ꓔꓲꓺ ꓒꓽ ꓪ ꓔꓲ Pope Francis ꓡꓰ Vatican ꓐꓰ Chile ꓗꓴꓷꓼ ꓠꓬꓲꓽ ꓗꓴꓸ ꓝꓼ ꓗꓪ ꓝ ꓡꓯꓽ ꓘꓳ ꓓꓴ ꓝꓲ ꓓꓴ ꓢꓲˍ ꓟ ꓚꓱꓹ=

ꓔꓲꓺ ꓒꓽ ꓪ ꓔꓲ Pope Francis ꓡꓰ Vatican ꓐꓰ Chile ꓗꓴꓷꓼ ꓠꓬꓲꓽ ꓗꓴꓸ ꓝꓼ ꓗꓪ ꓝ ꓡꓯꓽ ꓘꓳ ꓓꓴ ꓝꓲ ꓓꓴ ꓢꓲˍ ꓟ ꓚꓱꓹ=

ꓔꓲꓺ ꓒꓽ ꓪ ꓔꓲ Pope Francis ꓡꓰ ꓢ-ꓑꓲ (Spanish) ꓗꓴꓷꓼ ꓗꓪ ꓟ ꓔꓲꓺ ꓒꓽ ꓓꓽ ꓟ Alberto Ortega Martin ꓔꓯ Vatican ꓐꓰ Chile ꓗꓴꓷꓼ ꓠꓬꓲꓽ ꓗꓴꓸ ꓝꓼ ꓗꓪ ꓝ ꓡꓯꓽ ꓘꓳ ꓓꓴ ꓝꓲ ꓓꓴ ꓢꓲꓺ ꓗꓷˍ ꓟ ꓥ ꓡꓳ=

ꓔꓲꓺ ꓒꓽ ꓓꓽ ꓟ Ortega ꓠꓬ 56 ꓘꓳꓼ ꓙꓳˍ ꓟ ꓥ ꓢꓲ꓾ ꓬꓲꓸ ꓠꓬ  Chile ꓗꓴꓷꓼ ꓐꓱ ꓶ ꓟꓽ ꓢꓲꓺ ꓢꓰꓼ ꓕꓯ ꓙꓳ-ꓓꓯ (Jordan)  ꓐꓰ ꓲ-ꓣꓯ(Iraq) ꓗꓴꓷꓼ ꓗꓪ ꓟꓬꓱꓽ ꓬꓰ ꓡꓳꓹ ꓬꓰ ꓢꓴ ꓔꓲꓺ ꓒꓽ ꓓꓽ ꓟ ꓥ ꓡꓳ=ꓖꓳ ꓟ ꓡꓳꓹ ꓬꓰ ꓢꓲ Chile ꓗꓴꓷꓼ ꓗꓪ ꓕꓰ ꓡꓰ ꓣꓱꓽ ꓬꓰ ꓠꓹ ꓟ ꓢꓲꓺ ꓔ ꓟ ꓔꓯ ꓮ ꓟꓰ 10 ꓦ ꓟ 7 ꓠꓬꓲ ꓕꓯ ꓢꓲꓺ ꓚꓰꓹ ꓔ ꓟ ꓚꓱꓹ ꓐꓯ ꓑꓶꓻ ꓔ ꓟ ꓥ ꓡꓳ=

ꓔꓲꓺ ꓒꓽ ꓓꓽ ꓟ Ortega ꓠꓬ 1990 ꓘꓳꓼ ꓕꓯ ꓔꓲꓺ ꓒꓽ ꓒꓬꓱꓼ ꓡ ꓢꓲ ꓠꓬꓲ꓾ 1997 ꓘꓳ ꓗꓪ ꓐꓰ Vatican ꓗꓪ ꓕꓲꓽ ꓗꓴꓷꓼ ꓡꓰ ꓕꓲꓽ ꓗꓴꓷꓼ ꓝꓸ ꓡꓯꓽ ꓘꓳˍ ꓟ ꓟꓬꓱꓽ ꓠꓯꓸꓼ ꓗꓪ ꓟꓬꓱꓽ ꓟꓯ ꓢꓴ ꓒꓬꓱꓼ ꓡˍ ꓟ ꓥ ꓡꓳ= ꓬꓲ ꓠꓬ ꓡꓳꓹ ꓬꓰ ꓟ ꓙꓵꓹ ꓗꓪ ꓠꓲ-ꓖ-ꓣꓮ ꓗꓪ ꓖꓴ ꓟꓶꓸ ꓮ-ꓩ-ꓣꓲ-ꓗ ꓐꓰ ꓡꓯ-ꓐ-ꓠꓳ ꓗꓪ ꓟꓬꓱꓽ ꓬꓰ ꓡꓳꓹ ꓬꓰꓳ= ꓬꓲꓸ ꓠꓬ 2015 ꓘꓳꓼ ꓕꓯ ꓔꓲꓺ ꓒꓽ ꓓꓽ ꓟ ꓟꓬꓱꓽ ꓐꓬꓱꓽ ꓘꓶꓽ ꓔꓯ ꓘꓳꓹ ꓣꓴ ꓪ ꓡꓰꓳ=

ꓬꓲꓸ ꓔꓯ Chile ꓟꓵꓽ ꓗꓪ ꓕꓱ ꓡꓰ ꓝꓲ ꓩꓴˍ ꓟ ꓚꓱꓹ ꓠꓬ ꓡꓳꓹ ꓬꓰ ꓟ ꓙꓵꓹ ꓗꓪ Chile ꓗꓴꓷꓼ ꓗꓪ꓾ Vatican ꓐꓰ Chile ꓗꓴꓷꓼ ꓠꓬꓲꓽ ꓗꓴꓸ ꓝꓼ ꓗꓪ ꓝ ꓡꓯꓽ ꓘꓳ ꓢꓴ ꓬꓰ ꓢꓴ ꓝꓲ ꓓꓴ ꓥ ꓟ ꓔꓲꓺ ꓒꓽ ꓓꓽ ꓟ Ivo Scapolo ꓔꓯ ꓠꓬ ꓑꓳ-ꓔꓴ-ꓖꓰ ꓗꓴꓷꓼ ꓗꓪ ꓡꓳꓹ ꓬꓰ ꓟ 8 ꓦ ꓕꓯ ꓚꓵꓸ ꓩꓴ ꓗꓷ ꓟ ꓪꓴꓸ ꓠꓬꓲ ꓥ ꓡꓳ=

ꓬꓲꓸ ꓔꓯ ꓚꓵꓸ ꓩꓴˍ ꓟ ꓚꓱꓹ ꓠꓬ Chile ꓗꓴꓷꓼ ꓗꓪ ꓟ ꓘꓴ-ꓜꓲ-ꓞꓳ ꓠꓯꓸꓼ ꓗꓪ ꓫꓵꓽ ꓪꓴ ꓮꓽ ꓟꓬꓹ ꓔꓯ ꓒꓶꓻ ꓟꓽ ꓐꓻ ꓡ ꓟ ꓪꓴꓸ ꓠꓬꓲ ꓥ ꓡꓳ=Chile ꓗꓴꓷꓼ ꓗꓪ ꓟ ꓗꓴꓷꓼ ꓙꓵꓽ ꓢꓴ  ꓡꓰ ꓐꓯˍ ꓟ ꓠꓬ꓾ꓫꓵꓽ ꓪꓴ 150 ꓟ ꓛꓲꓺ ꓠꓬ ꓫꓬꓹ ꓖꓴ ꓟꓽ ꓓ ꓟ ꓫꓵꓽ ꓪꓴ ꓕꓱ ꓡꓰ ꓙꓳ ꓔꓬꓹ ꓟ ꓔꓯ ꓡꓳꓸ ꓟꓳˍ ꓡꓳ ꓐꓰ꓾ Reuters ꓓꓳꓽ ꓗꓪ ꓐꓯ ꓔ ꓡꓳ=