꓴ-ꓜꓲ-ꓞꓳ ꓗꓪ ꓛꓲ ꓡˍ ꓟ ꓐꓰ ꓕꓲꓽ ꓛꓳꓺꓼ ꓦꓲ ꓡꓲ ꓛꓲ ꓬꓰ ꓓꓹ ꓟ ꓮꓟꓮꓜꓳꓠ ꓗꓪ ꓣꓱꓽ ꓬꓰ ꓪꓴꓸ ꓔꓴꓺ ꓗꓷ  ꓟ ꓥꓳ= ꓦꓲ ꓡꓲ ꓓꓳꓻ ꓡˍ ꓕꓯ ꓔꓲꓺ ꓒꓽ ꓪꓺ ꓔꓲ ꓖꓶꓽ ꓩꓴ ꓡˍ ꓟ ꓫꓱꓸ ꓖꓶꓽ ꓕꓳꓽ ꓶꓽ ꓔꓯ ꓵˍ ꓡꓳ= ꓕꓳꓽ ꓶꓽ  ꓗꓪ ꓔꓲꓺ ꓒꓽ ꓪꓺ ꓔꓲ ꓝꓣꓮꓠꓚꓲꓢ ꓗꓪ ꓐꓰ ꓪꓴ-ꓢ ꓔꓯ ꓠꓲꓹ ꓒꓴꓺ ꓒꓴꓺ ꓡꓰꓽ ꓫꓸ ꓟꓳ ꓢꓲ꓾ ꓠꓯꓺ ꓞꓲꓼ ꓦꓲ ꓡꓲ ꓕꓱꓻ ꓟ ꓠꓬ ꓮꓟꓮꓜꓳꓠ ꓗꓪ ꓟ ꓶꓽ ꓤ ꓗꓪ ꓔꓬꓹ ꓢꓲ ꓣꓱꓽ ꓞꓹ ꓔꓬ ꓢꓴ ꓐꓴ ꓟꓲꓽ ꓕꓯ ꓗꓪ꓾ ꓖꓳꓻ ꓓꓱꓽ ꓔꓬꓹ ꓢꓺ ꓓꓴ ꓐꓰ ꓕꓲꓽ ꓪꓺꓽ ꓪꓴ-ꓢ ꓐꓯ ꓘꓶꓽ ꓔꓯ ꓟꓲ ꓣꓴꓺ  ꓔꓯꓹ ꓡ ꓝꓲ=ꓖꓳ ꓟ ꓡꓰ ꓟꓽ ꓞꓲ 10 ꓦꓻ ꓟ 6 ꓠꓬꓲ ꓗꓪ ꓐꓰ 27 ꓠꓬꓲ ꓗꓪ ꓛꓲ ꓬꓰ ꓠꓹ ꓟ꓾ ꓮꓟꓮꓜꓳꓠ ꓗꓪ ꓟ ꓔꓲꓺ ꓒꓽ ꓓꓽ ꓐꓴ ꓖꓪ ꓙꓱꓺ ꓜꓲꓼ ꓓꓴ ( Synod of Bishops for Amazonia) ꓐꓱ ꓶꓼ ꓥˍ ꓟꓲ ꓙꓲˍ ꓟ ꓕꓲꓽ ꓫꓵꓽˍ ꓟꓲ ꓥ ꓡꓳ=

ꓮ ꓡꓲꓳ ꓐꓯ ꓠꓬ ꓪꓴ-ꓢ ꓠꓬ ꓟꓴꓽ ꓗꓪ  ꓗꓴꓷꓼ ꓟꓸ ꓟꓲ ꓐꓯ ꓒꓬꓱꓻ ꓠꓹ ꓟ ꓐꓰ ꓠꓻ ꓔꓬꓹ ꓟ ꓞꓳ ꓤ ꓐꓴ ꓔꓯ ꓠꓻ ꓫꓬꓹ ꓖꓶꓽ ꓠꓹ ꓟ ꓠꓲꓹ ꓡꓶꓽ ꓙꓳˍ ꓟ ꓪꓴꓸ ꓠꓬꓲ꓾ ꓬꓲꓸ ꓔꓯ ꓛꓳꓺ ꓢꓴ ꓝꓲ ꓓꓴ ꓐꓴ ꓔꓯ ꓮ ꓕꓯˍ ꓟꓲ ꓝꓲ ꓩꓴ ꓔꓬꓹ ꓟ ꓪꓴ-ꓢ ꓬꓲꓸ ꓠꓲꓹ ꓡꓶꓽ ꓔꓯ ꓟꓳꓸ ꓖꓶꓽˍ ꓟ ꓠꓯꓺ ꓞꓲꓼ ꓦꓲ ꓡꓲ ꓡꓰ ꓐꓰ ꓥ ꓡꓳ=

ꓝꓮꓲ ꓠꓯꓺ ꓞꓲꓼ ꓦꓲ ꓡꓲ ꓕꓱꓻ ꓟ ꓠꓬ ꓮ ꓟ ꓔꓯ ꓟꓲ ꓗꓽ ꓕꓸ ꓓꓴ ꓟꓽ ꓙꓳ ꓙꓳ ꓐꓰ ꓘꓳꓹ ꓣꓴ ꓠꓻ ꓫꓬꓹ ꓖꓶꓽˍꓟ ꓾ ꓞꓳ ꓠꓻ ꓔꓬꓹ ꓖꓴ ꓗꓪ ꓛꓲ ꓙꓰ ꓢꓲ ꓠꓻ ꓫꓬꓹ ꓖꓶꓽˍ ꓟ ꓠꓯꓺ ꓞꓲꓼ ꓦꓲꓻ ꓾ ꓥ ꓠꓬ ꓬꓲꓻ ꓙꓬꓻ ꓕꓯꓽ ꓢꓲꓺ ꓗꓪ ꓟ ꓠꓯꓼ ꓞꓲꓼ ꓦꓲꓻ ꓥ ꓡꓳ=

ꓢꓲꓺ ꓒꓽ ꓬꓰ-ꓢꓴ ꓬꓲꓻ ꓙꓬꓻ ꓕꓯꓽ ꓢꓲꓺ ꓗꓪ ꓙꓻ ꓫꓱꓽ ꓡˍ ꓔꓬꓹ ꓕꓯ ꓟꓲꓽ ꓦꓲꓻ ꓙꓱꓼˍ ꓟ ꓠꓽ ꓗꓷ ꓢꓲ꓾ ꓝꓲ ꓓꓴ ꓐꓴ ꓙꓵꓻ ꓠꓲꓹ ꓔꓯ ꓟꓬꓽ ꓠꓬꓲ ꓕꓶꓻ ꓞ ꓝꓲˍ ꓟ ꓡꓰ ꓐꓰ꓾ꓮ ꓟꓶꓺ  ꓠꓯꓺ ꓞꓲꓼ ꓦꓲ ꓡꓲ ꓥˍ ꓟꓲ ꓢꓲꓺ ꓡꓲꓺˍ ꓟ ꓟꓽ ꓙꓳ ꓢꓴ ꓐꓴ꓾ ꓮꓸ ꓫꓵꓽ ꓔꓯ ꓟꓲ ꓢꓯꓼ ꓕꓵꓼ ꓠꓲꓹ ꓟꓽ ꓙꓳ ꓙꓳ ꓐꓰ ꓠꓲꓹ ꓟ ꓙꓬꓻ ꓔꓬꓹ ꓢꓴ ꓐꓴ ꓕꓯꓽ ꓢꓲꓺ ꓗꓪ ꓖꓳꓻ ꓓꓱꓽ ꓐꓰ ꓦ ꓠꓲꓹ ꓗꓴ ꓟꓬ ꓗꓴ ꓟꓶˍ ꓟ꓾ ꓢꓲꓺ ꓡꓲꓺˍ ꓟ ꓣꓱꓽ ꓛꓰꓽ ꓕꓲꓽ ꓛꓳꓺꓽ ꓣꓴꓺ ꓔꓯꓹ ꓡ ꓝꓲ꓾ ꓐꓰ ꓐꓳꓻ ꓔ ꓟ ꓥꓳ=

ꓔꓲꓺ ꓒꓽ ꓪꓺ ꓔꓲ ꓝꓣꓮꓠꓚꓲꓢ ꓠꓬ ꓟꓬꓱꓽ ꓕꓱꓻ ꓟ ꓔꓯ ꓪꓴꓸ ꓔꓴꓺ ꓬꓰ ꓠꓹ ꓟ ꓕꓵꓼ ꓪꓽ ꓖꓶꓽ ꓢꓴ Brazil ꓔꓲꓺ ꓒꓽ ꓓꓽ Bernardo Bahlmann of Óbidos  ꓐꓰ ꓕꓲꓽ ꓪꓺꓽ ꓝꓣꓮꓠꓚꓲꓢ ꓔꓲꓺ ꓒꓽ ꓐꓴ ꓔꓯ ꓫꓸ ꓟꓳˍ ꓟ ꓐꓳꓻ ꓔ ꓢꓲ꓾ ꓠꓯꓺ ꓞꓲꓼ ꓦꓲ ꓡꓲ ꓟꓬꓱꓽ ꓣꓱꓽ ꓫꓵꓽ ꓐꓱ ꓶꓼ ꓫꓱꓸ ꓖꓶꓽˍ ꓟ ꓕꓳꓽ ꓶꓽ ꓔꓯ ꓬꓲꓸ ꓟꓶꓽ ꓢꓰꓼ ꓗꓷ ꓟ ꓥꓳ=

https://www.google.com/search...: