ꓘꓴ-ꓜꓲ-ꓞꓳ ꓢꓲꓺ ꓤ ꓐꓴ ꓔꓯ ꓠꓵ ꓠꓲꓹ ꓗꓪ ꓐꓰ ꓡꓰꓽ ꓡꓳꓸ ꓙ ꓖꓶꓽ=

ꓘꓴ-ꓜꓲ-ꓞꓳ ꓢꓲꓺ ꓤ ꓐꓴ ꓔꓯ ꓠꓵ ꓠꓲꓹ ꓗꓪ ꓐꓰ ꓡꓰꓽ ꓡꓳꓸ ꓙ ꓖꓶꓽ=

10 ꓦ ꓟ 4 ꓠꓬꓲ꓾ 2019

10 ꓦ ꓟ 4 ꓠꓬꓲ ꓕꓯ Vatican ꓗꓴꓷꓼ꓾ ꓙꓲꓻ ꓫꓬꓹ ꓢꓴ ꓒꓲ-ꓕꓱ ꓐ-ꓢꓲ-ꓡꓲ-ꓗ ꓜꓳꓽ ꓓꓽ ꓟ ꓗꓪ ꓔꓲꓺ ꓒ ꓪ ꓔꓲ Francis ꓗꓪ ꓐꓰ ꓔꓲꓺ ꓒ Michael CzernySJ, Msgr Antoine Camilleri, Paolo Rudelli ꓐꓰ Paolo Borgia ꓐꓴ ꓔꓯ ꓔꓲꓺ ꓒꓽ ꓓꓽ ꓙꓵꓽ ꓪ ꓖꓶꓽ ꓗꓷꓳ=

ꓔꓲꓺ ꓒꓽ ꓓꓽ ꓐꓴ ꓔꓯ ꓙꓵꓽ ꓪꓽ ꓖꓶꓽˍ ꓟ ꓑꓮꓲ ꓗꓪ ꓔꓲꓺ ꓒꓽ ꓪ ꓔꓲ Francis ꓗꓪ ꓐꓰ ꓔꓲꓺ ꓒꓽ ꓓꓽ ꓬꓲꓸ ꓫꓵꓼ ꓐꓴ ꓔꓯ꓾ ꓘꓴ-ꓜꓲ-ꓞꓳ ꓗꓪ ꓟ꓾ ꓝ ꓢꓲ ꓣꓱꓽ ꓬꓰ ꓩꓴ ꓡ ꓔꓬꓹ ꓟ ꓟꓬꓱꓽ ꓐꓬꓱꓽ ꓘꓶꓽ ꓐꓴ ꓔꓯ ꓚ ꓟꓸ ꓖꓶꓽ ꓗꓷ ꓟ ꓥ ꓡꓳ=

ꓐꓬꓻ ꓡꓰ ꓟꓶꓽ ꓡꓰ ꓟꓽ ꓓ ꓟ ꓗ ꓫꓵꓽ

ꓝꓲ-ꓓꓴ 12 ꓣꓳ ꓟ ꓠꓬ ꓢꓲꓺ ꓒꓽ ꓬꓰ-ꓢꓴ ꓗꓪ ꓐꓰ꓾ ꓬꓲꓸ ꓪ ꓟꓶ ꓗꓷ ꓟ ꓣꓱꓽ ꓛꓰꓽ ꓐꓴ ꓔꓯ ꓡꓯꓽ ꓒꓯꓹ ꓚꓰꓹ ꓖꓶꓽˍ ꓟ ꓗ ꓫꓵꓽ ꓐꓴ ꓔꓯ ꓝ ꓢꓲ ꓖꓶꓽ ꓗꓷ ꓟ ꓣꓱꓽ ꓛꓰꓽ ꓐꓰ ꓟꓬꓱꓽ ꓐꓬꓱꓽ ꓘꓶꓽ ꓐꓴ ꓠꓬ ꓘꓴ-ꓜꓲ-ꓞꓳ ꓗꓪ ꓢꓯꓸ ꓔꓬꓹ ꓟ ꓗ ꓫꓵꓽ ꓥ ꓟ ꓐꓰ ꓢꓲꓺ ꓒ ꓬꓰ-ꓢꓴ ꓖꓶꓽ ꓗꓷ ꓟ ꓟꓬꓱꓽ ꓔꓯ ꓠꓬꓲꓸ ꓠꓬꓲ ꓟ ꓣꓳꓽ ꓤꓶ ꓗꓪ ꓛꓲꓺ ꓪꓺ ꓙꓲ ꓪꓴꓽ ꓟꓴ ꓡ ꓠ ꓬꓰ ꓔꓬꓹ ꓟ ꓔꓯˍ ꓟꓲ ꓟꓸ ꓖꓶꓽ ꓗꓷꓳ=

ꓙꓵꓻ ꓠꓲꓹ ꓣꓱꓽ ꓛꓰꓽ ꓗꓪ ꓐꓰ ꓘꓴ-ꓜꓲ-ꓞꓳ ꓢꓲꓺ ꓤꓽ ꓐꓴ ꓔꓯ ꓚꓬꓴꓸ ꓙˍ ꓟ꓾ ꓶꓼ ꓓꓳꓽ ꓫꓱꓹ ꓓꓳꓽ ꓚꓺ ꓖꓶꓽˍ ꓟ ꓐꓰ ꓢꓲꓽ ꓫꓬ ꓡꓰ ꓝꓲˍ ꓟ ꓟꓬꓱꓽ ꓗꓪ ꓔꓲꓺ ꓒꓽ ꓓꓽ ꓐꓴ ꓗꓪ ꓐꓰ ꓕꓲꓽ ꓝꓸ ꓢꓲꓺ ꓒꓽ ꓬꓰ-ꓢꓴ ꓚꓲꓸ ꓛꓬꓽ ꓬꓰ ꓔꓬꓹ ꓟ ꓥ ꓟ꓾ ꓪꓴ-ꓢ ꓬꓲ ꓤ ꓠꓱ ꓐꓴ ꓔꓯ ꓟꓴ ꓗꓪ ꓗꓴꓷꓼ ꓗꓪ ꓙꓻ ꓖꓴ ꓧꓳꓽ ꓟꓳꓸ ꓖꓶꓽ ꓔꓬꓹ ꓟ ꓔꓲꓺ ꓒꓽ ꓓꓽ ꓐꓴ ꓜꓽ ꓙꓲꓼˍ ꓟ ꓐꓰ ꓢꓷꓸ ꓠꓲꓹ ꓠꓬ ꓢꓲꓺ ꓒꓽ ꓬꓰ-ꓢꓴ ꓧꓳꓽ ꓟꓳꓸ ꓖꓶꓽˍ ꓟ ꓗꓪ ꓐꓰ ꓟꓲꓽ ꓕꓯꓽ ꓙꓰ ꓔꓬꓹ ꓟ ꓔꓯ ꓢꓷꓸ ꓔ ꓠꓹ ꓟ꓾

ꓙꓵꓽˍ ꓟ ꓕꓯꓽ ꓢꓲ ꓣꓱꓽ ꓙˍ ꓟ ꓠꓬ ꓔꓲꓺ ꓒꓽ ꓓ ꓐꓴ ꓐꓱ ꓶꓼ ꓪꓺ ꓙꓲꓻ ꓪꓴꓽˍ ꓟ ꓗ ꓫꓵꓽ ꓥ ꓟ꓾ ꓪꓴ-ꓢ ꓠꓬ ꓠꓴ ꓪ ꓐꓴ ꓔꓯ꓾ ꓟꓬꓱꓻ ꓓꓳꓽ ꓐꓱ ꓶꓼ ꓟꓽ ꓥ꓾ ꓣꓱꓽ ꓙ ꓓꓴ ꓐꓱ ꓶꓼ ꓘꓴ ꓔ ꓟ ꓥ ꓟ꓾ ꓙꓵꓽ ꓪ ꓘꓳꓹ ꓣꓴ ꓗꓷ ꓟ ꓔꓲꓺ ꓒꓽ ꓓꓽ ꓐꓴ ꓔꓯ ꓔꓲꓺ ꓒꓽ ꓪ ꓔꓲ ꓡꓰ ꓕꓵꓼ ꓪ ꓖꓶꓽ ꓗꓷꓳ=

ꓙꓲˍ ꓟ ꓮ ꓣꓳ ꓡꓳꓸ ꓒꓽ ꓠꓬ ꓮ ꓣꓳ ꓐꓴ ꓔꓯ ꓢꓷˍ ꓟ ꓡꓰ ꓐꓰ ꓮ ꓣꓳ ꓐꓴ ꓥˍ ꓟꓲ ꓮ ꓣꓳ ꓡꓳꓸ ꓒꓽ ꓔꓯ ꓢꓷˍ ꓡꓳ= ꓙꓲˍ ꓟ ꓮ ꓣꓳ ꓡꓳꓸ ꓒꓽ ꓠꓬ ꓬꓲꓸ ꓮ ꓣꓳ ꓐꓱ ꓶꓼ ꓢꓯꓼ ꓟꓬꓻ ꓖꓶꓽ ꓐꓻ ꓡˍ ꓟ ꓡꓰ ꓐꓰ ꓠꓴ ꓪ ꓥˍ ꓟꓲ ꓣꓱꓽ ꓙ ꓗꓴꓸ ꓢꓴ꓾ ꓧꓳꓽ ꓣꓱꓽ ꓖꓶꓽ ꓢꓴ꓾ ꓡꓳꓸ ꓙ ꓟꓴ ꓙ ꓖꓶꓽ ꓢꓴ ꓒꓬꓱꓼ ꓠꓹ ꓟ ꓔꓲꓺ ꓒꓽ ꓪ ꓔꓲ ꓡꓰ ꓟꓸ ꓖꓶꓽ ꓗꓷꓳ=

ꓝ ꓢꓲ ꓔꓲꓺ ꓒ ꓪ ꓔꓲ ꓡꓰ ꓔꓲꓺ ꓒꓽ ꓓꓽ ꓐꓴ ꓔꓯ꓾ ꓪꓴ-ꓢ ꓠꓬ ꓠꓴ ꓪꓽ ꓡꓯꓽ ꓒꓯꓹ ꓗꓪ ꓡꓯꓼ ꓙꓱ ꓔ ꓟ ꓣꓱꓽ ꓞꓹ ꓢꓴ ꓐꓴ꓾ ꓡꓳꓸ ꓙ ꓟꓴ ꓙˍ ꓟ ꓣꓱꓽ ꓞꓹ ꓢꓴ ꓐꓴ꓾ ꓞꓳ ꓫꓸ ꓐꓴ꓾ ꓔꓲꓺ ꓒꓽ ꓒꓬꓱꓼ ꓠ ꓢꓯꓼ ꓕꓵꓼ ꓔꓬꓹ ꓢꓴ ꓐꓴ꓾ ꓔꓲꓺ ꓒꓽ ꓐꓴ꓾ ꓘꓴ-ꓜꓲ-ꓞꓳ ꓢꓲꓺ ꓤ ꓐꓴ ꓔꓯ ꓠꓵ ꓠꓲꓹ ꓐꓰ ꓡꓳꓸ ꓙ ꓖꓶꓽ ꓠꓹ ꓟ ꓐꓯ ꓖꓶꓽ ꓗꓷꓳ=

ꓘꓴ-ꓜꓲ-ꓞꓳ ꓔꓯ ꓡꓯꓼ ꓫꓵꓺ ꓪꓴꓽ ꓡ ꓠꓹ ꓟ ꓣꓱꓽ ꓛꓰꓽ ꓖꓶꓽ ꓔꓬꓹ ꓟ ꓢꓲꓽ ꓫꓬꓹ ꓟ ꓦ ꓬꓲꓸ ꓣꓱꓽ ꓛꓰꓽ ꓗꓪ ꓐꓰ ꓘꓴ-ꓜꓲ-ꓞꓳ ꓔꓯ ꓡꓳꓸ ꓙ ꓟꓴ ꓙˍ ꓟ꓾ ꓠꓴ ꓪꓽ ꓔꓯ ꓮ ꓣꓳ ꓡꓳꓸ ꓢꓴ ꓡꓰ ꓐꓰ ꓾ ꓶꓼ ꓓꓳꓽ ꓫꓱꓹ ꓓꓳꓽ ꓚꓺ ꓢꓴ ꓡꓰ ꓐꓰ꓾ ꓟꓸ ꓖꓶꓽ ꓢꓴ ꓡꓰ ꓐꓰ ꓚꓰꓹ ꓔ ꓖꓶꓽˍ ꓟ ꓢꓲꓺ ꓒꓽ ꓬꓰ-ꓢꓴ ꓟꓬꓱꓻ ꓗꓪ ꓐꓰ ꓾ ꓐꓹ ꓐ ꓬꓲꓸ ꓐꓬꓱꓼ ꓡꓱꓼ ꓡꓱꓼ ꓟ ꓟꓬꓱꓻ ꓓꓳꓽ ꓔꓯ ꓪ ꓙꓲ ꓢꓷꓸ ꓡꓰ ꓠꓹ ꓟ ꓾ ꓠꓵ ꓠꓲꓹ ꓐꓲꓻ ꓞꓹ ꓟ ꓠꓲꓹ ꓟ ꓗꓪ ꓐꓰ ꓠꓴ ꓪ ꓮ ꓣꓳ ꓐꓴ ꓔꓯ ꓡꓳꓸ ꓙ ꓖꓶꓽ ꓐꓯ ꓢꓲ꓾ ꓔꓲꓺ ꓒꓽ ꓪ ꓔꓲ ꓗꓪ ꓐꓰ ꓟꓸ ꓖꓶꓽ ꓗꓷꓳ=

Credit to Vatican News

https://bit.ly/2MiGpt5