ꓙꓵꓽ ꓗ ꓗꓪ ꓐꓰ ꓘꓶꓽ ꓠꓬꓲꓹ ꓓꓴ ꓔꓳꓹ ꓜꓳꓽ ꓔꓬ ꓟ ꓙꓰ-ꓢꓴ ꓢꓲ-ꓤꓼ ꓐꓴ ꓞꓲꓼ

India ꓗꓴꓷꓼ ꓙꓵꓽ ꓗ(Law) ꓗꓪ ꓐꓰ ꓘꓶꓽ ꓠꓬꓲꓹ ꓔ ꓟ  ꓟꓶˍ ꓟ ꓙꓰ-ꓢꓴ ꓢꓲ-ꓤꓼ ꓐꓴ ꓞꓲꓼ
8 ꓦꓻ ꓟ 10 ꓠꓬꓲ꓾ 2019
India ꓗꓴꓷꓼ ꓗꓪ 1950 ꓘꓳꓼ 8 ꓦꓻ ꓟ 10 ꓠꓬꓲ ꓕꓯ ꓐꓯ ꓞꓷꓹ ꓗꓷ ꓟ ꓙꓵ-ꓗ (ꓡꓮꓪ) ꓠꓬ꓾ ꓠꓬꓲ. ꓠꓬꓲ ꓗꓪ ꓛꓲꓺ Dalits ꓙꓰ-ꓢꓴ ꓢꓲ-ꓤ ꓐꓴ ꓐꓰ Muslim ꓕꓯ: ꓢꓲ ꓗꓪ ꓛꓳꓽ ꓟꓽ ꓟꓵ ꓠꓬꓲꓺ ꓟ: ꓟꓵ_ ꓟ ꓧꓲꓠꓓꓴ ꓙꓽ ꓘꓪ ꓗꓪ ꓣꓳ ꓢꓴ ꓞꓳ ꓫꓵ: ꓕꓲ: ꓫꓵ: ꓐꓯ ꓢꓲ꓾ ꓘꓶꓽ ꓠꓬꓲ. ꓔ ꓟ ꓙꓵꓽ ꓗ (ꓡꓮꓪ) ꓔꓯ ꓟ: ꓠꓲꓹ ꓫꓵ_ ꓟ ꓔꓯ ꓢꓶꓸ ꓡꓰ ꓓꓴ (black day) ꓠꓯ ꓞꓲ ꓟ ꓠꓬꓲ ꓐꓯ ꓢꓲ ꓒꓳꓹ ꓔꓴꓺ ꓗꓷ ꓟ ꓥꓳ= Hindu ꓦ ꓡꓱ ꓢꓴ ꓟ: ꓥ ꓠꓬ ꓠꓱ. ꓐꓯꓼ ꓦꓻ ꓡꓱꓺ ꓢꓴ  ꓐꓴ ꓮ: ꓙꓵ: ꓠꓬ ꓣꓳˍ ꓟ꓾ ꓠꓬꓲꓺ ꓟ: ꓟꓵ_ ꓟ ꓜꓴꓻ ꓐꓰ ꓐꓳ ꓕꓲ ꓦ ꓡꓳ_ ꓐꓰ 1950 ꓘꓳꓼ 8 ꓦꓻ ꓟ 10 ꓠꓬꓲ ꓕꓯ ꓐꓯ ꓞꓲꓹ ꓗꓷ ꓟ ꓙꓵꓽ ꓗ(ꓡꓮꓪ) ꓕꓲ: ꓟ ꓥ ꓡꓳ=
Hindu ꓦꓻ ꓡꓱꓺ ꓢꓴ ꓮ: ꓟꓬꓹ ꓔꓬ_ ꓟ India ꓗꓴꓷꓼ ꓗꓪ ꓖꓳ ꓙꓵꓽ ꓗ(Law) ꓗꓪ ꓐꓰ ꓦꓻ ꓡꓱꓺ ꓢꓴ ꓠꓬꓲˍ ꓟ ꓠꓱ. ꓐꓯꓼ ꓦꓻ ꓡꓱꓺ ꓢꓴ꓾ ꓙꓵꓻ ꓢꓴ ꓐꓴ ꓕꓯ: ꓢꓲ ꓗꓪ ꓘꓶꓽ ꓠꓬꓲ. ꓔ ꓟ ꓔꓯ ꓔꓲꓺ ꓒ: ꓓ: ꓐꓴ ꓗꓪ ꓐꓰ  ꓟꓲꓸꓹꓟ. ꓖꓶ:ˍ ꓟ꓾ ꓢꓷ. ꓙ ꓟꓳ ꓙ ꓖꓶ:ˍ ꓟ ꓥ ꓡꓳ=
Dalits ꓐꓯˍ ꓟ ꓠꓬ  ꓬꓲ ꓟꓽ ꓟꓶ ꓢꓴ ꓐꓰ ꓣꓳˍ ꓟ (ꓠꓬꓲꓺ ꓟ: ꓟꓵꓺ ꓟ) ꓞꓳ ꓫꓵ: ꓥꓳ ꓐꓰ ꓘꓳꓹ ꓣꓴ ꓗꓷ ꓟꓶ ꓢꓴ ꓥ ꓡꓳ= Hindu ꓦꓻ ꓡꓱꓺ ꓢꓴ ꓮ: ꓟꓬꓹ ꓔꓬꓹ ꓟ ꓗꓪ ꓠꓬꓲꓺ ꓟ: ꓟꓵꓺ ꓢꓴ ꓐꓴ ꓔꓯ Hindu ꓜꓴꓻ ꓗꓪ ꓐꓰ ꓡꓳꓺ ꓦꓺ ꓗꓷ_ ꓟ ꓟꓶ ꓢꓴ ꓐꓯ ꓢꓲ꓾ꓙꓵꓽ ꓗ ꓗꓷ ꓔ ꓟ ꓙꓳˍ ꓡꓳ=
India ꓗꓴꓷꓼ ꓗꓪ ꓞꓳ ꓤ 1300 ꓪ ꓟ: ꓞꓲꓺ ꓙꓳˍ ꓟ ꓗꓪ ꓙꓰ-ꓢꓴ ꓢꓲ-ꓤ ꓐꓴ ꓠꓬ 2.3% ꓡꓰ: ꓙꓳˍ ꓡꓳ=Dalits ꓮ: ꓟꓬꓹ ꓠꓬ ꓙꓲ-ꓢꓴ ꓢꓲ-ꓤ ꓥ ꓢꓲ꓾ ꓙꓲ-ꓢꓴ ꓢꓲ-ꓤ ꓐꓴ ꓔꓯ ꓘꓶꓽ ꓠꓬꓲ.ꓔ ꓟ ꓡꓰ ꓐꓰ ꓗꓹ ꓟ ꓙꓵꓽ ꓗ ꓥ ꓡꓳ=
ꓗꓴꓷꓼ ꓗꓪ ꓟ ꓞꓳ ꓫꓵ: ꓥ ꓕ ꓑꓳꓸꓼ ꓠꓬ ꓕꓲ: ꓡꓰꓸꓼ ꓔꓬꓹ ꓪ: ꓠꓹ ꓟ꓾ ꓚꓲ. ꓛꓬꓼ ꓦꓻ ꓡꓱꓺ ꓚꓱꓹ ꓪꓴ. ꓠꓬꓲ ꓠꓲ ꓘꓶꓽ ꓠꓬꓲˍ ꓟ ꓟ: ꓙꓳ ꓠꓹ ꓟ꓾ ꓕꓲ: ꓣꓳ ꓡꓰ ꓕꓲ: ꓣꓳ ꓠꓲꓹ ꓡꓱꓺ ꓡꓱꓺ ꓡꓰ ꓐꓰ ꓦꓻ ꓡꓱꓺ ꓪꓴ. ꓓꓵꓺ ꓕꓱ: ꓪ ꓠꓹ ꓟ꓾ ꓚꓲ. ꓛꓬꓼ ꓦꓻ ꓡꓱꓺ ꓚꓱꓹ ꓔꓯ ꓟ. ꓖꓶ: ꓐꓻ ꓡ ꓠꓹ ꓟ ꓐꓱ ꓶ ꓒꓳꓹ ꓔꓴꓺˍ ꓟ ꓥ ꓟ ꓔꓯ India ꓔꓲꓺ ꓒ: ꓓ: ꓐꓴ ꓗꓪ ꓐꓰ ꓐꓯ ꓖꓶ: ꓔ ꓟ ꓥ ꓡꓳ=

ꓐꓰ ꓦꓮꓔꓲꓚꓮꓠ ꓓꓳꓽ ꓗꓪ ꓐꓯ ꓔꓸ ꓡꓳ=